“FALE hi BAWIPA sinin kan hmuhmi ro an si, thluachuah a kan pekmi an si” tiah Baibal nih a ti. (Salm 127:3) Nulepa cu fa an hun ngeih tikah an i nuam tuk.

An i nuamh lawng si loin a biapimi rian zong an hun ngei. An fale ngandam tein an ṭhan khawh nakhnga vitamin aa telmi rawl kha nifate an pek hna a hau. Mah lengah Jehovah he pehtlaihnak ṭha an ngeih nakhnga an cawnpiak hna a hau i Pathian phunglam kha an chimh hna a hau. (Ptb. 1:8) Zeitik in dah an fale kha an cawnpiak hna awk a si i zei kong dah an cawnpiak hna awk a si?

Israel ram, Zorah khua ah a ummi Manoah timi pa kong hi ruathmanh. Manoah nupi cu a cingmi a si nain vancungmi nih fapa na ngei lai tiah a chimh. (Biac. 13:2, 3) Mah bia an theih tikah an nuva in an i nuam tuk nain an fa kha zeitindah a ṭha bik in kan cawnpiak lai timi kongah an lungre zong a thei. Cucaah Manoah cu hitin thla a cam: “Maw BAWIPA, Pathian mi na rak thlahmi kha kan sinah ra ṭhan ko sehlaw, a chuak lai dingmi ngakchia cu zeitindah kan tuah lai ti kha kan cawnpiak seh tiah kaan nawl.” (Biac. 13:8) Manoah le a nupi nih an fapa Samson kha Pathian nawlbia an cawnpiak i an fapa zong nih a cohlan ve. Jehovah thiang thlarau nih Samson kha Israel mi hna biaceihtu in khuaruahhar thil tampi tuah khawh awkah a bawmh tiah Baibal nih a ti.—Biac. 13:25; 14:5, 6; 15:14, 15.

Nulepa nih an fale kha zeitik in dah an cawnpiak hna awk a si? Timote kha a nu, Zunis le a pi Lois nih a “ngakchiat lio tein” Jehovah kong an rak cawnpiak. (2 Tim. 1:5; 3:15) Cucaah fale kha an ngakchiat lio tein Jehovah kong cawnpiak awk a si.

Khrihfa nulepa nih an fale kha an “ngakchiat lio tein” an cawnpiak khawh hna nakhnga i timhlamh le lamhruainak hmuh awkah thlacam a hau. Phungthlukbia 21:5 ah “teimaknak le a hlankan in ṭha tein thil rak ruah chungnak nih duhdimnak kha a chuahter” tiah aa ṭial. (Ptb. 21:5) Nulepa cu nau a chuah hlan in ṭha tein an i tim chung ko lai. Nau caah a herh hngami thil vialte kha cazin hmanhin an tuah men ko lai. Mah lengah an fate kha Jehovah kong zeitindah kan cawnpiak lai ti zong i timh chung a biapi. Nau a chuah hnu tlawmpal ah cawnpiaknak thawk ding in an i tinh awk a si.

Ngakchia an ṭhannak kong a fiantermi cauk pakhat nih ngakchia a chuah in thla tlawmpal hrawng hi a thluak zokzok in a ṭhan caan a si i thil thar kha fawi tein a cawn khawh tiah a ti. Cucaah mah lio caan ah nulepa nih Jehovah kong le a phunglam kong cawnpiak cu a biapi tuk.

Fa a ngeimi hmaanhmaan a ṭuanmi unaunu nih a fanu kong kha hitin a chim: “Ka fanu thlakhat a si in phungchimnak ah kaa kalpi cang. Zeihmanh a hngal rih lo nain phungchimnak ah kaa kalpimi in ṭhatnak a hmu tiah ka zumh. Kum hnih a si ah phungchimnak i a tonmi hna kha cazual a pek khawh cang hna.”

