1, 2. (a) Kan dawtmi pakhatkhat kong kan ruahmi le kan chimmi nih zei ṭhatnak dah a chuahter? (A hramthawknak hmanthlak kha zoh.) (b) Zei biahalnak hna dah kan i ruah lai?

KAN dawtmi pakhatkhat kong kan ruahmi le kan chimmi nih amah he kan i pehtlaihnak a fehter chin. Jehovah Pathian he kan i pehtlaihnak zong cutin a si ve. Tuukhal a simi David nih zan ah arfi kha a zoh lengmang i Sertu i khuaruahhar a sinak kong kha a ruat. Hitin a ṭial: “Nangmah na sermi van le an hmun ciote ah na chiahmi hna thlapa le arfi hna khi ka zoh tikah, minung hi zeidah a si i na hnak karah na tenh? Minung menmen a simi hi zeidah a si i a zawn na ruah? ti hi ka ruat.” (Salm 8:3, 4) Lamkaltu Paul nih thlarau Israel mi hna he aa tlaiin Jehovah tinhnak khuaruahhar lam in a tlinmi kong kha a ruah tikah hitin a ṭial: “Pathian hi a va rum hringhran dah! A fimnak le a hngalhnak hi an va thuk hringhran dah!”—Rom 11:17-26, 33.

² Phungchim kan kal tikah Jehovah kong kha kan ruah i kan chim. Mah nih amah he kan i pehtlaihnak a fehter. Hmaikal tampi nih phungchimnak ah caan tampi kan pek caah Pathian kan dawtnak a fek chin tiah an ti. Hmaikal a ṭuanmi na si ah, hmaikal ṭuan aa timmi na si ah mah biahalnak hna hi ruathmanh: Hmaikal ṭuannak nih Jehovah he nan i pehtlaihnak kha zeitindah a fehter khawh? Hmaikal a ṭuanmi na si ahcun mah a sunglawimi rian hi ṭuan khawh peng awkah zeinihdah aan bawmh lai? Hmaikal na ṭuan rih lo ahcun ṭuan awkah zeidah na tuah khawh? Hmaikal ṭuannak nih Pathian he kan i pehtlaihnak a fehter khawhning kong kha i ruah hna u sih.

3. Hmailei hmuh laimi Pennak thluachuah kong chimnak nih zeitindah a kan ṭhathnem?

³ Hmailei hmuh laimi Pennak thluachuah kong kan chimmi nih Jehovah he a kan naihter chin. Innkhat hnu innkhat na kal tikah zei Baibal cang dah hman na duh bik? Salm 37:10, 11; Daniel 2:44; Johan 5:28, 29; asiloah Biathlam 21:3, 4 hna hi an si kho men. Mah biakam pawl kong kha midang he kan i ruah fate, a siangmi kan Pathian cu “laksawng ṭha le laksawng tlamtling paohpaoh” a kan petu a si kha a kan hngalhter ṭhan. Mah nih Pathian he a kan naihter.—Jeim 1:17.

4. Midang thlaraulei an chambaumi kan hmuh tikah Pathian ṭhatnak kha zeicah kan sunsak chin?

⁴ Phung kan chimhmi hna thlaraulei an chambaumi kan hmuh tikah biatak kha kan sunsak chin. Vawlei mi hna nih hlawhtlinnak le nuamhnak hmuh awkah lamhruainak an ngei lo. Tamdeuh cu hmailei kong ah an lungre a thei i ruahchannak an ngei lo. Cucaah nun hnawhchanmi kha hngalh an i zuam. Biaknaklei ah a ṭangmi tampi hmanh nih Baibal kong kha tlawmte lawng an hngalh. Annih cu hlanlio Nineveh khuami bantuk an si. (Jonah 4:11 rel.) Phungchimnak ah caan tamdeuh in kan i tel tikah phung kan chimhmi hna le Jehovah mi hna thlaraulei an sining aa dannak kong kha fiang deuh in kan hngalh. (Isa. 65:13) Asinain Jehovah nih a miphun lawng kha thlaraulei an herhmi a pekmi hna a si lo, mi vialte kha thlaraulei hrimhnak le ruahchannak taktak hmuh awkah a sawm hna. Mah nih Jehovah zeitlukin dah a ṭhat kha a kan hngalhter.—Biat. 22:17.

