1. Mi nih sal kong an ruah tikah zeidah an lung ah a chuak, mah cu Rom 6:22 i sal he zeitindah aa dan?

SAL timi kong mi nih an ruah tikah a bawipa nih a uk i puarhrang ngaiin a pehtlaihmi kha an lung ah a chuak. Asinain Pathian sal si cu mah he aa dang tuk. Baibal nih dawtnak a ngeimi Bawi i a sal si awkah Khrihfa a simi hna nih an i thim khawh tiah a ti. Lamkaltu Paul nih Khrihfa hna kha Pathian “sal” si u tiah a forh hna tikah Jehovah kha an dawt caah a rian ṭuan awkah a forhmi hna a si. (Rom 6:22) Cu bantuk sal sinak ah zeidah aa tel? Satan le a vawlei sal si kha zeitindah kan hrial khawh? Jehovah sal si le a cungah zumhfek tein umnak nih zei ṭhatnak dah a kan pek lai?

2. (a) Sal ṭuan rih awkah Israel mi nih zeicah bia an khiah khawh men? (b) Sal a hna an vihmi nih zeidah a langhter?

² Pathian nih Israel mi a pekmi hna Nawlbia nih Jehovah sal si awkah a herhmi kha a kan hngalhter. Hebru sal hna cu kum sarih a tlin tikah an bawipa sinin an luat tawn. (Ex. 21:2) Asinain sal nih a bawipa cu a dawt i a sinin kal a duh lo ahcun a um kho. A bawipa nih sal cu innka asiloah innka tung ah a chuahpi lai i a hna a vih lai tiah Jehovah Nawlbia nih a ti. (Ex. 21:5, 6) Cutin zeicah a tuah? Hebru holh ah nawlngaih timi cu theihnak le ngaihnak he aa pehtlai. Cucaah a hna an vihnak thawngin sal nih nawlngai tein a bawipa rian ṭuan a duh rih kha a langhter. Mah cu kan i pumpeknak he aa lo. Jehovah sin kan i pumpekmi cu Jehovah kan dawt caah a nawlngaih kan duh ti kan langhtermi a si.

3. Pathian sinah zeicah kan i pumpek?

³ Tipil kan in hlanah Jehovah rian ṭuan awk asiloah a sal si awkah bia kan khiak. Jehovah sin kan i pumpek tikah a nawl kan ngaih lai i a duhnak kan tuah lai tiah bia kan i kam. Cutin biakhiahnak tuah awkah ahohmanh nih a kan forh lo. Ngakchia hmanh nih tipil an in tikah an nu le an pa lunglawmhter awk men  ah si loin anmah theng nih in an duh taktak caah a si. Vancung kan Bawi, Jehovah kha kan dawt caah a sinah kan i pumpekmi a si. “Pathian kan dawt ti cu a nawl kan zul tinak a si ko” tiah lamkaltu Johan nih a ṭial.—1 Johan 5:3.

4. “Dinnak sal” si awkah zeidah tuah a herh?

⁴ Jehovah nih a sal si awkah a herhmi a kan pek caah kan i lawm tuk. Khrih tlanhnak man kan zumhnak thawngin sualnak sal sinak in kan luat. Mah cu mitlinglo kan si ko nain Jehovah le Jesuh nawlngeihnak tang i um awkah kan i thim tinak a si. Paul nih a cakuat pakhat ah mah kong kha fiang tein a langhter. Hitin a ti: “Kannih cu sualnak ah kan thi cang i asinain Khrih Jesuh he i pehtlaihnak thawngin Pathian ah kan nung tiah nan i ruah awk a si.” Cun hitin ralrin a pek hna: “Bawi pakhatkhat sinah, na nawl kan ngaih lai tiin nan i pek ahcun, nannih cu cu bawi a nawl nan zulhmi sal cu nan si, cu bantukin sualnak cu a nawl nan zulh ahcun sualnak sal cu nan si i sualnak nih a chuahpimi cu thihnak a si; cun cu bantuk ṭhiamṭhiam cun Pathian nawlngaihnak cu a nawl nan zulh ahcun nawlngaihnak nih a chuahpimi cu Pathian he i remnak kha a si. Sihmanhsehlaw Pathian cu lawm cio ko u sih. Zeicahtiah nannih sualnak sal a rak simi nih khan nan hmuhmi cawnpiaknak biatak kha nan lungthin dihlak in nan zulh cang. Sualnak chungin luatter nan si cang i dinnak sal ah khan nan i cang cang.” (Rom 6:11, 16-18) “Nan lungthin dihlak in nan zulh” awk a si tiah Paul nih a timi kha i cinken. Cucaah Pathian nawl kan lungthin dihlak in kan ngaih ti kha a sin kan i pumpeknak in kan langhter tikah “dinnak sal” kan hung si.

