Pennak caah Mahca Ṭhatnak Na Hlaw kho lai Maw?
“Lunglawm tein a thomi kha Pathian nih a dawt hna.”—2 KOR. 9:7.
1. Mi tampi nih zei bantuk thil caah dah mahca ṭhatnak an hlawt, zeicah?
MI NIH an ca i a biapi tukmi thil caah mahca ṭhatnak hlawt an duh. Nulepa nih an fale ṭhatnak caah an caan, an tangka le an thazaang an hman. Olympic zaang lentecelhnak ah tel a duhmi mino hna cu an hawile an i tuai i an i nuamh lioah nifate suimilam tampi chung fakpi in lentecelh an cawng. Jesuh zong a ca i a biapimi thil caah mahca ṭhatnak a rak hlawt ve. A hmuitinh cu nuam tein nun le tefa ngeih kha a si lo. Pathian Pennak caah a thazaang dihlak hman kha a si. (Matt. 4:17; Luka 9:58) A zultu hna zong nih mahca ṭhatnak tampi an hlawt ve. Pathian Pennak cu an caah a biapi bikmi a si i mah Pennak caah mahca ṭhatnak an hlawt. (Matt. 4:18-22; 19:27) Kannih zong ‘ka caah a biapi bikmi cu zeidah a si?’ tiah kan i hal awk a si.
2. (a) Khrihfa dihlak nih zei bantuk mahca ṭhatnak dah hlawt a herh? (b) Mi cheukhat nih a dang zei bantuk mahca ṭhatnak dah an hlawt?
2 Mahca ṭhatnak cheukhat cu Khrihfa dihlak nih hlawt a herh. Pathian he pehtlaihnak ṭha ngeih kan duh ahcun cutin tuah a herh. Thlacamnak, Baibal relnak, chungkhar pumhnak tuahnak, Khrihfabu pumhnak le phungchimnak ah i tel awkah kan caan le kan thazaang kan hmanmi cu mahca ṭhatnak kan hlawtmi a si. * (Josh. 1:8; Matt. 28:19, 20; Heb. 10:24, 25) Kan i zuamnak le Jehovah thluachuahnak thawngin phungchim rian cu a kau chin i Pathian biak awkah “Bawipa biakinn a dirnak tlang” i a kalmi cu an tam chin lengmang. (Isa. 2:2) Pennak rian bawmh awkah mi tampi cu Bethel rian, Biakinn le Civui tuahnak inn saknak, civui timhtuahnak le leiser ral a tongmi hna bawmhnak rian ṭuan khawh awkah mahca ṭhatnak an hlawt. Zungzal nunnak hmuh awkah cu bantuk mahca ṭhatnak hlawt a herh tiah Jehovah nih a ti lo nain Pathian Pennak rian bawmhnak caah a herhmi an si.
3. (a) Pennak caah mahca ṭhatnak kan hlawt tikah zei ṭhatnak dah kan hmuh? (b) Zei bia dah kan i hal awk a si?
3 Tuchan ah hlan nakin Pennak caah kan si khawh chungin rian ṭuan hi a biapi khun. Mi tampi nih Jehovah caah mahca ṭhatnak an hlawtmi kan hmuh caah kan i nuam tuk. (Salm 54:6 rel.) Cutin kan tuah ve ahcun Pathian Pennak a rat lai kan hngah lioah kan i nuam lai. (Deut. 16:15; Lam. 20:35) Kanmahle kanmah ṭha tein i check le hitin bia i hal cu a biapi tuk: Pennak caah tam deuh in rian ṭuan khawhnak lam a um maw? Kan caan, kan tangka, kan thazaang le kan thiamnak kha zeitindah kan hman? Mahca ṭhatnak kan hlawt tikah zeidah kan philh lo awk a si? Mah lungtho tein pekmi raithawinak cheukhat in kan i cawn khawhmi kha i ruah u sih. Mah nih kan lung a kan lawmhter chin lai.
Hlanlio Israel mi hna Raithawinak
4. Israel mi hna cu rai an thawinak thawngin zeitindah ṭhatnak an hmuh?
4 Hlanlio Israel mi hna nih sual ngaihthiamnak hmuh awk le Jehovah mithmai ṭha hmuh awkah rai an rak thawi. Raithawinak cheukhat cu halmi a si i a dang tu cu mah lungtho tein pekmi a si. (Lev. 23:37, 38) Khangh thawinak hna cu mah lungtho tein pekmi thawinak an si, mah cu Jehovah kha laksawng pek bantuk a si. Jehovah sin raithawinak he aa tlaimi tahchunhnak pakhat cu Solomon nih biakinn a pekchanh lioah hmuh khawh a si.—2 Chan. 7:4-6.
