JESUH nih Jehovah biakinn cu hrawh dih cikcek a si lai tiin a rak chimchung. Mah cu AD 70 ah Titus nih a hruaimi Rom ralkap nih Jerusalem an hrawh tikah a tling. (Matt. 24:2) A hnuah Rom Uktu Julian nih biakinn kha sak ṭhan awkah a rak timh.

Julian cu Khrihfa a si lomi Rom uktu hmanung bik a si tiah an ruah. Anih cu Constantine tupa a si i Khrihfa tiah aa timi hna sinah fimnak a rak cawng. Asinain AD 361 ah siangpahrang a si tikah an cawnpiakmi kha a cohlang ti lo. Julian nih church kha a cohlan lo caah tuanbia cauk hna nih “Zumhpialmi” tiah an auh.

Julian nih Khrihfa tiah aa timi hna kha a huat hna. Zeicatiah kum ruk a si lioah a pa le a chungkhat pawl kha Khrihfa ka si tiah aa timi hna nih an rak thah hna caah a si kho men. Julian nih Judah mi hna kha an biakinn sak ṭhan awkah a forh hna tiah church tuanbia kong hlathlaitu hna nih an ti. Cutin an sak ṭhan ahcun Jesuh cu nal profet a si ti kha a lang lai tiah a rak ruah. *

Julian nih biakinn sak ṭhan a duh ti cu a fiang ko. Asinain sak a rak thawk taktak le thawk taktak lo tu cu a fiang lo. A rak thawk a si ahcun zeiruang ah dah a ngol ṭhan ti zong a fiang lo. A fiangmi pakhat cu Julian cu siangpahrang a sinak kum hnih a tlin hlan ah an thah i aa timhmi cu a tlin lo timi a si.