Jesuh cu vawleicung ah a nung balmi lakah a lianngan bikmi Saya a si ti kha na hna a tla ko lo maw? Biahalnak le tahchunhnak a hmanmi ti bantuk a cawnpiak ning cheukhat kha naa cawn ko lai. A cawnpiaknak ah aa ralkahmi bia a hman tawnmi kong kha tah na ruat bal maw?

Mi tampi nih bia an chim tikah aa ralkahmi bia an hman tawn. Nang zong ruahlo piin cutin na hman ve men ko lai. Hitin na ti khawh men, “Thingthei vialte a hmin dih cang an ti, asinain a hak tuk rih ko hi ta.” Asiloah “Amah hi a ngakchiat lioah a ningzah a rak pang tuk nain atu ahcun mi hawikomh a thiam tuk cang.”

Cutin na chim tikah a kong pakhat kha na chim hmasa, mah hnuah asinain, sihmanhsehlaw, tu asiloah si loin ti bantuk bia hmangin aa ralkahmi kong kha na chim. Asiloah a kong na chapnak thawngin aa ralkahnak kha na langhter men lai. Cutin na chim ahcun na bia cu a tluang lai i a sullam hngalhthiam awkah a fawi lai.

Holh asiloah nunphung cheukhat ah aa ralkahmi bia kha an hmang theng lo nain cutin hman a ṭhat kha kan hngalh. Zeicah? Pathian thawchuah hnawhmi Baibal ah cu bantuk bia kha tampi a hman caah a si. Jesuh nih aa ralkahmi bia kha atu le atu a hman. Hitin a ti: “Ahohmanh nih meifar an van tikah pakan an khuh kel lo, mei vannak tu ah khan an chiah tawn.” “[Nawlbia] kha hrawh awkah si loin, an cawnpiaknak kha tlinter awk tu ah ka ra.” “Nu le pa sualnak va tuah hlah, an ti tawn cu nan theih. Sihmanhsehlaw kei nih cun, ahohmanh nih nu kha sual duhnak lungthin he a zoh ahcun . . . ” “‘Mit caah mit ve, ha caah ha ve,’ tiin an rak ti tawn kha nan theih. Sihmanhsehlaw kei nih cun, nan cung i ṭhatlonak a tuahtu hna kha lehrul hna hlah u, kaan ti hna. Nan orhlei bel ah an in bengh hna ahcun nan kehlei bel zongah khan in beng ko rih hna seh.”—Matt. 5:15, 17, 27, 28, 38, 39.

A dang Baibal cauk zongah aa ralkahmi bia kan hmuh. Mah nih a konglam kha hngalhthiam awkah a kan bawmh i a hnulei bia a biapit deuh kha a langhter. Fa a ngeimi na si ahcun mah hi ruathmanh: “Nulepa hna, nan fale kha an thin hung seh tiin ti hna hlah u. Khrihfa ziaza le cawnpiaknak he tu ṭhanter hna u.” (Efe. 6:4) Lamkaltu Paul nih nulepa nih fale kha Pathian duhning in an cawnpiak hna awk a si tiah a sawhsawh tein a ṭial khawh ko. Asinain ‘an thin hung seh tiin ti hna hlah u. Khrihfa cawnpiaknak he tu ṭhanter hna u’ tiin aa ralkahmi bia a hmanmi nih a sullam kha a fianter.

A hnuah Paul nih hitin a ṭial: “Kan dohmi hna cu minung kha si loin, vancung khua i a ummi thlarau sual ṭhawnnak hna . . . hi an si.” (Efe. 6:12) Mah aa ralkahmi bia nih kan dohmi hna cu ṭih a nung tukmi an si ti kha aan hngalhter ko lai. Kan dohmi cu minung sawhsawh si loin thlarau ṭhalo pawl an si.

Efesa cauk chungah Paul nih aa ralkahmi bia a hmanmi a dang tampi na hmuh lai. Mah kong ruahnak nih Paul nih a chim duhmi hngalh awk le kan tuah awk a simi kha fiang deuh in hngalhthiam awkah a kan bawmh lai.

Cahmai 4 le 5 i cazin ah Efesa dal 4 le dal 5 chungin lakmi aa ralkahmi bia cheukhat a um, mah kong rel cu a nuamh lengah man zong a ngei. Mah aa ralkahmi bia pawl na rel tikah nangmah na sining kha ruat. Hitin i hal: ‘Ka lungput taktak cu zeidah a si? Mah thil sining asiloah mah he aa lomi thil sining ah zeitindah ka tuah? Aa ralkahmi bia i khoikalei nih dah ka sining a langhter tiah mi nih an ruah?’ Aa ralkahmi bia nih na tuah awk a simi kha aan hngalhter ahcun mah ningin tuah. Aa ralkahmi bia nih in bawm seh.

Mah cazin kha chungkhar pumhnak ah nan hman khawh. Mah cacang pawl kha nan chungkhar ningin nan rel khawh. Mah hnuah pakhat nih aa ralkahmi cacang a hmailei kha a chim khawh, cun a hnulei bia zei a si kha a dang nih an ruah khawh. Mah hnuah a hnulei bia kha zeitindah kan zulh lai timi kong kha i ruahṭi u. Cutin i ruahṭinak nih chungkhar ah le kaadang ah Khrihfa ziaza langhter awkah mino he upa he aan bawmh hna lai.

Aa ralkahmi bia man a ngeihnak kha na hngalh ahcun Baibal na rel tikah aa ralkahmi bia a um kha na hmuh lai i phungchimnak ah mah bantuk bia hman man a ngeih tuk kha na hmuh lai. Tahchunhnak ah, inn-ngeitu kha hitin na ti khawh: “Mi tampi nih a thi kho lomi thlarau kan ngei tiah an ti, asinain Baibal chimmi hi zohhmanh.” Asiloah Baibal na cawnpiakmi kha hitin na hal khawh: “Mi tampi nih Pathian le Jesuh cu pakhat an si tiah an zumh, asinain Baibal nih zeitindah a ti? Nangtah zeitindah na zumh?”

Pathian duhning in nun awkah a kan bawmmi aa ralkahmi bia tampi kha Baibal ah kan hmuh. Baibal biatak hngalh awk mi bawmhnak ah mah kha kan hman khawh.