1, 2. (a) Tuu cu ṭha tein zohkhenh an si tikah zei ṭhatnak dah a chuak? (b) Jesuh chan i mi hna cu zeicah khaltu a ngei lomi tuu bantuk an si?

TUU cu ṭha tein a zohkhenhtu tuukhal an ngeih lawngah an ngan a dam. Tuukhal nih tuu kha rawl einak hmun ah chiahtak men in a dang an herhmi a zohkhenh hna lo ahcun kum tlawmpal hnuah tuu cu an der i an zaw tiah tuu zuatnak kong ṭialmi cauk pakhat nih a ti. Asinain tuukhal nih tuu pakhat cio kha ṭha tein a zohkhenh hna tikah a tuurun cu an ṭhawng i an ngan a dam.

² Khrihfabu zongah cutin a si ve. Khrihfa tuukhal nih tuu pakhat cio kha ṭha tein an zohkhenh hna ahcun Khrihfabu dihlak ṭhatnak an hmu lai. Mibu cu “khaltu a ngei lomi tuu bantukin lungrethei le awlokchong in an um” kha Jesuh nih a hmuh hna tikah a zaang an fak ti kha naa cinken ko lai. (Matt. 9:36) Jesuh chan i mi hna cu zeicah khaltu a ngei lomi tuu bantuk an si? Pathian Nawlbia cawnpiaknak rian a ngeimi hna nih puarhrang ngaiin an pehtlaih hna i anmah theng zong an cawnpiak hna ningin an nung lo. Biaknaklei hruaitu hna nih mi cungah dawtnak le zawnruahnak langhter loin Pathian biak kha a harmi an lawhter. Mah tikah mi nih ‘thil rit’ a phormi bantuk ah an i ruat.—Matt. 23:4.

3. Khrihfa upa nih tuurun an zohkhenh tikah zeidah an philh lo awk a si?

³ Tuchan Khrihfa upa hna nih a biapimi rian an ngei. An zohkhenhmi tuu cu Jehovah le Jesuh ta an si. Mah tuu hna cu “tuukhal ṭha” Jesuh caah an sunglawi tuk i an caah a nunnak hmanh a pek. Annih cu ‘a sungmi a thi’ in a “cawkmi” an si. (Johan 10:11; 1 Kor. 6:20; 1 Pit. 1:18, 19) Khrihfa upa nih an hruaitu cu “Tuukhal ngan” Jesuh Khrih a si ti kha an philh  lo awk a si. Cucaah tuurun an pehtlaih hnaning kha Jesuh nih bia a ceih te hna lai.—Heb. 13:20.

4. Hi capar ah zei kong dah kan i ruah lai?

⁴ Khrihfa upa nih tuu kha zeitindah an pehtlaih hna awk a si? Unau pawl cu ‘hruaitu pawl an bia ngaih’ awkah forh an si. Asinain Jehovah nih amah ta a simi tuu kha “a uk in uk” lo awkah Khrihfa upa zong kha nawl a pek hna. (Heb. 13:17; 1 Piter 5:2, 3 rel.) Khrihfa upa nih tuu kha “a uk in uk” loin zeitindah an ‘hruai’ khawh hna lai? Phundang cun, Khrihfa upa nih Pathian pekmi nawlngeihnak lonh loin zeitindah tuu kha an zohkhenh khawh hna lai?

5. Isaiah 40:11 in Jehovah kong zeidah kan hngalh khawh?

⁵ Jehovah he aa tlaiin profet Isaiah nih hitin a ti: “A tuurun kha tuukhal nih an tuu an zohkhenh hna bangin a zohkhenh hna lai; tuufa tete kha a pumh hna lai i a kut in a cawi hna lai; an nule kha nem tein a hruai hna lai.” (Isa. 40:11) Mah Baibal cang nih a tha a dermi asiloah huhphenh a herhmi hna kha Jehovah nih zeitindah a zohkhenh hna ti a langhter. Tuukhal nih a tuu pakhat cio an herhmi a hngalh bantukin Jehovah nih unau pakhat cio an herhmi kha a hngalh i bawmh a duh hna. Cun tuukhal nih a chuakkami tuu kha a pom bantukin Jehovah nih hneksaknak le harnak tampi kan ton tikah a kan hnemh i a hleiin a kan zohkhenh. Jehovah cu “zaangfahnak in a khatmi kan Pa” a si.—2 Kor. 1:3, 4.

