1. Zeicah Baibal kha kan zumh taktak awk a si?

BAIBAL a cawngmi cu phungchimnak ah aa tel khawh nakhnga Baibal cu Pathian Bia a si ti a zumh kha a langhter a hau. * Kannih zong kan tuahsernak le kan biachim in Baibal kan zumh kha kan langhter a hau ve. Baibal kha kan zumh taktak i phungchimnak ah hmual ngei tein kan hman ahcun mi kha Jehovah hngalh awk le zungzal nunnak hmuh awkah kan bawmh khawh hna lai.

2. Zeicah kan rak cawnmi biatak ah kan dir peng awk a si?

² Lamkaltu Paul nih Baibal a biapitnak kha a langhter. Timote sinah “kaan cawnpiakmi ah khan dir law fek tein zum peng” tiah ca a ṭial. Timote cu a cawnmi Baibal biatak nih thawngṭha kha a zumhter. Kannih zong Baibal in kan hngalhmi nih kan zumhnak a fehter ve. Baibal nih ‘khamhnak i a kan kalpi khotu fimnak’ a kan ngeihter khawh. (2 Tim. 3:14, 15) Paul nih a chimchapmi bia nih Baibal cu Pathian sinin a rami a si ti a langhter. 2 Timote 3:16 (rel) in a dang zeidah kan hngalh khawh rih? Mah cacang kha a dikthliar deuh in i ruah u sih. Mah nih Jehovah cawnpiaknak vialte cu “a hmaanmi” an si ti kha a kan zumhter chin lai.—Salm 19:8.

3-5. (a) Pentekos ni ah Piter nih mibupi sin phung a chim hnuah zeidah a cang, zeicah? (b) Thesalonika khuami tampi nih zeicah biatak an cohlan? (c) Tuchan ah, kan phungchimnak he aa tlaiin mi nih zeidah an hngalh?

³ Jesuh nih Israel mi hna kha hitin a ti hna: “Profet hna le mifim hna le cawnpiaktu hna kha kaan pek hna lai.” (Matt. 23:34) Mah cu a zultu hna kha an si. Jesuh nih a zultu hna kha phungchimnak ah  Baibal hman awk a cawnpiak hna. AD 33, Pentekos ni ah “cawnpiaktu” a simi lamkaltu Piter nih Jerusalem khua i mibupi sinah phung a chim. Mah lioah Hebru Baibal chung in cacang tam nawn kha a cherhchan. Mah cacang pawl a fianter ning kha an theih tikah mi tampi cu an rak tuahmi sualnak ruangah an lung a ṭhalo. An i ngaichih i Pathian sinah ngaihthiam an hal. Mah ni ah mi thong thum hrawng zumtu an hung si.—Lam. 2:37-41.

⁴ A dang cawnpiaktu a simi lamkaltu Paul sin zong in kan i cawn khawh. Anih cu Jerusalem in lamhlatpi tiang phung a chim. Voikhat cu Masidonia ram, Thesalonika khua i pumhnak inn ah aa pummi Judah mi sinah a chim. Sabbath ni, nithum chung Paul cu “mi hna he khan Cathiang chung bia kha an i al i Messiah cu thihnak a in awk le a thawh ṭhan awk a sinak kong kha Cathiang cun a langhter i a fianter.” Cucaah Judah mi hna le Grik mi tampi cu zumtu an hung si.—Lam. 17:1-4.

⁵ Tuchan zongah, kan chimmi a hmaan ti langhternak caah Baibal kan hmanmi kha mi tampi nih an hngalh. Switzerland ram i unaunu pakhat nih phungchimnak ah Baibal a rel tikah inn-ngeitu pa nih zei biaknak dah na si tiah a hal. Unaunu nih kei le ka hawi nu hi Jehovah Tehte kan si tiah a leh. Mah tikah inn-ngeitu nih Jehovah Tehte lawnglawng hi ka inn ah ra in Baibal a relmi an si caah mah cu ka hngalh awk pei a si cu tiah a ti.

6, 7. (a) Pumhnak ah phung a chimmi nih Baibal kha zeitindah a ṭha bikmi lam in a hman khawh? (b) Mi kha Baibal kan cawnpiak hna tikah Baibal kha zeitindah hmualngei tein kan hman khawh?

