1, 2. Tuchan ah Jesuh nih rawlpetu ah aho dah a hman? Mah sal hngalh cu zeicah a biapit?

UNAUNU pakhat nih kan zungpi ah rian a ṭuanmi unau pawl sinah hitin lawmhnak ca a ṭial: “Unau hna, ka herhmi kong te aa ṭialmi capar kha ka herh tuk lio caante ah ka hmuh hi voi tam tuk a si cang.” Nang tah cutin na ruat ve maw? Unau tampi nih cun cutin an ruah. Mah cu khuaruahhar awk a si maw? A si lo.

² Kan herh lio te ah thlarau rawl kan hmuhmi nih Khrihfabu Lu a simi Jesuh nih rawl kaan pek hna lai tiah bia a kan kamh ning in a tuah ti kha a langhter. Jesuh nih rawlpetu ah aho dah a hman? A ratnak ding hmelchunhnak kong a chim lioah “zumhawk a tlakmi le a fimmi sal” kha “a sal hawi” “a caan hmaan tein rawl a petu dingah” ka hman lai tiah a ti. * (Matthai 24:45-47 rel.) Hi donghnak caan ah Jesuh nih a zultu pawl kha rawl pek awkah mah zumhawk tlak sal kha a hman. Aho dah zumhawk tlak sal a si ti hngalh cu a biapi tuk. Pathian he kan i pehtlaihnak cu zumhawk tlak sal sinin thlarau rawl kan hmuhnak cungah aa hngat.—Matt. 4:4; Johan 17:3.

3. Zumhawk tlak sal kong bianabia kha kan cauk nih zeitindah an rak fianter?

³ Zumhawk tlak sal he aa tlaiin Jesuh chimmi bianabia nih zeidah a chimduhmi a si? Hlanah kan cauk pawl nih hitin an fianter: AD 33, Pentekos ni ah Jesuh nih zumhawk tlak sal kha a sal hawi zohkhenh awkah rian a pek. Sal timi cu AD 33 hnu in atu tiang caan khatkhat ah vawleicung ah a nungmi chiti thuhmi phu kha a si. Sal hawi timi cu mah chiti thuhmi pakhat cio kha an si. 1919 thawkin Jesuh nih zumhawk tlak sal kha “a ngeihmi thil vialte” a pek. Mah thil cu vawleicung i Pennak kong chimnak rian he aa tlaimi kha a si. Asinain mah kong kha ṭha tein kan hlathlai i thlacam buin kan ruah hnuah Jesuh chimmi zumhawk a tlakmi le a fimmi sal  kong kan hngalhthiam ning thlen a herh ti kha kan hngalh. (Ptb. 4:18) Kan i ruahchanmi cu van a si ah vawlei a si ah mah bianabia he zeitindah kan i pehtlaih ti kha i ruah u sih.

4-6. Jesuh chimmi zumhawk tlak sal bianabia cu 1914 hnu lawngah a tling tiah zeicah kan ti khawh?

⁴ Matthai dal 24 i a dang cacang pawl nih zumhawk a tlakmi le a fimmi sal bianabia cu AD 33, Pentekos ni ah si loin hi donghnak caan ah a tling ti kha a langhter. Mah kong kha i ruah u sih.

⁵ Zumhawk tlak sal bianabia cu Jesuh nih a ratnak le donghnak caan he aa tlaiin a chimmi hmelchunhnak ah aa tel vemi a si. (Matt. 24:3) Matthai 24:4-22 ah aa ṭialmi chimchungbia cheu bang cu voihnih a tling. A voikhatnak cu AD 33 in 70 ah a si. A voihnihnak a simi a ngan deuhmi tlinnak cu kan chan ah a si. Cu a si ah zumhawk tlak sal kong Jesuh chimmi cu voihnih a tling lai tinak a si maw? A si lo.

⁶ Matthai 24:29 thawkin Jesuh nih kan chan ah a tling hngami thil kong kha a bik in a chim. (Matthai 24:30, 42, 44 rel.) Jesuh nih harnak nganpi ah a cang dingmi kong a chim lioah mi nih ‘mi Fapa cu vancung in a rat kha an hmuh lai’ tiah a ti. Cun donghnak caan ah a nung hngami hna caah hitin a chim: ‘Nan Bawipa a rat lai ni nan hngal lo,’ “Mi Fapa cu nan i rin lo caanpi ah a ra ko lai.” * Jesuh nih donghnak caan ah a cang hngami thil kong kha a chim hnuah zumhawk tlak sal bianabia kong kha a chim colh. Cucaah zumhawk tlak sal bianabia cu 1914, donghnak caan aa thawk hnu lawngah a tling ti cu a fiang ko. Mah cu aa tlakmi a si ko. Zeicah?