6. Khrihfa upa nih Jehovah kha zeitindah aa zohchunh khawh?

⁶ Vancung kan Pa sinin Khrihfabu tuukhal nih a biapimi thil aa cawn khawh. Jehovah bantukin tuu an herhmi kha hngalh awkah aa zuam a hau. Unau pawl nih zei harnak dah an ton ti a hngalh ahcun zeitikah le zeitindah tha ka pek hna lai i ka bawmh hna lai ti kha a hngalh lai. (Ptb. 27:23) Cucaah unau pawl kha caanpek in bia a ruah hna lai i an bia a ngaihpiak hna lai. Unau pawl i an pumpak kong ah aa thlak lai lo nain Khrihfabu chung i a hmuhmi le a theihmi kha biapi ah a chiah lai i “a dermi” kha dawtnak in a bawmh hna lai.—Lam. 20:35; 1 Thes. 4:11.

7. (a) Ezekiel le Jeremiah chan ah Pathian tuu cu zeitindah pehtlaih an si? (b) Zumhawk a tlak lomi tuukhal pawl Jehovah nih a hlawtmi hna in zeidah kan i cawn khawh?

⁷ Ezekiel le Jeremiah chan ah a nungmi Pathian miphun i tuukhal hna lungput kong kha ruathmanh. Annih nih tuu kha ṭha tein an zohkhenh hna ding a si nain cutin an tuah lo caah Jehovah nih a hlawt hna. Jehovah nih hitin a ti: ‘Ka tuu hna cu ram sa nih a seh hna i khaltu an ngeih lo caah sahrang rawl ah an cang i ka tuukhal hna nih ka tuu kong ah an zeihmanh a poi lo i anmah zawn lawng kha an i ruat.’ Hruaitu hna cu anmah zawn lawng an i ruat i an hak a kauh caah mi cu harnak an tong. (Ezek. 34:7-10; Jer. 23:1) Khrihfaram hruaitu hna zong cutin an si caah Pathian nih a hlawt ve hna. Zumhawk a tlak lomi tuukhal pawl Jehovah nih a hlawtmi hna in Khrihfa upa nih zei a biapimi kong dah an cawn khawh? Jehovah tuurun kha dawtnak he ṭha tein zohkhenh awk a si ti kha a si.

8. Khrihfa upa nih unau pawl an cawnpiak hna tikah Jesuh kha zeitindah an i zohchunh khawh?

⁸ Mitling lo kan si caah unau cheukhat nih Jehovah nih a halmi hna kha ṭha tein an hngalthiam men lai lo. Baibal phunglam  he aa tlak lomi biakhiahnak an tuah men lai asiloah thlaraulei nutling patling a si lomi bantukin thil an tuah men lai. Mah tikah Khrihfa upa nih zeitindah an pehtlaih hna awk a si? A zultu pawl sin i Jesuh lungsaunak kha an i zohchunh awk a si. Pennak ah ahodah a ngan bik lai ti in a zultu pawl cu an i al lengmang nain Jesuh cu an cungah a thin a hung bal lo. Toidornak langhternak kong kha dawtnak he a cawnpiak lengmang ko hna. (Luka 9:46-48; 22:24-27) I toidor timi zei a si an hngalh nakhnga an ke hmanh a ṭawlpiak hna. Tuchan Khrihfa upa hna zong nih toidornak an langhter a hau.—Johan 13:12-15 rel; 1 Pit. 2:21.

9. Lamkaltu hna i zei lungput dah Jesuh nih a remh hna?

⁹ Lamkaltu Jeim le Johan nih tuukhal timi cu midang uk a si ti in an rak ruah. Pennak ah hmun ṭha rak kan pe tiah Jesuh kha an hal. Mah tikah Jesuh nih an lungput kha a remh hna i hitin a ti hna: “Vawleicung ah cun nan hngalh bantukin, bawi nih an ukmi hna cu a lal in an lalhnawh tawn hna i hruaitu hna nih khan an hruaimi hna cu a uk in an uk tawn hna. Sihmanhsehlaw nannih cu cuticun nan si awk a si lai lo. Nan lak i pakhatkhat nih ngan a duh ahcun nan sinum a si awk a si.” (Matt. 20:25, 26) Lamkaltu hna nih an unau pawl kha “a lal in lalhnawh,” phundang cun zeidah an tuah awk a si timi chimh zungzal kha an hrial a hau.

