1, 2. Van le vawlei a ummi Jehovah bupi kong langhnak nih zei tuah awk dah a kan forh?

VAN le vawlei i a ummi bu nganpi ah kan i tel vemi kong ṭha tein ruah cu lungthawh awk ngai a si. Ezekiel dal 1 le Daniel dal 7 i aa ṭialmi langhnak nih Jehovah nih aa tinhmi tlinter awkah zeitindah rian a ṭuan ti kha fiangte in a langhter. Jesuh nih vawleicung i a ummi Jehovah bupi kha lam a hruai. Phungchim rian ṭuan awk, mah rian a ṭuanmi hna kha thapek awk, cawnpiak awk le mi kha Jehovah biak ding bawmh awkah lam a hruai. Mah nih Jehovah bupi zumh awkah a kan forh.—Matt. 24:45.

² Pathian rian ah na rian a tamnak thawng in bupi hnu kha na zul maw? Biataklei ah ka lung a tho tuk ti lo tiah na hun ruah men lai. Kumzabu pakhatnak i Khrihfa hna cu cutin an rak um. Cucaah lamkaltu Paul nih Jesuh a lungthawhnak kong kha a rak chimh ṭhan hna. Mah nih ‘lung dongh in ngol’ lo awkah aan bawmh hna lai tiah Paul nih a ti. (Heb. 12:3) Mah capar ah tuchan i Jehovah bupi rianṭuannak kong kan i ruah lai. Jesuh nunning nih kumzabu pakhatnak i Khrihfa hna kha thazaang a rak pek hna bantukin tuchan i Jehovah bupi tuahmi nih Pathian rianṭuannak ah inkhawhnak ngeih awk le lungthawh zungzal awkah a kan bawmh lai.

3. Baat lo awkah zeidah kan tuah a herh? Hi capar ah zei kong dah kan i ruah lai?

³ Pathian rian kan ṭuannak ah ‘baat’ asiloah lungthawhnak zor kan duh lo ahcun Pathian bupi tuahmi kong ruah lawng hi a za lo. ‘Ṭhatnak kan tuah’ zungzal awk a si tiah Paul nih a ti. (Gal. 6:9) Jehovah bupi lamhruainak zulh awk le lungthawh zungzal awkah a kan bawm hngami thil panga kong kan i ruah lai. Mah hnuah, kanmah asiloah kan innchungkhar caah tuah a herhmi a um le um lo kha bia kan chah khawh lai.

4. Pumhnak cu a hmaanmi biaknak ah a biapimi a si zungzal tiah zeicah kan ti khawh?

⁴ Pumhnak cu Jehovah salle caah a biapi tukmi a si zungzal. Van ah, Jehovah cu vancungmi hna he an i pum. (1 Si. 22:19; Job 1:6; 2:1; Dan. 7:10) Hlanlio Israel mi hna cu phungbia kha “an theih” i an hngalhthiam nakhnga an i pum. (Deut. 31:10-12) Kumzabu pakhatnak ah Judah mi hna cu cathiang rel awkah pumhnak inn ah an rak kal lengmang. (Luka 4:16; Lam. 15:21) Khrihfabu dirh a si tik zongah pumhnak cu a biapi ṭhiamṭhiam i mah cu Pathian biaknak caah atu tiang a biapi rih. A hmaanmi Khrihfa hna cu “pakhat le pakhat kan i dawt khawh nakhnga le thil ṭha kan i tuahpiak khawh nakhnga” kan i bawm. A hlei in, donghnak caan ah kan nun caah pakhat le pakhat “i forh chin” a hau.—Heb. 10:24, 25.

5. Pumhnak ah pakhat le pakhat zeitindah tha kan i pek khawh?

⁵ Pakhat le pakhat tha i pek khawhnak lamkhat cu pumhnak ah a phi peknak hi a si. Tahchunhnak ah, catlangbu i biahalnak a phi kha pek khawh a si, Baibal cang in pek khawh a si asiloah Baibal phunglam nih zeitindah a kan bawmh ti a langhtermi hmuhtonnak tawi pakhat chim khawh a si. (Salm 22:22; 40:9) Biatak ah kan umnak zei can a si cang hmanhah, pumhnak ah upa le mino nih an pekmi a phi kan theih tikah kan thazaang a um tuk.

