1, 2. Pathian mithmai ṭha hmuh awkah zeidah kan tuah a herh?

MI NIH zeitindah a kan hmuh ti kha mi tampi nih hngalh an duh. Asinain Khrihfa a simi nih cun Jehovah nih zeitindah a kan hmuh ti kha hngalh kan duh deuh awk a si. Zeicahtiah Jehovah cu van le vawlei ah a lianngan bikmi a si i “nunnak vialte hram” a si.—Salm 36:9.

² Lamkaltu Piter nih Jehovah mithmai ṭha hmuh awkah “nan nunning cu a thiangmi le Pathian sin i pekmi an si awk a si” tiah a ti. (2 Piter 3:11 rel.) Kan lungthin, kan tuahsernak le thlaraulei kan thian lawngah kan “nunning” cu a thiang lai. Cun Pathian kan dawtnak le kan upatnak thawngin “Pathian sin i pekmi” kan si zong a hau. Cucaah kan tuahsernak lawng si loin kan ruahnak zong hi Pathian caah a biapimi a si. Jehovah nih minung ‘lungthin kha a hneksak’ caah kan tuahsernak a thian le thian lo le amah lawng kan biak le biak lo kha a hngalh.—1 Chan. 29:17.

3. Zei bia dah kan i hal awk a si?

³ Satan Khuachia nih Pathian mithmai ṭha hmuhter a kan duh lo. Cucaah Jehovah he kan i pehtlaihnak a rawh nakhnga a tuah khawhmi zei thil paoh a tuah. Jehovah kan biak ti nakhnga lo hlen awkah Satan nih lih a chim lengmang. (Johan 8:44; 2 Kor. 11:13-15) Hitin kan i hal awk a si: ‘Satan nih zeitindah mi kha a hlen hna? Jehovah he kan i pehtlaihnak kilven awkah zeidah ka tuah khawh?’

4. Pathian he kan i pehtlaihnak hrawh awkah Satan nih zeidah a hmuichon ah a chiah, zeicah?

⁴ Zultu Jeim nih hitin a ṭial: “Mi nih tukforhnak kan in cu, kan duhnak a ṭhalomi khan a kan pialpi i rap ah  a kan foih caah a si tawn. Cu tikah thil ṭhalo duhnak nih cun sualnak kha a pawi i a hrin; cun sualnak cu a ṭhan i patling a si tikah thihnak kha a hrin.” (Jeim 1:14, 15) Satan nih Pathian he kan i pehtlaihnak hrawh awkah kan duhnak a ratnak, kan lungthin kha hmuichon ah a chiah.

5, 6. (a) Satan nih kan lungthin kha uk awkah zeitindah aa zuam? (b) Satan nih kan lung chungah a ṭhalomi duhnak a um nakhnga zei thil pathum dah a hman? Mah thil hna hman kha zeitlukin dah a thiam?

⁵ Satan nih kan lungthin kha uk awkah zeitindah aa zuam? “Vawlei hi a pumpi in mi ṭhalopa kuttang ah a um” tiah Baibal nih a ti. (1 Johan 5:19) Satan nih a hmanmi hlennak ah vawlei “chung thilri” zong aa tel. (1 Johan 2:15, 16 rel.) Satan nih mi hlen awkah vawlei kha fimzer ngaiin a hmannak hi kum tampi a si cang. Kannih zong hi vawlei ah kan um caah Satan hlennak in kan i kilven a hau.—Johan 17:15.

⁶ Satan nih kan lung chungah a ṭhalomi duhnak a um nakhnga aa zuam. Cutin umter awkah lamkaltu Johan nih a chimmi vawlei “chung thilri” pathum kha a hman. Mah cu (1) “pumsa duhnak,” (2) “mi nih zoh an duhmi thil,” le (3) “mi nih porhlawtnak ah an hmanmi thil” hna kha an si. Satan nih mah thil pathum kha hmangin Jesuh kha ramlak ah a rak tukforh. Mah thil hna kha kum tampi chung a hman cang caah a hmanning a thiam tuk cang i aho kha dah, zei in dah ka tukforh lai ti kha a hngalh. Satan hlennak in i kilven ning kan i ruah hlanah Satan nih Evi kha zeicah a hlen khawh i Pathian Fapa kha zeicah a hlen khawh lo timi kong i ruah hmasa u sih.

