1. Jehovah cu zeicah a hmasa bik le a lianngan bikmi Phungchimtu a si?

PHUNGCHIMTU timi cu mi sinah thawngṭha a chimtu kha a si. Jehovah Pathian cu a hmasa bik le a lianngan bikmi phungchimtu a si. Adam le Evi nih an doh cangka in Jehovah nih Satan Khuachia cu hrawh a si lai tiah a thanh colh. (Gen. 3:15) Jehovah nih zeitindah a min a thianter lai, Satan nih a chuahtermi buaibainak kha zeitindah a tawnghtham lai ti le minung nih zungzal nunnak zeitindah an hmuh khawh ṭhan lai ti kha kumzabu tampi chung a fianter. Mah thawngṭha vialte cu Pathian Bia, Baibal ah aa ṭial.

2. (a) Vancungmi cu zeitindah phungchimtu an si? (b) Jesuh cu phungchimnak ah zeitindah zohchunhawk ṭha a si?

² Vancungmi zong phungchimtu an si ve. Annih zong nih thawngṭha an chim ve i vawlei ah thawngṭha a karh khawh nakhnga midang kha an bawmh hna. (Luka 1:19; 2:10; Lam. 8:26, 27, 35; Biat. 14:6) Vancungmi bawi bik Mikhael tah zeitin? Anih zong phungchimtu a si ve. Vawleicung a um lioah a biapi bikmi a rian cu thawngṭha chim kha a si. A nunning nih phungchim rian hi kan caah a biapi bikmi rian a si ve awk a si ti kha a langhter.—Luka 4:16-21.

3. (a) Kan chimmi thawngṭha cu zeidah a si? (b) Zei biahalnak i a phi dah kan hngalh a hau?

³ Jesuh nih a zultu pawl kha phungchim awkah a fial hna. (Matt. 28:19, 20; Lam. 1:8) Lamkaltu Paul nih Timote kha hitin a ti: “Thawngṭha karhter kha fakpi in i zuam, Pathian nih an kawh chan rian vialte kha ṭuan.” (2 Tim. 4:5) Kan chimmi thawngṭha cu zeidah a si? Vancung kan Pa, Jehovah nih a kan dawt timi kong kha mi kan chimh hna. (Johan 3:16; 1 Pit. 5:7) Pathian nih a kan dawt kha a Pennak thawng in a langhter. Cucaah mi kha Pathian Pennak nan cohlan, a nawl nan ngaih i a dingmi thil nan tuah ahcun Pathian hawikom nan si kho tiah kan chimh  hna. (Salm 15:1, 2) Jehovah nih harnak vialte kha a hloh dih lai i hlanlio i kan rak tonmi thil ruangah a chuakmi ngaihchiatnak zong a hloh lai. Mah cu thawngṭha taktak a si. (Isa. 65:17) Phungchimtu kan si caah, mah a biapimi biahalnak pahnih i a phi hi kan hngalh a hau: Tuchan ah mi nih zeicah thawngṭha an theih a herh? Phungchimnak rian hi zeitindah tlamtling tein kan ṭuan khawh lai?

4. Pathian kong kha a hmaan lopi in mi nih zeitindah an chim?

⁴ Na pa nih nangmah le na chungkhar kha aan kaltak hna tiah mi pakhat nih aan hlen hei ti u sih. Cun na pa cu mi puarhrang a si i na kong zong hngalh a duh lo, a thil tuahmi zong chimh aan duh lo tiah a ti chap. Na pa cu a thi cang i na kawl a hau ti lo tiah aan ti. Cu bantukin mi cheukhat nih Pathian kong kha an chim ve. Annih nih Pathian cu a puarhrangmi a si asiloah a kong hngalh khawh a si lo tiah an ti. Pathian nih miṭhalo pawl kha hell ah zungzal in a hrem hna tiah biaknak lei hruaitu cheukhat nih an cawnpiak hna. Cheukhat nih cun Pathian nih leiser ral kha a tlunter i mi kha harnak a pek hna tiah an ti. Leiser ral ruangah miṭha he miṭhalo he an thi nain mah cu Pathian dantatnak a si ti zong in an ti.

5, 6. Thlennawnnak zumhnak le a hmaan lomi cawnpiaknak nih mi kha zeitindah a hnorsuan hna?

