1, 2. Zeicah hlennak hi a tam tuk, tuchan ah zei bantuk hlennak hna dah kan hmuh? (A hramthawknak hmanthlak zoh.)

VAWLEI ah hlennak le lihchimnak hi a tam tuk. Mah cu khuaruahhar awk a si lo. Satan Khuachia cu mi hlen a thiam tukmi a si lengah hi vawlei uktu a si tiah Baibal nih a ti. (1 Tim. 2:14; 1 Johan 5:19) Hi vawlei ṭhalo donghnak a naih chin bantukin Satan nih “caan tawite lawnglawng” ka ngei cang ti a hngalh caah a thin a lin chinchin ve. (Biat. 12:12) Cucaah Khuachia kut tangah a ummi hna cu an ṭhalo chin lengmang lai tiah kan i ruahchan khawh. Annih nih Jehovah a biami hna kha hlen awkah a hleiin an i zuam.

² A caan ah thawngthanhnak hna nih Jehovah salle le an zumhnak kong an chim tikah a hmaanmi le a hmaan lomi an cawh asiloah lih in an chim. Tadinca biatlangpi, TV le Internet hna kha a hmaan lomi kong thanhnak ah an hman tawn. Mi cheukhat nih mah kha ṭha tein hlathlai hmasa loin an zumh caah an ngaih a chia i an thin hmanh a hung.

3. Hlen kan si nakhnga lo zeinihdah a kan bawmh khawh?

³ Kannih tu cu Satan hlennak in kan i kilven khawh caah kan i lawm tuk. Cutin i kilven khawh awkah “palhmi remhnak . . . caah a ṭhahnemmi” Baibal nih a kan bawmh. (2 Tim. 3:16) Lamkaltu Paul ṭialmi nih Thesalonika khua i Khrihfa cheukhat cu hlen an si ti a langhter. Annih kha “fawi tuk in lungtuai in um hlah u” tiah a rak ti hna. (2 Thes. 2:1, 2) Paul ralrin peknak in zei fimnak dah kan i lak khawh i mah kha zeitindah kan zulh khawh?

4. Thesalonika khua i Khrihfa hna cu “Bawipa Ni” a rat lainak kong he aa tlaiin zeitindah ralrin pek an si, kannih tah zeitindah ralrin pek kan si?

⁴ Thesalonika khua i Khrihfa hna sin a voikhatnak  a cakuat ah Paul nih “Bawipa Ni” a rat lainak kong he aa tlaiin ralrin a pek hna. Unau pawl kha a lung aa tuaimi le timhcia in a um lomi siter a duh hna lo. Nannih cu “ceunak mi” nan si i ‘nan i ṭhangh awk le lungfim tein nan um awk a si’ tiah a ti hna. (1 Thesalon 5:1-6 rel.) Tuchan ah a hmaan lomi biaknak dihlak a simi a Liannganmi Babilon hrawh a si lai kha kan hngak. Mah hrawhnak cu Jehovah ni lianngan ni aa thawknak a si lai. Jehovah nih aa tinhmi zeitindah a tlinter lai kha kan hngalhthiam. Jehovah ni ca, i timh awkah a kan bawmmi ralrin peknak hna kha Khrihfabu in kan hmuh lengmang. Mah kan hmuhmi ralrin peknak hna kha ṭha tein kan ngaih ahcun ‘kan khuaruah khawhnak’ kha hmangin Pathian biak ding timi kan biakhiahnak a fek chin lai.—Rom 12:1, NW.

5, 6. (a) Paul nih Thesalon cakuat pahnihnak ah zei kong dah a ṭial? (b) A rauhhlan ah Jesuh nih zeidah a tuah lai, zei bia dah kan i hal awk a si?

