1-3. (a) Joshua cu kan caah zeicah zohchunhawk ṭha a si? (b) Biakhiahnak kan tuah tikah zeidah kan i cinken awk a si?

KAN i thimmi cu a biapi tuk. Zeicahtiah mah nih kan nunning kha a uk caah a si. Tahchunhnak ah, mi pakhat cu lam i a kal lioah lam aa ṭhen kha ruah lo piin a hmuh. Zei lam dah aa thim lai? Kal a duhnak hmun he aa hlat deuhnak lam si loin aa naih deuhnak lam kha aa thim ko lai.

² Baibal ah a biapimi thimnak a rak tuahmi mi tampi kong aa ṭial. Tahchunhnak ah, Kain nih a thinhunnak aa sum lai le sum lai lo kha a rak i thim. (Gen. 4:6, 7) Joshua nih a hmaanmi Pathian maw ka biak lai asiloah a hmaan lomi pathian dah ka biak lai ti kha a rak i thim. (Josh. 24:15) Joshua nih Jehovah he naih tein um kha a duh caah cutin um awk a bawmmi lam kha aa thim. Asinain Kain nih cun Jehovah he a hlattermi lam kha aa thim.

³ Kannih zong a hmaanmi lam i kal khawh awkah a caan ah a biapi ngaimi biakhiahnak kan tuah a hau ve. Mah tikah kan i thimmi nih Jehovah thang a ṭhatter khawh i amah he a kan naihter khawh bantukin a hlat zong a kan hlatter khawh ti kha kan i cinken awk a si. (Hebru 3:12 rel.) Atu capar le a hnu capar ah Jehovah he a kan hlatter khomi thil pasarih kong kan i ruah lai.

4. Rian ṭuan cu zeicah a biapit?

⁴ Khrihfa hna cu anmah le an innchungkhar cawm awkah rian an ngei. Chungkhar a zohkhenh lomi cu zumlotu nakin a ṭha lo deuh tiah Baibal nih a ti. (2 Thes. 3:10; 1 Tim. 5:8) Cucaah rian ṭuan cu a biapi tuk. Asinain naa ralrin lo ahcun naa thimmi na rian  ruangah Jehovah he nan i hlat kho. Zeitin in dah?

5. Rian pakhat na cohlan hlanah zeidah na ruah hmasa awk a si?

⁵ Rian na kawl hei ti u sih. Nan ram ah rian hmuh a har ahcun na hmuhmi zei rian paoh cohlan na duh men ko lai. Na hmuhmi rian cu Baibal phunglam he aa ralchanh ah tah zeitin? Asiloah Khrihfabu le chungkhar caah caan a za in pe kho lo tiang in mah rian ah caan pek a hauh ah tah zeitin? Rian ngeih lo nakcha cun zei rian paoh ṭuan ah a ṭha deuh tiin mah rian cu na cohlang lai maw? Naa thimmi nih Jehovah he aan naihter khawh bantukin aan hlatter khawh ti kha philh hlah. (Heb. 2:1) Rian na kawl tikah asiloah rian i thlen na duh tikah zeitindah a ṭhami biakhiahnak na tuah khawh lai?

6, 7. (a) Rian ngeih na duh cu zei ruang ah dah a si khawh men? (b) Zei a ruang nih dah Jehovah he naih na duh kha a langhter? Zeicah?

⁶ Kan i thimmi cu tuah kan duhmi cungah aa hngat. Hitin i hal: ‘Zeicah rian ṭuan ka duh?’ Rian ngeih na duh cu Jehovah rian ṭuan khawh zungzal awkah na chungkhar zohkhenh na duh caah a si ahcun Jehovah nih aan bawmh lai. (Matt. 6:33) Ruahlo piin na rian na sungh tik asiloah chawlehnak a ṭhat lo tikah zeitin bawmh ah dah a ṭhat lai ti kha Jehovah nih a hngalh. (Isa. 59:1) “Pathian nih harnak an inmi chungin Pathian a ṭihmi hna khamh cu a thiam.”—2 Pit. 2:9.

⁷ Rian ngeih na duh cu rum na duh caah a si maw? Na duh bantukin na hlawh zong a tling men ko lai. Asinain rumnak ca lawng ruat in rianṭuan cu ṭih a nung. (1 Timote 6:9, 10 rel.) Tangka le rian kha na nunnak ah biapi bik ah na chiah ahcun Jehovah he nan i hlat lai.

