Biakinn ah bu chung in chuahmi cu khoika i a ṭhut zongah a poi lo. Mah mekazin nih bu chung in chuahmi fale cu inn ah a ummi an si rih ahcun nulepa nih thlaraulei bawmh awkah a forh hna. 1989, November 15, Vennak Innsang, cahmai 19 le 20 ah aa ṭial bantukin nulepa nih an sinah a ummi, a cuza rih lomi, bu chung chuahmi an fa kha Baibal hmanh an cawnpiak khawh. Mah nih an fa kha a palhnak i remh awkah a herhmi thazaang a hmuhter lai.

A cuza rih lomi bu chung in chuahmi cu biakinn ah a nu le a pa pawng ah dai tein a ṭhut ahcun a poi lo. Bu chung in chuahmi cu biakinn i a hnulei bik tlang ah ṭhut a hau lo, cucaah a nu le a pa cu khoika i an ṭhut hmanhah an pawng ah a ṭhu kho. An fale thlaraulei a zohkhenhmi nulepa nih an fa kha pumhnak in ṭhatnak hmu seh ti an duh ko lai. An fa kha a dang ah ṭhutter loin an sinah an ṭhuttermi nih ṭhatnak hmuh awkah a bawmh lai.

Bu chung in chuahmi cu a nu le a pa sinah a ummi a si ti lo ah tah zeitin? Nulepa he ṭhutṭi khawh a si lai maw? Hlanah rak chuahmi mah mekazin nih inn ah a um lomi, bu chung in chuahmi chungkhat he i pehtlaihnak kong ah ngeih a herhmi lungput kha fiang tein a langhter. * Asinain bu chung in chuahmi cu pumh chungah a chungkhat pawng ah dai tein ṭhut timi cu a chungkhat nih amah he a herh loin pehtlaihnak tuah timi he aa dang tuk. Zumhfekmi unau cu bu chung in chuahmi an chungkhat cungah aa tlakmi lungput an ngeih le amah he i pehtlaihnak kong ah Baibal ruahnak cheuhnak kha an zulh ahcun ṭhutnak kong ah lungretheih ding a um lo.—1 Kor. 5:11, 13; 2 Johan 11.

Bu chung in chuahmi cu pumhnak ah dai tein a ṭhut ahcun a chungkhat pawng a ṭhut zongah unau dang pawng a ṭhut zongah a poi lo. Khoika ah ṭhut ding timi rikhiahnak nih buaibainak a phunphun a chuahter khawh. Zumhfekmi chungkhar tel in zapi nih bu chung in chuahmi he aa pehtlaimi Baibal phunglam kha an zulh le unau pawl caah tlukrilhtertu a si lo ahcun pumhnak ah ṭhutnak he aa tlaiin zeihmanh lungretheih awk a um lo. *