5. Midang thlaraulei bawmhnak nih kan tonmi harnak kha zeitindah a kan hmuhter?

⁵ Midang thlaraulei kan bawmhmi hna nih kan tonmi harnak lawng ruah lo awk a kan bawmh. Hmaanhmaan a ṭuanmi, unaunu Trisha nih a nu le a pa an i ṭhen tikah mah bia a hmaan kha a hun hngalh. Hitin a chim: “Mah cu ka ton balmi lakah ka lung a ka fahter bikmi thil sining pakhat a si ve.” Nikhat cu a ngaih a chia tuk i leng ah chuah a huam lo nain Baibal cawnpiak awkah a kal. A cawnpiakmi hna cu harnak tampi a tongmi ngakchia pathum an si. An pa nih a kaltak hna i an upa zong nih puarhrang ngaiin a pehtlaih hna. Trisha nih hitin a chim: “Ka tonmi buaibainak le lungretheihnak cu anmah an tonmi he tahchunh ahcun zei hmanh a si lo. Baibal kan cawn tikah an mit au a piang chin, an lung a tho tuk i an i nuamh tuk caah an ni lengmang. Mah ngakchia hna cu Jehovah sinin hmuhmi laksawng an si, a hleiin mah ni ah khan a si khun.”

6, 7. (a) Baibal biatak kan cawnpiak hna tikah kan zumhnak cu zeitindah a feh chin? (b) Baibal a cawngmi hna an nunning i thlen awkah Baibal phunglam nih a bawmhmi hna kha kan hmuh tikah zeitindah kan um?

⁶ Baibal biatak kha mi kan cawnpiakmi hna nih kan zumhnak a fehter. Lamkaltu Paul nih midang an cawnpiak hna ningin a nung lomi a chan hawi Judah mi cheukhat sinah hitin a ṭial: “Nannih midang a cawnpiaktu saya hna, zeicahdah nanmah cu nan i cawnpiak kun lo?” (Rom 2:21) Tuchan hmaikal pawl he cun an i dang tuk. Hmaikal pawl cu biatak cawnpiak awk le Baibal cawnpiaknak tuah awkah caanṭha tampi an hmu. Cutin ṭha tein tuah khawh awkah anmah thengte an i cawnpiak hmasa a hau. Cawnpiaknak pakhat cio caah i timhchung le biahalnak pawl phit awkah hlathlainak tuah a hau. Hmaikal a ṭuanmi unaunu Janen nih midang kha biatak ka cawnpiak hna fatinte ka zumhnak cu a fek chin tiah a ti.

⁷ Baibal a cawngmi hna an nunning i thlen awkah Baibal phunglam nih a bawmhmi hna kan hmuh tikah Pathian fimnak kha kan sunsak chin. (Isa. 48: 17, 18) Mah nih kan nunnak ah Pathian phunglam kha zulh zungzal awkah a kan bawmh. Hmaikal unaunu Adrianna nih hitin a chim: “Mi nih anmah fimnak kha an i bochan tikah harnak le buaibainak an tong tawn. Asinain Jehovah fimnak kha an hun i bochan tikah ṭhatnak an hmu colh.” Hmaikal unaupa Phil nih Jehovah bawmhnak thawngin mi nih an nunning an i thlen khawhmi ka hmuh tikah ka khuaruah a har tiah a chim.

8. Phungchimnak ah unau pawl he ṭuanṭinak nih zeitindah a kan bawmh?

⁸ Phungchimnak ah unau pawl he ṭuanṭinak nih thazaang a kan ngeihter. (Ptb. 13:20) Hmaikal pawl cu phungchimnak ah unau pawl he caan tampi an hmangṭi. Mah nih ‘pakhat le pakhat i bawmhnak’ caanṭha tamdeuh in a hmuhter hna. (Rom 1:12; Phungthlukbia 27:17 rel.) Hmaikal unaunu Lisa nih ka rian ṭuannak hmun ahcun mi cu pakhat le pakhat an i nahchuah i an i zuam tiah a chim. Nifate mi kong an ceihmi le bia ṭhalo an chimmi kha a theih peng. Hitin a chimchap: “A caan ah Khrihfa ziaza na langhter caah nihchuak capo ah an in saih ko lai. Asinain phungchimnak ah unau pawl he ṭuanṭinak nih thazaang a ka hmuhter taktak. Cu bantuk ni ahcun zeitluk ka baat hmanhah zanlei ah hrimhnak he inn ah ka ṭin.”

9. Nuva hna cu hmaikal an ṭuanṭimi nih zeitindah a bawmh hna?

⁹ Kan innchunghawi he hmaikal kan ṭuanṭi tikah kan i pehtlaihnak a fek chin. (Pct. 4:12) A vapa he hmaikal a ṭuanṭimi Madeline nih hitin a chim: “Kan pa he chun nitlak phungchimnak ah kan tonmi kong asiloah Baibal kan relmi chungin phungchimnak ah hman khawh a simi kong kha kan i ruah. Hmaikal kan ṭuanṭi caah kum khat hnu kum khat kan i naih chin lengmang.”  Hmaikal unaunu Trisha nih “ka vapa he leiba ngeih lo awkah kan i ralring, cucaah tangka kong ah kan i si bal lo” tiah a ti. Lennolh le Baibal cawnpiaknak ah an kalṭi. Mah nih an i pehtlaihnak kha a fehter chin.