⁵ Mi cheukhat nih Pathian cu a um lo tiah an ti. Thlennawnnak a zummi hna nih Sertu a um lo i thilnung hna hi pakhatkhat nih a sermi hna an si lo tiah an ti. Cheukhat nih minung cu saram in duhsah duhsah in aa thlengmi kan si tiah an zumh. Cucaah mi nih a caan ah sualnak an tuahmi le anmah zawn lawng an i ruahmi kha an khuaruah a har lo. Annih nih a ṭhawngmi nih a dermi nek cu a phung a si ko tiah an zumh. Cucaah a cheu nih dinlonak cu a um zungzal ko lai tiah an timi hi khuaruahhar awk a si lo. Mah ruangah thlennawnnak a zummi hna cu ruahchannak taktak an ngei lo.

⁶ Hi donghnak caan ah mi an lungre a theih cu thlennawnnak zumhnak le a hmaan lomi cawnpiaknak ruang zong ah a si. (Rom 1:28-31; 2 Tim. 3:1-5) Mah cawnpiaknak hna cu thawngṭha an si lo. Lamkaltu Paul nih mah cawnpiaknak ruangah mi cu ‘an lungthin a mui i Pathian pekmi nunnak chungah khan an i tel kho lo’ tiah a ti. (Efe. 4:17-19) Mah lengah, thlennawnnak zumhnak le a hmaan lomi cawnpiaknak nih mi kha Pathian sinin a rami thawngṭha cohlan awkah a dawnh hna.—Efesa 2:11-13 rel.

7, 8. Zei tuahnak thawng lawng in dah mi nih thawngṭha kha ṭha tein an hngalh khawh?

⁷ Mi cu Pathian he pehtlaihnak ṭha an ngeih khawh nakhnga Jehovah a um ti le amah naih khawhnak a ruang ṭha a um ti kha an hngalh hmasa a hau. Mah kha an hngalh khawh nakhnga Pathian sermi thil kong kha hlathlai awkah tha kan pek khawh hna. Mi nih sermi thil kha an zoh i ṭha tein an ruah tikah Pathian fimnak le ṭhawnnak kha an hngalh lai. (Rom 1:19, 20) Pathian sermi thil vialte cu khuaruahhar a si kha mi nih an hngalhthiam nakhnga zeitindah kan bawmh khawh hna lai? Thilnung Pawl Hi Sermi An Si Maw? [Kawl] timi brochure kha hman khawh a si. Asinain mi pakhat nih sermi thil a hlathlainak in a hngalh khawh lai lomi biahalnak cheukhat a um. Mah biahalnak hna cu zeicah Pathian nih sifah harnak hi umnak nawl a awnh, vawlei ca i Pathian tinhmi cu zeidah a si, Pathian  nih pakhat cio hi a kan siaherh maw ti bantuk hi an si.

⁸ Pathian le aa tinhmi kong thawngṭha cu Baibal hlathlainak thawng lawng in hngalh khawh a si. Thawngṭha hngalh awkah midang kan bawmh khawhmi hna hi tinvo sung a si. Asinain mi pakhat kha Pathian zumh awk le a hawi si khawh awkah bawmh kan duh ahcun Pathian kong chimh sawhsawh lawng in a za lo. Zeicah Pathian zumh a herh ti kha a hngalhthiam nakhnga fiangte in chimh a hau. (2 Tim. 3:14) Cucaah fiang deuh in mi kan cawnpiak khawh hna nakhnga Jesuh nawl kan i cawn a hau. Jesuh nih mi kha an lung fiang lak in zeicah a cawnpiak khawh hna? A ruang pakhat cu biahalnak kha ṭha tein a hman caah a si. Zeitindah a nawl kan i cawn khawh lai?

9. Mi nih thawngṭha an zumh khawh nakhnga bawmh kan duh hna ahcun zeidah kan tuah awk a si?

⁹ Jesuh bantukin phungchimnak ah biahalnak kha zeicah kan hman ve awk a si? Siibawi nih khuaihlainak nganpi tuah na hau tiah aan ti hei ti u sih. Amah cu na zumh men ko lai. Asinain na ngandamnak kong zeihmanh hal hmasa loin cutin aan ti ah tah? Cutin a si ahcun a chimmi kha na zum men lai lo. A thiam ngaimi siibawi hmanh nih mi kha a bawmh khawh hna nakhnga bia a hal hmasa hna le an chimmi a ngaihpiak hmasa hna a hau. Cucaah mi nih Pennak kong thawngṭha an zumh khawh nakhnga bawmh kan duh hna ahcun, zeidah bawmh an herh ti kha hngalh awkah ṭha tein biahalnak tuah thiam a hau.

