1958 ah ka fapa Keri kha ka hrin i tlawmpal ah a ngan a dam lo ti kha ka hngalh. Siibawi pawl nih a zawtnak kha thla hra chung an kawl, mah hnu kum nga lawngah London i siilei mifim pawl nih a zawtnak kha an hngalh. Keri ka hrin hnu kum kua ah ka fanu Luwes kha ka hrin i anih cu Keri nakin a zual deuhmi zawtnak a ngeih caah ka ngaih a chia tuk.

“Na fale, an pahnih in LMBB * timi zawtnak an ngei i thlop ning zong a um rih lo” tiah siibawi te nih nem tein an ka ti. Mah lioah, cikor he aa tlaimi mah zawtnak kong kha mi nih an rak hngal set rih lo. Mah zawtnak a ngeimi hna cu an mit a rawk i a hnuah an mit a caw kho, an thau tuk, an kut dong le an ke dong hawi hlei in a tam, an ṭhan a nuar, an pum rianṭuanning aa ruang lo, zun thlum zawtnak le hliahhlok fah zawtnak an ngei i an kal a ṭhalo. Cucaah ka fale zohkhenh cu a har tuk. Nai i an tuahmi hlathlainak ah Britain mi 125,000 ah 1 cu mah zawtnak an ngei ti an hmuh, asinain mi tampi cu mah zawtnak kha tlawmpal an ngei men lai ti a si.

Va ka ngeihka ah Jehovah Tehte pakhat he Baibal kong kan rak i ruah i a chimmi biatak a si kha ka rak hngalh. Asinain kan pa cu ngaih a huam lo. A rian ruangah kan i ṭhial lengmang caah kaa pum kho lo. Asinain Baibal ka rel i Jehovah sinah thla ka cam zungzal. “Hremnak a ingmi hna caah BAWIPA cu himnak hmun a si i harnak caan ah ralhruang fek a si,” amah a kawlmi kha a “kaltak bal hna lo” timi kha ka rel tikah ka hna a ngam tuk.—Salm 9:9, 10.

Keri cu a mit a ṭhat set lo caah kum ruk a si ah England ram, thlanglei rilikam i a ummi a ṭha ngaimi sianginn ah kan chiah. A lungre a theihnak kong kha phone in a ka chimh lengmang, mah tikah Baibal phunglam a hngalhthiam nakhnga ka chimh. Luwes ka hrin hnu kum tlawmpal ah thahri le taksa fah zawtnak ka hun ngei. Keri cu kum 16 a si ah a sianginn in a rak kir. Asinain a mit cu a rawk chin i 1975 ah a mit cu a caw. 1977 ah kan pa nih a kan kaltak.

Keri a rak kir hnu tlawmpal ah, dawtnak a ngeimi Khrihfabu rianṭuannak ah kan i tel i 1974 ah tipil ka ing. Khrihfa upa pakhat nih Keri kha kum hra fai a si lio i a tonmi thlennak pawl tawnghtham khawh awkah a bawmh caah kaa lawm tuk. Unau dang nih inn rian an ka bawmh, a hnuah an lak i panga kha nawlngeitu hna nih kanmah zohkhenh awkah rian an pek hna. Mah cu thluachuah taktak a si!

Keri cu thlaraulei ah a ṭhangcho i 1982 ah tipil a ing. Manhcaan hmaikal ṭuan a duh tuk. Cucaah Keri he hmaikal ṭuanṭi awk le cutin kum tlawmpal ṭuan awkah bia ka khiak. Tlawmpal a rauh hnuah peng zohkhenhtu nih “Keri, ziah hmaanhmaan na ṭuan lo?” tiah a hal tikah ka fapa cu aa nuam tuk. Mah cu ka fapa nih a herhmi thapeknak a si i 1990 ah hmaanhmaan a ṭuan.

 Keri cu voihnih tiang a ṭawk ruh an thlen, voikhat cu 1999 ah a si i voikhat cu 2008 ah a si. Asinain Luwes cu Keri nakin a zual deuh. Anih cu a chuahka in a mit a caw, a ke khatlei ah kedong paruk a um ka hmuh tikah LMBB zawtnak a ngeih ve kha ka hun hngalh. A zawtnak an check tikah a chunglei thil tampi a rak rawk cang ti kha an hmuh. A kal voinga tiang an khuaihlaimi tel in pum khuaihlainak voi tampi an tuah. Keri bantukin zun thlum zawtnak zong a ngei.

Luwes nih khuaihlainak tuah tikah a chuak khomi buaibainak kha a hngalh. Cucaah pumhlaitu siibawi, siilei mifim pawl le rian ngeitu pawl kha thi rawnh a duh lonak kong a chimhcia hna. Cucaah a zohkhenhtu dihlak nih a sining kha ṭha tein an hngalhthiam.

Kan inn ah Jehovah biaknak he aa tlaimi thil tampi kan tuah. Chanthar electronic thilri a chuah hlanah Keri le Luwes kha suimilam tampi chung ca ka rak relpiak lengmang hna. Atu ah cun Baibal hlathlainak caah CD, DVD le www.pr418.com chung i awkhumhmi kha kan hman khawh cang, pumhnak zong ah hmualngei tein a phi kan pek khawh cang.

A caan ah Keri nih a phi a pekmi cu aa ciahmi a si nain, Phungchim Ning Cawnnak i a hmuhmi rian ah cun amah bia tein a chim. 1995 ah bu rianṭuantu a hung si i biakinn ah a rian a tam zungzal, unau pawl kha a conglawmh hna i seh tlaih zong a bawmh hna.

Keri cu a hliahhlok a fah caah lengkekual ṭhutnak ah a ṭhu i phungchim kal tikah unau pawl nih an nampiak. Unaupa pakhat bawmhnak thawng in biatak hngalh a duhmi pa pakhat kha Baibal a cawnpiak khawh. Kum 25 chung a cawlcang ti lomi unaunu zong tha a pek. Atu cu an pahnih in an i pum cang.

Luwes cu kum kua a si ah a pi nih thil tah a chimh i a zohkhenhtu pakhat le keimah nih pangpar suai kan chimh. Thil tah kha a zuam tuk caah Khrihfabu chung i ngakchia le upa pawl caah puan kha a zawng a phunphun in a tahpiak hna. Cun benh khawhmi hmanthlak tete in card zong a ser. Mah card kha a pekmi hna nih an duh ngai. Kum hra fai a si lioah seh in caṭial kha a cawng. Atu ah, a aw a chuak khomi computer hmang in a hawile he e-mail in pehtlaihnak an tuah zungzal. Kum 17 a si ah tipil a ing i phungchimnak campaign a um caan ah manhcaan hmaikal kan ṭuanṭi. “Mitcaw nih khua an hmuh lai” i ‘ram chung ah a ummi cu ka zaw tiah an zai ti lai lonak’ Pathian kamhmi vawlei thar a zumh kha langhter awkah Luwes nih Keri bantukin Baibal cang pawl kha cinken aa zuam.—Isa. 33:24; 35:5.

Jehovah thawchuah hnawhmi, a sunglawimi Baibal biatak kan hngalh caah kan i lawm tuk. Dawtnak a ngeimi unau pawl bawmhnak cung zongah kan i lawm tuk, zeicahtiah atu ah kan tuah khawhmi thil tampi hi anmah bawmhnak loin cun kan tuah kho lai lo. A bik in, Jehovah bawmhnak thawng in kan nunnak cu sullam a ngei taktak.