Kenya i inn pakhat nih hmaikal pahnih cu luh awkah an sawm hna i an va luh tikah ihkhun cungah a itmi mi niamte kha an hmuh i an khuaruah a har tuk. Mah pa cu a pum a hmete i a ban zong a tawite. “Kebei cu an pet an lam lai” timi Pathian biakam kha an chimh tikah aa nuam tuk.—Isa. 35:6.

Atu ah kum 40 dengmang a si cangmi Onesmus cu a chuahka in ruh kiah a fawi tukmi zawtnak a ngei ti kha hmaikal pahnih nih an hun hngalh. A ruh cu a kiah a fawi tuk i tlawmpal te aa khawn hmanhah a kiak colh. Mah zawtnak cu thlop khawh a si rih lo caah Onesmus cu a nun chung vialte fahnak in buin leng kekual ṭhutnak ah um zungzal ding a si.

Onesmus nih Baibal cawn awkah a cohlan. Asinain a nu nih aa khawngdeng sual lai i a zual sual ti lai a phan caah a pumhter duh lo. Cucaah unaupa pawl nih pumhnak i an chimmi kha aw an khumh i Onesmus nih inn ah a ngaih. Thla nga hrawng Baibal an cawn hnuah Onesmus nih fahnak ka in zongah kaa pum ko lai tiah bia a khiak.

Onesmus cu aa pumh tikah a zawtnak a zual maw? A zual lo. “Kaa pumh chungah ka inmi fahnak cu a ṭha deuhmi a lo” tiah a ti. Cutin a ṭhat deuhnak cu a theihmi ruahchannak thar ruangah a si tiah a ruah. Onesmus a nu nih a fapa lungput aa thlenmi a hmuh tikah aa lawm tuk i Baibal cawn awkah a cohlan ve. Cun “Pathian rian ṭuan cu ka fapa caah sii a si” ti zong in a ti.

A rauhhlan ah Onesmus cu tipil a ing rih lomi thawngthanhtu a hung si. A hnuah tipil a ing i atu ah cun bu rianṭuantu a si cang. Onesmus nih a ke pahnih le a kut pakhat kha a hmang kho lo nain Jehovah rian kha a si khawh chungin ṭuan a duh. Manhcaan hmaikal ṭuan a duh nain form a phih ngam pah lo. Zeicah? A leng kekual ṭhutdan nampiak awkah midang bawmhnak a hau ti a hngalh caah a si. A lungre theihnak kha unau pawl a chimh hna tikah kan in bawmh lai tiah bia an kamh. Cuticun manhcaan hmaikal ṭuan khawh awkah an bawmh taktak.

Onesmus nih hmaanhmaan ṭuan a duh nain a lungre a thei ṭhan. Asinain nicang Baibal ah a herhmi thazaang peknak a hmuh. Mah cacang cu “BAWIPA hi zeitluk in dah a ṭhat ti kha nanmah tein va kawl cio hmanh u” timi Salm 34:8 kha a si. Mah cacang kha ṭha tein a ruah hnuah hmaanhmaan ṭuan awkah bia a khiak. Zarhkhat ah nili phungchim a kal i a ṭhangchomi Baibal cawnpiaknak tampi a ngei. 2010 ah Hmaikal Tinṭan a kai. Tinṭan a petu cu a rak leng hmasa bikmi unau pahnih lak i pakhat a si caah Onesmus cu aa nuam tuk lai.

Onesmus a nu le a pa cu an thi cang nain unau pawl nih nifate a herhmi kha an bawmh. Atu i a hmuhmi thluachuah ruangah aa nuam i “ram i a ummi cu ka zaw tiah an zai ti lai lo” caan kha a hngak.—Isa. 33:24.