7. Donghnak caan aa thawk tikah zei a biapimi biahalnak dah a chuak, zeicah?

⁷ Mah biahalnak hi ruat ta hmanh: “Aho cu dah zumhawk a tlakmi le a fimmi sal cu a si?” Kumzabu pakhatnak ah mah cu hal a hau lomi a si. A hmasa capar ah kan hmuh cang bantukin lamkaltu hna nih khuaruahhar thil an tuah khawh i midang zong kha thlarau laksawng an pek khawh hna. Mah nih lamkaltu pawl cu Pathian nih a hmanmi hna an si ti a langhter. (Lam. 5:12) Cucaah Khrih nih hruaitu rian a pekmi hna cu ahote dah an si tiah ahohmanh nih an hal a hau lo. Asinain 1914 in thil sining cu aa thleng tuk cang. Mah kum ah rawlṭuan caan aa thawk. Rawl kung le belh kung ṭhen caan cu a hung phan cang. (Matt. 13:36-43) Rawlṭuan caan aa thawk tikah Jesuh zultu kan si tiah aa timi a hmaan lomi Khrihfa tampi an um. Cucaah a biapi tukmi mah biahalnak hi a chuak: Rawl kung a simi chiti thuhmi hna cu zeitindah hngalh khawh an si lai? Zumhawk tlak sal bianabia nih a phi a kan hngalhter. Khrih i chiti thuhmi a zultu hna cu an herhmi thlarau rawl a hmumi kha an si.

8. Zumhawk tlak sal cu chiti thuhmi Khrihfa hna in dirhmi a si tiah ti cu zeicah aa tlak?

⁸ Zumhawk tlak sal cu vawleicung ah a ummi chiti thuhmi Khrihfa hna in dirhmi a si a hau. Annih cu “siangpahrang tlangbawi” tiah auh an si i Pathian tuahmi khuaruahhar thil kong chim awkah rian pek an si. (1 Pit. 2:9) Cucaah “siangpahrang tlangbawi” ah aa telmi hna cu an unau pawl biatak cawnpiaktu an si lai ti cu aa tlakmi a si.—Mal. 2:7; Biat. 12:17.

9. Zumhawk a tlakmi le a fimmi sal cu chiti thuhmi dihlak in dirhmi a si maw? Fianter.

⁹ Zumhawk a tlakmi le a fimmi sal cu chiti thuhmi dihlak in dirhmi a si maw? A  si lo. Chiti thuhmi dihlak cu vawleicung ah a ummi unau pawl thlarau rawlpetu an si dih lo. An lak i cheukhat cu Khrihfabu ah bu rianṭuantu asiloah Khrihfa upa in rian an ṭuan. Zungpi in a rami lamhruainak kha zumhawk tlak tein an zulh i innkhat hnu innkhat phungchimnak ah le Khrihfabu ah an cawnpiak hna. Asinain annih cu vawleicung ah a ummi unau pawl thlarau rawl petu ah an i tel lo. Mah lengah chiti thuhmi hna lak i aa toidormi unaunu pawl zong nih Khrihfabu ah cawnpiaktu si ding in an i zuam bal lo.—1 Kor. 11:3; 14:34.

10. Zumhawk a tlakmi le a fimmi sal cu aho dah a si?

¹⁰ Zumhawk a tlakmi le a fimmi sal cu aho dah a si? Kumzabu pakhatnak ah Jesuh nih mi tlawmte hmang in mi tampi a dangh hna bantukin, mah sal cu 1919 thawk in thlarau rawl timhtuahnak le peknak ah aa telmi chiti thuhmi unaupa phu hmete in dirhmi kha a si. Donghnak caan chungah annih cu zungpi ah rian an ṭuan. Nai kum hrawng ah, mah sal cu Jehovah Tehte Hna i Uktu Bu in rian a ṭuan. Asinain Jesuh chimmi bianabia i “sal” timi biafang cu pakhat ca lawng a si kha i cinken. Cucaah Uktu Bu ah aa telmi hna cu hmunkhat te ah an phu ning in rian an ṭuanṭi i biakhiahnak an tuahṭi zungzal.

11, 12. (a) Zumhawk a tlakmi le a fimmi sal cu zei rian pahnih dah pek a si? (b) Jesuh nih zumhawk tlak sal kha a sal hawi zohkhenh awkah zeitik in dah rian a pek? Ahote dah a thim hna?

¹¹ Jesuh chimmi bianabia ah zumhawk a tlakmi le a fimmi sal cu rian pahnih pek a si ti kha i cinken. Pakhatnak cu a sal hawi zohkhenh kha a si i pahnihnak cu a bawipa ngeihmi thil vialte zohkhenh kha a si. Mah bianabia cu donghnak caan chung lawng ah a tlingmi a si caah mah rian pahnih cu Jesuh Siangpahrang a si kum, 1914 hnuah pek a si lai.

