Siria siangpahrang nih Pathian profet Elisha kha tlaih awkah a kawl. Tlang cungah a um i khua kulhnak vanpang a ummi, Dothan khua ah Elisha cu a um ti thawng a theih. Mah zan ah siangpahrang nih a ralkap pawl kha rang le rangleng he Dothan ah a thlah hna. Khua a dei tikah khua cu an kulh dih.—2 Si. 6:13, 14.

Elisha sinum cu a tho i leng a chuah tikah ralkap pawl kha a hmuh hna i a ṭih tuk. “Aize, ka bawipa! Zeidah kan tuah lai?” tiah a ti. Elisha nih “ṭih hlah, zeitintiah kan sin i a ummi hna cu an sin i a ummi hna nakin an tam deuh,” tiah a ti. Cun hitin thla a cam: “Maw Bawipa, a hmuh khawh nakhnga, a mit hi hun auter ko.” Mah tikah “Bawipa nih tlangvalpa mit cu a auter i a hmuh; cun zohhmanh, Elisha velchum ahcun, tlang cu rang le mei rangleng in a khat.” (2 Si. 6:15-17) Mah in zeidah kan cawn khawh?

Siria ralkap nih an kulh hna nain Elisha cu lungdai tein a um. Jehovah kha aa bochan caah Jehovah huhphenhnak kha a rak hmuh. Tuchan ah Jehovah nih khuaruahhar in a kan huhphenh lai tiah kan i ruahchan lo nain a miphun kha an phu ningin a huhphenh hna ti cu kan hngalh. Kannih zong rang le mei rangleng nih a kan huhphenhmi kha kan hmuh tiah ti khawh a si. Jehovah nih a miphun a kilven hna ti kan zumh le kan i bochan zungzal ahcun kan him tiah kan ruah lai i a thluachuah kan hmu lai. (Salm 4:8) Elisha nih a tonmi a dang thil sining in kan i cawn khawhmi kong i ruah rih u sih.

Nikhat cu, Elisha lei a thuan lioah profet Elijah cu a sinah a ra i a puan kha a aih. Cutin a tuah cu Elijah nih amah zohkhenhtu, phundang cun a sinum si awkah a sawmmi a si. Mah tikah Elisha nih a hawile caah rawldanghnak nganpi a tuah i a nu le a pa kha a chawnhbiak hna hnuah Elijah kha a zulh. (1 Si. 19:16, 19-21) Elisha nih Pathian fialmi zei rian paoh kha ṭuan a duh caah Jehovah nih lam tampi in a hman i a hnuah Elijah canah profet rian kha a pek. 

 Elisha cu Elijah sinah kum ruk hrawng rian a ṭuan. Mah caan chungah Elisha cu “Elijah kut i ti a toihtu” a si tiah Baibal nih a ti. (2 Si. 3:11) Mah cu zei sullam dah a si? Hlanlio ah mi cu an kut in rawl an ei tawn. An ei dih in an bawile an kut an i ṭawl tikah sinum nih ti an toih hna. Cucaah Elisha rian cheukhat cu thil hmete asiloah a biapi lomi a lo. Asinain Elijah sinum si kha tinvo sung in a hmuh.

Cu bantukin tuchan Khrihfa tampi zong caantling rian a phunphun an ṭuan. Zeicah? Jehovah an zumh caah le an si khawh chungin a rian ṭuan an duh caah a si. Cheukhat cu inn kha chuahtak in Bethel rian asiloah innsaknak rian ti bantuk an ṭuan. An ṭuanmi rian kha mi tampi nih thil hmete asiloah a biapi lomi in an hmuh men lai. Asinain kannih tu nih cun cutin kan hmuh awk a si lo. Jehovah nih a salle ṭuanmi zei rian paoh kha a sunsak.—Heb. 6:10.

Pathian nih Elijah kha “phuchim in van ah a cawi” hlanah Gigal in Bethel ah a kalter. Elijah nih Elisha kha rak um ta ko tiah a ti tikah “kaan umtak lai lo” tiah a leh. Khual an tlawn lioah Elijah nih Elisha kha rak um ta ko tiah voihnih tiang a ti chap nain a duh lo. (2 Si. 2:1-6) Ruth cu Naomi sinah zumhfek tein a um bantukin Elisha cu Elijah sinah zumhfek tein a um ve. (Ruth 1:8, 16, 17) Zeicah? Elijah rian ṭuanpiak awkah Pathian nih rian a pekmi kha a sunsak caah a si.

Elisha cu kan caah zohchunhawk ṭha taktak a si. Pathian bupi chungah rian kan hmuh tikah Jehovah rian kan ṭuanmi a si ti kan i cinken zungzal ahcun mah rian kha kan sunsak lai. Mah nakin a sunglawi deuhmi zeihmanh a um lo.—Salm 65:4; 84:10.