10. Pennak kha pakhatnak ah kan chiah i Pathian nih a kan bawmhmi kan hmuh tikah Jehovah kan i bochannak cu zeitindah a um?

¹⁰ Pennak pakhatnak ah kan chiah tikah Jehovah kan i bochannak a fek chin, Jehovah bawmhnak le kan thlacamnak a kan lehmi kha kan hmuh. Zumhfekmi Khrihfa dihlak nih Jehovah an i bochan ti cu a hmaan ko. Asinain hmaikal a ṭuanmi hna nih Jehovah kan i bochan lawngah kan ṭuan khawh peng lai ti kha an hngalh. (Matthai 6:30-34 rel.) Hmaikal le khualtlawng rianṭuantu a bawmtu a simi unaupa Curt cu an inn in suimilam pahnih le cheu mawṭaw in kal a haumi Khrihfabu ah tlawn awkah a hna a tla. A nupi zong hmaikal a ṭuanmi a si ve. An tlawn dingmi Khrihfabu kalnak caah datsii an ngei nain kirnak caah an ngei ti lo, lahkhah thoh awkah zarhkhat aa duh rih fawn. Curt nih kan biakhiahnak cu a hmaan hnga maw tiin kan lung a hring tiah a ti. Asinain thla an cam i kal awkah bia an khiak. Pathian nih kan herhmi kha a kan bawmh lai tiah an zumh. An kal laite ah unaunu pakhat nih phone a chawnh hna i laksawng pek kaan duh hna, tiah a ti hna. A pekmi hna cu an herhmi tangka zatte kha a si. Curt nih cu bantuk thil sining kha atu le atu kan ton tikah kan herhmi thil a kan petu cu Jehovah a si kha fawi tein kan hngalh tiah a ti.

11. Hmaikal a ṭuanmi hna nih an hmuhmi thluachuah cheukhat cu zeidah an si?

¹¹ Hmaikal a ṭuanmi hna nih Pathian rian tamdeuh in kan ṭuan i Pathian he kan i naih deuh tikah thluachuah zong tamdeuh in kan hmuh tiah an chim tawn. (Deut. 28:2) Asinain hmaikal ṭuan cu a zungzal in cun a fawi lo. Mitlinglo kan si ruangah le hi vawlei ṭhalo ruangah kan zapi in harnak kan tong. Hmaikal cheukhat cu an tonmi harnak ruangah hmaikal ṭuannak in caan tlawmpal chung an i din ta men lai. Asinain mah harnak pawl cu tawnghtham khawh asiloah hrial khawh a si tawn ko. Hmaikal ṭuan zungzal awkah zeinihdah aan bawmh khawh?

12, 13. (a) Hmaikal pakhat cu hal an simi suimilam tlinh aa harh ahcun zeidah a tuah awk a si? (b) Nifate Baibal relnak, pumpak hlathlainak le ṭha tein ruahnak caah a caan pek cu zeicah a biapit?

¹² Hmaikal tampi cu an rian a tamtuk. Rian vialte ṭuan khawh cu a harmi a si, cucaah ṭha tein an tuaktan a hau. (1 Kor. 14:33, 40) Hmaikal pakhat cu hal an simi suimilam tlinh aa harh ahcun caan a hmanning kha ṭha tein a ruah awk a si. (Efe. 5:15, 16) Hitin aa hal kho: ‘Nuamhsaihnak caah caan tamtuk in ka hmang maw? Ka rian ṭuan caan kha ka thleng kho lai maw? A herh lomi thil caah caan tamtuk in ka hmang maw?’ Hmaikal a ṭuanmi hna nih mah biahalnak hna kha an i hal lengmang awk a si i a herh ahcun thlennak an tuah awk a si.

¹³ Hmaikal pakhat nih nifate Baibal relnak, pumpak hlathlainak le ṭha tein ruahnak caah a caan a pek awk a si. A biapi deuh lomi thil ruangah mah a biapimi thil tuah khawh loin a um nakhnga lo aa ralrin awk a si. (Fil. 1:10) Tahchunhnak ah, hmaikal pakhat cu phungchimnak ah chun nitlak a kal hnuah inn ah a ṭin tiah na mitthlam ah cuanter hmanh. Zanlei ah pumhnak ca i timh awkah aa tim. Asinain a cakuat a phanmi kha a rel hmasa. Cun a computer kha a on i a e-mail kha a rel i a leh hna. Cun cawk a duhmi thil i a man kha a zoh pah. Cuticun suimilam pahnih hrawng a liam manh kha a hngal lo i pumhnak caah aa tim rih lo. Mah cu zeicah ṭih a nun? Lentecelh thiam pawl nih mah an rian kha  saupi ṭuan an duh ahcun an pum kha ṭha tein an zohkhenh a hau. Cu bantukin hmaikal pawl zong nih hmaikal rian ṭuan khawh zungzal awkah pumpak hlathlainak hmaan tein an tuah a hau.—1 Tim. 4:16.