⁵ Paul nih Thesalon cakuat pahnihnak zong a ṭial. Mah ah Jesuh nih “Pathian a hngal lomi hna le Bawipa Jesuh kong thawngṭha a ngai duh lomi hna” bia a ceih hna tikah a um dingmi harnak kong kha a ṭial. (2 Thes. 1:6-8) Thesalon khua i Khrihfa cheukhat cu Jehovah ni a ra zau lai ti an theih tikah an thin a phang i an lung aa tuaitam tiah mah cakuat dal 2nak ah Paul nih a ṭial. (2 Thesalon 2:1, 2 rel.) A hmasa Khrihfa hna nih Jehovah tinhnak zeitindah a tlin lai ti kha fiang tein an rak hngalthiam lo. Mah kha Paul nih chimchungbia kong he aa tlaiin a hnu i a ṭialmi mah bia nih a langhter: “Kan ngeihmi hngalhnak cu siseh, midang chimh thiamnak kan ngeihmi zong cu siseh, a cheuchum lawnglawng an si i a cheuchum lawnglawng a simi cu a tlingmi a phak tikah cun an loh phung a si ko.” (1 Kor. 13:9, 10) Asinain Jehovah nih Paul, lamkaltu Piter le a dang zumhfekmi chiti thuhmi unaupa pawl a rak ṭialtermi hna ralrin peknak bia an ngaihnak thawngin zumhfek tein an um kho.

⁶ An ruahnak remh awkah Pathian nih Paul kha Jehovah ni a phanh hlanah zumhpialmi le “mi ṭhalopa” an chuah lainak kong a ṭialter. * Mah hnu, Pathian thimmi caan ah Jesuh nih hlen a simi dihlak  kha “a hrawh” dih cikcek hna lai. Cutin biaceih an si cu ‘biatak kha an rak cohlan duh lo’ caah a si tiah Paul nih a fianter. (2 Thes. 2:3, 8-10) Hitin kan i hal awk a si: ‘Biatak kha zeitlukin dah ka duh? Hmanung bik Baibal fianternak ka hngalh nakhnga vawleicung pumpi i Pathian miphun caah chuahmi hi mekazin le a dang cauk pawl kha ṭha tein ka rel maw?’

7, 8. (a) A hmasa Khrihfa hna caah zeidah ṭih a nung? (b) Tuchan Khrihfa hna caah a hleiin zeidah ṭih a nung?

⁷ Khrihfa hna caah ṭih a nungmi cu zumhpialmi hna cawnpiaknak lawng a si lo. Paul nih Timote sinah “tangka duhnak hi ṭhatlonak phun kip chuahnak hram a si” tiah a ṭial. Cun “mi a cheu cu tangka ngeih an duh tuk caah zumhnak kha an kaltak i ngaihchiatnak a phunphun an tong” ti zongin a ṭial. (1 Tim. 6:10) “Minung sining nih a tuah tawnmi” zong hi a um zungzalmi thil ṭihnung a si.—Gal. 5:19-21.

⁸ Paul nih Thesalon khua i Khrihfa hna kha ‘lamkaltu a deu’ tiah a auhmi hna kongah fakpi in ralrin a pek hna. An lak i cheukhat nih “a zummi hna kha anmah lei i hruai awkah lih an chim.” (2 Kor. 11:4, 13; Lam. 20:30) Efesa Khrihfa hna nih “mi ṭhalo” kha Khrihfabu chungah an cohlang hna lo i lamkaltu deu le mi lihchim an si ti kha an rak langhter caah Jesuh nih a rak thangṭhat hna. (Biat. 2:2) Paul nih Thesalon khuami hna kha a cakuat pahnihnak ah hitin ralrin a pek hna: “U le nau hna, Bawi Jesuh Khrih min in, mi thathu . . . cu kom hna hlah u, tiah kan in fial hna.” Mah hnuah “rian ṭuan a duh lomi” Khrihfa hna kong zong a chim. (2 Thes. 3:6, 10) Mi thathu le rian ṭuan a duh lomi kha an hrial hna awk a si ahcun zumh a pial hnikmi hna cu an hrial chinchin hna awk a si. Hlanah cu bantuk mi hna he i komh cu a hleiin ṭih a nung i hrial awk an rak si bantukin tuchan zongah a si ṭhiamṭhiam.—Ptb. 13:20.

9. Mi pakhat nih Baibal fianter lomi kong a ruahdamh asiloah Jehovah bupi kha sual a phawt ahcun zeicah fakpi in kan i ralrin awk a si?

⁹ Harnak nganpi le hi vawlei ṭhalo donghnak caan hi a nai tuk cang. Jehovah nih kumzabu pakhatnak ah a rak pekmi hna ralrin peknak cu tuchan ah a hleiin a biapi. ‘Pathian vel kha kan hmuh cang i cu vel cu pakpalawng ah canter’ kha kan duh hrimhrim lo. Cutin kan canter sual ahcun zungzal nunnak kan sung lai. (2 Kor. 6:1) Khrihfabu ah a rak i pummi pakhatkhat nih Baibal fianter lomi kong ruahdamh in chim awk asiloah Khrihfa upa le Pathian rian a ṭuanmi midang kha sual phawt awkah a kan lem ahcun fakpi in kan i ralrin a hau.—2 Thes. 3:13-15.