8, 9. Nulepa nih rian le pawcawmnak kong he aa tlaiin zeidah nan i hal awk a si? Zeicah?

⁸ Fa a ngeimi na si ahcun na tuahsernak cu na fale cungah huham a ngei ti kha philh hlah. Na caah a biapi bik in an hmuhmi cu zeidah a si? Na rian maw? Asiloah Jehovah he nan i pehtlaihnak dah? Na nunnak ah min thannak le rumnak kha pakhatnak ah na chiah ahcun na fale nih an upat tikah cu bantuk lam an i thim ve lai a si lo maw? Asiloah nulepa in an in upat kho hnga maw? Mino unaunu pakhat nih hitin a chim: “Kaa cinkenmi cu ka pa cu a rian lawng a lung ah a um. A hmasa ahcun, ka pa cu kan innchungkhar ṭha tein khuasak khawhnak caah rian fak piin a ṭuanmi a lo. Ṭha tein zohkhenh a kan duh. Asinain nai kum hrawng ah aa tinhmi cu aa thleng. Rian lawnglawng a ṭuan i a herhmi leng in thil man sung hna kha a rak cawk. Cucaah kan innchungkhar cu midang thlarau lei a bawmmi in si loin tangka tampi a ngeimi in a kan hngalh. Ka pa sinin tangka tampi hmuh nakin thlarau lei bawmhnak hmuh ka duh deuh.”

⁹ Nulepa hna nan rian ruangah Jehovah he i hlat hlah u. Nan fale caah zohchunhawk ṭha si u. Tangka le thilri nakin Jehovah he pehtlaihnak ṭha ngeih a biapi deuh ti nan zumh kha nan nunning in nan fale kha hngalhter hna u.—Matt. 5:3.

10. Mino pakhat nih rian aa thim hlanah zeidah a ruah hmasa awk a si?

¹⁰ Ka upat tikah zei rian dah ka ṭuan lai tiah a ruatmi mino na si ahcun zeitindah a ṭhami rian naa thim khawh lai? Kan cawn cang bantukin kan i thimmi cu tuah kan duhmi cungah aa hngat. Rian pakhatkhat ca tinṭan kai na duh ahcun mah rian nih na nunnak ah Jehovah rian pakhatnak i chiah awkah aan bawm lai  maw? Asiloah Jehovah he aan hlatter lai dah? (2 Tim. 4:10) Tangka tampi an ngeih lawng ah aa nuammi hi vawlei mi hna he i lawh na duh maw? Asiloah hitin a chimmi David bantukin Jehovah dah naa bochan lai: “Atu cu ka tar cang i mino ka si ti lo, hi vialte chungah hin miṭha cu BAWIPA nih a hlawt kha ka hmu bal lo i a fale zong rawl hal in an vah kha ka hmu bal lo.” (Salm 37:25) Lam khat nih Jehovah he aan hlatter lai i a dang lam khat nih a ṭha bikmi nunnak aan pek zungzal lai ti kha philh hlah. (1 Timote 6:6; Malakhi 3:10 rel.) Zei lam dah naa thim lai? *

11. Hrimhnak le nuamhsaihnak he aa tlaiin Baibal nih zeidah a kan cawnpiak? Zeidah kan philh lo awk a si?

¹¹ Baibal nih i nuamh kha a palh tiah a ti lo, cun hrimhnak le nuamhsaihnak tuah cu caan thlau men a si ti zong in a ti lo. Paul nih Timote sinah hitin a ṭial: “Pum cawlcanghnak nih ṭhatnak tlawmpal a chuahter.” (1 Tim. 4:8, NW) Baibal nih “nih caan” le “laam caan” a um a ti i a zafang in i dinh awkah tha a kan pek. (Pct. 3:4; 4:6) Asinain naa ralrin lo ahcun hrimhnak le nuamhsaihnak nih Jehovah he aan hlatter khawh. Zeitin in dah? A caan tam tuk in na peknak thawng in asiloah a ṭha lomi hrimhnak le nuamhsaihnak naa thimnak thawng in a si.

