Hlanlio ahcun miphun tampi nih misual cheukhat kha thingtung cungah an thlai hna i an thah hna. Rom miphun nih cu bantuk minung kha tung cungah an ṭem chih hna asiloah an khenh chih hna, cuka ah a fah, rawl ṭam, ti haal le a kih an celh tiang ni tlawmpal chung cu an nung kho. Rom miphun nih tung cung ah thlai in thah cu a nauta bikmi misual pawl nih an in dingmi ningzah awk tlak dantatnak in an hmuh.

Hlanlio Israel miphun hna tah zeitin? Misual kha tung cungah thlai in an that hna maw? Moses Nawlbia nih hitin a ti: “Mi pakhatkhat nih thihnak tlak sualnak a tuah i nan thah i thingkung cungah nan thlai ahcun, a ruak cu thingkung cungah cu zan khuadei in a um lai lo, sihmanhsehlaw cu ni lila ah cun nan phum lai.” (Deut. 21:22, 23) Cucaah thih awk tlak sualnak a tuahtu kha an thah hmasa hnuah thingtung asiloah thingkung cungah an thlai ti cu a fiang ko.

Mah kong he aa tlaiin Levitikas 20:2 nih hitin a ti: “Israel mi lak in siseh, an sinah a pemmi khual hna lak in siseh, ahohmanh nih a fa zeihmanh kha Molek a pek ahcun amah cu thah a si lai; rammi nih lung in an cheh lai.” Cun ‘khuavang a ngeimi le camhthiammi’ zong an thah hna. Zeitin in dah? ‘Lung in an cheh hnanak’ in a si.—Lev. 20:27.

Deuteronomi 22:23, 24 nih hitin a ti: “Hammi ngaknu pakhat cu mipa pakhat nih a khua chungah a ton i a ihpi ahcun, khi khua hauka ah an pahnih in nan chuahpi hna lai i lung in thi lakin nan cheh hna lai; nu cu, khua chungah a um nain bawmhnak hmuh awkah a au lo caah; pa cu, a innpa nupi kha a sual caah; cuticun ṭhatlonak cu nan lakin nan thenh lai.” Cucaah Israel mi hna nih sualnak ngan a tuahmi hna kha lung in an cheh hna i an thah tawn hna ti cu a fiang ko. *

Deuteronomi 21:23 nih “thlaimi cu Pathian chiatserhmi a si” tiah a ti. “Pathian chiatserhmi” pakhat a ruak kha mi hmuhnak ah an thlaimi cu Israel mi hna caah ralrin petu a si lai ti cu a fiang ko.