1, 2. AD 33 ah Jesuh nih lamkaltu hna he Lanhtak puai an tuah hnuah zeidah a tuah?

MAH hi AD 33, Nisan 14 zan ah a cangmi a si. Jesuh le a hawile cu Lanhtak puai an tuah dihka te a si. Mah puai nih Izipt ram in Pathian nih Israel mi kha zeitindah a khamh hna ti kha a hngalhter ṭhan hna. Asinain zumhfekmi Jesuh zultu hna cu a ngan deuhmi lam in khamh an si lai. A thaizing ah Jesuh cu a ral pawl nih an thah cang lai. Raithawinak ca i a tlingmi a nunnak a pekmi nih mi vialte kha sualnak le thihnak in a luatter hna lai.—Heb. 9:12-14.

² Pathian nih dawtnak in a kan pekmi mah laksawng kha kan philh nakhnga lo Jesuh nih Lanhtak puai canah a dang puai pakhat kha tuah hram a thawk. Thilnu telh lo changreu hlumkhat kha a lak i a cheu, cun zumhfekmi lamkaltu 11 kha a phawt hna. Hitin a ti hna: “Hihi ka pum a si, nan ca i ka pekmi cu. Keimah philhlonak ah run tuah u.” Cun mitsur hang zong a pek hna i hitin a ti hna: “Hi hrai hi nan caah ka thletmi ka thi in khenhchihmi Pathian biakamnak a si.”—Luka 22:19, 20.

3. (a) Jesuh thih hnuah zei thlennak nganpi dah a um? (b) Jesuh thlacamnak kan i ruah tikah zei biahalnak hna dah kan ruah awk a si?

³ Pathian le Israel mi hna nih an tuahmi Nawlbia biakamnak cu a dong cang lai. Mah canah Jehovah le chiti thuhmi Jesuh zultu hna nih biakamnak thar an tuah cang lai. Jesuh nih a zultu hna kha Israel mi bantuk siter a duh hna lo. Israel mi hna nih Pathian kha lungrual tein an biak lo caah Pathian min kha an thangchiat. (Johan 7:45-49; Lam. 23:6-9) Jesuh nih a zultu hna kha Pathian min an thangṭhat khawh nakhnga lungrual tein um hna seh ti a duh.  Cucaah zeidah a tuah? Kan rel khawhmi thlacamnak hna lakah a ṭha bikmi thlacamnak kha a cam i a Pa kha bawmhnak a hal. (A hramthawknak hmanthlak zoh.) Mah thlacamnak cu Johan 17:1-26 ah aa ṭial. Mah thlacamnak kan i ruah tikah mah biahalnak hna hi ruat: “Pathian nih Jesuh thlacamnak cu a let maw? Mah thlacamnak ningin ka nung maw?”

4, 5. (a) Jesuh thlacamnak a thawklei in zeidah kan i cawn khawh? (b) Jesuh nih amah ca i a halmi kha Jehovah nih zeitindah a leh?

⁴ Jesuh nih a zultu hna kha zan tlaipi tiang a biapimi kong tampi a cawnpiak hna. Mah hnuah van a cau i hitin thla a cam: “Ka Pa, a caan kha a cu cang. Na Fapa nih sunparnak kan pek ve nakhnga, na Fapa cu sunparnak ka pe ko. Nangmah nih na ka pekmi vialte hna cu zungzal nunnak ka pek hna nakhnga mi vialte cung i nawlngeihnak cu na ka pek cang.” Cun hitin a ti chap: “Vawleicung ah na sunparnak cu ka langhter cang; na ka fialmi rian cu ka liim cang. Ka Pa, vawlei ser hlan i nangmah sin i ka rak ngeihmi sunparnak kha atu ah hin na hmaika ah sunparnak ka pe tuah.”—Johan 17:1-5.

⁵ Jesuh nih a thlacamnak a thawknak ah a caah a biapi bikmi kong kha a chim. Mah cu a Pa sunparnak pek kha a si. Jesuh nih zohchunhawk thlacamnak zong kha cutin a rak thawk. (Luka 11:2) Mah hnuah a zultu pawl caah a cam. ‘Zungzal nunnak a pek khawh hna nakhnga’ a hal. A donghnak ah amah caah hitin a hal: “Ka Pa, vawlei ser hlan i nangmah sin i ka rak ngeihmi sunparnak kha atu ah hin na hmaika ah sunparnak ka pe tuah.” Jehovah nih a Fapa kha vancungmi hna nakin “a ngan deuhmi min” a peknak thawngin a halmi lengin a pek.—Heb. 1:4.

