Naa Cinken Maw?

Nai ah chuahmi Vennak Innsang kha ṭha tein na rel maw? A tanglei biahalnak hna na phit khawh le khawh lo zohhmanh:

Ningcang loin Baibal hman timi ah zeidah aa tel, mah kha Khrihfa a simi nih zeitindah kan hmuh awk a si?

Mah ah Baibal an kau tikah an hmuh hmasa bikmi cacang nih tuah a herhmi a kan chimh ti zumh zong aa tel. A hmaanmi Khrihfa nih cun hmailei kong hngalh an i zuam lo. Mah nakcha cun a hmaanmi hngalhnak le Pathian lamhruainak hmuh awkah Baibal kha an hlathlai.—12/15, cahmai 3.

A lo hngami “vawlei” cu zeidah a si?

A lo hngami “vawlei” cu Pathian duhning in a nung lomi vawleicung mi vialte kha an si. (1 Johan 2:17) Vawlei le zumhfekmi minung tu cu an hmun lai.—1/1, cahmai 5-7.

Abel cu a thi cang ko nain zeitindah bia a chim rih? (Heb. 11:4)

Zumhnak in a chimmi a si. A zumhnak kha kan i cawn khawh i kan i zohchunh khawh. Anih cu tuchan tiang zohchunh awk ṭha a si.—1/1, cahmai 12.

Pathian he kan i hlat nakhnga lo zei hna dah kan i ralrin awk a si?

Kan i ralrin awk a simi thil cheukhat cu hihi an si: pawcawmnak le rian, hrimhnak le nuamhsaihnak ca i kan i thimmi, bu chungin chuahmi chungkhat he pehtlaihnak, chanthar thilri hmannak, ngandamnak kongah lungretheihnak, tangka cungah a hmaan lomi hmuhnak le kanmah hmuhning le sining kha a biapi tuk ah chiahnak.—1/15, cahmai 12-21.

Moses toidornak in zeidah kan i cawn khawh?

Moses cu a nawlngeihnak ruangah aa porhlaw lo, amahle amah si loin Pathian tu aa bochan. Kannih zong kan ṭhawnnak, kan nawlngeihnak asiloah kan thiamnak ruangah i porhlaw loin Jehovah tu bochan kan duh. (Ptb. 3:5, 6)—2/1, cahmai 5.

A thoṭhanmi hna cu khoika ah dah an um lai?

144,000 cu van ah an um lai. Asinain a thoṭhanmi tamdeuh cu vawlei ah an um lai i zungzal in an nung lai.—3/1, cahmai 6.

Israel mi cu “an chunglei in an cuarpar an i tan lo” ti tikah zeidah a chimduhmi a si? (Jer. 9:26)

Annih cu an lung a khong i doh an hmang, cucaah Jehovah nawlbia zei i a relter lomi ruahnak le duhnak vialte kha an hlawt a hau. (Jer. 5:23, 24)—3/15, cahmai 9-10.

Sullam a ngeimi nunnak ngeihnak ah Jesuh cu zeitindah zohchunh awk ṭha a si?

Jesuh cu Pathian duhnak tuah ding timi tinhnak a ngei. A Pa kha a dawt tuk i minung zong a dawt hna. Ka Pa nih a ka dawt i a lung ka tling ti zong aa hngalh. Mah hna cu sullam a ngeimi nunnak ngeih awkah a biapi bikmi an si.—4/1, cahmai 4-5.

Vawlei lei Pathian bupi ah zeidah aa tel?

Uktu bu, zung ṭengnge kawmiṭi, khualtlawng rianṭuantu, Khrihfa upa phu, Khrihfabu le unau pakhat cio an i tel.—4/15, cahmai 29.

Pathian biaceihnak cu a puarhrangmi a si lo tiah zeicah kan ti khawh?

Jehovah nih miṭhalo an thihmi kha a duh lo. (Ezek. 33:11) Mi kha bia a ceih hna hlanah dawtnak in ralrin a pek hmasa hna ti kha hlanlio i a tuahmi in kan hngalh khawh. Mah nih hmailei bia a ceih tikah kan luat kho lai timi ruahchannak a kan ngeihter.—5/1, cahmai 5-6.

Israel miphun nih misual mi hna kha tung cungah thlai in an that hna maw?

An that hna lo. Hlanlio i miphun dang nih cun cutin an tuah nain Israel mi nih cun an tuah lo. Hebru Baibal an ṭial lio caan ah misual pawl kha lung cheh ti bantukin an thah hmasa hna. (Lev. 20:2, 27) Mah hnuah an ruak kha midang ralrin peknak caah tung cungah an thlai.—5/15, cahmai 13.

Vawlei ah zeicah daihnak a um lo?

Minung nih thil tampi an tuah khawh ko nain anmahle anmah tu cu lam an i hruai kho lo. (Jer. 10:23) Vawlei hi Satan nih a uk caah mi nih daihnak an umter kho lo. (1 Johan 5:19)—6/1, cahmai 16.