7. Satan nih Evi hlen awkah “pumsa duhnak” kha zeitindah a hman?

⁷ Nunnak caah rawl ei a hau. Sertu nih vawlei kha rawl tampi chuahter awk in a ser. Satan nih tirawl kan duhnak kha hmangin Pathian duh lomi thil tuah awkah a kan tukforh ko lai. Cutin Evi kha zeitindah a rak tukforh ti kha i ruah u sih. (Genesis 3:1-6 rel.) Satan nih Evi kha “a ṭha le a ṭhalo hngalh khawhnak a pe khotu thingkung” i a thei na ei ahcun na thi lai lo tiah a ti. Cun na ei ahcun Pathian bantuk na si lai ti zong in a ti. (Gen. 2:9) Khuachia nih Evi kha na nun khawh peng nakhnga Pathian nawl ngaih a hau lo tiah a ti duhnak a si. Mah cu lih bia a si. Mah ruahnak kha Satan nih Evi lung chungah a rawn hnuah Evi cu thim ding pahnih a ngei: Mah kha a al khawh, asiloah mah kong kha ruat in thingthei ei a duhnak kha a ṭhanter khawh. A dang thingthei kha a ei khawh ko nain dum laifang ah a ummi thingkung kong tu kha a ruat zungzal. Cucaah mah thingthei kha a ei.  Satan nih Evi lung chungah Sertu nih a thlauhmi thil tuah duhnak kha a umter.

8. Satan nih Jesuh tukforh awkah “pumsa duhnak” kha zeitindah a hman? Zeicah a hlawh a tlin lo?

⁸ Satan nih Jesuh zong kha cutin a rak tukforh ve. Jesuh cu ramlak ah rawl loin ni 40 le zan 40 chung a um lioah Satan nih rawl ei duhnak kha hmangin a rak tukforh. “Pathian Fapa na si ahcun, hi lung hi changreu ah i cang tiah ti tuah ngat” tiah a ti. (Luka 4:1-3) Jesuh cu thim ding pahnih a ngei: Rawl ei a duhnak kha tlinter awkah a ṭhawnnak a hman khawh asiloah hman loin a um kho. Asinain mah ca ṭhatnak caah a ṭhawnnak hman awk a si lo ti kha a hngalh. A paw a ṭam ko nain rawl nakin Pathian he an i pehtlaihnak kha biapi deuh ah a chiah. Cucaah hitin a leh: “Cathiang nih pei, ‘Minung nunnak hi rawl lawngin a si lo,’ a ti cu.”—Luka 4:4.

9. “Mi nih zoh an duhmi thil” timi cu zeidah a si? Satan nih Evi a hlen lioah mah kha zeitindah a hman?

⁹ Satan hmanmi thil ah Johan nih a chimmi “mi nih zoh an duhmi thil” zong aa tel. Mah cu thil pakhat kha zoh sawhsawhnak in hun duh khawh a si tinak a si. Satan nih Evi a hlen lioah mah duhnak kha a hman i “hngalhnak nan ngei” lai tiah a ti. Evi nih mah thei kha a zoh deuhdeuh tikah ei a duh deuhdeuh ve. Mah thingkung cu “mithlaang ngai a si” kha a hmuh.

10. Satan nih Jesuh tukforh awkah “mi nih zoh an duhmi thil” kha zeitindah a hman? Jesuh nih zeitindah a leh?

¹⁰ Satan nih Jesuh tukforh awkah “mi nih zoh an duhmi thil” kha zeitindah a hman? Satan nih “vawleicung ram vialte kha a hmuhsak dih. Khuachia nih cun a thawh i, ‘Hi lianhngannak vialte le hi chawva vialte hi kaan pek lai. A dihlak hin keimah pek ka si cang i ka duhmi paoh ka pek khawh hna’” tiah a ti. (Luka 4:5, 6) Jesuh nih vawleicung pennak taktak kha si loin an sunparnak tu kha langhnak in a hmuhmi a si. Jesuh cu a hmuhmi nih a tukforh lai tiah Satan nih a ruah ko lai. Cucaah “ka hmaiah na khuk naa bil ahcun hi vialte hi na ta an si dih ko lai” tiah a ti. (Luka 4:7) Asinain Satan nih siter a duhmi ningin si cu Jesuh nih a duh hrimhrim lo. Cucaah hitin a al colh: “Cathiang nih pei, ‘Bawipa na Pathian cu na biak lai i amah rian lawng kha na ṭuan lai,’ a ti cu.”—Luka 4:8.