5. A si a fakmi hmanh nih rai an thawi khawh nakhnga Jehovah nih zeitindah a tuah?
5 Mikip nih aa tluk tein an pe kho lai lo ti kha Jehovah nih a hngalh. Israel mi kha an pek khawhmi lawng pek awkah a hal hna. Jehovah nawlbia nih saram raithawinak pek awk le saram thi thlet awkah a hal hna. Mah raithawinak hna cu Jesuh thawngin “a ra dingmi thil ṭha muithlam ceo” an si. (Heb. 10:1-4) Asinain Jehovah nih mah nawlbia ningin tuah hrimhrim ding tiah a ti hna lo. Tahchunhnak ah, tuu asiloah meheh ti bantuk a pe kho lomi nih ṭhuro an pek ahcun Pathian nih a cohlan ko. Cucaah a si a fakmi hmanh nih Jehovah sinah lunglawm tein rai an thawi khawh. (Lev. 1:3, 10, 14; 5:7) Jehovah nih zei bantuk saram paoh a cohlan ko nain lungtho tein rai a thawitu hna sinin a halmi thil pahnih a um.
6. Rai a thawitu cu zei thil pahnih dah hal an si? Mah halmi zulh cu zeitlukin dah a biapit?
6 Pakhatnak ah, rai a thawitu nih a ṭha bikmi a pek lai. A zawmi le do a tla lomi saram a pek ahcun Jehovah nih a raithawinak kha a cohlang lai lo. (Lev. 22:18-20) Pahnihnak ah, Nawlbia nih a hal hna bantukin rai a thawitu cu a thian a hau. A thian lo ahcun Jehovah mithmai ṭha a hmuh khawh ṭhan nakhnga sual thawinak asiloah phungbuar thawinak kha a pek hmasa lai. Mah hnu lawngah lungtho tein rai a thawimi kha Jehovah nih a cohlan lai. (Lev. 5:5, 6, 15) Mah cu a biapi tukmi a si. A thian lo lioah raithawimi sa kha a ei ahcun thah a si lai tiah Jehovah nih nawl a pek hna. (Lev. 7:20, 21) Rai a thawitu cu a thian i a thawimi sa zong do tlami a si ahcun a chiaṭha thleidannak lungthin a thiang lai i aa nuam lai.—1 Chanrelnak 29:9 rel.
Tuchan Raithawinak
7, 8. (a) Pennak caah mahca ṭhatnak a hlawmi hna nih zei bantuk nuamhnak dah an hmuh khawh? (b) Jehovah sinah pek khawhmi zeidah kan ngeih?
7 Tuchan ah unau tampi cu Jehovah rian kha fakpi in an ṭuan. Mah nih Jehovah lung a lawmhter. Unau pawl bawmh awkah fakpi in rian kan ṭuanmi nih kanmah theng zong a kan lawmhter. Biakinn saknak le leiser ral a tongmi hna bawmhnak rian a ṭuanmi unaupa pakhat nih unau pawl ka bawmh hna tikah kaa nuamhning cu a chim zia hmanh ka thiam lo tiah a ti. Hitin a chim: “Unau pawl nih biakinn thar an hmuh tik asiloah leiser ral a tongmi hna nih bawmhnak an hmuh tikah an i nuamhmi le an sunsakmi ka hmuhmi nih kan rian ṭuanmi le kan i zuamnak vialte cu a phu tuk tiah a ka ruahter.”
Raithawinak tampi cu mah lungtho tein pekmi a si, mah cu tuchan i mahca ṭhatnak kan hlawtmi he aa lo (Catlangbu 7-13 zoh)
8 Chanthar Jehovah bupi nih Pennak rian bawmh khawhnak lam kha an kawl zungzal. 1904 ah Unaupa C. T. Russell nih Jehovah thangṭhatnak caah kan caan, kan nawlngeihnak, kan tangka le a dangdang kha kan si khawh chungin kan hman awk a si tiah a ti. Jehovah sin rai kan thawi 2 Sam. 24:21-24) Kan ngeihmi thil kha ṭha deuh in kan hmang kho lai maw?