12. Hrimhnak le nuamhsaihnak naa thim tikah zeidah na ruah awk a si?

¹² A hmasa bikah zei bantuk hrimhnak le nuamhsaihnak dah kan i thim awk a si timi kong i ruah u sih. A ṭhami hrimhnak le nuamhsaihnak i thim khawh a si ko. Asinain nuamhsaihnak tam deuh cu zaangennak, khuachia thiamnak le ziaza rawhralnak ti bantuk Pathian huatmi thil aa telmi an si. Cucaah hrimhnak le nuamhsaihnak naa thim tikah naa ralrin a hau. Mah biahalnak hna hi ruat hmanh: Kaa thimmi cu ka cungah zei huham dah a ngeih? Zaangen hmangmi si awk asiloah miphun a ṭanhmi si awkah a ka forh maw? A zungzal in teitu si a ka duhter maw? (Ptb. 3:31) Tangka tam tuk a dih maw? Unau dang tlukrilh tertu a si lai maw? (Rom 14:21) Zei bantuk mi he dah  nuamhsaihnak kan tuahṭi? (Ptb. 13:20) Thil ṭhalo pakhatkhat tuah duhnak a ka ngeihter maw?—Jeim 1:14, 15.

13, 14. Nuamhnak caah a caan zeizat dah na hman kha zeicah na ruah awk a si?

¹³ Hrimhnak le nuamhsaihnak caah a caan zeizat dah ka hman ti zong ruat. Hitin i hal: ‘Pumhnak le phungchimnak caah a caan a za in pe kho lo tiang in hrimhnak caah caan tam tuk ka hmang maw?’ Hrimhnak le nuamhsaihnak ah caan tam tuk na hman ahcun naa nuamh ding tlukin naa nuam kho lai lo. A tak ti ahcun nuamhnak caah caan tam tuk a hmang lomi cu an i nuam deuh. Zeicah? A biapi bikmi thil kha pakhatnak ah kan chiah ti an hngalh caah nuamhnak kan tuahmi cu a palh timi ruahnak an ngeih lo caah a si.—Filipi 1:10, 11 rel.

¹⁴ Nuamhnak caah caan tampi hman cu a nuammi a lawh hmanhah mah nih Jehovah he aan hlatter khawh. Kum 20 a simi unaunu Kim cu cu bantuk thil a rak tong. Zarh fatin Ninga ni, Zarhte ni le Zarhpi ni ah party puai ah ka kal lengmang tiah a ti. Asinain atu cu mah nakin a biapi deuhmi thil tuah awk a um ti a hngalh cang. Hitin a ti: “Hmaikal ka si caah lohmun kal awkah zinglei suimilam 6:00 ah ka tho, cucaah hlan bantuk in deilei pakhat, pahnih tiang party ah kaa tel kho ti lo. Nuamhnak cu a dihlak in cun a palh lo ti cu ka hngalh, asinain mah nih lung a vai vuanhter tuk.” Nuamhnak ah a caan tam tuk hman lo awkah i ralrin a herh kha a hun hngalh.

15. Fale caah a ṭhami nuamhsaihnak kha nulepa nih zeitindah nan i thim khawh?

¹⁵ Nulepa cu anmah theng le an fale kha pumsalei, thlaraulei le thinlunglei zohkhenh awk rian an ngei. Mah ah nuamhsaihnak ca timhtuah zong aa tel. Asinain nuamhsaihnak hi a dihlak in cun a ṭhat lo caah ralring tein i thim a hau. (1 Kor. 5:6) Ralring tein nan i thim ahcun mah cu nan innchungkhar caah hrimhnak petu a si lai. * Cuticun nan i thimmi nuamhsaihnak nih Jehovah he aan hlatter hna lai lo.

16, 17. Nulepa tampi nih zei bantuk ngaihchiat awk thil dah an ton, Jehovah nih an intuarmi a hngalhthiam ti kha zeitindah kan hngalh khawh?

¹⁶ Nulepa le fale, pakhat le pakhat an i dawt cu a phung a si ko. Jehovah nih a miphun kha, nu nih a fale a dawt hna bantukin ka dawt hna tiah a ti. (Isa. 49:15) Kan innchungkhar mi pakhat nih Jehovah a kaltak tikah kan ngaih a chiat tukmi cu a phung a si. A fanu bu chungin chuah a simi unaunu nih hitin a chim: “Ka ngaih a chia tuk. ‘Zei ruangah dah Jehovah cu a kaltak hnga?’ tiah ka ruat. Keimah ruangah a si tiah ka ruah i sual kaa phaw.”

