1, 2. Ni hmanung bik caan he aa tlaimi zei chimchungbia nih dah zultu hna kha an khuaruah a harter hna, zeicah?

JESUH nih a zultu hna kha biakinn hrawh a si lainak kong a chimh hna. Mah a bia ruangah Piter, Jeim, Johan le Andru cu an lungre a thei. (Mar. 13:1-4) Cucaah anmah lawng in an um lioah Jesuh kha hitin an hal: “Hihi zeitik ah dah a si lai? Cun na ratnak ding hmelchunhnak le atu chan donghnak ding hmelchunhnak ah zei thil dah a um hna lai?” (Matt. 24:1-3) Mah tikah Jesuh nih Jerusalem a rawh lai i a cang dingmi thil lawng si loin Satan vawlei donghnak caan i a cang dingmi thil zong a chimh hna. A cang dingmi thil pakhat nih a zultu hna kha an khuaruah a harter ko hna lai. Jesuh nih raltuknak, mangṭam le ṭhatlonak ti bantuk a ṭha lomi thil a um lai tiah a chim hnuah a ṭhami thil zong a chim. Hitin a ti: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai!”—Matt. 24:7-14.

² Jesuh zultu hna cu Jesuh he Pennak kong thawngṭha kha an chimṭi cang. (Luka 8:1; 9:1, 2) Jesuh nih a chimmi mah bia zong hi an i cinken ko lai: “Rawl ṭuan awk cu a tampi ko nain a ṭuantu cu tlawmte lawng an si. Cucaah rawl a ṭuantu dingah mi tam deuh a thlah hna nakhnga lo-ngeitu sinah khan thla va cam tuah u.” (Luka 10:2) Asinain “khuazakip ah” le “miphun vialte” sinah zeitindah phung an chim khawh lai? Rianṭuantu cu khoika in dah an rat lai? Matthai 24:14 bia cu khuaruahhar lam in a tlin lai kha zultu hna nih an rak hngal theng lai lo.

3. Luka 21:34 i Jesuh bia cu zeicah tuchan kan caah a biapit khun? Zei bia dah kan i hal awk a si?

 ³ Jesuh chimchungbia cu kan chan ah a tling. Mi tampi nih Pennak kong thawngṭha kha vawleicung pumpi ah an chim. (Isa. 60:22) Asinain mi cheukhat caah phungchimnak rian kha a biapi bik ah chiah cu a har lai ti zong in Jesuh nih a chim. Annih cu thil dang kong lawng an “ruat” lai i an lung a vaivuan lai. (Luka 21:34 rel.) Jesuh bia cu tuchan kan caah a biapi khun, zeicatiah Pathian salle cheukhat cu a biapi bikmi thil kha pakhatnak ah an chiah lo caah a si. Mah kha rian, fimcawnnak asiloah thilri chawva he aa tlaiin bia an khiah tikah kan hmuh khawh. Mi cheukhat tu cu lentecelhnak asiloah nuamhsaihnak caah caan tam tuk an hman. A cheu cu khuasaknak kong ah an lungre a theih caah Pathian rian kha an ṭuan khawh tlukin an ṭuan lo. Hitin i hal: ‘Zeitindah rian ka ṭuan? Pathian duhnak kha ka nunnak ah hmasa bik ah ka chia maw?’

4. (a) Paul nih Filipi khua i Khrihfa hna caah zeitindah thla a cam, zei ruangah? (b) Hi capar le a hnu capar ah zei kong dah kan i ruah lai? Mah nih zeitindah a kan bawmh lai?