6. Pumhnak nih zei lam hna in dah a kan bawmh?

⁶ Pumhnak le civui nih lam tampi in a kan bawmh. Tahchunhnak ah, mi nih phung kan chimmi an ngaih duh lo asiloah a kan ralchanh tik hmanhah ralṭha tein phungchim awkah a kan bawmh. (Lam. 4:23, 31) Baibal hrambunh in phung an chimmi le a dangdang nih kan zumhnak a fehter. (Lam. 15:32, Rom 1:11, 12) Unau pawl he kan umṭi tikah kan i nuam i kan hna a ngam. (Salm 94:12, 13) Uktu Bu i Cawnpiaknak Kawmiṭi nih Jehovah salle pumhnak i cawnpiak dingmi kha an timhtuah. Zarh fate pumhnak ah lamhruainak ṭhaṭha kan hmuh zungzal caah kan i lawm tuk.

7, 8. (a) Kan i pumh hnawh chan bikmi cu zeidah a si? (b) Pumhnak nih zeitindah aan bawmh?

⁷ Asinain ṭhatnak hmuh kan duh ca lawngah kan i pumhmi a si lo. Kan i pumh hnawh chan bikmi cu Jehovah biak awkah a si. (Salm 95:6 rel.) Pumhnak ah, a liannganmi Pathian kha hla in thangṭhatnak caanṭha kan hmu. (Kol. 3:16) A phi kan pekmi zong in Jehovah kha kan thangṭhat khawh. Jehovah cu cutin biak awkah aa tlak taktakmi a si. (Biat. 4:11) Cucaah hmaan tein i pumh cu a biapi tuk.—Heb. 10:25.

⁸ Pumhnak cu Jehovah nih hi vawlei ṭha lo a hrawh hlan tiang inkhawhnak ngeih awk bawmtu ah a kan pekmi laksawng a si. Nangtah cutin na ruat maw? Cutin kan ruah ahcun kan rian a tam tuk hmanhah hmaan tein i pumh khawh awkah kan i zuam lai. (Fil. 1:10) A biapi tukmi a ruang a um ti dah lo cun zeitikhmanh ah pumh kan tlolh awk a si lo.

9. Phungchimnak rian cu a biapi tuk ti kha zeitindah kan hngalh?

⁹ Lungtho tein phungchimnak nih Jehovah bupi hnu zulh awkah a kan bawmh. Jesuh nih vawleicung a um lioah phungchimnak rian kha a rak thawk.  (Matt. 28:19, 20) Mah caan thawk in phungchimnak le zultu siternak rian cu van le vawlei i a ummi Jehovah bupi caah a biapi bikmi rian a hung si. Vancungmi nih kan rianṭuannak kha a kan bawmh i biatak a cohlang hngami pawl hmuh awkah lam a kan hruai ti kha hmuhtonnak tampi nih a langhter. (Lam. 13:48; Biat. 14:6, 7) Hmuh khawhmi Jehovah bupi nih a bik in aa tinhmi cu phungchimnak rian tlangtlak le bawmh kha a si. Mah rian cu na caah a biapi bikmi rian a si maw?

10. (a) Unaupa pakhat nih biatak a duhnak kha zeitindah a ṭhawnter? (b) Phungchimnak nih biatak na duhnak kha zeitindah a ṭhawnter?

¹⁰ Lungtho tein phung kan chim tikah biatak kan duhnak a ṭhawng chin. Khrihfa upa a sinak a sau cangmi, hmaanhmaan a ṭuanmi unaupa Mitchel cu cutin a rak si. Hitin a chim: “Mi sinah biatak kong chim kha ka duh. Thla fatin chuahmi Vennak Innsang asiloah I Hlau! i capar thar kong ka ruah tikah, cuka i a ummi fimnak, thleidan thiamnak le a tlari tein aa ṭialmi nih ka khuaruah a ka harter. Mi nih mah capar hna kha zeitindah an leh lai ti le zeitindah an lung ka thawhter khawh hna lai ti kha hngalh awkah phungchim ah kal ka duh.” Phungchimnak nih a biapi bikmi thil kha pakhatnak ah chiah awk le zei hmanh nih phungchimnak caan a hnorsuan nakhnga lo a ka bawmh tiah  Mitchel nih a ti chap. Kannih zong Pathian rian ah kan rian a tam ahcun hi donghnak caan ah inkhawhnak kan ngei kho ve lai.—1 Korin 15:58 rel.