10, 11. Jesuh cawnpiak ning kan i cawn ahcun zeidah kan tuah khawh lai?

¹⁰ Saya pakhat nih biahalnak a hman ahcun a siangngakchia kong a hngalh lengah a siangngakchia kha khuaruah awk le a ruahnak chim awk zong ah a bawmh ti kha Jesuh nih a hngalh. Tahchunhnak ah, Jesuh nih a zultu pawl kha toidornak kong cawnpiak a duh hna tikah khua a ruahtermi biahalnak pakhat a rak hal hmasa hna. (Mar. 9:33) Voikhat cu Jesuh nih Piter kha bia pakhat a hal i, a si khomi a phi pahnih a chimh hnuah a hmaanmi a phi a thimter. Mah nih Piter kha a biapimi thil hngalh awkah a bawmh. (Matt. 17:24-26) Jesuh nih a zultu pawl lungthin ah a ummi kha hngalh a duh caah an lung ah a um taktakmi chim awk a bawmmi bia a rak hal hna. (Matthai 16:13-17 rel.) Jesuh nih mi kha zeidah tuah awk a si timi lawng kha a chim hna lo. Biahalnak a tuah hnanak thawngin thawngṭha cohlan awk le an nunning i thlen awkah a forh hna.

¹¹ Jesuh bantukin hmualngeimi biahalnak kan hman ahcun phungchimnak ah kan tonmi hna kha zeitindah ṭha tein bawmh khawh an si ti kan hngalh lai. Cun kan chimmi an duh lo tik zongah zeitindah chim ding a si ti kha kan hngalh lai. Mah lengah anmah theng zeitindah ṭhatnak i lak awk a si ti kan cawnpiak khawh hna lai. Atu ah, biahalnak ṭha tein hman khawhning kong pathum kan i ruah lai.

12-14. Na fa nih phungchim a ngamh deuh nakhnga zeitindah na bawmh khawh? Tahchunhnak in chim.

¹² Tahchunhnak 1: Kum hra fai a simi na fa nih a khaan hawi sinah sernak  kong chim a ngamh lo ahcun zeidah na tuah lai? Thawngṭha chim ngam awkah zeitindah na bawmh khawh lai? Sualphawt asiloah chim ding chimh men si loin Jesuh nih a rak tuah bantukin a ruahnak chim awkah bia na hal khawh. Mah cu zeitindah na tuah khawh lai?

¹³ Thilnung Pawl Hi Sermi An Si Maw? timi brochure kha nan relṭi hnuah zei kong dah na duh bik tiah na hal khawh. Sertu a zumhnak a ruang le biak a duhnak a ruang dang kong kha ruah awkah forh. (Rom 12:2) Cun nan zumhnak a ruang aa dang kho ti kha chim.

¹⁴ Cun atu kan i ruah bantukin na khaan hawi kha na ruah khawh ve tiah na fa kha chim. Na fa nih a khaan hawi kha sernak kong cheukhat a chimh hnuah a ruahnak kha a hal khawh. Tahchunhnak ah, Thilnung Pawl Hi Sermi An Si Maw? timi brochure cahmai 12 le 13 i aa ṭialmi a kong kha relter. Mah hnuah na fa nih hitin a hal khawh, “Vanlawng thla a sertu cu a thluak a ṭhat tuk a hau lai, a si ko lo maw? tiah a hal khawh. A khaan hawi nih a hau lai tiah a ti ko lai. Cu tikah na fa nih “vanlawng thla sertu nih vaa thla aa zohchunhmi a si ti tah na hngal maw?” tiah a hal ṭhan khawh. Cun “vaa aa zohchunhtu hmanh a thluak a ṭhat a herh ahcun vaa a sertu chinchin cu a thluak a ṭhat a hau chinchin lai, a si ko lo maw?” tiah a hal khawh. Na fa nih mi sinah a zumhnak kong ral ṭha deuh in a chim ngam nakhnga inn ah na fa he tuahchun u. Na fa kha biahalnak ṭha tein hman a thiam nakhnga na cawnpiak ahcun phungchim thiam awkah na bawmh khawh lai.