Khual an tlawn lioah Elijah nih Elisha kha “nangmah sinin lak ka si hlanah hin zeidah kaan tuahpiak lai, ka hal tuah” tiah a ti. Mah hlanpi ah Solomon nih Pathian a rak hal bantukin Elisha zong nih a hal ve. Elisha nih “na thlarau hi a let hnih in ka coter tuah tiah kaan nawl” tiah a ti. (1 Si. 3:5, 9; 2 Si. 2:9) Elisha halmi cu zeidah a si? Israel mi nih fater kha ro let hnih in an pek hna. (Deut. 21:15-17) Cucaah Elisha nih Elijah ro co awkah a halmi a si, phundang cun amah zaka in profet rian ṭuan awkah a halmi a si. Cun Elijah bantukin a hmaanmi biaknak caah ralṭhatnak le lungthawhnak ngeih a duh ruangah Elijah thlarau asiloah lungput kha a halmi a si.—1 Si. 19:13, 14.

Mah a halmi kha Elijah nih zeitindah a leh? Hitin a ti: “Thil har ngai na ka hal; asinain, nangmah sinin lak ka si lio kha na ka hmuh ahcun, mah cucu na ta a si ko lai; sihmanhsehlaw na ka hmuh lo ahcun, cu bang cun a si lai lo.” (2 Si. 2:10) Elijah bia cu sullam pahnih a ngei. Pakhatnak ah, Elisha nih a halmi a hmuh lai le hmuh lai lo cu Pathian lawng nih bia a khiah khawh. Pahnihnak ah, Elisha nih mah kha hmuh a duh ahcun zei thil a can hmanhah Elijah sinah a um a hau.

Elisha halmi kha Pathian nih a pe maw? Baibal nih hitin a ti: “An kal lengmang i bia an i ruah lio lengmang ahcun, zohhmanh, mei rangleng pakhat le mei rang hna nih annih pahnih cu an ṭhen hna. Cun Elijah cu phuchim in vancung ah a kai. Cun Elisha nih khan mah cucu a hmuh.” * Mah cu Elisha halmi kha Jehovah nih a lehmi a si. Elisha nih Elijah an kalpimi kha a hmuh, Elijah thlarau let hnih kha a hmuh i amah zaka ah Pathian profet a hung si.—2 Si. 2:11-14.

Elijah nih a thlakmi puan kha Elisha nih aa lak i aa hruk. Cutin aa hrukmi kha mi nih an hmuh tikah Pathian profet a si cang ti kha an hngalh. Mah hnuah Jordan Tiva kha cheu hnih ah a cheunak thawngin Pathian profet a si kha a langhter.

Phuchim in Elijah an lak lio a hmuhmi kha Elisha nih zeitikhmanh ah a philh kho lai lo. Mei rang le mei rangleng hmuh ahcun ahopaoh an khuaruah a har tuk ko lai. Mah nih Elisha halmi kha Jehovah nih a pek ti a langhter. Kannih tu cu Pathian nih kan thlacamnak a kan leh tikah mei rang le mei rangleng langhnak kha kan hmu lai lo. Asinain Pathian nih kanmah bawmh awk le a duhnak tlinter awkah a ṭhawnnak a hman ti kha fiang tein kan hmuh khawh ko. Cun Jehovah nih vawleicung ah a ummi a bupi thluachuah a pekmi kan hmuhmi hi vancung  leng kekual a rianṭuannak kan hmuhmi bantuk a si.—Ezek. 10:9-13.

Elisha nih Jehovah i a liannganmi ṭhawnnak zumh awkah a bawmmi thil tampi a ton. Pathian thiang thlarau nih Elisha kha khuaruahhar thil pa 16 a tuahter. Mah cu Elijah tuahmi i a let hnih a si. * Elisha nih rang le mei rangleng a voihnihnak a hmuh cu Dothan khua ah a si i Siria ralkap nih an kulh lioah a si.

Dothan khua ah Elisha cu ral nih an kulh nain lungdai tein a um. Zeicah? Jehovah cungah a fekmi zumhnak a ngeih caah a si. Kannih zong cu bantuk zumhnak ngeih kan herh ve. Cucaah zumhnak le thlarau nih a chuahtermi a dang ziaza pawl ngeih khawh awkah Pathian sinah thlacam in a thiang thlarau hal hna u sih.—Luka 11:13; Gal. 5:22, 23.

Dothan ah a cangmi thil nih Elisha kha Jehovah le vancung a ralkap pawl i bochan chin awkah a bawmh ko lai. Pathian nih khua kha kulh awkah le Elisha kha a ral hna kut in khamh awkah vancungmi kha a thlah hna. Cun an ral pawl kha an mit a cawtter hnanak thawngin Elisha le a sinum pa kha a khamh hna. (2 Si. 6:17-23) Ṭihnungmi mah caan le caan dang ah Elisha nih Jehovah a zumh le aa bochan taktak kha a langhter.

Elisha bantukin Jehovah Pathian kha i bochan hna u sih. (Ptb. 3:5, 6) Cutin kan tuah ahcun Pathian nih ‘a kan zaangfah lai i thluachuah a kan pek’ lai. (Salm 67:2) Kannih cu mei rang le rangleng taktak nih cun a kan kulh lo ti cu a hmaan ko. Asinain a ra laimi ‘harnak nganpi’ ah Jehovah nih a miphun dihlak kha a kan huhphenh lai. (Matt. 24:21; Biat. 7:9, 14) Mah caan a phanh hlan tiang Pathian cu “kan himnak a si” ti kha i cinken zungzal hna u sih.—Salm 62:8.