11. Zeicah bupi chuahmi cauk kha rel in ṭha tein ruah awk a si?

¹¹ Jehovah nih thazaang a kan peknak lamkhat cu bupi chuahmi cauk tampi in a si. Bupi cauk pakhat na rel tikah, ‘Mah hi ka herhmi bak a si. Jehovah nih keimah caah ṭial sehlaw a lo’ tiah na ruah lio kha naa cinken men ko lai. Cutin na ruah cu a ruang a um. Jehovah nih bupi chuahmi cauk hmang in a kan cawnpiak i lam a kan hruai. “Na zulh awkhnga lam kha kaan hmuhsak lai, kaan cawnpiak lai” tiah a kan ti. (Salm 32:8) Kan hmuhmi bupi chuahmi cauk vialte rel awk le ṭha tein ruah awkah kan si khawh chung in kan i zuam maw? Cutin tuahnak nih harnak in a khatmi hi donghnak caan ah inkhawhnak ngeih awk le lungtho tein Pathian rian ṭuan zungzal awkah a kan bawmh lai.—Salm 1:1-3; 35:28; 119:97 rel.

12. Bupi cauk kha sunsak awkah zeinihdah a kan bawmh khawh?

¹² Mah cauk pawl chuah awkah an ṭuanmi rian vialte kong kha kan ruah ahcun kan cauk pawl kha kan sunsak chin lai. Cauk in chuahmi asiloah Web site ah rawnmi vialte caah hlathlainak tuah, ṭial, check ṭhan, hmanthlak thim le ca leh a hau. Mah rian kha Uktu Bu i Caṭialnak Kawmiṭi nih an tlangtlak. Mah cauk pawl a nammi zung ṭengnge nih mah cauk pawl kha Khrihfabu tampi ah an kuat hna. Mah rian vialte cu zeicah ṭuan a si? Jehovah salle nih thlarau rawl kim tein an ei khawh nakhnga caah a si. (Isa. 65:13) Jehovah bupi sinin kan hmuhmi cauk vialte in ṭhatnak i lak hna u sih.—Salm 119:27.

13, 14. Van ah Jehovah bupi kha ahote nih dah an bawmh? Kannih tah vawlei ah zeitindah kan bawmh khawh ve?

¹³ Langhnak ah, Johan nih Jehovah a ralchanhmi pawl doh awkah aa thawhmi rang raang aa citmi Jesuh kha a hmuh. (Biat. 19:11-15) Vancung ah a tho ṭhanmi zumhfekmi chiti thuhmi hna le zumhfekmi vancungmi hna cu rang raang i cit in Jesuh hnu an zulhmi zong kha a hmuh. Mah nih an hruaitu Jesuh kha an bawmh ti a langhter. (Biat. 2:26, 27) Mah nih Jehovah bupi a hruaitu pawl kha kan bawmh ve hna awk a si ti a kan hngalhter.