¹² Jesuh nih zumhawk tlak sal kha a sal hawi zohkhenh awkah zeitik ah dah rian a pek? Mah kha hngalh awkah 1914 i rawlṭuan caan aa thawk hnu in zei thil dah a cang ti kha tamdeuh in kan i ruah lai. A hmasa ah kan rak cawn cang bantukin mah lio caan ah Khrihfa kan si tiah aa timi phu tampi an um. Jesuh nih zumhawk tlak sal in zei phu dah rian a pek  hna lai? Jesuh le a Pa nih 1914 in 1919 a thawklei tiang biakinn an check hnuah mah cu hngalh a si. * (Mal. 3:1) Jehovah le a Bia a duh taktakmi zumhawk tlak Baibal Siangngakchia phu hmete nih Jesuh le a Pa kha an lung an ton hna. Asinain annih cu thenhnak cheukhat tuah an herh rih. Annih nih hneksaknak le thianhnak caan chungah an cawnpiakmi hna kha toidor tein an cohlan. (Mal. 3:2-4) Mah zumhfekmi Baibal Siangngakchia hna cu Jesuh chimmi bianabia i rawl kung a simi a hmaanmi Khrihfa kha an si. Anmah lakin 1919 ah Jesuh nih sining a tlinhmi chiti thuhmi unaupa hna kha a thim hna i zumhawk a tlakmi le a fimmi sal in a sal hawi zohkhenhtu ding ah rian a pek hna.

13. Sal hawi ah ahote dah an i tel ve, zeicah?

¹³ Sal hawi cu ahote dah an si? Thlarau rawl a hmumi kha an si. Donghnak caan a thawklei ahcun sal hawi timi cu chiti thuhmi dihlak kha an si. A hnu ah, tuudang ah aa telmi mibu nganpi zong sal hawi ah an hun i tel ve. Atu ah Khrih i “tuurun run khat” chungah, tamdeuh cu tuudang an si cang. (Johan 10:16) An phuhnih in zumhawk tlak sal nih a caan hman tein a pekmi hna thlarau rawl in ṭhatnak an hmu. Tuchan ah zumhawk a tlakmi le a fimmi sal in dirhmi Uktu Bu ah aa telmi hna tah zeitin? Mah unaupa hna zong nih thlarau rawl an herh ve. Cucaah a dang Khrihfa hna bantukin sal hawi kan si ve ti kha pakhat cio nih toidor tein an cohlan.

14. (a) Zumhawk tlak sal cu zei rian dah pek a si? Mah rian ah zeidah aa tel? (b) Jesuh nih zumhawk a tlakmi le a fimmi sal kha zeitindah ralrin a pek hna? (‘Sal Ṭhalo a Si ahcun . . . ’ timi rinli kulh kha zoh)

¹⁴ Jesuh nih zumhawk a tlakmi le a fimmi sal kha a biapi tukmi rian a pek. Baibal chan ah, zumhmi sal asiloah zohkhenhtu nih a bawipa ngeihmi thil vialte kha a tlangtlak. (Luka 12:42) Cu bantukin, zumhawk tlak sal cu vawleicung i Khrih ta a simi thil vialte kha tlangtlak awkah rian pek a si. Mah ah tangka, thilri, phungchim rian le civui program pawl aa tel. Mah lengah Khrihfabu pumhnak, pumpak Baibal hlathlainak ca le phungchimnak caah kan hmanmi Baibal hrambunhmi cauk pawl zong aa tel. Sal hawi hna nih zumhawk tlak sal hmang in pekmi thlarau rawl kha an i hngatchan.

15, 16. Jesuh nih zumhawk tlak sal kha a ngeihmi thil vialte zohkhenh awkah zeitik ah dah rian a pek?

¹⁵ Jesuh nih a pahnihnak rian a simi, ‘a ngeihmi thil vialte zohkhenh’ awkah zeitik ah dah rian a pek? Jesuh nih hitin a ti: “A bawipa nih a tlun tikah, a rian a rak ṭuan liote ah a run tanhmi sal caah cun lunglawmh awk a va si dah! Cu sal cu a bawipa nih a ngeihmi thil vialte zohkhenhtu ah a chiah hrimhrim lai, tiah kan chimh hna.” (Matt. 24:46, 47) “A rian a rak ṭuan liote ah,” chimduhmi cu thlarau rawl zumhawk tlak tein a pekmi kha Jesuh nih a hmuh hnuah a pahnihnak rian a pek ti kha i cinken. Cucaah rian pakhat le pakhat kar lakah caan zei maw a um lai. Jesuh nih a ngeihmi thil vialte zohkhenh awkah sal kha zeitin le zeitik ah dah rian a pek ti kha hngalh awkah mah thil pahnih hi kan hngalh a hau: mah cu zeitik ah dah a rat ti le a ngeihmi thil ah zeidah aa tel ti kha a si.

