1. Zeinihdah lungsau loin a kan umter khawh?

VANCUNG ah Khrih Siangpahrang a si kum, 1914 ah Satan vawlei donghnak caan aa thawk. Mah kum ah vancung ah raldohnak a um i Jesuh nih Satan le a khuachia pawl kha vawlei ah a thlak hna. (Biathlam 12:7-9 rel.) Satan nih “caan tawite lawnglawng” ka ngei cang ti kha a hngalh. (Biat. 12:12) Asinain mah “caan tawite” cu kum 100 hrawng a si cang caah mi cheukhat nih donghnak caan cu a sau tuk tiah an ruah khawh men. Jehovah nih Satan vawlei a donghter lai caan kan hngah lioah lungsau loin kan um maw?

2. Hi capar ah zei biahalnak hna dah kan i ruah lai?

² Lungsau lo cu ṭih a nung. Zeicah? Kan lung a sau lo ahcun ruat set loin thil kan tuah khawh caah a si. Cucaah hngah duhnak lungput ngeih awkah zeinihdah a kan bawmh lai? Hi capar i kan i ruah dingmi a tanglei biahalnak hna a phi nih a kan bawmh lai. (1) Profet Mikah sinin lungsaunak kongah zeidah kan i cawn khawh? (2) Donghnak caan a nai cang ti kha zeinihdah an langhter lai? (3) Jehovah lungsaunak cungah kan i lawmh kha zeitindah kan langhter khawh?

3. Mikah chan ah Israel mi hna sining cu zeitindah a si?

³ Mikah 7:2-6 rel. Israel mi hna Jehovah cung an zumhnak a der thluahmahmi le Siangpahrang Ahaz chan ah zumhawktlak lo an hung simi kha profet Mikah nih a hmuh. Mah zumhawktlak lo Israel mi kha mi harnak a pe khomi hling he a tahchunh hna. Annih nih mi kha ṭhalo ngaiin an pehtlaih hna i harnak an pek hna caah hling he an i lo. Chungkharmi pakhat le pakhat i dawt khawh ti lo tiangin thil sining  cu a chia. Mikah nih mah thil sining kha keimah tein ka thleng kho lai lo ti a hngalh caah Jehovah sinah lungthin dihlak in thla a cam. Cun Pathian nih a tawnghtham lai caan kha lungsau tein a hngak. Jehovah nih aa tlakmi caan ah a tawnghtham lai ti kha Mikah nih a zumh.

4. Zei harnak dah kan ton?

⁴ Mikah bantukin kannih zong mahzawn lawng aa ruatmi hna lakah khua kan sa ve. Mi tampi cu ‘lawmh a hngal lomi, zumhawk a tlak lomi, zaangfahnak a ngei lomi’ an si. (2 Tim. 3:2, 3, NW) Kan rian ṭuanhawi, sianginn kaiṭi hawi le innpa nih mahzawn ruahnak lungput an langhter tikah kan lungre a thei ko lai. Asinain cheukhat cu mah nakin a ngan deuhmi harnak kan tong. Jesuh nih a zultu hna cu chungkhar dohnak an tong lai tiah a ti. A bia cu Mikah 7:6 bia he aa lo. Jesuh nih hitin a ti: “Ka ratnak chan cu fale hna le pale hna dohter awk, fanule hna le nule hna dohter awkah a si; nan ral ṭhalo bik hna cu nanmah innchungkhar chungmi lila an si lai.” (Matt. 10:35, 36) Jehovah a bia lomi kan chungkharmi hna nih an kan nihsawh le an kan doh tikah a har tuk ko lai. Mah kha kan ton ahcun kan lung a dongh awk a si lo. Jehovah cungah zumhfek tein um in a tawnghtham lai caan kha lungsau tein kan hngah awk tu a si. Bawmhnak hmuh awkah thla kan cam peng ahcun Jehovah nih a cungah zumhfek tein kan um khawh nakhnga a herhmi ṭhawnnak le fimnak kha a kan pek lai.

5, 6. Jehovah nih Mikah kha zeitindah thluachuah a pek? Mikah nih zeidah a hmuh lo?