¹⁴ Cu bantukin mibu nganpi nih vawlei ah a tang rihmi chiti thuhmi Jesuh naule kha ṭha tein an bawmh ve hna. (Zekhariah 8:23 rel.) Jehovah bupi kan bawmh ti kha zeitindah kan langhter khawh? Lamkhat cu a kan hruaitu pawl an nawl kan ngaih hnanak thawng in a si. (Heb. 13:7, 17) Khrihfa upa pawl he aa tlai in kan chimmi bia nih unau dang kha Khrihfa upa pawl le an rian upat awkah a bawm hna maw? Kan fale kha mah zumhfekmi unaupa pawl upat awk le ruahnak an cheuhmi hna ngaih awkah kan cawnpiak hna maw? Bupi kan bawmh kha lam dangdang zong in langhter khawh a si. Tahchunhnak ah, phungchim rian caah thawhlawm pek awkah kan chungkhar ning in kan i ruahceihṭi hna maw? (Ptb. 3:9; 1 Kor. 16:2; 2 Kor. 8:12) Biakinn thianhnak le zohkhenhnak ah tah kan i tel maw? Jehovah nih cu bantuk lam in a bupi kan bawmhmi kha a hmuh tikah a thiang  thlarau a kan pek lai. A thiang thlarau nih hi donghnak caan ah inkhawhnak ngeih awkah a kan bawmh lai.—Isa. 40:29-31.

15. A hmaanmi thil tuah awkah zeicah fakpi in kan i zuam zungzal awk a si?

¹⁵ Inkhawhnak ngeih le Jehovah bupi lamhruainak zulh kan duh ahcun Jehovah duhmi ningin kan nun a hau. (Efe. 5:10, 11) Satan, hi vawlei ṭha lo le kan tlinlonak ruangah a hmaanmi thil tuah cu a har ngaingai. Unau cheukhat cu Jehovah he pehtlaihnak ṭha ngeih zungzal awkah nifate fakpi in an i zuam. Cutin an i zuam caah Jehovah nih a dawt hna. Cucaah lung dongh awk a si lo. Pathian duhmi ningin kan nun ahcun hnangamnak kan hmu lai i kan biaknak kha Jehovah nih a cohlan lai.—1 Kor. 9:24-27.

16, 17. (a) Sualnak nganpi kan tuah sual ahcun zeidah kan tuah awk a si? (b) Anni sinin zeidah kan i cawn khawh?

¹⁶ Sualnak nganpi na tuah sual ahcun zeidah na tuah awk a si? Mah kha thuh i zuam hlah. A ran khawh chung rang in bawmhnak kha kawl. David nih a sualnak a rak thuh tikah zeitluk in dah a intuar ti kha philhhlah. Hitin a chim: “Ka sualnak kha ka phuan hna lo tikah chun ni tlak in ka ṭap.” (Salm 32:3) Kan sualnak nganpi kha thuh kan i zuam ahcun kan i nuam ti lai lo, mah lengah Jehovah he kan i pehtlaihnak hmanh a rawk kho. Asinain kan phuan ahcun, ‘zaangfahnak kan hmu lai.’—Ptb. 28:13.

¹⁷ Anni timi nu kong hi ruathmanh. * Anni cu kum hra fai a si ah hmaanhmaan a rak ṭuan, a si nain thil ṭhalo a hun tuah. Cu tikah a chiaṭha thleidannak lungthin a thiang ti lo, “kaa nuam kho ti lo i ka lungre a thei peng” tiah a ti. Voikhat cu pumhnak ah Jeim 5:14, 15 kong kha an chim. Mah tikah Anni nih bawmhnak a herh kha a hun hngalh i Khrihfa upa pawl kha bawmhnak a hal hna. Cutin tuah cu a fawi lo nain, kei cu mizaw bantuk ka si i Jehovah nih ka herhmi sii kha a ka pek tiah a ti. “Sii din cu a fawi lo, asinain mah cu damnak a si” ti zong in a ti. Atu ah, Anni cu a chiaṭha thleidannak lungthin a thiang cang i Jehovah rian kha lungtho tein a ṭuan ṭhan cang.

18. Zei tuah dah kan i zuam awk a si?

¹⁸ Hi donghnak caan ah Jehovah bupi ah kan i tel khawh vemi hi tinvo sung a si ti kha kan i cinken awk a si. Kan innchungkhar ningin hmaan tein i pumh, lungtho tein phungchim le bupi chuahmi cauk vialte in ṭhatnak i lak awkah fakpi in i zuam hna u sih. A kan hruaitu pawl kha bawm hna u sih law Jehovah duh ningin nung u sih. Cutin kan tuah ahcun, Jehovah bupi lamhruainak kha kan zulh lai i thil ṭha tuahnak ah kan baa lai lo.