5. Kan zapi in zeidah kan doh a herh, zeicah?

⁵ Pathian sin aa pumpemi sal a simi nih kan doh awk a simi thil pahnih a um. Pakhat cu kan tlinlonak kha a si. Paul zong nih mah kha a rak doh ve. Hitin a ti: “Ka chunglei mi cu Pathian phung ah khan aa lawm; sihmanhsehlaw ka chung i phung dang a rak um ve kha ka hngalh, cu phung cu ka lung nih a ṭha a timi phung a rak dohtu kha a si. Cu phung nih cun, ka pum chung i rian a ṭuanmi sualnak phung sal ah khan a ka ser.” (Rom 7:22, 23) Mitlinglo kan si caah Pathian duh lomi thil a kan tuahter khotu kan pumsa duhnak kha kan doh a hau. Lamkaltu Piter nih hitin a kan forh: “A luatmi bantukin um u, sihmanhsehlaw nan luatnak kha ṭhatlonak khuhnak bel ah hmang hlah u, Pathian sal bantuk tuin nung u.”—1 Pit. 2:16.

6, 7. Satan nih vawlei kha zeitindah duh a nungmi a lawhter?

⁶ Pahnihnak ah khuachia nih an ukmi vawlei kha kan doh awk a si. Satan cu hi vawlei uktu a si i Jehovah le Jesuh cung kan zumhfehnak hrawh awkah hriamnam a phunphun a hman. Satan nih hi vawlei ta si awkah a kan lemnak thawngin a sal kan si nakhnga aa zuam. (Efesa 6:11, 12 rel.) Cutin a tuahnak lamkhat cu hi vawlei kha duh a nungmi a lawhternak thawngin a si. Lamkaltu Johan nih hitin ralrin a kan pek: “Vawlei hi nan tlaihchan ahcun, Pathian dawtnak kha nan chungah a um lo. Vawlei ta a simi thil paohpaoh, pumsa duhnak te hna, mi nih zoh an duhmi thil hna, mi nih porhlawtnak ah an hmanmi thil te hna hi Pa sinin a rami an si lo; vawlei in a rami lawngte an si dih.”—1 Johan 2:15, 16.

⁷ Vawlei mi hna nih thilri chawva kha an duh chin lengmang. Satan nih mi kha tangka tampi kan ngeih ahcun kan i nuam lai tiah a zumhter hna. Hmun kip ah dawr nganpipi an um. Thanhlaar nih thilri tampi ngeih le i nuamh hi nunnak ah a biapi bikmi a si tiin an langhter. Tahchunhnak  ah, khualtlawnnak rianṭuantu hna nih mi kha vawlei hmuhning a ngeimi hna he a nuammi hmun i kalṭi awkah an sawm hna. Kan pawngkam i a ummi thil nih kan nunning kha vawlei mi hna duhning in thlen awkah a kan forh.

8, 9. Zeidah ṭih a nung, zeicah?

⁸ Piter nih vawlei mi hna bantukin khua a ruatmi, kumzabu pakhatnak i Khrihfa hna he aa tlaiin hitin ralrin peknak bia a chim: “Annih nih nuamhnak an timi cu chun ceupi i pumsa duhnak zei paoh tuah kha a si ko; hlennak ah an hmanmi lam kha an zulh peng ko caah nan sin i rawl an ei tik zongah ningzahnak le hmaichiatnak chuahpitu an si. An holh tikah an bia a puam, an i porhlaw i lawkih mi hna lak i khua a sami hna, an umnak hmun in a chuak katete pawl foihnak ah khan pumsa duhnak kha an hman. Luatnak nan hmu lai tiah bia an kamh hna, sihmanhsehlaw anmah hmanh kha, rawhralnak a phak pitu hna an ziaza sal kha an si, minung hi a teitu paoh sal a si ko.”—2 Pit. 2:13, 18, 19.

⁹ “Mi nih zoh an duhmi thil” a simi kan duhmi zei thil paoh kha ngeih kan i zuam ahcun luatnak kan hmu lai lo. Hmuh khawh lomi hi vawlei bawi, Satan Khuachia sal tu kan si lai. (1 Johan 5:19) Thilri chawva sal si cu ṭih a nung tukmi a si i luat awkah a har.

10, 11. A hleiin Satan nih ahote dah a doh hna? Sianghleiruun nih Khrihfa mino pawl kha zei tuah awkah dah a donh hna?