⁵ Jehovah nih Mikah kha a lung a sau caah thluachuah a pek. Mikah nih Siangpahrang ṭhalo Ahaz le a uknak a donghmi kha a hmuh. Ahaz fapa, Hezekiah siangpahrang a hung simi le Israel mi hna a hmaanmi biaknak i kir ṭhan awkah a bawmhmi hna kha a hmuh. Chaklei Israel pennak kha Assiria mi hna nih an lak tikah Samaria kong he aa tlaiin a ṭialmi chimchungbia a tlin zong kha a hmuh.—Mik. 1:6.

⁶ Asinain Mikah cu Jehovah nih a ṭialtermi chimchungbia vialte a tlin dih hlanah a thi. Tahchunhnak ah, Mikah nih hitin a ṭial: “Hmailei caan ah cun BAWIPA inn a umnak tlang cu tlang vialte lakah a sang bik a si lai; Cu tlang ah cun mi tampi kha an ra lai, phun tampi kha an ra lai i, ‘Ra u law BAWIPA tlang ah cun kai hna u sih’ . . . an ti lai.” (Mik. 4:1, 2) Mikah cu a pawngkam mi hna nih zei an tuah hmanhah a thih tiang Jehovah cung zumhfek tein um awkah bia a khiak. Hitin a ṭial: “Mi vialte hna cu anmahle an pathian min cio in an kal ko lai, Sihmanhsehlaw kannih cu BAWIPA kan Pathian min in a zungzal in kan kal lai.” (Mik. 4:5) Jehovah nih a biakam vialte a tlinter lai ti a zumh caah harnak caan chung zongah lungsau tein a hngah. Zumhfekmi Mikah nih Jehovah kha aa bochan.

7, 8. (a) Jehovah bochan awkah zei a ruang dah a um? (b) Zeinihdah caan cu a liam a fawimi a lawhter?

⁷ Mikah bantukin Jehovah kha kan i bochan maw? Cutin bochan awk a sinak a ruang a um. Kannih cu Mikah chimchungbia a tlinmi kha kan hmuh. Hi donghnak caan ah phun kip, ram kip le holh kip in a rami mi tampi cu “BAWIPA inn a umnak tlang” ah an kai. Annih cu pakhat le pakhat aa domi ram in a rami an si nain “an vainam hna cu tuhmui ah an ser hna” i ‘raltuk zong kha an i cawnpiak ti lo.’ (Mik. 4:3) Jehovah i a daimi a miphun lakah kan i tel khawh vemi hi tinvo sung a si.

 ⁸ Jehovah nih hi chan ṭhalo hi hrawk zokzok seh ti kan duh. Asinain lungsau tein hngah khawh awkah Jehovah ruahning in khua kan ruah a hau. Jehovah nih mi vialte biaceih awkah Jesuh Khrih kha a thim i biaceih ni zong a khiah cang. (Lam. 17:31) Asinain mah ni a rat hlanah Pathian nih mi vialte kha ‘biatak hngalh’ awk, zulh awk le khamhnak hmuh awkah caanṭha a pek hna. Cucaah mi kha nunnak an hmuh nakhnga phung kan chimh hna a hau. (1 Timote 2:3, 4 rel.) A rauhhlan ah donghnak a ra cang lai. Jehovah kong chimnak ah kan rian a tam ahcun caan cu a liam a fawimi a lo lai. Mah lengah donghnak a rat tikah phungchimnak ah kan rian a rak tam caah kan i nuam lai.

9-11. 1 Thesalon 5:3 bia cu a tling cang maw? Fianter.

⁹ 1 Thesalon 5:1-3 rel. A rauhhlan ah mi nih “a dai dih ko i a him dih ko” tiah an ti lai. Mah bia i hlenter kan duh lo ahcun “kan i ṭhangh awk le lungfim tein kan um awk a si.” (1 Thes. 5:6) Mah a biapimi thanhnak a chuahtermi thil sining cheukhat kha atu kan i ruah lai.