6. Zungzal nunnak hmuh awkah lamkaltu pawl nih zeidah an tuah a herh? Cutin an tuah ti kha zeitindah kan hngalh khawh?

⁶ Jesuh nih a thlacamnak ah zungzal nunnak hmuh awkah tuah a herhmi zong kha a chim. (Johan 17:3 rel.) Pathian le Khrih kong kha “hngalh” zungzal a hau tiah a ti. Cutin zeitindah kan tuah khawh? Pakhatnak ah, Jehovah le a Fapa kong kha tam deuh in hngalh awkah kan tuah khawhmi zei paoh tuah a hau. Pahnihnak ah, kan hngalhmi kha zulh a hau. Jesuh nih a thlacamnak ah “na ka pekmi bia kha ka chimh hna i annih nih an cohlan” tiah a ti caah lamkaltu hna nih mah thil pahnih an tuah cang ti a lang. (Johan 17:8) Asinain zungzal nunnak hmuh awkah Pathian Bia kha ṭha tein ruah le nifa nunnak ah hman zungzal a hau. Lamkaltu pawl nih vawleicung i an nun chung vialte cutin an tuah zungzal maw? An tuah zungzal. Jerusalem Thar vanpang bunhnak lung 12 ah an min aa ṭial zungzal caah cutin kan chim khawh.—Biat. 21:14.

7. Pathian kong “hngalh” timi cu zeidah a si? Zeicah Pathian hngalh cu a biapit tuk?

⁷ Zungzal nunnak hmuh kan duh ahcun Pathian kong kha “hngalh” zungzal a hau. Mah cu zei sullam dah a si? Pathian kong tam deuh in hngalh awkah kan cawn zungzal a hau tinak a si. Asinain Pathian sining le aa tinhmi kong hngalhnak lawngin a za lo. Kan dawt taktak le amah he pehtlaihnak ṭha kan ngeih a hau. Cun unau cungah dawtnak kan langhter a hau. Baibal nih “pakhat le pakhat aa daw lomi nih cun Pathian kha an hngal lo” tiah a ti. (1 Johan 4:8) Pathian hngalh ti tikah a nawl ngaih zong aa tel. (1 Johan 2:3-5 rel.) Jehovah a hngalmi kan si khawh vemi hi tinvo sung taktak  a si. Asinain Judas Iskariot bantukin Jehovah he a sunglawimi kan i pehtlaihnak cu a rawk kho. Cucaah kan i pehtlaihnak a feh chin nakhnga kan i zuam a hau. Cutin kan tuah ahcun Jehovah nih a sunglawi tukmi zungzal nunnak laksawng a kan pek lai.—Matt. 24:13.

8, 9. Jesuh vawleicung a um chungah a caah a biapi bikmi cu zeidah a si? Zei cawnpiaknak dah Jesuh nih a huat?

⁸ Johan dal 17 i Jesuh thlacammi kan rel tikah Jesuh nih lamkaltu pawl lawng si loin kanmah zong a kan dawt tuk ti kha kan hngalh khawh. (Johan 17:20) Asinain Jesuh caah a biapi bikmi cu kanmah khamh kha a si lo. Vawleicung a um chung vialte a caah a biapi bikmi cu a Pa min upatnak pek kha a si. Tahchunhnak ah, vawleicung a ratnak kong a fianter hmasa bik lioah, Isaiah cazual chungin hitin a rel: ‘Jehovah Thlarau cu ka cungah a um. Sifakmi hna sin i Thawngṭha chim awkah chiti a ka thuh.’ Mah ca a rel lioah Pathian min kha fiang tein a aw a chuah lai ti kha kan hngalh khawh.—Luka 4:16-21.