⁴ Kumzabu pakhatnak i Khrihfa hna cu an nunnak ah Pathian rian kha hmasa bik i chiah awkah an rak i zuam. Cucaah lamkaltu Paul nih Filipi khua i Khrihfa hna kha ‘a biapi deuhmi thil an hngalh’ nakhnga thla a campiak hna. (Filipi 1:9-11 rel.) Lamkaltu Paul bantukin Khrihfa tam deuh cu “an ral a ṭha chinchin i ṭih lo tein thawngṭha bia kha an chim.” (Fil. 1:12-14) Cu bantukin tuchan zong ah Pathian Bia kha ralṭha tein kan chim ve. Matthai 24:14 bia tlinternak caah Jehovah nih a bupi kha zeitindah a hman timi kong kha hi capar ah kan i ruah lai i mah nih thazaang a kan pek lai. Cun phungchimnak ah lungthawh chin awk zong a kan bawmh lai. Jehovah bupi nih zei rian dah a ṭuan, mah kong hngalhnak nih kanmah le kan chungkhar kha zei tuah awk dah a kan forh? A hnu capar ah Pathian rian ṭuan zungzal awk le Jehovah bupi lamhruainak zulh awkah zeinihdah a kan bawmh khawh ti kha kan i ruah lai.

5, 6. (a) Jehovah nih vancung ah a cangmi kong kha langhnak in zeicah a salle a hmuhter hna? (b) Langhnak ah Ezekiel nih zeidah a hmuh?

⁵ Jehovah nih Baibal ah a telh lomi a kong tampi a um. Tahchunhnak ah, kan thluak asiloah van le vawlei kong kha a dikthliar in a kan chim lo. Mah canah a duhnak hngalhthiam awk le a nawl ngaih awkah a kan bawmmi kong tu a kan chimh. (2 Tim. 3:16, 17) Jehovah nih mit in hmuh khawh lomi a bupi kong a kan chimhmi cu lungthawh awk ngai a si. Isaiah, Ezekiel, Daniel le Biathlam cauk ah mah kong pawl kan rel tikah kan lung a cawlcang tuk. (Isa. 6:1-4; Ezek. 1:4-14, 22-24; Dan. 7:9-14; Biat. 4:1-11) Jehovah nih vancung ah a cangmi thil cheukhat kha zeicah a kan hngalhter?

⁶ Jehovah nih van le vawlei i a ummi a bupi ah aa tel vemi kan si kha i cinken zungzal hna seh ti a kan duh. Hmuh khawh lomi Jehovah bupi cu Jehovah duhnak tuah awkah fakpi in aa zuam. Tahchunhnak ah, Ezekiel nih leng kekual nganpi kha langhnak ah a hmuh.  Mah nih hmuh khawh lomi Jehovah bupi kha a langhter. Mah leng kekual cu a rang tuk i a duhnak lei paoh ah a kal kho colh. (Ezek. 1:15-21) Mah leng kekual aa citmi, zong kha Ezekiel nih a hmuh. Hitin a chim: “Dar tleu bantuk a si i somei vaam huam in a ummi khi a lo . . . BAWIPA sunparnak a muisam cu cu bantuk cu a si.” (Ezek. 1:25-28) Ezekiel cu mah langhnak a hmuh tikah a lau tuk ko lai. Jehovah nih a bupi kha ṭha tein a uk i mah kha lamhruai awkah a thiang thlarau a hmanmi kha a hmuh. Langhnak i a kalmi leng kekual nih hmuh khawh lomi Jehovah bupi a rian ṭuan ning kha a langhter.

7. Daniel hmuhmi langhnak nih zeitindah zumhnak a kan ngeihter?

⁷ Daniel hmuhmi langhnak zong nih zumhnak a kan ngeihter. Leng kekual a ngeimi bawiṭhutdan ah a ṭhumi, “zungzal in a nungmi” Jehovah kha a hmuh. (Dan. 7:9) Jehovah nih a bupi cu a kal, chimduhmi cu a duhnak tuah awkah rian a ṭuan ti kha Daniel hmuhter a duh. Daniel nih “minung a lomi” Jesuh zong kha a hmuh. Anih cu hmuh khawhmi Jehovah bupi cungah nawlngeihnak pek a si. Minung cung i a nawlngeihnak cu kum tlawmpal ca lawng a si lo. “Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak a ngeihmi cu zeitikhmanh i hrawh khawh lomi ṭhawnnak a si.” (Dan. 7:13, 14) Mah langhnak nih Jehovah cungah zumhnak a kan ngeihter i a tuahmi thil kha hngalhthiam awkah a  kan bawmh. Cun Jesuh cu Jehovah nih nawlngeihnak a pek caah a kan Hruaitu in zumh awkah mah langhnak nih a kan bawmh.