10. Thesalonika khua i Khrihfa hna cu zei biatak zulh awkah dah forh an si?

¹⁰ Paul nih Thesalonika khua i Khrihfa hna kha “fek tein dir” awk le an rak theihmi kha zulh peng awkah a forh hna. (2 Thesalon 2:15 rel.) Cawnpiak an rak simi “biatak” cu zeidah a si? Jesuh cawnpiaknak le Pathian nih Paul le midang a ṭialtermi hna kha a si. A hmaan lomi biaknak nih an cawnpiakmi hna kha a si lo. Paul nih Korin khua i Khrihfa hna kha a thangṭhat hna, zeicatiah hitin a ṭial: “Keimah kha philh lo tein nan ka um i kaan pek chinmi hna cawnpiaknak kha nan zulh caah kaan thangṭhat hna.” (1 Kor. 11:2) Mah cawnpiaknak cu Jehovah le a Fapa sinin a rami a si caah zumh awk le bochan awk a tlak.

11. Mi cheukhat cu hlen an si tikah zeidah a cang kho?

 ¹¹ Paul nih Hebru khuami hna sin a cakuat ah Khrihfa hna i an zumhnak a tlauter khomi le Jehovah cung zumhawktlak lo a siter khomi thil pahnih kong a ṭial. (Hebru 2:1; 3:12 rel.) Jehovah sinin duhsah in a ping ah kalnak kong le Jehovah zamtaknak kong a ṭial. Tilawng pakhat cu rilikam in duhsah in aa thawnmi kha hngalh awkah a har. Duhsah duhsah in lamhlatpi tiang aa thawn kho. Asinain mi pakhat nih a tilawng kha rilikam in a nam hramhram khawh. Mah tahchunhnak pahnih nih mi pakhat cu hlen khawh a si le biatak a zumhnak a der thluahmah ahcun zeidah a cang kho ti a langhter.

12. Zeinihdah Jehovah he kan i pehtlaihnak a hrawh khawh?

¹² Thesalonika khua i Khrihfa cheukhat cu hlen khawh an rak si. Tuchan ah tah cutin a si kho maw? Kan caan a ei khomi thil tampi a um. Na huammi thil tuahnak, Internet hmannak, cakuat rel le lehnak asiloah zaang lentecelhnak kong relnak ah suimilam zeizat dah na hman ti kha ruathmanh. Mah thil pakhatkhat nih Khrihfa pakhat kha a lung a vaivuanhter khawh i Jehovah ca i a lungthawhnak kha a zorter khawh. Mah tikah zeidah a cang kho? Lungtak in thla a cam ti men lai lo. Asiloah Baibal relnak, pumhnak le phungchimnak caah caan tlawm deuh lawng a hman cang men lai. Fawi tuk in lungtuai kha zeitindah kan hrial khawh?

13. Baibal nih a chimchung bantukin mi tampi nih zei lungput dah an ngeih, zeinihdah kan zumhnak kha a kilven khawh?

¹³ Satan vawlei donghnak cu a nai tuk cang i “donghnak caan” ah kan nung ti a cohlang duh lomi hna he i komh cu ṭih a nung ti kha kan hngalh a hau. Lamkaltu Piter nih atu lio caan he aa tlaiin hitin a ṭial: “An pumsa duhnak nih a ukmi hna kha an hung chuak lai. Nannih cu an in nihsawh hna lai i ‘“Ka ra ṭhan lai,” tiah bia aa kam a si lo mei? Atu khuazei ah dah a um kun? Kan pupa hna cu an thi diam cang, sihmanhsehlaw thil cu vawlei ser ri in a si bantukin pei a si peng ko hi,’ an ti lai.” (2 Pit. 3:3, 4) Nifate Baibal relnak le hlathlainak nih “donghnak caan” ah kan nung ti philh lo awkah a kan bawmh lai. Baibal chimchungmi zumhpialmi hna cu hlanpi in an um cang i atu tiang an um rih ko. “Mi ṭhalopa” zong a um rih i Pathian salle kha a doh hna. Mah ruangah Jehovah ni cu a nai cang ti kha zeitikhmanh ah kan philh awk a si lo.—Zef. 1:7.