⁹ Jesuh vawlei i a rat hlanpi ah Judah biaknaklei hruaitu pawl nih Pathian min hman lo awkah mi kha an cawnpiak hna. Mah cawnpiaknak kha Jesuh nih zeitlukin dah a huat lai khi ruathmanh. Mah biaknaklei hruaitu hna kha hitin a ti hna: “Ka Pa nawl in [‘min in,’ NW] a rami ka si, sihmanhsehlaw nan ka cohlang lo; midang pakhatkhat amah nawl in a rat tikah nan rak cohlan te ko ṭung lai.” (Johan 5:43) Cun Jesuh nih a thih lai ni tlawmpal aa duh ah, a caah a biapi bikmi kha a thlacamnak ah hitin a chim ṭhan: “Ka Pa, na min cu upatnak pe ko.” (Johan 12:28) Cun atu i kan i ruahmi thlacamnak zongah, Jesuh caah a biapi bikmi cu a Pa min sunparnak pek a si kha kan hngalh khawh.

10, 11. (a) Jesuh nih a Pa min kha zeitindah a langhter? (b) Jesuh zultu hna nih zeicah Jehovah min kha mi an hngalhter hna?

¹⁰ Jesuh cu hitin thla a cam: “Hi vawlei  chungin na kawh hna i na ka pekmi hna sinah hin na min cu ka langhter cang; annih cu nangmah ta an si i annih cu nangmah nih keimah na ka pekmi an si. Na bia kha an ngaih i atu cu kei cu na sinah ka ra cang lai; vawlei ah hin ka um ti lai lo; sihmanhsehlaw annih cu an um rih lai. A Thiangmi ka Pa, nangmah le keimah cu pakhat kan si bantuk hin pakhat an si khawh ve nakhnga, na ka pekmi hna cu na min ṭhawnnak in [‘ruangah,’ NW] huppheng ko hna.”—Johan 17:6, 11.

¹¹ Jesuh nih a zultu pawl sinah a Pa min a “langhter” asiloah a hngalhter hna ti tikah Jehovah min a hman lawng kha a si lo. Jehovah aho a si kha hngalh awkah a bawmh hna. Pathian i duhnungmi a sining hna le dawtnak in mi a pehtlaih hnaning zong kha a cawnpiak hna. (Ex. 34:5-7) Atu ah Jesuh cu van ah Siangpahrang a si cang i a zultu pawl nih vawleicung pumpi ah Jehovah min an thanh khawh nakhnga a bawmh hna. Zeicah mah rian cu ṭuan a si? Hi chan ṭhalo a dongh hlanah Jehovah kong kha mi tampi nih an hngalh khawh nakhnga caah a si. Mah caan a phanh tikah Jesuh nih zumhfekmi a tehte hna kha a khamh hna lai i mikip nih a liannganmi Jehovah min kha an hngalh lai.—Ezek. 36:23.

12. Jesuh nih a rak thawkmi rian kha liim awkah zei thil pathum dah kan tuah a herh?

¹² Jesuh nih a rak thawkmi rian liim awkah a zultu pawl kha a fial hna. Hitin thla a cam: “Vawlei ah na ka thlah bantukin kei zong nih vawlei ah ka thlah ve hna.” Asinain mah rian ṭuan khawh awkah bawmh an herh ti kha Jesuh nih a hngalh. A zultu pawl he an umṭi lioah an derthawmnak kha an tei khawh nakhnga a bawmh hna. A thlacamnak ah a zultu pawl nih a biapimi thil pathum an tuah khawh nakhnga bawmh awkah Jehovah kha a hal. Pakhatnak ah, Satan vawlei ta an si nakhnga lo thla a cam. Pahnihnak ah, Pathian Bia ngai in thiang tein an um zungzal nakhnga thla a cam. Pathumnak ah, amah le a Pa an lung aa rual bantukin a zultu pawl zong an lung aa rual ve nakhnga thla a cam. Hitin kan i hal awk a si: ‘Jesuh nih a thlacamnak ah a chimmi thil pathum kha ka tuah maw?’ A zultu pawl nih mah thil pathum kha an tuah ahcun mi tampi nih an chimmi thawngṭha an cohlan lai tiah Jesuh nih a zumh.—Johan 17:15-21 rel.

13. Kumzabu pakhatnak ah Jehovah nih Jesuh thlacamnak kha zeitindah a leh?

¹³ Lamkaltu cauk kan hlathlai tikah Jesuh thlacamnak Jehovah nih a lehmi kha kan hmuh khawh. Kumzabu pakhatnak i Khrihfa hna lakah Judah mi le Jentail mi, mirum le misifak, sal le sal ngeitu tiin an rak um i thleidannak a um khomi a si. Asinain an lung aa rual tuk caah lamkaltu Paul nih pum chung i a ummi nge he a rak tahchunh hna i an lu cu Jesuh a si. (Efe. 4:15, 16) Thleidannak a ummi Satan vawlei ah cu bantuk lungrualnak a um khawhmi cu Jehovah i a ṭhawngmi thiang thlarau thawngin a si.—1 Kor. 3:5-7.