⁶ Mi kan cawnpiak hna tikah Baibal kha zeitindah a ṭha bikmi lam in kan hman khawh? Pumhnak ah phungchim awk rianpek na si ahcun ṭha tein na thimmi Baibal cang kha hmang. Baibal bia kha a chim in chim asiloah ṭial chommi rel asiloah electronic thilri in rel loin na Baibal cauk in rel. Aa pummi zong kha an Baibal kau ve awkah forh hna. Baibal cang a sullam le mah nih Jehovah he pehtlaihnak ṭha ngeih awkah zeitindah a bawmh khawh hna ti kha fianter. Hngalhthiam a harmi tahchunhnak le aa pummi ni hna seh ti duh men ah hmuhtonnak pawl chim loin na hmuhmi caan kha Baibal fianternak caah hmang.

⁷ Mi kha Baibal kan cawnpiak hna tikah zeidah kan i cinken awk a si? Kan cawn lioah cauk chung i aa ṭialmi Baibal cang kha lonh tak awk a si lo. Baibal a cawngmi kha cawnnak ca aa timh lioah mah cacang pawl kha rel awkah thape. Cun kan fianter tikah kanmah lawngte nih chim loin a ruahning kha chimter ve awk a si. Zeidah zumh awk a si, zeitin tuah awk a si ti kha kanmah nih chimh loin Baibal cawnpiakmi kha a hngalhthiam nakhnga biahalnak tu kan tuah awk a si. *

8. Paul nih zeidah a rak doh?

⁸ Khrihfa upa cu sualnak a tuahmi hna chimhhrin awkah rian an ngei. (1 Tim. 5:20; Titas 1:13) Asinain kanmah te zongin i chimhhrinh khawh a si. Paul cu chiaṭha thleidannak lungthin thiang a ngeimi, zohchunhawk ṭha Khrihfa a si. (2 Tim. 1:3) Asinain hitin a ṭial: “Ka chung i phung dang a rak um ve kha ka hngalh—cu phung cu ka lung nih a ṭha a timi phung a rak dohtu kha a si. Cu phung nih cun . . . sualnak phung sal ah khan a ka ser.” Paul nih a derthawmnak doh khawh awkah zeidah a tuah timi kong kan i ruah lai.—Rom 7:21-25 rel.

9, 10. (a) Paul nih zei derthawmnak hna dah a ngeih khawh men? (b) Paul nih a derthawmnak kha zeitindah a doh khawh men?

 ⁹ Paul nih a derthawmnak zei a si cu a chim lo, asinain mi a ‘serhsatmi,’ phundang cun a puarmi le upat a hmang lomi ka rak si tiin cun a chim. (1 Tim. 1:13) Khrihfa a si hlanah Khrihfa pawl kha puarhrang ngai in a rak pehtlaih hna. ‘An cungah ka thin a hung tuk’ tiah a ti. (Lam. 26:11) Paul cu a thin sum awkah a rak cawn cang nain a caan ah a intuarnak le a biachim i sum awkah aa harh rih men lai. (Lam. 15:36-39) Mah kha tei khawh awkah zeinihdah a bawmh?

¹⁰ Korin khuami hna sin a voikhatnak a cakuat ah amahle amah i chimhhrinh awkah zeidah a tuah kha a chim. (1 Korin 9:26, 27 rel.) A derthawmnak doh awkah fakpi in aa zuam. Paul nih Baibal ah ruahnak cheuhnak a kawl lai, mah kha zulh khawh awkah Jehovah sinah bawmhnak a hal lai i a si khawh chung in zulh aa zuam lai ti kha kan zumh khawh. * Kannih zong kan derthawmnak kha kan doh ve caah a sinin kan i cawn khawh.

11. Biatak lam ah kan kal le kal lo hngalh awkah zeitindah kan i “hneksak” zungzal khawh?

¹¹ Kan derthawmnak kan dohmi kha zeitikhmanh ah kan ngol awk a si lo. Biatak lam ah kan kal le kal lo hngalh awkah kan i “hneksak” zungzal awk a si. (2 Kor. 13:5) Kolose 3:5-10 ti bantuk Baibal cang kan rel tikah hitin kan i hal awk a si: ‘Ka derthawmnak doh awkah fakpi in kaa zuam maw? Asiloah Jehovah duh lomi thil kha dah ka hun duh? Tahchunhnak ah, Internet ka zoh lioah a thurhnawmmi Web site a langh ahcun ka phit colh maw? Asiloah cu bantuk Web site kha dah ka kawl?’ Cu bantuk caan ah Baibal ruahnak cheuhnak kha kan zulh ahcun “lungfim tein” le hliphlau tein kan um kho lai.—1 Thes. 5:6-8.

12, 13. (a) Palhmi remh timi cu zeidah a si? Cutin kan tuah tikah Jesuh kha zeitindah kan i zohchunh khawh? (b) Mi kan remh hna tikah zei bantuk bia dah kan hrial awk a si?

