Annih cu thlarau pum a ngeimi Pathian fapa hna an si ti a langhtermi thil a um. Mah cu zeidah a si?

Genesis 6:2 ah hitin aa ṭial: “[Minung] fanu hna an i dawh cu Pathian fapa hna nih khan an hmuh hna i cucaah an duhmi kha an i thim hna i an ṭhit hna.”

Hebru Baibal ah, “Pathian fapa hna” timi biafang kha Genesis 6:2, 4; Job 1:6; 2:1; 38:7 le Salm 89:6 (NW) ah kan hmuh. Mah Baibal cang hna nih “Pathian fapa hna” kong kha zeitindah a chim?

Job 1:6 ah kan hmuhmi “Pathian fapa hna” cu Pathian hmai ah aa pummi, thlarau pum a ngeimi an si ti cu a fiang ko. An lakah pakhat cu ‘vawleicung khuazakip i aa chawkmi’ Satan kha a si. (Job 1:7; 2:1, 2) Cu bantukin, Job 38:4-7 zongah “Pathian fapa vialte hna” kong kha kan hmuh i annih cu Pathian nih vawlei “a kil-lung kha a bunh” lioah “lunglawm in an au” tiah a ti. Mah lioah minung cu ser an si rih lo caah annih cu vancungmi an si hrimhrim ko lai. Salm 89:6 ah aa ṭialmi ‘Pathian fapa hna’ cu minung si loin van ah Pathian he a umṭimi thlarau pum a ngeimi an si.

Cu a si ah Genesis 6:2, 4 ah aa ṭialmi “Pathian fapa hna” cu ahote dah an si? A cunglei Baibal cang hna zoh tikah annih cu vawleicung ah a rami thlarau pum a ngeimi, Pathian fapa hna an si tiah ti khawh a si.

Vancungmi pawl nih nupa sualnak tuah an duh ti kha mi cheukhat nih cohlan an i harh. Matthai 22:30 ah aa ṭialmi Jesuh bia nih vancung ahcun ṭhitumnak le nupa umṭinak a um lo ti a langhter. Asinain, a caan ah vancungmi hna nih minung pum kha an i lak i minung he an ei, an dingṭi tawn. (Gen. 18:1-8; 19:1-3) Cucaah minung pum an i lak lioah nu pawl he an it ṭi kho tiah ti khawh a si.

Cutin vancungmi cheukhat nih an tuah ti zumh khawh a sinak a ruang Baibal ah a um. Judas 6, 7 nih hawi ning kel loin nupa sualnak a tuahmi Sodom khuami hna sualnak kha ‘hi vial hi nan nawl ngeihmi a si lai, tiah timi chung i um a duh lomi vancungmi hna’ sualnak he a tahchunh. Mah vancungmi hna le Sodom khuami hna nih an tuahmi sualnak cu hawi ning kel loin nupa sualnak an tuahmi kha a si. Mah kong aa ṭial venak 1 Piter 3:19, 20 nih nawl a ngai lomi vancungmi hna kha ‘Noah chan’ he a pehtlaihter. (2 Pit. 2:4, 5) Cucaah, Noah chan i nawl a ngai lomi vancungmi hna tuahsernak cu Sodom le Gomorrah khuami hna sualnak he tahchunh khawh a si.

Cucaah Genesis 6:2, 4 ah aa ṭialmi “Pathian fapa hna” cu minung pum i lak in nu pawl he nupa sualnak a rak tuahmi, vancungmi hna kha an si tiah ti cu aa tlakmi a si.

Mah thlarau hna nih “Noah nih tilawng a ser lio i lungsau in Pathian nih a ngan hna lioah khan, Pathian nawl cu an ngai duh lo” tiah lamkaltu Piter nih a ti. (1 Pit. 3:20) Satan nih Pathian a dohnak ah a ṭangmi vancungmi pawl kha Piter nih a chimduhmi a si ti cu a fiang ko. Judas nih “Pathian nih, hi vial hi nan nawl ngeihmi a si lai, tiah a ti i cu chung i a um duh lomi vancungmi hna kong” kha a chim. Annih cu “vawlei tang muihnak ah khin thir cikcin in zungzal an hren hna i sualphawt an si lai ni, ni lianngan a phak tiang cuka ahcun Pathian nih a chiah hna lai” tiah a chim.—Judas 6. 

Noah chan ah vancungmi hna cu zeitindah nawl an ngaih lo? Buanchukcho hlanah mah a ṭhalomi vancungmi hna nih minung pum an rak i lak, mah cu Pathian nih an caah a timhmi a si lo. (Gen. 6:2, 4) Cun minung fanu hna he nupa sualnak an tuah, mah cu phungning a si lomi thil a si. Pathian nih vancungmi hna kha nu he umṭi awk in a ser hna lo. (Gen. 5:2) Mah a ṭhalomi, nawlngai lomi vancungmi hna cu Pathian nih a khiahmi caan ah hrawh an si lai. Atu ahcun annih cu Judas nih a chim bantukin “vawlei tang muihnak” ah chiah an si. Phundang cun thong ah thlak bantuk an si.

Zeitikah le zeitindah Jesuh nih “thong i thlakmi thlarau hna” sinah phung a chim? Mah cu Jesuh a thawhṭhan hnuah a si tiah Piter nih a ṭial. (1 Pit. 3:18, 19) Cun Jesuh nih mah thlarau hna sin phung a chim cu Piter nih a cakuat pakhatnak a ṭial hlanah a si ti kha a hnu hmai bia nih a langhter. Cucaah a ṭhalomi thlarau hna sinah an in laimi dantatnak kong kha Jesuh nih a thawhṭhan hnu tlawmpal ah thanh sehlaw a lo. Mah cu ruahchannak a pekmi hna a si lo. Dantatnak kong a chimhmi hna tu a si. (Jonah 1:1, 2) Jesuh cu a thih tiang zumhfek tein a um i a thawhṭhanmi nih Satan cu a cungah nawl a ngeih lo kha a langhter, mah caan thawk in biaceihnak kong kha thanhnak nawl a ngei.—Johan 14:30; 16:8-11.

Hmailei ah Jesuh nih Satan le mah vancungmi hna kha a tlaih hna lai i dongh hngal lo khor ah a thlak hna lai. (Luka 8:30, 31; Biat. 20:1-3) Mah caan a phanh hlan tiang nawl ngai lomi vancungmi hna cu thlaraulei muihnak taktak ah an um lai i a donghnak ah hrawh an si taktak lai.—Biat. 20:7-10.