¹⁷ Cu bantuk thil na ton ahcun Jehovah nih na intuarmi kha a hngalhthiam. Amah zong hmasa bik minung, Adam le Buanchukcho hlan ah mi tampi nih an rak doh tikah “a ngaih a chia.” (Gen. 6:5, 6) Cu bantuk thil a tong bal lomi nih cun zeitluk in dah a fah kha an hngalthiam theng lai lo. Asinain, bu chung in chuahmi chungkhar mi pakhat tuahsernak ṭha lo ruangah Jehovah he i hlat cu ṭih a nung. Nan innchungkhar mi pakhat nih Jehovah a kaltak ruang i na ngaihchiatnak kha zeitindah na tei khawh lai?

18. Fale nih Jehovah an kaltak tikah zeicah nulepa nih mahle mah sual i phawt awk a si lo?

¹⁸ A cangmi thil ruangah nangmah le nangmah sual i phaw hlah. Aa pumpe i tipil a ing cangmi nih cun kan thil kha  ‘kanmah tein kan i phorh awk a si.’ Jehovah kan biak lai le biak lai lo kha kanmah tein kan i thim awk a si. (Gal. 6:5) Jehovah nih sualnak a tuahtu lawng kha aa thimmi thil ruangah rian a ngei tiah a hmuh caah nang cu sual aan phaw lai lo. (Ezek. 18:20) Nang zong midang kha sualphaw ve hna hlah. Jehovah lamhruainak kha upat law Khrihfabu a hupphengtu Khrihfa upa pawl kha do hna hlah, Satan tu kha do.—1 Pit. 5:8, 9.

19, 20. (a) Fale bu chung in chuah a simi nulepa nih an ngaihchiatnak kha zeitindah an tei khawh lai? (b) Annih nih zeidah an i ruahchan awk a si?

¹⁹ Na fa bu chung in chuah a si caah Jehovah cungah na thin a hun ahcun zei thil dah a chuak kho? Jehovah he nan i hlat kho. Na dawtmi na chungkhar nih anmah nakin Jehovah na dawt deuh kha an hngalh a hau. Cucaah na ngaihchiatnak inkhawh awkah Jehovah he nan i pehtlaihnak kha fehter i zuam. Zumhfekmi unau pawl he i kom zungzal. (Ptb. 18:1) Jehovah sinah thlacam law na intuarmi vialte kha chim. (Salm 62:7, 8) Bu chung in chuahmi he ca i kuat ti bantuk pehtlaihnak kha zeiruang hmanh ah tuah hlah. (1 Kor. 5:11) Jehovah rian ṭuannak ah na rian i tamter. (1 Kor. 15:58) A cunglei ah a kong chimmi unaunu nih hitin a chim: “Jehovah rian ah ka rian a tam a hau ti le thlarau lei ka ṭhawn zungzal nakhnga kaa zuam a hau ti kha ka hngalh, mah lawngah ka fanu, Jehovah sin i a kir ṭhan tikah ka bawmh khawh lai.”

²⁰ Dawtnak cu ‘ruahchannak a ngei’ tiah Baibal nih a ti. (1 Kor. 13:4, 7) Jehovah sinah na dawtmi a rak kir ṭhan lai ti i ruahchan cu a palh lo. Bu chung in chuahmi mi tampi cu an i ngaichih i Jehovah bupi ah kum fatin an rak kir ṭhan. An sualnak an i ngaihchih hnu cun an cungah Jehovah cu a thin a hung ti lo. Jehovah cu ‘ngaihthiamnak in a khatmi a si.’—Salm 86:5.

21, 22. Na nunnak ah zei bantuk thil dah thim na duh?

²¹ Jehovah nih minung kha kan duhmi i thimnak nawl a kan pek. (Deuteronomi 30:19, 20 rel.) Asinain a ṭhami i thim awk rian kan ngei. Khrihfa a simi kan zapi in hitin kan i hal awk a si: ‘Zei lam dah ka zulh? Rian le pawcawmnak, hrimhnak le nuamhsaihnak asiloah innchungkhar pehtlaihnak ruangah Jehovah he kaa hlat maw?’

²² Jehovah nih a mi kha a dawt zungzal hna. A ṭhalomi kan i thim lawng ah Jehovah he kan i hlat lai. (Rom 8:38, 39) Asinain a ṭhalomi lam cu hrial khawh a si ko. Zei thil ruang hmanh ah Jehovah he i hlat hlah. A hnu capar ah ralring tein i thim awk a simi a dang pali kong kan i ruah lai.