Nulepa nih an fale kha an ngakchiat tein an cawnpiakmi hna nih ṭhatnak a chuahter. Asinain cutin tuah cu a fawi zungzal lo ti kha an hngalh.

Ngakchia cu an lung vaivuanh a fawi tuk caah cawnpiak awkah nulepa nih an i harh ko lai. Ngakchia cu an duhmi aa thleng colh lengmang. Cun thil thar hngalh an duh i an pawngkam thil kha hngalh awkah an i zuam. Nulepa cawnpiaknak kha fale nih an ngaih nakhnga nulepa nih zeidah an tuah khawh?

Moses chimmi hi ruathmanh. Deuteronomi 6:6, 7 ah hitin kan hmuh: “Nihin ah kaan pekmi bia hi na lung chungah an riak lai i na fale kha fel tein na cawnpiak hna lai i, na inn chung i na ṭhut ah siseh, lam i na kal ah siseh, na ih ah siseh, na thawh ah siseh, na chimh lengmang hna lai.” Mah cacang nih nulepa nih an fale an cawnpiakmi hna kha atu le atu an nolh ṭhan awk a si ti a langhter. Ngakchia cu ti tlawm tete in toih lengmang a haumi thingkung fate he an i lo. Upa nih a kong pakhat kha an theih ṭhan lengmang ahcun an i cinken deuh bantukin ngakchia zong an si ve.

Fale kha Pathian kong biatak cawnpiak awkah nulepa nih caan lak a hau. Asinain nulepa cu an rian a tam tuk caah cutin tuah cu a fawi lo. Lamkaltu Paul nih a biapimi thil caah “caanṭha” kawl awk a si tiah a ti. (Efe. 5:15, 16) Cutin nulepa nih zeitindah an tuah khawh? Khrihfa upa pakhat cu Khrihfabu rian lawng si loin pawcawmnak rian zong a ṭuan. A nupi zong hmaanhmaan a ṭuan i a rian a tam ngai. An nuva in an fanu cawnpiaknak le Khrihfabu rian ṭuannak ah a caan a za in an pek khawh nakhnga ṭha tein an timhtuah. Zeitindah an tuah? Mah unaupa nih hitin a ti: ‘Zinglei,  rianṭuannak i ka kal hlanah kan nu he Cathiang kha Nifate Ṭha tein Rel asiloah Ka Baibal Tuanbia Cauk kha kan relpiak. Zanlei, kan fanu a ih hlanah ca kan relpiak i phungchim kan kal tikah kan kalpi ve. A ngakchiat lio tein cawnpiaknak caanṭha kan hmuhmi kha tlolh kan duh lo.’

Kan fale kha an upat tikah rian a hngalmi si hna seh ti kan duh hna nain kan cawnpiak hnanak a biapi bikmi a ruang cu Pathian kha an lungthin dihlak in daw hna seh ti kan duh caah a si.—Mar. 12:28-30.

Salm 127:4 nih hitin a ti: “Mipa nih a no lioah a ngeihmi fapa hna cu ralkap kut chung cantiang bantuk an si.” Baibal nih fale kha hmuichon ah ṭha tein tinh a haumi cantiang he a tahchunh hna. Thal kah thiampa kut ah cantiang cu chikkhat lawng a um i a kah cangmi cantiang cu a la kho ṭhan ti lo. Cu bantukin fale cu nulepa sinah an cutzat hlan tiang chikkhat lawng an um. Cucaah mah caan chungah fale kha Pathian nawlbia duh awk le zulh awkah cawnpiak cu a biapi tuk.

Thlaraulei a fale he aa tlaiin lamkaltu Johan nih hitin a ṭial: “Ka fale biatak chungah khua an sa ti thawng hleiin a ka lawmhter deuhtu zeihmanh a um ti lo.” (3 Johan 4) Khrihfa nulepa zong nih an fale ‘biatak chungah khua an sakmi’ an hmuh tikah cutin an chim khawh ve lai.