10. Khrihfa upa nih tuu kha zeitin pehtlaih hna seh tiah dah Jesuh nih a duh? Paul cu zeitindah zohchunhawk ṭha a si?

¹⁰ Jesuh nih tuu pawl kha amah nih a pehtlaih hnaning in Khrihfa upa zong nih pehtlaih awkah aa ruahchan. Bawi bantukin um loin unau pawl caah rian ṭuan an duh awk a si. Lamkaltu Paul cu Jesuh bantukin unau pawl caah toidor tein rian a ṭuan. Efesa Khrihfa upa hna kha hitin a ti hna: “Nan sin i ka um chung vialte, Asia ram chung i ka ra phakka tein zeitindah nan sinah ka umtuning a si kha nan hngalh. Toidorte le mitthli he Bawipa sal ka si.” Paul nih Khrihfa upa hna kha aa toidormi le unau pawl caah fakpi in rian a ṭuanmi si hna seh ti a duh. A nunning in ‘a dermi zeitindah bawmh awk an si’ kha a hmuhsak hna. (Lam. 20:18, 19, 35) Korin khuami hna sin a cakuat ah an zumhnak uk a duh lo kha a ṭial. Anih cu anmah bantukin Pathian sal a si ve i lunglawm tein Pathian an biak khawh nakhnga bawmh a duh hna. (2 Kor. 1:24) Toidornak le rian fakpi in ṭuannak ah Paul cu tuchan Khrihfa upa pawl caah zohchunhawk ṭha a si.

11, 12. Khrihfa upa nih unaupa pakhat kha biakhiahnak tuah awkah zeitindah a bawmh khawh?

¹¹ Khrihfa upa cawnpiaknak cu a zungzal in Baibal chung i “cawnpiaknak a hmaanmi” cungah hram aa bunh awk a si. (Titas 1:9) Mah lengah ‘nem tein’ an cawnpiak hna awk a si. (Gal. 6:1) Zeitin tuah ding tiah a hnek in hnek loin Jehovah an dawtnak le a Bia an duhnak cungah hrambunh in anmah tein biakhiahnak tuah awkah an bawmh hna lai. Tahchunhnak ah, Khrihfa upa nih unaupa pakhat kha Baibal phunglam asiloah kan cauk chung i capar pakhat kha a ruahpinak thawngin a biapimi biakhiahnak tuah awkah a bawmh khawh men. Aa thimmi nih Jehovah he an i pehtlaihnak zeitin a hnorsuan khawh ti kha ruah awkah a forh lai. Cun biakhiahnak tuah hlanah Pathian sinah thlacam in lamhruainak hal a biapit tuk kha a chimh khawh. (Ptb.  3:5, 6) An i ruahceih hnuah Khrihfa upa nih unaupa kha amah tein biakhiahnak a tuahter lai.—Rom 14:1-4.

¹² Khrihfa upa nih lamhruainak an pek hna tikah a zungzal in Baibal ah hram aa bunh awk a si. Cucaah Baibal kha ṭha tein hmanthiam awkah an i zuam ding a si. Cuticun Pathian pekmi nawlngeihnak lengin thil an tuah lai lo. Mah lengah tuu cu anmah ta a si lo. Unau pakhat cio kha an tuahmi biakhiahnak he aa tlaiin Jehovah le Jesuh nih bia an ceih hna lai.—Gal. 6:5, 7, 8.

13, 14. Khrihfa upa cu tuurun caah zeitindah zohchunhawk ṭha an si khawh?

¹³ Piter nih Khrihfa upa pawl kha unau pawl “a uk in uk hna hlah u” tiah a ti hna hnuah “an i zohchun ding tu si i zuam u” tiah a forh hna. (1 Pit. 5:3) Khrihfa upa cu tuurun caah zeitindah zohchunhawk tlak an si khawh? Khrihfa upa si khawh awkah ngeih a herhmi sining pahnih kha ruathmanh. Pakhatnak ah, “mahle mah aa uk khomi” a si a hau. Chimduhmi cu Baibal phunglam kha ṭha tein a hngalhthiam lai i zeitin hman ding a si kha a hngalh lai. A harmi thil sining ah lungdai tein a um lai i biakhiahnak tuah hlanah ṭha tein a ruah lai. Pahnihnak ah, “a innchungkhar ṭha tein a zohkhenh khomi a si lai.” Chimduhmi cu Khrihfa upa cu chungkhar a ngeimi a si ahcun va le pa in zohchunhawk ṭha a si a hau, zeicahtiah “mah innchungkhar hmanh ṭha tein a zohkhenh kho lomi nih cun zeitindah Pathian Khrihfabu cu a zohkhenh khawh lai?” (1 Tim. 3:1, 2, 4, 5) Cu bantuk sining a ngeimi Khrihfa upa cu unau pawl nih an zumh hna lai.