¹⁰ Vawlei Ralpi a dih tikah mi nih daihnak um seh ti an rak duh. Vawlei ralpi pakhatnak a dih tikah daihnak chuahter awkah Ramkomh Bu kha an dirh. Vawlei ralpi pahnihnak a dih tikah mi nih UN nih daihnak a chuahter khawh lai tiah an i ruahchan. Cozah le biaknaklei hruaitu hna nih mah bu pahnih kha an i bochan. Tahchunhnak ah, UN nih 1986 kha Ramkomh Daihnak Kum tiah an thanh. Mah kum ah nainganzi le biaknaklei hruaitu tampi cu daihnak ca thlacam awkah Catholic Church i an lu bik he an i tong.

¹¹ Asinain mah an thanhmi le a dang hna cu 1 Thesalon 5:3 i chimchungbia a tlinnak an si lo. Zeicah? “Rawhnak nih cun a den” rih hna lo caah a si.

12. “A dai dih ko i a him dih ko” timi thanhnak kong he aa tlaiin zeidah kan hngalh?

 ¹² “A dai dih ko i a him dih ko” tiah ahote nih dah an thanh lai? Khrihfaram le a dang biaknaklei hruaitu hna cu zeitindah an i tel lai? Cozah tah zeitindah an i tel lai? Mah kong cu Baibal nih a chim lo. Zei bantukin an thanh zongah zeitluk zumhawk a tlakmi a lawh hmanhah ‘daihnak le himnak’ a um taktak lai lo ti kha kan hngalh. Satan nih hi vawlei hi a uk rih ko lai. A ṭhalo tukmi a uknak cu aa thleng rih lai lo. Satan nih a karhtermi zumhnak kha kan cohlan i nainganzi ah kan i tel ahcun ngaihchiat awk ngai a si lai.

13. Vancungmi hna nih zeicah hrawhnak thli kha an tlaih?

¹³ Biathlam 7:1-4 rel. 1 Thesalon 5:3 bia tlin lai kan hngah lioah a ṭhawngmi vancungmi hna nih hrawhnak thlitu kha an tlaih. Zeidah an hngah? Lamkaltu Johan nih chiti thuhmi “Pathian sal hna” nih hmanung bik hmelchunhnak an hmuh lai tiah a ṭial. * Mah a biapimi thil a tlin dih in vancungmi hna nih hrawhnak thli kha an thlah lai. Mah hnuah zeidah a cang lai?

14. A rauhhlan ah a Liannganmi Babilon hrawh a si cang lai ti kha zeinihdah a langhter?

¹⁴ A Liannganmi Babilon a simi a hmaan lomi biaknak cu hrawh awkah aa tlak bantukin hrawh a si cang lai. Mah tikah ahohmanh nih an bawm kho lai lo. Atu hmanhah a donghnak caan a nai ti kha kan hmuh khawh. (Biat. 16:12; 17:15-18; 18:7, 8, 21) Biaknak le an hruaitu pawl an soimi hna thawngpang nih bawmtu a ngeih ti lo kha a langhter. Cutin a si ko nain biaknaklei hruaitu hna nih harnak kan tong tiin an ruat lo. Zeitluk in dah an palh! “A dai dih ko i a him dih ko” tiah an thanh hnuah cozah nih a hmaan lomi biaknak kha ruahlopi in a doh lai i a hrawh dih lai. A Liannganmi Babilon cu a zungzal in a rawk lai. Mah thil sining hna kha lungsau tein hngah cu a phu tuk.—Biat. 18:8, 10.

15. Zeicah Jehovah nih lungsau tein a hngah?

¹⁵ Jehovah nih a min kha mi nih an upat lo nain tawnghtham awkah aa tlakmi caan kha lungsau tein a hngah. Jehovah nih lungthin ṭha a ngeimi hna hrawh an si lai kha a duh lo. (2 Pit. 3:9, 10) Kannih zong cutin kan si ve ko lai. Donghnak a rat hlanah Jehovah lungsaunak cung kan i lawmh kha lam phunphun in kan langhter khawh.

16, 17. (a) Jehovah a bia ti lomi hna kha zeicah bawmh kan duh hna awk a si? (b) A cawlcang ti lomi, Jehovah sin kir ṭhan cu zeicah a biapit tuk?