8. Jehovah bupi he aa tlaimi langhnak nih Ezekiel le Isaiah kha zeitindah a umter hna? Kannih tah zeitindah a kan umter ve awk a si?

⁸ Jehovah bupi he aa tlaimi mah langhnak nih zeitindah a kan umter awk a si? Ezekiel bantukin Jehovah tuahmi nih kan khuaruah a harter i toidornak a kan ngeihter. (Ezek. 1:28) Profet Isaiah zong nih vancung i a cangmi thil kha langhnak ah a hmuh ve. Jehovah nih a tuahmi thil kong kha midang chimh awkah a sawm tikah Isaiah nih a cohlan colh. (Isaiah 6:5, 8 rel.) Jehovah bawmhnak thawng in zei bantuk harnak paoh ka tei khawh lai tiah Isaiah nih a zumh. Isaiah bantukin kannih zong Pathian rian tam deuh in kan ṭuannak thawng in Jehovah bupi bawmh duhnak a kan ngeihter ve. Jehovah duhnak a tuah zungzalmi bupi ah kan i tel ve ti hngalh cu thazaang petu a si.

9, 10. Hmuh khawhmi Jehovah bupi cu zeicah a herh?

⁹ Jehovah nih a Fapa hmang in vawleicung a bupi kha a dirh i vancung a bupi he rian an ṭuanṭi. Matthai 24:14 chimchungbia a tlin nakhnga mah cu a herh. Zeicah? A ruang pathum hi ruat hmanh.

¹⁰ Pakhatnak ah, Jesuh nih a zultu pawl kha “vawleicung khuazakip ah” phung nan chim lai tiah a ti hna. (Lam. 1:8) Pahnihnak ah, phungchimnak rian a ṭuanmi hna ṭha tein zohkhenh le thlarau rawl timhtuah a herh. (Johan 21:15-17) Pathumnak ah, annih cu Jehovah biakṭi awk le phungchim ning cawn awkah hmunkhat ah an i pumh a herh. (Heb. 10:24, 25) Mah vialte tuah khawh awkah Jesuh zultu hna cu ṭha tein dirh an herh.

11. Jehovah bupi kha zeitindah kan bawmh khawh?

¹¹ Jehovah bupi kha zeitindah kan bawmh khawh? A biapimi lamkhat cu phungchim rian a hruaitu unaupa pawl kha kan zumh hnanak in a si. Jehovah le Jesuh nih mah unaupa pawl kha an zumh hna bantukin kan zumh ve hna awk a si. Annih nih hi vawleicung buaibainak tawnghtham awkah an caan le an thazaang kha an hman khawh ko. Asinain cutin an tuah lo. Hmuh khawhmi Jehovah bupi nih zeidah a tuah zungzal ti kha i ruah u sih.

12, 13. Khrihfa upa nih an rian kha zeitindah an ṭuan? Mah cu zeicah thazaang petu a si?

¹² Vawleicung pumpi i hmuhtonnak a ngeimi Khrihfa upa hna cu rian an ṭuannak ram ah phungchim rian hruai awk le tlangtlak awkah rian pek an si. Biakhiahnak an tuah tikah lamhruainak hmuh awkah Baibal ah an kawl. Cuticun Baibal kha ‘an ke caah meiinn an siter i an lam caah ceunak an siter.’ Mah leng ah Jehovah sinah thla zong an cam.—Salm 119:105; Matt. 7:7, 8.

¹³ Kumzabu pakhatnak i Khrihfa upa hna bantukin tuchan phungchimnak rian a hruaitu Khrihfa upa zong nih “Pathian Bia chimnak” kha pakhatnak ah an chiah. (Lam. 6:4) An ram le vawlei pumpi ah phungchim rian a ṭhanchomi  an hmuh tikah an i lawm tuk. (Lam. 21:19, 20) Pathian salle caah phunglam tampi an ser lo. Thawngṭha karhter awkah a herhmi an tuah tikah Baibal le thiang thlarau lamhruainak an zulh. (Lamkaltu 15:28 rel.) Cuticun mah unaupa hna nih Khrihfabu caah zohchunh awk ṭha an chiah.—Efe. 4:11, 12.