14. Phungchimnak ah hmaan tein i telnak nih zeitindah a kan kilven khawh?

¹⁴ Phungchimnak ah hmaan tein i telnak nih lungtuai lo awkah a bawmh hna ti kha hmuhtonnak hna nih a langhter. Khrih Jesuh nih a zultu hna kha miphun kip zultu siter awk le cawnpiak awkah nawl a pek hna, mah cu an caah kilvengtu a si hngami ruahnak cheuhnak a si. (Matt. 28:19, 20) Mah nawlpekmi zulh khawh awkah phungchimnak ah lungtho tein i tel a hau. Thesalonika khua i Khrihfa hna cu phungchim men in an lung a si i kan rian a si ti phun men in mi an cawnpiakmi hna kha na mitthlam ah na cuanter kho maw? Paul nih hitin a timi hna kha i cinken: ‘Thiang thlarau kha dawn hlah u; chimchungbia kha zei rello in um hlah u.’ (1 Thes. 5:19, 20, NW) Kan hlathlaimi le mi kan chimhmi hna chimchungbia pawl cu lungthawh awk taktak an si.

15. Chungkhar pumhnak ah tuah khawhmi thil cheukhat cu zeidah an si?

 ¹⁵ Kan innchungkhar mi hna kha phungchim a thiammi an si nakhnga bawmh kan duh hna. Cutin bawmh awkah unau cheukhat nih chungkhar pumhnak i caan cheukhat kha phungchim cawnnak caah an hman. Mah caan ah lennolh tuahnak caah nan i tim kho. Zei kong dah chim naa timh? Inn-ngeitu nih tam deuh in hngalh a duh nakhnga zeitindah na chim khawh? Len ṭhan awkah zeitik caan dah a ṭha bik? Mi tampi nih chungkhar pumhnak i caan cheukhat kha pumhnak ca i timhnak zongah an hman. Nannih chungkhar tah cutin nan tuah kho lai maw? Pumhnak ah a phi peknak le a dang ah nan i tel ve ahcun nan zumhnak a fek lai i lungtuai lo awkah aan bawmh hna lai. (Salm 35:18) Chungkhar pumhnak nih Baibal fianter lomi kong ruahdamh lo awk le Jehovah nih bupi hmangin a chimmi le Baibal chimmi cung lunghrin lo awkah aan bawmh hna lai.

16. Zeinihdah chiti thuhmi hna kha lungtuai lo awkah a bawmh hna?

¹⁶ Kum tampi chungah, Jehovah nih a miphun kha Baibal chimchungbia hngalhthiam chin awkah a bawmh hnanak thawngin thluachuah a pek hna. Mah kong kan ruah tikah hmailei kan hmuh hngami thluachuah kong chimchungbia zong a tling hrimhrim lai ti kan zumh khawh. Chiti thuhmi hna cu van ah Khrih he umṭi ding timi ruahchannak an ngei. Mah ruahchannak nih lungtuai lo awkah a bawmh hna lai ti cu a fiang ko. Paul nih Thesalon khuami hna sin a ṭialmi mah bia hi tuchan chiti thuhmi hna he zong aa pehtlai: “Nanmah aan dawtu hna Pathian kha zungzal in lawm ko u sih. Zeicahtiah nannih cu Pathian nih thlarau ṭhawnnak thawngin Pathian mi ah aan canter hna thawng le biatak nan zumhnak thawng khan . . . a rak in thim hna.”—2 Thes. 2:13.

17. 2 Thesalon 3:1-5 bia nih zeitindah thazaang aan pek?

¹⁷ Vawleicung zungzal nun ding aa ruahchanmi hna zong chiti thuhmi hna bantukin fawi tein lungtuai lo awkah an si khawh chungin an i zuam awk a si. Vawleicung zungzal nun ding aa ruahchanmi na si ahcun Paul nih Thesalonika khua i chiti thuhmi hna sin a chimmi thazaang peknak bia kha zul zungzal. (2 Thesalon 3:1-5 rel.) Mah bia caah kan i lawmh awk a si. Thesalon cakuat nih Baibal fianter lomi kong ruahdamh lo awk le lunghrin awk a simi thil zumh lo awkah a kan bawmh. Donghnak caan a naih tuk cang caah mah ralrin peknak kan hmuhmi cungah kan i lawm tuk.