1900 kum thawklei ah mi nih a aw a um lomi video pakhat (A Trip Down Market Street) kha an duh ngai. Mah video cu U.S.A., San Francisco, khuami hna an nunning kong a si. Video a thlatu hna nih camera kha mawṭaw hmailei ah an chiah i mi an tamnak lam kha an thlak. Mah video ah rangleng, mah lio caan i an hmanmi mawṭaw, mi nih thil an cawk lio le tadinca a zuarmi hna an lang.

Mah video kha atu ah kan zoh ṭhan tikah ngaihchiat awk ngai a si, zeicahtiah 1906, April thla ah mah video cu thlak dawh a si i mah thla ni 18 ah lihnin le mei ruangah minung 3,000 leng an thi i cuka hmun tampi a rawh caah a si. Video chung i a langmi cheukhat cu ni tlawmpal lawng an nung cang lai. Video a thlatu pakhat i a tefa a simi Scott Miles nih hitin a chim: “Cuka i mi hna kha ka hmuh hna, annih nih zeidah an ton lai kha an i hngal lo. An caah ka lung a ṭhalo ngai nain ka bawm kho hna lo.”

Mah lio i a cangmi le kan chan kan tahchunh tikah khua fakpi in a kan ruahter. Kannih zong midang caah kan lung a ṭhalo nain kan bawm kho hna lo. Annih cu nifa nunnak caah an rian a tam i a ra laimi rawhnak kong kha an ruat lo, mah rawhnak cu Satan vawlei hrawhnak kha a si. Mah rawhnak cu ralrin pek hmasa loin a tlungmi lihnin he aa lo lo. Kannih cu Jehovah biaceih ni kong ralrin peknak caanṭha tlawmpal kan ngei. Innkhat hnu innkhat phungchimnak ah zarh fate na caan tlawmpal na hman ko lai nain ralrin peknak ah tam deuh in naa tel kho lai maw?

Jesuh cu kan caah zohchunhawk ṭha a si. Jesuh nih a tonmi hna kip sinah phung a chim, lam ah a tonmi ngunkhuai khawltu le chun aa dinh caan i tikhor ah a tonmi nu kha phung a chimh hna. (Luka 19:1-5; Johan 4:5-10, 21-24) Dinhcaan tlawmpal a ngeih hmanhah mi kha phung a chimh khawh hna nakhnga aa din lo. Mi kha a zaangfah hna caah a si khawh chungin a cawnpiak hna. (Mar. 6:30-34) Phungchim awkah timhcia tein a ummi Jesuh kha tuchan thawngthanhtu hna nih zeitindah an i zohchunh?

Melika cu runvennak ṭha tuk in tuahmi ṭaihkhaan ah a ummi a si. A innpa tampi cu ramdang  in a rami siangngakchia an si. An phone number cu phone cauk ah aa ṭial lo i ṭaihkhaan i a ummi hna cazin zongah an min a um lo. Cucaah unaunu nih mileng khaan le ṭumkainak seh hlei i a tonmi hna sin paohah phung a chim. Hitin a ti: “Mah kha ka lohmun in ka hmuh.” Melika nih bupi chuahmi cauk kha holh phunphun in aa put i a innpa tampi nih cazual le mekazin kha an cohlan. Cun kan Web site, jw.org hmanning zong kha a chimh hna. Cuticun Baibal cawnpiaknak tampi a tuah khawh.

Sonia zong nih phungchim khawh awkah caanṭha a kawl ve. Anih cu sii inn ah rian a ṭuanmi a si i a rian ṭuanṭi hawi dihlak sin phungchim awkah hmuitinh a ngei. Pakhatnak ah, a rian ṭuanṭi hawi pawl nih an herhmi le hngalh an duhmi kong kha hngalh awkah aa zuam. Mah hnuah chuncaw ei caan ah phung a chimh hna. Cuticun Sonia nih Baibal cawnpiaknak pahnih a thawk khawh. Cun aa manh caan ah siibawi ton awk i a hngakmi hna sin phungchim awk zongah aa tim.

1906 i lihnin in a luatmi pakhat nih mah lihnin cu kan khua le kan peng ah a tlung balmi leiser ral lakah ṭih a nung bikmi a si tiah a chim. Asinain leiser ral vialte cu a rauhhlan i a ra laimi “Pathian a hngal lomi hna” dantatnak ni he tahchunh ahcun zeihmanh an si lo. (2 Thes. 1:8) Jehovah nih a Tehte pawl an chimmi ralrin peknak kha mi nih cohlang hna sehlaw an ruahning le an lungthin i thleng hna seh ti a duh.—2 Pit. 3:9, Biat. 14:6, 7.

Harnak caan ah kan nung ti kha hngalh awkah mi bawmhnak caanṭha na ngei. Mahca ṭhatnak lawng ruat loin Jehovah kha an kawl a hau. (Zef. 2:2, 3) Na rian ṭuan hawi, na innpa le nifate na tonmi hna sin i phungchim khawhnak caanṭha na hmuhmi paoh kha na hmang maw? Midang ralrin peknak ah tam deuh in naa tel kho lai maw?