14, 15. (a) Vawleicung pumpi ah phung kan chim khawh nakhnga zeinihdah a kan bawmh? (b) Phungchim rianṭuannak na bawmh khawhmi he aa tlaiin zeitindah na ruah?

¹⁴ Unau tampi cu cauk, pumhnak le civui timhtuahnak caah nifate rian an ṭuan. Tahchunhnak ah, mah lungtho tein aa pemi unau thong tampi cu holh phun 600 leng in calehnak rian kha fakpi in an ṭuan. Mah ruangah mi tampi nih ‘Pathian tuahmi thil lianngan’ kong kha anmahle holh in an hngalh khawh. (Lam. 2:7-11) Mino unau tampi cu seh in cauk namnak le ṭhitnak rian an ṭuan. Mah cauk hna kha lam hlatpi ah a ummi Khrihfabu tiang an kuat.

¹⁵ Kan umnak hmun zong ah unau tampi cu thawngṭha chimnak rian kha biapi ah kan chiah khawh nakhnga rian an ṭuan. Tahchunhnak ah, unau tampi cu Biakinn le Civui tuahnak Inn saknak ah rian an ṭuan. A dang tu cu leiser ral a tongmi le siithlopnak lei ah harnak a tongmi pawl bawmhnak rian an ṭuan. A cheu cu civui ca timhtuahnak rian an ṭuan i a dang cu phungchim ning tinṭan ah cawnpiaktu an si. Mah rian vialte i aa tinhmi cu zeidah a si? Thawngṭha kan chim khawh nakhnga, biataklei ah kan ṭhancho nakhnga le Jehovah a biami an tam chin nakhnga caah a si. Hmuh khawhmi Jehovah bupi nih a biapi deuhmi thil kha pakhatnak ah an chiah taktak!

16. Chungkhar pumhnak asiloah pumpak hlathlainak ah zei kong dah na hlathlai khawh?

¹⁶ Jehovah bupi rianṭuannak kong kha a caan pe in na ruat tawn maw? Chungkhar pumhnak asiloah pumpak Baibal hlathlainak ah bupi kong kha na hlathlai khawh i na hngalhmi kha ṭha tein na ruah khawh. Isaiah, Ezekiel, Daniel le Johan hmuhmi langhnak kong hlathlai cu lungthawh awk ngai a si lai. Jehovah Tehte Pawl—Pennak Thawngthanhtu Hna timi cauk le a dang cauk asiloah DVD hna nih hngalh duh awk ngai a simi Pathian bupi kong tampi a kan chimh.

17, 18. (a) Hi capar ah kan i ruahmi kong cu na caah zeitindah man a ngeih? (b) Zei bia dah naa hal awk a si?

¹⁷ Jehovah nih a bupi hmang in a liimmi rian kong ruah cu a ṭha. Khuaruahhar a simi a bupi he kannih zong a biapimi thil kha pakhatnak ah chia ve hna u sih. Cutin kan tuah ahcun hitin a ṭialmi Paul bantukin kan ruah ve ko lai: “Pathian nih a kan zaangfah caah cu rian cu a kan ṭuanter i kan hnabei a dong bal lo.” (2 Kor. 4:1) Paul nih unau pawl kha hiti zong in tha a pek hna: “Ṭhatnak tuah kha baa hlah u sih; kan ngol lo ahcun a theitlai kan zun caan kha a phan ve ko lai.”—Gal. 6:9.

¹⁸ Nifa na nunnak ah a biapi deuhmi thil kha pakhatnak i chiah khawh awkah nangmah asiloah na chungkhar ning in thlennak tuah a hau maw? Phungchimnak rian tam deuh in na ṭuan khawh nakhnga a sawhsawh tein na nung kho lai maw? A hnu capar ah Jehovah bupi i zohchunh awk le Pathian rian kha lungtho tein ṭuan zungzal awkah a kan bawm khomi thil panga kong kan i ruah te lai.