Kum 30 leng a si i nungak a simi unaunu Angela * cu Khrihfa upa pawl nih an len hnik tikah a thin a phang. Hitin khua a ruat: ‘Zei bia dah an ka chimh lai? Pumh ka bau pah tawn ti hi ka hngalh ko, asinain chun nitlak tar pawl zohkhenhnak rian ka ṭuan i inn ka ṭin tik ahcun ka ba tuk cang.’ Mah lengah a nu a dam lo ca zongah Angela cu a lungre a thei.

Angela sinah a leng hnikmi Khrihfa upa pakhat hei si law zeitindah tha na pek lai? A hmasa bik ah, “a bami” sin na len hlanah zeitindah naa timhtuah khawh?—Jer. 31:25.

Ahopaoh vawlei lei kan rian asiloah Pathian rian kan ṭuannak ah a caan ahcun kan ba tawn. Tahchunhnak ah, profet Daniel cu langhnak a hmuhmi a sullam a hngalhthiam lo tikah a “tha a dih.” (Dan. 8:27) Cucaah Jehovah nih a sullam chimh awkah le a thlacammi a theih kha chimh awkah vancungmi Gabriel kha Daniel sinah a rak thlah. Cun Jehovah nih “aan dawt” ti zong in vancungmi nih a rak chimh. (Dan. 9:21-23) Mah hnu zongah, a dang vancungmi pakhat nih Daniel kha cu bantuk bia in tha a rak pek ṭhan.—Dan. 10:19.

A tha a bami asiloah a lung a dongmi unau pakhat sin na va len hlanah a sining kha ṭha tein ruat hmasa. Zei harnak dah a ton? Mah nih zeitindah a tha a dihter? Zei bantuk ziaza ṭha dah a langhter? Khrihfa upa a ṭuannak kum 20 leng a si cangmi, unaupa Richard nih hitin a chim:  “A bik in unau pawl an ṭhatnak kha ka ruat. Ka len hna hlanah an sining kha ṭha tein ka ruah, mah nih an herh ningin thazaang pek awkah a ka bawmh.” Unau pakhat sinah Khrihfa upa dang he lenṭi nan i timh ahcun nan len hlanah mah unau i a sining kha i ruah hmasa u law a ṭha lai.

Unau pakhat cu Khrihfa upa sinah a intuarmi kha chimh aa harh kho men. Cucaah na lenmi unaupa nih zalong tein bia a chim ngam nakhnga zeitindah na bawmh khawh? A sin na phanh tikah hmaipanh tein le nem tein bia tlawmpal chim cu bawmtu a si kho men. Khrihfa upa a ṭuannak kum 40 leng a si cangmi unaupa Michael cu unau a len hna tikah hi bantuk bia hi a chim hmasa tawn: “Khrihfa upa nih kan hmuhmi tinvo sung pakhat cu unau pawl an inn i va len le anmah he ṭha tein i theihhngalh kha a si. Cucaah nihin kan in lenmi hi kaa ngaih tukmi a si.”

Unau pakhat kha na len tikah a hmasa bik ah thla nan camṭi khawh. Thlacamnak ah, mah unau i a zumhnak, dawtnak le inkhawhnak a ngeihmi ti bantuk a ṭhatnak tete kha na chim khawh. Lamkaltu Paul nih unau pawl ca thla a cam tikah cutin a rak tuah. (1 Thes. 1:2, 3) Nang zong cutin thla na cam ahcun mah nih thazaang a pemi bia i ruah awkah nan pahnih in nan lungthin kha a timhtuah lai. Mah lengah na va lenmi unau kha a hna a ngamter lai. Hmuhtonnak a ngeimi Khrihfa upa Ray nih hitin a chim: “Ahopaoh kan tuahmi thil ṭha kha a caan ahcun kan philh tawn. Mah kha pakhatkhat nih a kan chimh ṭhan tikah hrimhnak kan hmu.”

Paul bantukin, unau pawl bawmh awkah Baibal cangkhat te lawng na hman  hmanhah “thlarau thluachuah” kha na hrawm khawh hna. (Rom 1:11) Tahchunhnak ah, a lung a dongmi unau cu man ka ngei lo tiah aa ruat men lai. Mah tikah, a ro i a kormi “hlonhmi saphaw cua” he aa tahchunhmi salm caṭialtu kong kha na relpiak khawh. (Salm 119:83, 176) Mah cacang kha a tawinak in na fianter hnuah Pathian phunglam ‘a philh lo’ ti na zumh kha na chimh khawh.

Thlaraulei ah a cawlcang ti lomi asiloah Pathian rian ah tei a ma ti lomi unaunu kha Baibal hmangin zeitindah tha na pek khawh? Tangka tlau bianabia cu a caah thazaang petu a si kho men. (Luka 15:8-10) Mah tangka cu ngun tangka tampi thil in sermi a man a sungmi ṭhi pakhat chung in a tlaumi a si kho. Mah bianabia nan i ruahmi nih unaunu kha Khrihfabu ah man a ngeimi a si kha hngalh awkah a bawmh khawh. Mah hnuah nang cu Pathian tuu fate pakhat na si i aan zohkhenh lai tiah na ti khawh.

Unau pawl cu Baibal i an relmi kong chim kha an duh ngai. Cucaah nangmah lawng nih bia chim hlah. An sining he aa tlaimi cacang nan rel dih hnuah biafang pakhat asiloah biafangbu kha thim law a hmuhning kha hal. Tahchunhnak ah, 2 Korin 4:16 nan rel dih hnuah, “Jehovah nih zei lam hna in dah aan ‘tharter’ asiloah thazaang aan pek tiah na ruah?” tiin na hal khawh. Cu bantuk biahalnak nih nan pahnih caah thazaang petu a simi bia aan ruahter khawh hna lai.—Rom 1:12.

Unau pawl an sining he aa lomi, Baibal tuanbia nan i ruahṭinak thawng zongin tha na pek khawh hna. A lung a dongmi pakhat kha Hannah asiloah Epafroditas kong na chimh khawh. Annih cu an lung a dongh caan a um ko nain Pathian hmai ah mansungmi an si peng. (1 Sam. 1:9-11, 20; Fil. 2:25-30) Thapeknak caah na hman khawhmi Baibal tuanbia dang tampi a um rih.

Unau kha na va len hna hnu zongah an cungah siaherhnak langhter zungzal. (Lam. 15:36) Tahchunhnak ah, na ṭin laiah amah he phungchim kalṭi awkah na timhtuah khawh. Hmuhtonnak a ngeimi unaupa Bernard nih nai ah a lenmi unau pakhat he an i ton tikah ruahnak a cheuhmi he aa tlaiin “Zeitin, mah cu man a ngei maw?” tiah fimkhur tein a hal. Cutin siaherhnak na langhter ahcun bawmh an herhmi a dang a um le um lo kha na hngalh khawh lai.

Unau pawl cu voidang nakin zawnruah, hngalhthiam le dawt an herh. (1 Thes. 5:11) Cucaah tuukhal lennak na tuah hlanah, an sining kha ṭha tein ruat hmasa. Mah kong kha thla cam law na hman hngami Baibal cang kha ṭha tein thim. Cu tikah “a bami” caah hrimhnak a pemi bia kha na hngalh lai.