¹⁴ Khrihfa upa nih Jesuh bantukin phungchimnak rian kha lam an hruainak thawng zongin zohchunhawk ṭha an chiah. Pennak kong thawngṭha chimnak cu Jesuh nunnak ah a biapi bikmi ah aa tel i a zultu pawl kha phungchim ning a cawnpiak hna. (Mar. 1:38; Luka 8:1) Tuchan ah, unau pawl nih Khrihfa upa he phungchim kalṭi kha an duh. Mah a biapimi rian ca i Khrihfa upa lungthawhnak kha an hmuh i a phungchim ning kha an i cawn. Khrihfa upa cu a rian a tam tuk buin phungchimnak caah a caan le a thazaang a hman ahcun unau pawl zong cu bantuk lungthawhnak an ngei ve lai. Khrihfa upa nih pumhnak ca timhchungnak, a phi peknak le Biakinn thenhnak le kilvennak rian ti bantuk zongah unau pawl caah zohchunhawk ṭha a chiah khawh.—Efe. 5:15, 16; Hebru 13:7 rel.

15. Khrihfa upa nih tuukhal lennak an tuahnak a ruang cheukhat cu zeidah a si?

¹⁵ Tuukhal ṭha nih hma a pumi le a zawmi tuu kha a thlop colh hna. Cu bantukin  Khrihfa upa nih harnak a tongmi le cawnpiak asiloah thapek a herhmi hna kha an bawmh colh hna awk a si. Tar le a zawmi hna cu nifa an herhmi kha bawmh an hau nain a hleiin Baibal in thapek le hnemh an herh khun. (1 Thes. 5:14) Mino unau pawl cu “tlanval lio pumsa duhnak” kha fakpi in an doh men lai. (2 Tim. 2:22) Khrihfa upa nih tuukhal lennak an tuahnak thawngin unau dihlak kha an bawmh hna. An len hna lioah unau pawl tonmi harnak kha hngalh an i zuam lai i Baibal in tha an pek hna lai. Unau pawl kha an herhmi bawmhnak an pek hna ahcun buaibainak nganpipi kha an hrial khawh lai.

16. Unau pakhat cu buaibainak nganpi a ton ahcun Khrihfa upa nih zeidah an tuah awk a si?

¹⁶ Unau pakhat nih Jehovah he an i pehtlaihnak a rawhter khomi buaibainak nganpi a ngeih ah tah zeitin? Jeim nih hitin a ti: “A zawmi nan um ahcun, Khrihfa upa kha au hna u law thla in campiak hna seh law Bawipa min in chiti kha in thuh hna seh. Zumhnak in thla an camnak nih khan a zawmi kha a damter lai; Bawipa nih damnak kha a pek ṭhan lai i sualnak a tuahmi kha ngaihthiam a si lai.” (Jeim 5:14, 15) “A zawmi” unau nih ‘Khrihfa upa kha a auh’ hna lo hmanhah Khrihfa upa nih a sining an hngalhle cangka an bawmh awk a si. Harnak a tongmi unau he thla an camṭi asiloah an campiak i an bawmh tikah Pathian rian lunglawm tein ṭuan awkah tha a pemi tuukhal ṭha an si kha an langhter.—Isaiah 32:1, 2 rel.

17. Khrihfa upa nih “tuukhal ngan” an i zohchunh tikah Khrihfabu cu zeitindah ṭhatnak a hmuh?

¹⁷ Khrihfa upa nih Jehovah bupi chung i an tuahmi thil kip ah “tuukhal ngan” Jesuh Khrih kha zohchunh an i zuam. Annih nih tuurun an ṭhawn chin nakhnga le zumhfek tein Pathian an biak nakhnga an bawmh hna. Dawtnak a ngeimi tuukhal hna le a Lianngan Bikmi Tuukhal, Jehovah cungah kan i lawm tuk hringhran.