Inkhawh awk bawmtu ṭha pakhat cu kan chungle, kan hawikom le zumtu unau pawl sinin kan hmuhmi hnemhnak kha a si.

Hawikom pawl nih zaangfahnak le dawtnak in an chimmi bia cu fahnak a damter khotu sii he aa lo i hrimhnak a kan pek khawh. (Ptb. 16:24; 18:24; 25:11) Asinain a hmaanmi Khrihfa hna cu midang nih rak hnemh lai lawng kha an ruat lo. ‘[Pathian nih] a hnemh hna bantukin annih zong nih harnak a phunphun a ingmi kha hnemh ve’ awkah an i zuam. (2 Kor. 1:4, NW; Luka 6:31) Mexico ram i pengkomh zohkhenhtu a simi Antonio cu, cu bantuk hnemhnak a rak hmumi a si.

Antonio cu thi khenser phunkhat a simi lymphoma zawtnak a ngeih tikah a lungre a thei tuk. Asinain a chiatnak lei hmuhnak a ngeihmi kha tei awkah fakpi in aa zuam. Zeitin in dah? Pennak hla kha i cinken aa zuam i a sak, cun hla bia kha a ruah. Baibal rel le thangpi in thlacamnak zong hi a caah hnemtu taktak a si.

Asinain, Antonio nih a caah bawmtu taktak a simi pakhat cu zumtu unau pawl sinin a hmuhmi a si kha a hun hngalh. Hitin a chim: “Ka nupi he kan lungre a theih tuk tikah kan rualchan a simi Khrihfa upa pakhat kha kan leng law thla kan campiak tiah kan ti. Mah nih kan hna a ngamter i kan lung a daihter.” Hitin a chimchap: “Kan chungkhat le zumtu unau pawl nih a kan bawmh caah a chiatnak lei hmuhnak kan ngeihmi kha caan tawite chungah kan tei khawh.” Cu bantuk dawtnak le siaherhnak a ngeimi hawikom a ngeih caah zeitluk in dah aa lawmh lai!

Kan lungre a theih tikah a kan bawm khomi a dang pakhat cu thiang thlarau a si. Lamkaltu Piter nih Pathian thiang thlarau cu “laksawng” a si tiah a ti. (Lam. 2:38) AD 33, Pentekos ni ah mi tampi chiti thuh an si tikah cutin a rak si taktak. Piter nih chiti thuhmi hna caah a chimmi a si nain thiang thlarau cu kan zapi in hmuh khawhmi laksawng a si. Mah laksawng cu cat lo in hmuh khawh a si caah Pathian sinah thiang thlarau kha hal zungzal.—Isa. 40:28-31.

Lamkaltu Paul cu harnak tampi a rak tong, a caan ah cun a thih hmanh a rak thi deng. (2 Kor. 1:8-10) Asinain Paul cu a nunnak caah thin phang tuk in a um lo. Pathian nih a ka bawmh ti a hngalh caah a hna a ngam. Hitin a ṭial: “Kan Bawipa Jesuh Khrih i a Pa le a Pathian, zaangfahnak in a khatmi kan Pa, zeizong vialte ah a kan bawmtu Pathian cu lawm u sih! Harnak kan innak kip ah a kan bawmh.” (2 Kor. 1:3, 4) Paul nih a tonmi harnak kha aa teiter lo. Mah canah harnak a inmi nih unau pawl cungah siaherhnak ngeih awk tu a bawmh, cuticun an herh caan ah ṭha deuh in a hnemh khawh hna.

Antonio cu a dam hnuah, khualtlawng rian kha a ṭuan khawh ṭhan. Zumtu unau pawl cungah siaherhnak a rak langhter zungzal ko nain, atu ah cun a hlei in a dam lomi hna sin len le thazaang pek awkah an nuva in an i zuam. Tahchunhnak ah, fakpi in a zawmi unaupa pakhat kha an len tikah mah unaupa nih pumh a duh lo kha Antonio nih a hun hngalh. Antonio nih hitin a chim: “Mah unaupa nih Jehovah le unau pawl a dawt hna lo cu a si lo, asinain a zawtnak nih a lungthin kha a hnorsuan i man ka ngei lo timi ruahnak a ngeihter.”

Antonio nih mah a dam lomi unaupa thazaang pek awkah a tuahmi pakhat cu nai i an tuahmi hnianghrawmnak ah thlacam a fialmi kha a si. Unaupa nih thlacam ka thiam lai lo tiah a ruah nain cam awkah a hna a tla. Antonio nih hitin a chim: “Bia dawhdawh hmang in thla a cam khawh, mah hnu cun midang pakhat bantuk a hung si i man ka ngei timi ruahnak a ngei ṭhan.”

Kan zapi in sifah harnak kan tong cio i a tlawm deuh le a tam deuh lawng a si. Asinain Paul nih a chim bantukin mah harnak nih midang kha an herh caan i hnemh khawh awkah a kan bawmh. Cucaah harnak a tongmi unau pawl kha hngalh i zuam in kan hnemh hnanak thawngin kan Pathian, Jehovah nawl kha i cawn hna u sih.