Nai ah chuahmi Vennak Innsang kha ṭha tein na rel maw? A tanglei biahalnak hna na phit khawh le khawh lo zohhmanh:

Jesuh nih zeitikah dah ‘thong i thlakmi thlarau hna sinah phung a chim’? (1 Pit. 3:19)

Jesuh nih thlarau ṭhalo pawl dantat an si lainak kong kha a thawhṭhan hnu tlawmpal ah thanh sehlaw a lo.—6/15, cahmai 23.

Nupi, va a ngei ṭhanmi hna nih an tonmi harnak pathum cu zeidah a si?

Mah hna hi an si: a hmasa innchunghawi le atu innchunghawi tahchunh lo awk i zuam; atu innchunghawi he aa hngal lomi hawikom hna he i ton tikah a tlari tein um i zuam; hmasa innchunghawi zumhawktlak lo a si ruangah atu innchunghawi zumh awkah i zuam.—7/1, cahmai 9-10.

Jesuh nih tuu le meheh kha zeitikah dah a ṭhen hna? (Matt. 25:32)

A hmaan lomi biaknak hrawh an si hnu, harnak nganpi chung i mi biaceih awkah Jesuh a rat tikah a si te lai.—7/15, cahmai 6.

Rawl kung le belh kung bianabia chung i miṭhalo pawl cu zeitikah dah an hacang an rial lai? (Matt. 13:36, 41, 42)

Harnak nganpi chung i hrawhnak in kan luat kho lai lo ti an hngalh tikah a si te lai.—7/15, cahmai 13.

Jesuh chimmi zumhawktlak le a fimmi sal kong cu zeitikah dah a tlin? (Matt. 24:45-47)

AD 33, Pentekos ni ah si loin 1914 hnu in a tling. 1919 ah sal cu a sal hawi zohkhenh awkah rian pek a si, sal hawi ah thlarau rawl a eimi Khrihfa vialte an i tel.—7/15, cahmai 21-23.

Jesuh nih zumhawktlak sal kha a ngeihmi thil vialte zohkhenh awkah zeitikah dah rian a pek?

Mah cu zumhawktlak sal nih vancung an laksawng an hmuh tik, harnak nganpi chungah a si te lai.—7/15, cahmai 25.

Baibal ah mi cheukhat an min aa ṭial lomi cu an ṭhatlo ruangah asiloah an biapit lo ruangah maw a si?

A si lo. Baibal ah miṭha cheukhat le miṭhalo cheukhat cu an min ṭial a si lo. (Ruth 4:1-3; Matt. 26:18) Zumhfekmi vancungmi pahnih te lawng an min kan hngalh hna.—8/1, cahmai 10.

Sachsenhausen thong in lam hlatpi ah a kalmi hna lakah unau 230 cu Pathian pekmi ṭhawnnak thawng lawngin si loin zei ruangah dah an luat?

An paw a ṭam ca le an dam lo caah an tha a dih nain lungdongh lo awkah pakhat le pakhat tha an i pe zungzal.—8/15, cahmai 18.

Israel mi Biakammi Ram luh awk i Jordan tiva an tannak kong cu zeicah thazaang petu a si?

Tiva cu ti a lianh lio a si nain Jehovah nih a miphun an tan khawh nakhnga ti kha a dirter. Mah nih Jehovah an zumhnak le an i bochannak kha a fehter chin lai. Mah kong cu kan ca zongah thazaang petu a si.—9/15, cahmai 16.

Baibal nih a rong kong a chim lengmangmi nih zeidah a langhter?

A rong cu kan lungthin cungah huham a ngeih le thil i cinken khawh awkah a kan bawmh kha Pathian nih a hngalh ti a langhter.—10/1, cahmai 14-15.

Mikah 5:5 (NW) i tuukhal le hruaitu kong chimchungbia cu tuchan ah zeitindah a tlin?

Mikah 5:5 ah a chimmi ‘tuukhal pasarih le hruaitu pariat’ cu Khrihfa upa pawl an si ti kha kan hngalh, annih nih a ra laimi dohnak caah Pathian miphun kha tha an pek hna.—11/15, cahmai 20.

Pathian kan herhnak a ruang cheukhat cu zeidah a si?

Pathian sinin a rami lamhruainak le harnak tawnghtham ning kha hngalh a herh. Nuam te’n le ṭha te’n kan nun khawh nakhnga a kan bawmh i cutin nun khawh awkah a biakam kha a tlinter lai.—12/1, cahmai 4-6.