14. Jesuh thlacamnak kha tuchan ah Jehovah nih zeitindah a leh?

¹⁴ Lamkaltu hna an thih hnuah thil sining aa thlenmi cu ngaihchiat awk ngai a si. Zumhpialmi pawl an hung chuak. Khrihfabu chungah a hmaan lomi cawnpiaknak a hung lut i mah nih ṭhencheunak a chuahter. (Lam. 20:29, 30) Asinain 1919 ah Jesuh nih chiti thuhmi Khrihfa hna kha a hmaan lomi biaknak in a luatter  hna i ‘i rem ṭhipṭhep tein a fun’ hna. (Kol. 3:14) Lungrual tein phung an chimmi nih zei ṭhatnak dah a chuahter? “Phun kip, ram kip, holh kip le hrin kip” chungin a rami, mi nuai sarih leng cu atu ah chiti thuhmi hna he lungrual tein Jehovah kha an biak. (Biat. 7:9; Johan 10:16) Mah cu “vawlei nih cun keimah cu nangmah thlahmi ka si le nangmah nih annih cu keimah na ka dawt bantukin na dawt hna ti kha a hngalh lai” tiah Jesuh nih thla a cammi kha Jehovah nih a lehmi a si.—Johan 17:23.

15. Jesuh nih chiti thuhmi a zultu hna caah a hleiin zeidah a hal?

¹⁵ Nisan 14 zanlei ah Jesuh nih a zultu pawl kha a Pennak ah amah he uktu ṭuanṭi ding in biakamnak a sernak thawngin “sunparnak” asiloah upatnak a pek hna. (Johan 17:22; Luka 22:28-30) Cucaah Jesuh nih chiti thuhmi a zultu a hung si hngami vialte caah hitin thla a cam: “Ka Pa, vawlei ser a si hlan in na ka dawt caah, na ka pekmi sunparnak kha an hmuh nakhnga na ka pekmi hna hi ka sin i umter ka duh hna.” (Johan 17:24) Tuu dang pawl cu chiti thuhmi hna nih an hmuh laimi laksawng kha nahchuah loin an i lawm. Mah zong nih tuchan Khrihfa hna cu an lung aa rual ti a langhter.

16, 17. (a) Jesuh nih a thlacamnak a donghnak ah zeidah ka tuah zungzal lai tiah a chim? (b) Zeidah kan tuah zungzal awk a si?

¹⁶ Jehovah nih a lung aa rualmi le amah a hngal taktakmi miphun a ngeih hna ti kha mi tampi nih an cohlang duh lo. Mah cu biaknaklei hruaitu pawl i a hmaan lomi cawnpiaknak ruangah a si. Jesuh chan zongah cutin a rak si ve. Cucaah a thlacamnak kha mah bia in a donghter: “A dingmi ka Pa, vawlei nih cun an hngal lo, sihmanhsehlaw kei nih cun kaan hngalh i hi hna nih hin na ka thlah hi an hngalh. Na ka dawtnak cu an chungah a um i kei zong an chungah ka um nakhnga, nangmah kong [‘na min,’ NW] cu annih kha ka hngalhter hna i ka hngalhter ṭhan lengmang ko hna lai.”—Johan 17:25, 26.

¹⁷ Jesuh nih a Pa min kha mi a hngalhter taktak hna. Cun atu zongah, Khrihfabu Lu in a Pa min le aa tinhmi kong kha midang kan hngalhter khawh hna nakhnga a kan bawmh rih. Jesuh lamhruainak kha zul in phungchimnak le zultu siternak rian kha lungtho tein ṭuan hna u sih. (Matt. 28:19, 20; Lam. 10:42) Lungrual tein um awk zongah fakpi in i zuam hna u sih. Cutin kan tuahnak thawngin Jesuh thlacam ningin kan nung kho lai. Mah nih Jehovah min kha upatnak a pek lai i zungzal nuamhnak a kan hmuhter lai.