¹⁰ Satan nih hmuhtonnak a ngei theng lomi kha a doh hna. A hleiin mino pawl kha a doh hna. Mino pakhat nih asiloah ahopaoh nih Jehovah sal si awk bia an khiahmi kha a duh lo. Satan nih Jehovah sin aa pumpemi hna i an zumhfehnak le an biaknak kha hrawh a duh.

¹¹ Sal cu a hna an vih tikah chikkhat cu a fak ko lai. Asinain mah hmelchunhnak cu a um zungzal lai i mah nih a bawipa sin um awkah bia a khiah kha a langhter lai. Mino caah an pawngkam mi hna he aa lo lomi biakhiahnak tuah cu a har asiloah a fak ko lai. Tahchunhnak ah, Satan nih hi vawlei ah rian ngeih cu hnangamnak petu a si tiah mi kha a ruahter hna. Asinain kan nunnak ah Jehovah kha pakhatnak i kan chiah lawngah hnangamnak kan hmu lai. Jesuh nih thlaraulei ah “mi chambau kan si ti aa hngalmi cu, lunglawmmi nan va si dah” tiah a ti. (Matt. 5:3) Khrihfa hna cu Satan duhnak si loin Jehovah duhnak tuah awkah an i pumpe. Baibal kha an rel i  “chunzan” in an ruat. (Salm 1:1-3 rel.) Asinain tuchan sianghleiruun tampi nih Pathian salle kha Jehovah rian ṭuan awk le Baibal ṭha tein ruah awkah caan a ngeihter hna lo.

12. Tuchan mino tampi nih zei thim awk dah an ngeih?

¹² Minung uktu nih Khrihfa a simi a sal kha harnak tampi a pek khawh. Paul nih Korin khuami hna sin a cakuat pakhatnak ah hitin a ti: “Pathian nih an kawh ah khan sal na rak si maw? Na si zongah na zei poi hlah; luatnak caan na hmuh ahcun luat i zuam.” (1 Kor. 7:21) Sal cu a bawipa nih harnak a pek ahcun luat aa zuam ah a ṭha. Tuchan ram tampi ah kum cuzat chung sianginn kai ding timi nawlbia a um. Mah hnuah siangngakchia pawl nih sianginn kai chap lai le kai chap lai lo kha an i thim khawh. Khrihfa hna nih rian ngeihnak ca men ah sianghleiruun kai chap awk an i thim ahcun Jehovah rian caantling in ṭuan awkah zalonnak an ngei kho lai lo.—1 Korin 7:23 rel.

13. Jehovah salle kha zei fimcawnnak nih dah a bawmh khawh bik hna?

¹³ Paul nih Kolose khua ah a ummi Khrihfa hna kha hitin ralrin a pek hna: “Khrih chungin si loin, van le vawlei uktu thlarau hna sinin le minung nih pakhat le pakhat an i cawnpiak chin lengmangmi chungin a chuakmi minung fimnak, santlaihnak zeihmanh a ngei lomi fimnak, hlennak menmen a simi cu hmangin, ahohmanh nih sal ah in ser hna hlah seh.” (Kol. 2:8) Cawnpiaktu tampi nih “minung fimnak, santlaihnak zeihmanh a ngei lomi fimnak, hlennak menmen a simi” kha an cawnpiak hna. Sianghleiruun zongah mah kha an cawnpiak hna i siangngakchia pawl kha nifa nunnak caah a herhmi fimnak an cawnpiak hna lo. Asinain Khrihfa hna cu Pathian rian an ṭuan khawh nakhnga nunning sawhsawh tein nun awkah a herhmi fimthiamnak tu kha an cawng. Paul nih Timote sin a chimmi mah bia hi biapi ah an chiah: “Biaknak nih hin rumnak a chuahpi taktak, sihmanhsehlaw cu rumnak a ngeimi cu mah le tinvo i a lung hna a ngammi kha an si. . . . Cucaah cun rawl le fenh-aih kan ngeih ahcun cucu kan i zat awk a si ko.” (1 Tim. 6:6, 8) A hmaanmi Khrihfa hna cu an min hnulei ah an degree aa ṭial nakhnga i zuam loin phungchimnak ah an si khawh chungin an i telnak thawngin “thangṭhatnak ca” hmuh awk tu an i zuam.—2 Korin 3:1-3 rel.