11. Satan nih Evi kha zeitindah a hlen?

¹¹ A donghnak ah, Johan nih “mi nih porhlawtnak ah an hmanmi thil” kong  kha a chim. Vawleicung ah Adam le Evi lawng an rak um lioah an ngeihmi thil kha mi hmaiah porhlaw ngaiin an langhter kho lo. Asinain an i porhlaw. Satan nih Evi kha na hmuh awk a simi, a ṭha tukmi thil kha Pathian nih aan pe duh lo tiah a zumhter. Cun “a ṭha le a ṭhalo hngalhnak pe khotu thingkung a tlai” nan ei ahcun Pathian “bantukin hngalhnak nan ngei ve lai i a ṭha le a ṭhalo kha nan hngal ve lai” tiah a ti. (Gen. 2:17; 3:5) Satan nih Evi kha Jehovah loin nun khawh a si ko tiah ruahter a duh. Evi nih mah hlennak a zumh cu aa porhlawt caah a si kho men. Thlauhmi thingthei kha a ei i ka thi lai lo tiah a ruah. Mah cu a palh tuk.

12. Satan nih Jesuh tukforh awkah zei thil dah a hman rih, Jesuh nih zeitindah a leh?

¹² Evi he i lo loin Jesuh nih cun toidornak kongah zohchunhawk ṭha a chiah. Satan nih Jesuh kha mi lungthin a la hngami thil tuah in Pathian kha hneksak awkah a forh. Asinain mah cu porhlawtnak langhter a si lai caah Jesuh nih fakpi in a al. “Cathiang nih pei, ‘Bawipa na Pathian cu va hneksak hlah,’ a ti ve kha” tiah fiang tein a leh.—Luka 4:9-12 rel.

13, 14. Tuchan ah, Satan nih zeitindah a kan hlen?

¹³ Tuchan zongah Satan nih Evi le Jesuh sinah a rak hmanmi hlenning kha a hman rih. Mi kha an ziaza a rawh nakhnga asiloah tam tuk in an eidin nakhnga tukforh awkah “pumsa duhnak” kha a hman. Mi nih a thurhnawmmi hmanthlak an zoh nakhnga a hleiin Internet ah an zoh nakhnga tukforh awkah “mi nih zoh an duhmi thil” kha a hman. Mi nih an i porhlawt nakhnga nawlngeih, minthan le thilri chawva an duh chin nakhnga tukforh awkah “mi nih porhlawtnak ah an hmanmi thil” kha a hman.

¹⁴ Ngatlaitu nih nga tlaih awkah nga rawl an hman bantukin Satan nih vawlei “chung thilri” kha a hman ve. Nga rawl cu nga caah mithlaang ngai a si nain a chungah sio a um. Cu bantukin Satan nih Pathian nawlbia he aa ralchanhmi thil tuahter awkah a sawhsawh te a lomi thil kha a hman. Pathian duhnak tuah nakin kan herhmi thil kawl le nuam tein nun khawh awkah i zuam cu a biapi deuh tiah ruahter a kan duh. Nangtah Satan kha naa hlenter lai maw?

15. Jesuh bantukin Satan hlennak kha zeitindah kan tei khawh?

 ¹⁵ Satan nih Evi cu a hlen khawh nain Jesuh tu cu a hleng kho lo. Satan nih hlen awk i aa zuam fatinte Jesuh nih “Cathiang nih pei . . . a ti cu” “Cathiang nih pei . . . a ti kha” tiah Baibal hmangin a leh. Kannih zong Baibal kha teima tein kan hlathlai ahcun Baibal kha ṭha tein kan hngalh lai i tukforhnak kan ton tikah a kan bawm hngami Baibal cang kha kan hngalh khawh lai. (Salm 1:1, 2) Zumhfekmi Pathian salle kong i cinkennak nih anmah bantukin zumhfek tein um awk a kan bawmh lai. (Rom 15:4) Jehovah kan upat taktak ahcun, phundang cun a duhmi kan duh i a huatmi kan huat ahcun mah nih a kan kilven lai.—Salm 97:10.