¹⁶ Jesuh cu zeitik ah dah a rat? Matthai dal 24 i a hmasa cacang pawl ah a phi cu kan hmuh. Mah cacang hna i Jesuh “rat” caan timi nih donghnak caan i miṭhalo pawl hrawh awkah a rat caan kha a chimduhmi a si ti kha philh hlah. * (Matt. 24:30, 42, 44) Cucaah zumhawk tlak sal bianabia i Jesuh “rat” asiloah “tlun” caan cu harnak nganpi chungah a si lai.

17. Jesuh ngeihmi thil ah zeidah aa tel?

¹⁷ Jesuh ngeihmi thil “vialte” ah zeidah aa tel? Jesuh ngeihmi thil ah vawleicung ah a ummi thil lawng hi si loin vancung ah a ummi thil zong aa tel. Jesuh nih “vancung le vawleicung i a ummi nawl ngeihnak vialte cu pek ka si cang” tiah a ti. (Matt. 28:18; Efe. 1:20-23) Atu cu a ngeihmi thil ah Messiah Pennak zong aa tel cang. Mah Pennak kha 1914 thawkin a hmuh i chiti thuhmi a zultu hna kha a hrawm ve hna lai.—Biat. 11:15.

18. Jesuh nih a ngeihmi thil vialte zohkhenh awkah zumhawk tlak sal kha zeicah lunglawm tein rian pek a duh?

 ¹⁸ Cucaah zeidah kan hngalh khawh? Harnak nganpi chungah Jesuh nih miṭhalo pawl hrawh awk i a rat tikah zumhawk tlak sal nih a sal hawi kha a caan hmaan tein thlarau rawl a pekmi hna kha a hmuh lai. Mah tikah Jesuh nih a ngeihmi thil vialte zohkhenh awkah lunglawm tein rian a pek lai. Zumhawk tlak sal ah aa telmi hna cu vancung ah an laksawng an hmuh tik le Khrih he an ukṭi tikah mah rian kha pek an si lai.

19. Zumhawk tlak sal cu a dang chiti thuhmi hna nakin vancung ah laksawng ngandeuh an hmu lai maw? Fianter.

¹⁹ Zumhawk tlak sal cu a dang chiti thuhmi hna nakin vancung ah laksawng ngandeuh an hmu lai maw? An hmu lai lo. Caan caankhat lioah phu hmete sinah kamhmi laksawng cu a hnuah midang zong nih an hmuh ve lai. Tahchunhnak ah, Jesuh nih a thih lai zan ah zumhfekmi lamkaltu 11 sinah a chimmi bia hi ruat hmanh. (Luka 22:28-30 rel.) Mah pa hna in dirhmi phu hmete cu zumhfek tein an um caah a ṭha tukmi laksawng nan hmuh lai tiah Jesuh nih bia a kamh hna. Amah he vancung ah siangpahrang an ṭuanṭi lai. Asinain kum tlawmpal hnuah, 144,000 dihlak cu amah he vancung ah siangpahrang kan ṭuanṭi lai tiah a chim. (Biat. 1:1; 3:21) Cu bantukin Matthai 24:47 zongah zumhawk tlak sal in dirhmi chiti thuhmi unaupa, phu hmete kha a ngeihmi thil vialte zohkhenh awkah rian kaan pek hna lai tiah bia a kamh hna. Asinain 144,000 an dihlak in Khrih ngeihmi thil zohkhenh awkah rian pek an si lai.—Biat. 20:4, 6.

20. Jesuh nih zumhawk tlak sal kha zeicah rian a pek? Zei tuah dah kan duh zungzal awk a si?

²⁰ Jesuh nih kumzabu pakhatnak ah mi tlawmte hmang in mi tampi a dangh hna bantukin tuchan zongah zumhawk a tlakmi le a fimmi sal hmang in mi tampi kha a dangh hna. Donghnak caan chungah Jesuh zultu taktak a simi, chiti thuhmi an si ah tuudang an si ah a caan hmaan tein thlarau rawl an hmuh peng nakhnga Jesuh nih zumhawk tlak sal kha rian a pek. Cucaah zumhawk a tlakmi le a fimmi sal ah aa telmi chiti thuhmi unaupa hna kha kan bawmh hnanak thawng in kan i lawmhnak kha langhter zungzal hna u sih.—Heb. 13:7, 17.