15. Pathian a zum lomi pakhat he bia kan i ruah tikah zeitindah biahalnak kan hman khawh?

¹⁵ Tahchunhnak 2: Pathian a um a zum setsai lomi asiloah a zum lomi kha phungchimnak ah kan ton men lai. Amah  he bia i ruah khawh awkah kan i zuam kho. Cutin a zumhnak zei can dah a si cang asiloah zeicah Pathian a zumh lo kha nem tein kan hal khawh. A chimmi kan ngaih hnuah, a zumhnak kha biapi ah a chiah caah kan thangṭhat khawh. Cun thilnung hna hi ser an si ti a langhtermi kong aa ṭialmi ca rel na duh maw tiah kan hal khawh. A duh ahcun, Thilnung Pawl Hi Sermi An Si Maw? timi brochure kha kan pek khawh. Fimkhur te le nem tein bia kan hal hna ahcun mi lungthin chungah thawngṭha kan luhter khawh lai.

16. Baibal kan cawnpiakmi kha kan cawnmi cauk chung i aa ṭialmi a phi lawng zeicah kan pekter awk a si lo?

¹⁶ Tahchunhnak 3: Mi pakhat kha Baibal kan cawnpiak tikah, kan cawnmi cauk chung i aa ṭialmi a phi lawng kan pekter ahcun zeidah a cang kho? Biatak hngalhnak ah a ṭhangcho kho lai lo. Zeicah? A kong ṭha tein ruat loin a phi a pe lengmangmi cu a hram thukpi ah aa sih lomi thingkung he aa lo. Mi nih an ralchanh tikah biatak ṭanh aa harh lai. (Matt. 13:20, 21) Baibal a cawngmi kha bawmh khawh awkah a cawnmi zeitindah a hmuh kha hal a hau. A cawnmi a cohlan le cohlan lo le zeicah cutin a ruah ti kha hngalh i zuam. A zumhnak cu Baibal ah hram aa bunh nakhnga Baibal cang kha ṭha tein ruah awkah bawm. (Heb. 5:14) Biahalnak kha ṭha tein kan hman ahcun, Baibal a cawngmi cu biataklei ah a fek lai i mi nih an ralchanh asiloah a ping ah hruai an timh tikah zumhfek tein a um kho lai. (Kol. 2:6-8) Phungchimtu ṭha si awkah zeidah kan tuah khawh rih?

17, 18. Phungchimnak ah nan kalṭimi unau nih phung a chim lioah zeitindah na bawmh khawh?

¹⁷ Jesuh nih a zultu hna kha phungchimnak ah pahnih pahnih in a thlah hna. (Mar. 6:7; Luka 10:1) A hnuah lamkaltu Paul nih thawngṭha chimnak ah aa tel vemi a rian “ṭuan hawi” pawl kong kha a rak chim. (Fil. 4:3) 1953 ah bupi nih phungchimnak ah thawngthanhtu nih midang bawmh ding timi special program kha an rak tuah.

¹⁸ Phungchimnak ah nan kalṭimi unau nih phung a chim lioah zeitindah na bawmh khawh? (1 Korin 3:6-9 rel.) A relmi Baibal cang kha na Baibal ah kau ve. Bawmh a herh le herh lo na hngalh nakhnga inn-ngeitu he an i ruahmi kha ṭha tein ngai. (Pct. 4:12) Asinain thawngthanhtu nih ṭha tein a chim khawh ahcun asiloah inn-ngeitu nih bia a chim lio a si ahcun zei hmanh chim ve hlah. Na chim ahcun thawngthanhtu kha a tha na derter lai asiloah inn-ngeitu kha a lung na tuaiter lai. Tawi tein bia kaakhat kaahnih chim cu a palh lo, asinain na chim hnuah thawngthanhtu kha a bia na pehter ṭhan awk a si.

19. Zeidah kan i cinken awk a si, zeicah?

¹⁹ Innkhat hnu innkhat nan kal lioah phungchimtu ṭha si awkah zeitindah nan i bawmh khawh? Nan phungchim ning ṭhanchoter khawhning kha i ruah u. Nan phungchimnak sang i a ummi hna he aa tlai in lung a donghtermi kong kha i ruah hlah u. Unau pawl ṭhatlonak kong zong chim hlah u. (Ptb. 18:24) Kan dihlak in mitlinglo kan si ti kha kan i cinken awk a si. Jehovah nih a sung tukmi phungchimnak rian a kan peknak thawng in zaangfahnak a langhter. (2 Korin 4:1, 7 rel.) Cucaah phungchimtu ṭha si awkah kan si khawh chung kan i zuamnak thawng in thawngṭha kan sunsak kha langhter hna u sih.