14. Filipi 3:8, 9 ningin Paul nih Pathian le Khrih sal a si khawhmi kha zeitindah a hmuh?

 ¹⁴ Paul nunning in kan i cawn khawh. Anih cu Judah Phungbia cawnpiaktu Gamaliel sinah fimnak a cawngmi a si. A cawnmi cu tuchan sianghleiruun fimcawnnak he tahchunh khawh a si. Asinain Paul nih a cawnmi kha Pathian le Khrih sal si khawhnak tinvo sung he a tahchunh tikah zeitindah a ruah? Hitin a ṭial: “Cu thil vialte hna nakin a sunglawi deuhmi ka Bawipa Jesuh ka hngalhnak ruangah cun, sungh cikcek ah ka rel hna. Amah ruangah cun zeizong vialte hi ka hlonh dih hna i cu thil vialte cu hmunthur men ah ka rel hna, cucu Khrih kha ka ngeih khawh . . . nakhnga ka duh caah a si.” (Fil. 3:8, 9) Paul hmuhning nih Khrihfa mino hna le nulepa hna kha fimcawnnak he aa tlaiin a hmaanmi biakhiahnak tuah awkah a bawmh hna lai. (Hmanthlak zoh.)

15, 16. Jehovah bupi ah zei fimcawnnak dah a um i aa tinhmi cu zeidah a si?

¹⁵ Sianghleiruun tampi ah zei thil dah a um? Cuka hmun ah a ummi hna nih cozah le a dang nawlngeitu pawl cungah an thinhunnak kha an langhter i an doh tawn hna. (Efe. 2:2) Asinain Jehovah bupi nih cun daihnak a umnak Khrihfabu ah a ṭha bikmi fimcawnnak a kan pek. Kan dihlak in Phungchim Ning Cawnnak in zarh fate ṭhatnak kan hmu. Ṭhatnak hmuh khawhnak a dang tinṭan pawl a um rih. Tahchunhnak ah, tlangval hmaikal unaupa pawl caah (Nupi a Ngei Lomi Unaupa pawl caah Baibal Tinṭan) le innchunghawi a ngeimi hmaikal pawl caah (Khrihfa Nuva caah Baibal Tinṭan) timi a um. Mah tinṭan hna nih vancung kan Bawi, Jehovah nawl ngaih awkah a kan bawmh.

¹⁶ A sunglawimi biatak tampi kha Vennak Innsang Index asiloah Vennak Innsang Library CD ah kan hmuh khawh. Mah fimcawnnak hna i aa tinhmi cu Jehovah biak kha a si. Mah lengah midang kha Pathian hawi si awkah zeitindah bawmh khawh a si ti zong a kan cawnpiak. (2 Kor. 5:20) Cun annih nih midang kha an cawnpiak khawh ve hna lai.—2 Tim. 2:2.

17. A ṭha bikmi fimcawnnak kan i thim ahcun zei ṭhatnak dah kan hmuh lai?

¹⁷ Jesuh chimmi sal pathum bianabia ah zumhawktlak sal pahnih cu thangṭhat an si. Mah nih anmah he an bawipa he a lawmhter hna. An bawipa lung an ton caah rian tam deuh in a pek hna. (Matthai 25:21, 23 rel.) Kannih zong a ṭha bikmi fimcawnnak kha kan i thim ahcun kan i nuam lai i laksawng kan hmu lai. Tahchunhnak ah, Michael cu ca a thiam ngaimi a si. Cucaah sianghleiruun a kai khawh nakhnga i ruah awkah a sayate nih an auh. Asinain Michael nih sianghleiruun kai aa timh lo kha an hngalh tikah an khuaruah a har tuk. Mah nakcha cun hmaanhmaan ṭuan pah in a paw aa cawm khawh nakhnga a herhmi fimnak tu kha caan tawite a cawng. Michael nih a biakhiahnak a palh tiah a ruat maw? Hitin a chim: “Hmaikal in le Khrihfa upa pakhat in ka hmuhmi fimcawnnak hi ka caah man a ngei tuk. Ka hmuhmi thluachuah le tinvo hna cu ka hmuh khawhmi tangka zeizatnak hmanh in a sung deuh. Sianghleiruun kai awk ka rak i thim lo caah kaa nuam tuk.”

18. Zeicah a ṭha bikmi fimcawnnak kha kan i thim?

¹⁸ A ṭha bikmi fimcawnnak nih Pathian duhnak kha a kan hngalhter i Jehovah sal si awkah a kan bawmh. Cun “thutnak sal sinak khan luatter” kan si lai timi ruahchannak a kan ngeihter i a donghnak ah “Pathian fale hna luatnak a sunglawimi” kha kan hmuh lai. (Rom 8:21) Mah lengah mah fimcawnnak cu kan Bawipa, Jehovah kan dawt taktak ti langhter khawhnak a ṭha bikmi lam a si.—Ex. 21:5.