¹⁶ A cawlcang ti lomi kha bawm hna. A tlaumi tuu pakhat hmuh ṭhan a si tikah vancung ah lunglawmhnak a um tiah Jesuh nih a chim. (Matt. 18:14; Luka 15:3-7) Jehovah nih atu ah amah a bia ti lomi an si hmanhah amah an dawt a rak langhtermi hna kha a siaherh hna. Cu bantuk mi hna kha Khrihfabu i kir ṭhan awk kan bawmh hna tikah Jehovah le vancungmi cu an i lawm.

¹⁷ Atu ah Pathian a bia ti lomi hna lakah naa tel ve maw? Unau pakhatkhat nih na lung aan fahter caah pumh ti loin na um men lai. Cutin na umnak a sau cang men lai. Cucaah hitin i hal: ‘Atu ka nunning hi a ṭha deuh maw, a nuamh dah kaa nuam deuh maw? Ka thin a ka huntertu hi Jehovah maw a si, asiloah a tlinglomi minung dah? Jehovah Pathian nih  ka caah a ṭhalomi a tuah bal maw?’ A tak ti ahcun Jehovah nih ṭha tein a kan pehtlaih zungzal. Atu ah kan i pumpek ningin kan nun lo hmanhah thil ṭha a kan pek rih ko. (Jeim 1:16, 17) Asinain a rauhhlan ah Jehovah ni a ra cang lai. Atu hi dawtnak a ngeimi kan Pa, Jehovah sin le Khrihfabu ah kan kir awk caan a si cang. Mah lawng hi, hi donghnak caan ah a himmi hmun a si.—Deut. 33:27; Heb. 10:24, 25.

18. Zeicah a kan hruaitu kha kan bawmh hna awk a si?

¹⁸ Hruaitu hna kha zumhfek tein bawm hna. Dawtnak a ngeimi Tuukhal, Jehovah nih lam a kan hruai i a kan kilven. A Fapa kha Tuukhal Bawi bik in rian a pek. (1 Pit. 5:4) Khrihfabu 100,000 lengah Khrihfa upa hna nih Pathian tuu pakhat cio kha ṭha tein an zohkhenh hna. (Lam. 20:28) A kan hruaitu hna kha zumhfek tein kan bawmh hna tikah Jehovah le Jesuh nih a kan tuahpiakmi vialte cung kan i lawmhnak kan langhter a si.

19. Zeitindah hmunkhat te ah kan i fonh khawh?

¹⁹ Unau he naih tein um u. Mah cu zei sullam dah a si? Ṭha tein cawnpiakmi ralkap cu ral nih an doh hna tikah hmunkhat te ah an i fonh. Cutin an tuah caah ral nih fawi tein an tei kho hna lo. Satan nih Pathian mi hna kha fak chinchin in a doh hna. Atu hi kan unau doh caan a si lo. Pakhat le pakhat naih tein um awk, kan unau pawl tlinlonak kha hmuhpiak lo awk le Jehovah tu i bochan awk caan a si cang.

20. Atu ah zeidah kan tuah awk a si?

²⁰ Cucaah Jehovah he kan i pehtlaihnak kha fehter chin hna u sihlaw hngah duhnak lungput langhter hna u sih. “A dai dih ko i a him dih ko” tiin an thanh laimi le chiti thuhmi hna hmanung bik hmelchunhnak pek an si laimi kha lungsau tein hngak hna u sih. Mah hnuah vancungmi pali nih hrawhnak thli kha an thlah lai i a Liannganmi Babilon cu hrawh a si cang lai. Mah thil a can lai kan hngah lioah Jehovah bupi chung i hruaitu hna lamhruainak kha zul hna u sih. Satan le a khuachia hna kha hmunkhat te ah do hna u sih. Atu ah salm caṭialtu i mah ruahnak cheuhnak hi kan zulh awk a si: “BAWIPA cungah a ruahchannak a chiami vialte hna, lungṭhawng le thazaang ṭhawng in um ko u.”—Salm 31:24.