¹² “Palhmi remhnak” tiah lehmi Grik biafang cu thil pakhatkhat kha ṭhatter asiloah remh timi sullam a ngei. Mi nih kan chimmi asiloah kan tuahmi an theihthiam lo tikah remh a hau. Tahchunhnak ah, Jesuh nih “ngunkhuai khawltu le misual hna” kha zaangfahnak he a pehtlaih hna tikah Judah biaknak hruaitu pawl nih an mawhchiat. Mah tikah Jesuh nih hitin a rak remh hna: “A dammi nih cun siibawi an herh lo, a zawmi lawng nih khan an herh. Va kal u law, ‘Saram thawinak si loin ka duhmi cu zaangfahnak lungthin kha a si,’ tiah Cathiang chungah aa ṭialmi hi a sullam va ruat tuah u.” (Matt. 9:11-13) Jesuh nih Pathian he aa tlaiin mi nih an ngeihmi ruahnak zong a rak remh hna. Jehovah cu ‘zaangfahnak le vel ngeihnak in a khatmi, fawite in a thin hunter khawh lomi, a fekmi dawtnak tampi mi cungah a langhter i mi cungah zumhawktlak ngaingai a simi Pathian’ a si kha lungsau te le zaangfahnak he a rak chimh hna. (Ex. 34:6) Cucaah aa toidormi hna nih thawngṭha kha an hun zumh.

¹³ Kannih zong mi kan bawmh hna tikah Jesuh kha kan i zohchunh awk a si. 2 Timote 3:16 bia nih midang palhnak kan remh tikah awhrang in biachim awk a si a ti duhnak a si lo. Midang intuarmi zei rello in biachim kha Baibal nih a duh lo. Midang kha bia fakfak in kan ti hna ahcun kan bia cu “nam chunh” bantuk a si lai. Mah tikah an lung kan fahter hna lai i kan bawm kho hna lai lo.—Ptb. 12:18.

14-16. (a) Khrihfa upa nih buainak a tongmi hna kha zeitindah an remh khawh hna? (b) Nulepa nih an fale kha Baibal hmang in remh cu zeicah a biapit?

 ¹⁴ Baibal hmang in mi kan remh hna tikah zeitindah lungsaunak le zaangfahnak kan langhter khawh? Aa si lengmangmi nuva hna nih Khrihfa upa kha bawmhnak an hal hei ti u sih. Khrihfa upa cu pakhat lei lawng ah a ṭang lai lo i amah hmuhning kha a chim lai lo. Mah canah, Baibal phunglam hmang in a bawmh hna lai, Chungkhar Nuamhnak Tawhfung timi cauk, ṭhen 3nak chung i phunglam kha a hman khawh. Mah phunglam pawl an i ruah tikah nuva hna nih thlennak tuah an herh kha an hun hngalh men lai. A hnuah, Khrihfa upa nih an chungkhar sining a hal hna lai i a herh ahcun a bawmh ṭhan hna lai.

 ¹⁵ Nulepa nih an fale kha zeitindah an remh khawh hna? A cuza kami na fanu cu hawi thar a ngei hei ti u sih. Mah a hawi cu a ṭhalo tiah na ruah. Mah tikah mah a hawi kong kha na hlathlai awk a si. Na hlathlai tikah na fanu caah na lungre a theih rih ahcun na fanu kha bia na ruah khawh. Mino kong aa telmi Vennak Innsang capar kha kawl in cuka ah a ummi Baibal phunglam kha na hman khawh. Cun na fanu he caan tam deuh hman i zuam. Phungchim a kal tik asiloah chungkhar ningin caan nan hmanṭi tikah a lungput zeitin a um kha hngalh i zuam. Bia na ruah tikah na lung a sau i zaangfahnak na ngeih ahcun na dawt le a kong hngalh na duh kha a hngalh lai. Mah nih a hawikom he aa tlaiin ruahnak na cheuhmi kha zulh a duhter lai i a ṭhalomi hrial awk a bawmh lai.

¹⁶ Ahote dah bawmh an herh rih? A ngandamnak kong ah a lungre a theimi, a rian a sungh caah a lung a dongmi asiloah Baibal cawnpiaknak cheukhat aa fiang set lomi hna kha lungsau te le zaangfahnak he kan bawmh khawh hna. Baibal hmang in mi kan remh hna ahcun kan dihlak in ṭhatnak tampi kan hmu lai.