14, 15. (a) Hmaikal hna cu zeicah nunning sawhsawh tein an nun awk a si? (b) Hmaikal pakhat nih harnak a ton ahcun zeidah a tuah awk a si?

¹⁴ Hlawhtlingmi hmaikal hna cu nunning sawhsawh tein nun zungzal awkah an i zuam. Jesuh nih a zultu pawl kha cutin nun awkah a rak forh hna. (Matt. 6:22) Jesuh nih phungchim rian kha lungvaivuan loin a ṭuan khawh nakhnga nunning sawhsawh tein a rak nung. Cucaah hitin a chim khawh: “Cenghngia nih cun kua an ngei i vate cu bu an ngei, sihmanhsehlaw Mi Fapa cu riahnak hmun hmanh a ngei lo.” (Matt. 8:20) Jesuh i zohchunh aa zuammi hmaikal pawl nih thilri an ngeih deuhdeuh ah mah thil zohkhenhnak le remhnak caah caan pek a herh deuhdeuh ve kha an hngalh.

¹⁵ Hmaikal pawl nih an rian cu a sunglawi tukmi a si kha an hngalh, asinain midang nakin kan ṭha deuh tiin cun an i ruat lo. Mah rian cu Jehovah sinin kan hmuhmi laksawng a si ti kha an hngalh. Cucaah hmaikal pakhat cio nih mah rian an ṭuan khawh zungzal nakhnga Jehovah kha an i bochan a hau. (Salm 121:1, 2) Harnak le zuamcawhnak cu a um ko lai. (Salm 34:19) Cu bantuk thil ton tikah hmaikal rian kha ngol colh loin Jehovah kha lamhruainak an hal awk a si i anmah bawmh awkah Pathian kha caan an pek awk a si. (Salm 37:5 rel.) Jehovah nih dawtnak in a bawmhmi hna an hmuh tikah amah he an i pehtlaihnak a fek chin lai.—Isa. 41:10.

16. Hmaikal ṭuan na duh ahcun zeidah na tuah awk a si?

¹⁶ Hmaikal a ṭuanmi hna hmuhmi thluachuah hmuh na duh ve ahcun mah kong kha Jehovah sinah thla cam. (1 Johan 5:14, 15) Hmaikal a ṭuanmi hna kha mah kong ruah hna. Hmaikal ṭuan khawh awkah bawmtu a simi hmuitinh ngei. Keith le Erika nih cutin an rak tuah. An ṭhirual a simi nuva tampi bantukin caantling in rian an ṭuan i an i um hnu tlawmpal ah mawṭaw tharte le inn an i cawk. “Mah thil hna nih hnangamnak a kan pek lai tiah kan rak ruah nain cutin a si lo” tiah an ti. Keith cu a rian a sungh hnuah manhcaan hmaikal a hun ṭuan. “Phungchimnak rian cu zeitlukin dah a nuamh ti kha hmaikal rian nih a ka hngalhter” tiah a ti. An hawikom a hung simi hmaikal nuva hna nih hmaikal rian ṭuannak le nunning sawhsawh in nunnak nih nuamhnak tampi a chuahter ti kha hngalh awkah an bawmh hna. Mah tikah Keith le Erika nih zeidah an tuah? An hmuitinh pawl kha cazin an tuah i mah kha an tikhal kuang ah an taar, cun an tlinhmi pawl kha an zah. Caan tlawmpal a rauh hnuah hmaikal an ṭuan kho.

17. Hmaikal ka ṭuan kho hnga maw tiah ruah cu zeicah fim a si?

¹⁷ Nangtah hmaikal na ṭuan kho lai maw? Atu ahcun ka ṭuan kho rih lai lo tiah na ruah ahcun phungchimnak ah na si khawh chungin naa telnak thawngin Jehovah he i naih deuh awkah i zuam. Na sining kha ṭha tein na ruah i Jehovah sinah thla na cam ahcun thlennak cheukhat na tuahnak thawngin hmaikal na ṭuan khawh lai kha na hun hngalh men lai. Hmaikal rian na hun ṭuan tikah mahca ṭhatnak na hlawtmi cu na hmuhmi lawmhnak he tahchunh khawh a si lo kha na hmuh lai. Pathian Pennak kha pakhatnak ah na chiah caah le midang kha tamdeuh in na pek hna caah naa nuam lai. (Matt. 6:33) Mah lengah Jehovah kong ruahnak le chimnak caanṭha tamdeuh na ngei lai i mah nih Jehovah na dawtnak kha a fehter lai i a lung na lawmhter lai.