16, 17. Kan ‘khuaruah khawhnak’ cu zei bantuk minung dah kan si timi cungah zeitindah huham a ngeih khawh?

¹⁶ Vawlei ruahning in si loin Jehovah ruahning in khua a ruatmi si khawh awkah nan ‘khuaruah khawhnak’ kha hmang u tiah lamkaltu Paul nih tha a kan pek. (Rom 12:1, 2, NW) Kan ruahmi kha ṭha tein i uk a hau ti kha langhter awkah Paul nih hitin a ti: “Pathian hngal kho hna hlah seh tinak ca i chonmi vanpang porhlawtnak vialte kha kan baoh dih; minung lungthin kha sal ah kan tlaih hna i Khrih nawl kha kan ngaihter hna.” (2 Kor. 10:5) Kan ruahnak cu zei bantuk minung dah kan si timi cungah huham a ngeih tuk caah Pathian duhmi kha kan ruah zungzal awk a si.—Fil. 4:8.

¹⁷ A thiangmi si kan duh ahcun a ṭhalomi ruahnak le duhnak kha kan hrial a hau. Jehovah kha “a thiangmi lungthin” in kan dawt a hau. (1 Tim. 1:5) Asinain kan lungthin cu a zer tuk caah vawlei “chung thilri” cu kan cungah zeitlukin dah huham a ngeih kha kan hngal men lai lo. (Jer. 17:9) Cucaah Paul nih hitin ruahnak a kan cheuhmi zulh hi a biapi tuk: “Nanmah le nanmah kha ṭha tein i hneksak tuah u: zumhnak nunning khan a nungmi nan si maw? I hneksak tuah u.” Baibal kan hlathlai tikah ‘Ka ruahnak le ka duhmi hi Pathian duhmi a si maw?’ tiah kan i hal awk a si.—2 Kor. 13:5.

18, 19. Jehovah nih siter a kan duhmi minung si khawh awkah zeicah fakpi in kan i zuam awk a si?

¹⁸ Vawlei “chung thilri” dohnak ah a kan bawm khomi a dang pakhat cu Johan chimmi mah bia, i cinkennak hi a si: “Vawlei le a chung i a ummi thil minung nih an duhmi hna hi an lo cuahmah cang; sihmanhsehlaw Pathian duhnak a tuahmi cu zungzal in an nung.” (1 Johan 2:17) Satan vawlei cu a hmun zungzal dingmi a lo nain nikhatkhat cu a lo te lai. Hi vawlei thil vialte cu a rauhhlan ah an lo dih cang lai ti i cinkennak nih Satan hlennak doh khawh awkah a kan bawmh lai.

¹⁹ “Pathian ni nan hngah lioah hin” Pathian duhmi minung nan si awk a si i “cu ni cu tuan deuh ah a phak khawh nakhnga fakpi in nan i zuam awk a si. Cu ni ah cun van vialte cu an kang dih lai i nika thlapa le arfi vialte hna cu, cu ni linhnak thawng cun an ti dih lai” tiah lamkaltu Piter nih a ṭial. (2 Pit. 3:12) A rauhhlan ah mah ni cu a phan cang lai i Jehovah nih Satan vawlei ah aa telmi vialte kha a hrawh dih cang lai. Mah caan a phanh hlan tiang, Satan nih Evi le Jesuh a rak tukforh hna bantukin kanmah tukforh awkah vawlei “chung thilri” kha a hman rih lai. Evi bantukin kan duhnak tlinter kha kan i zuam awk a si lo. Cutin kan tuah ahcun Satan kha kan pathian kan siter bantuk a si lai. Satan nih kanmah tukforh awkah a hmanmi thil cu a ṭha tukmi a lawh hmanhah Jesuh bantukin kan al awk a si. Jehovah nih siter a kan duhmi minung si khawh awkah kan dihlak in fakpi in i zuam hna u sih.