17. Cawnpiak kan si tikah zeicah kan i lawmh awk a si?

¹⁷ Cawnpiak kan simi kha kan duh tawn lo tiah Baibal nih a ti. Mah cu cohlan awkah a har tuk kho men. Asinain kan cohlan i kan zulh ahcun mah nih ding tein a kan nunter khawh lai. (Heb. 12:11) Khrihfa chungkhar ah a ṭhangmi, a cuza cangmi tampi nih nulepa cawnpiaknak cu kan caah man a ngei tuk tiah an chim. Jehovah nih Khrihfa upa hmang in a kan cawnpiakmi kha kan cohlan ahcun nunnak lam ah kan kal zungzal kho lai.—Ptb. 4:13.

18, 19. (a) Phungthlukbia 18:13 i ruahnak cheuhnak cu midang a cawnpiaktu Khrihfa upa hna caah zeicah a biapit? (b) Khrihfa upa nih sualnak a tuahtu kha a cawnpiak tikah nemnak le dawtnak a langhter ahcun zei ṭhatnak dah a chuak kho?

¹⁸ Cawnpiak thiam awkah Khrihfa upa le nulepa nih zeitindah an cawn khawh? Jehovah nih mi kha “ding tein” cawnpiak awkah a kan fial. (2 Tim. 3:16) Mah cu mi kan cawnpiak hna tikah Baibal phunglam hman a herh tinak a si. A biapimi Baibal phunglam pakhat cu Phungthlukbia 18:13 ah hmuh khawh a si. Hitin a ti: “Bia na leh hlanah ngai hmasa, cuti na tuah lo ahcun na hruh a si hlei ah bia na leh mipa zei i na rel lo zong a si.” Cucaah pakhatkhat nih unau pakhat cu sualnak ngan a tuah tiah Khrihfa upa a chimh hna ahcun Khrihfa upa nih mah unau kha an cawnpiak hlanah a konglam dihlak hngalh an i zuam awk a si. (Deut. 13:14) Cutin an tuah lawngah “ding tein” an cawnpiak khawh lai.

¹⁹ Khrihfa upa nih mi kha “nem tein” an cawnpiak hna awk a si ti zong in Baibal nih a ti. (2 Timote 2:24-26 rel.) Mi pakhat sualnak nih Jehovah thang a chiatter lengah midang zong fahnak a pek ko hna lai. Asinain sualnak a tuahmi a cawnpiak lioah Khrihfa upa cu a thin a hun ahcun a bawm kho ti lai lo. Khrihfa upa nih Pathian kha i zohchunh in sualnak a tuahtu kha nem tein a chawnh ahcun i ngaihchih awkah a bawmh lai.—Rom 2:4.

20. Nulepa nih an fale an cawnpiak hna tikah zei Baibal phunglam dah an zulh awk a si?

²⁰ Nulepa zong nih an fale an cawnpiak hna tikah Baibal phunglam kha an zulh awk a si ve. (Efe. 6:4) Tahchunhnak ah, mi pakhat nih na fapa cu thil ṭhalo a tuah tiah a pa kha a chimh ahcun a pa nih zeidah a tuah awk a si? A fapa kha a chimhhrinh hlanah a konglam dihlak hngalh aa zuam awk a si. Khrihfa chungkhar mi hna nih puarhrang ngai in thil a tuahter khotu, thinhun tuknak kha an hrial awk a si. Jehovah cu “zaangfahnak le zawnruahnak in a khatmi a si” i nulepa nih an fale an cawnpiak hna tikah mah ziaza kha langhter an i zuam ve awk a si.—Jeim 5:11.

21, 22. Salm 119:97-104 na rel tikah zei bia dah Jehovah Bia na hmuhning he aa khah?

²¹ Pathian a ṭihmi pa pakhat nih Jehovah nawlbia zeicah a duh kha a rak chim. (Salm 119:97-104 rel.) Anih cu Baibal a hlathlainak thawng in fimnak le hngalhthiamnak a ngei. Baibal phunglam a zulhnak thawng in mi nih an tuah tawnmi palhnak kha a hrial khawh. Baibal hlathlai kha a duh tuk i a hngalhmi a zulhnak thawng in ṭhatnak a hmu. A nun chung vialte Pathian nawlbia zulh awkah bia a khiak.

²² Nangtah Baibal kha na sunsak maw? Pathian nih aa tinhmi a tlinter lai ti zumh awkah Baibal nih aan bawmh khawh. Baibal cawnpiaknak nih thihnak ah aan kalpi khotu sualnak tuah lo awkah aan bawmh khawh. Cun nunnak lam kha hngalh in mah lam ah kal zungzal awk midang bawmhnak ca zong ah na hman khawh. A fimmi le dawtnak a ngeimi Pathian, Jehovah rian kan ṭuan tikah Baibal kha cutin hmang zungzal hna u sih.