A ṬHANGCHO liomi ram ah a ummi, Khrihfa upa Franswa nih hitin a chim: “Uktu thimnak i a phichuak nih zaangennak a chuahter caah Jehovah Tehte tampi cu an inn in an zaam. Rawl le sii a har tuk i a taangmi tlawmte zong a man a fak tuk. Bank pawl cu an khar dih i tangka chuahnak seh hna cu rian an ṭuan ti lo.”

An inn in a zaam i Biakinn ah a ummi unau pawl kha zung ṭengnge i unau pawl nih tangka le a herhmi thilri an bawmh colh hna. Aa domi phu hna nih lam an kham dih nain Jehovah Tehte Hna cu khoikalei hmanhah an ṭan lo kha an phuhnih in an hngalh caah zung ṭengnge mawṭaw pawl cu kalnak nawl an pek hna.

Franswa nih hitin a chim: “Biakinn pakhatlei kan kal lioah aa thupmi hna nih meithal in kan mawṭaw kha an kah. Asinain an kuan pawl cu kan karlak in an kal. Meithal aa putmi ralkap pakhat kan sin a rat kha kan hmuh tikah kan mawṭaw kha kan mer zokzok i zung ṭengnge leiah kan mawngh zokzok. Kan thih lo caah Jehovah cungah kan i lawm tuk. A thaizing ah mah Biakinn ah a ummi unau 130 cu a himnak hmun ah an phan i cheukhat cu zung ṭengnge ah an ra. Annih kha mah buainak a dih hlan chung thlaraulei he pumsalei he kan zohkhenh hna.”

Franswa nih hitin a chim rih: “A hnuah zung ṭengnge ah unau pawl sinin lawmhnak ca tampi a phan. Hmun kip ah a ummi unau pawl bawmhnak nih Jehovah an zumhnak kha a fehter chin.”

Kokek ruang le minung ruangah a chuakmi harnak a tongmi unau pawl kha “lum tein um u law khim tein ei u” tiin kan ti hna lo. (Jeim 2:15, 16) Mah nakcha cun pumsalei an herhmi kha bawmh awkah kan i zuam. Cu bantukin kumzabu pakhatnak lioah mangṭam a tlung lai tiin ralrin peknak bia an theih tikah “zultu pawl nih khan anmah  le an ti khawh tawk cio in Judah ram i a ummi unau pawl bawmhnak pek awkah khan an i ceih.”—Lam. 11:28-30.

Jehovah salle nih a herhbaumi kha pumsalei bawmh kan duh hna. Asinain mi cu thlaraulei zong bawmh an herh. (Matt. 5:3) Thlaraulei an chambaunak kha hngalhter awk le bawmh awkah Jesuh nih a zultu pawl kha zultu siternak rian a ṭuanter hna. (Matt. 28:19, 20) Mah rian ṭuan khawh awkah kan caan, kan thazaang le kan ngeihchiah tampi kan hman. Bupi nih thawhlawm cheukhat kha pumsalei bawmhnak caah an hman nain a bik in Pennak kong thawngṭha karhternak caah an hman. Cuticun Pathian le innpa an dawt hna kha an langhter.—Matt. 22:37-39.

Jehovah Tehte Hna i vawlei pumpi rianṭuannak a bawmmi hna nih an pekmi thawhlawm cu aa tlak tein le a ṭha bikmi lam in an hman ti kha an zumh khawh. Nangtah a herhbaumi unau pawl kha na bawm kho hna lai maw? Zultu siternak rian kha bawmh na duh maw? Na duh ahcun “nangmah kut chungah ṭhatnak tuah khawhnak kha a um tikah, a hmu hnga ding a simi sinin ṭhatnak kha va kham hlah.”—Ptb. 3:27.