tikah kan dihmi cu a um lai nain mah nih thluachuah tampi a kan hmuhter. (Australia Bethel ah rian a ṭuanmi hna
9. Caan hmanning he aa tlaiin Luka 10:2-4 in zeidah kan cawn khawh?
9 Kan caan. Kan cauk pawl holhlehnak le chuahnak, Biakinn le Civui tuahnak inn saknak, civui ca timhtuahnak, leiser ral a tongmi hna bawmhnak le a dang a herhmi rianṭuannak caah a caan le thazaang tampi a herh. Nikhat ah suimilam 24 lawng kan ngei, cucaah kan caan ṭha tein hman awk a kan bawmmi phunglam kha Jesuh nih a kan pek. A zultu pawl kha phungchim awk a thlah hna tikah “lampi ah ahohmanh biakchawnh awkah dircon hlah u” tiah a ti hna. (Luka 10:2-4) Zeicah Jesuh nih cutin a ti hna? Jesuh chan ah mi cu pakhat le pakhat an i chawnhbiak tikah kun le kut tlaih sawhsawh lawng an hmang lo. Voi tampi an i kup i vawlei ah a bawh hmanh an bawk. Cutin tuahnak ah caan tampi a dih. Jesuh nih a zultu hna kha chawnhbiak a hmang lomi si awkah a chimhmi hna a si lo. Annih cu caan tampi an ngeih lo caah an caan kha ṭha tein hman awk le a biapi bikmi thil tuah awkah a chimhmi hna a si. (Efe. 5:16) Pennak rian ṭuan awkah caan tam deuh in kan ngeih nakhnga mah Jesuh chimmi phunglam kha kan zul kho lai maw?
Africa, Kenya i Biakinn ah thawngthanhtu hna
10, 11. (a) Vawlei pumpi rianṭuannak caah kan pekmi thawhlawm cu zeitindah hman a si? (b) 1 Korin 16:1, 2 i zei phunglam nih dah a kan bawmh khawh?
10 Kan tangka. Vawlei pumpi rianṭuannak caah tangka tampi a hau. Khualtlawng rianṭuantu, missionary le special hmaikal pawl caah kum fatin dollar nuai tampi a dih. 1999 thawkin a si a fakmi hmun hna ah Biakinn 24,500 leng sak a si cang. Asinain Biakinn 6,400 hrawng cu a herh rih ko. Thla fatin Vennak Innsang le I Hlau! mekazin nuai 100 hrawng chuah a si. Mah vialte cu lungtho tein na pekmi thawhlawm in ṭuanmi a si.
11 Thawhlawm peknak he aa tlaiin kan zulh awk a simi phunglam kha Jehovah nih lamkaltu Paul a ṭialter. (1 Korin 16:1, 2 rel.) Korin khua i unau pawl kha zarh donghnak ah kan tangka zeizat dah a tang lai ti hngak loin zarh thawknak ah (an chan lioah Zarhpi ni in aa thawk) zeizat dah kan pek lai timi biakhiah awkah a forh hna. Kumzabu pakhatnak i unau hna bantukin tuchan unau pawl zong nih thawhlawm zeizat dah kan pek khawh lai ti kha an ruahcia i siang ngaiin an pek ve. (Luka 21:1-4; Lam. 4:32-35) A miphun nih pek duhnak lungput an ngeihmi kha Jehovah nih a sunsak.
U.S.A., New York, Tuxedo i Innsaknak Kawmiṭi ah lungtho tein a ṭuanmi
12, 13. Mi cheukhat kha Jehovah sin i a ṭha bikmi pek lo awkah zeinihdah a dawnh hna, asinain Jehovah nih zeitindah a bawmh hna lai?
12 Kan thazaang le kan thiamnak. Pennak caah kan thazaang le kan thiamnak hman kan i zuam tikah Jehovah nih a kan bawmh. Thazaang ka ngei lo tiah kan ruah tikah bawmh awkah bia a kan kamh. (Isa. 40:29-31) Pennak rian bawmh awkah thiamnak ka ngei lo asiloah midang nih ṭha deuh in an ṭuan khawh lai tiah kan ruat maw? Jehovah nih Bezalel le Oholiab a rak bawmh hna bantukin kan ngeihmi thiamnak ṭhanter awkah a kan bawmh khawh ve ti kha philhhlah.—Ex. 31:1-6; a hramthawknak hmanthlak zoh.
13 Jehovah nih a ṭha bikmi kan pekmi kha zeihmanh i dawnhter lo awkah a kan forh. (Ptb. 3:27) Biakinn an rak sak ṭhan lioah Jehovah nih Jerusalem i Judah mi hna kha mah rian bawmh awkah zeidah an tuah timi kong ṭha tein ruah awkah a chimh hna. (Hag. 1:2-5) Annih cu an lung a vaivuan i Jehovah rian kha pakhatnak ah an chia lo. Hitin kan i hal awk a si: Jehovah duhnak tuah cu thil dang vialte nakin kan caah a biapi deuhmi a si maw? Hi donghnak caan ah Pathian Pennak rian tam deuh in ṭuan khawh awkah kan nunnak kong ṭha tein ruat in kan i timhtuah kho lai maw?
Kan Si khawh tawk in Peknak
14, 15. (a) A si a fakmi unau pawl kong nih zeitindah thazaang a kan pek? (b) Zei tuah dah kan duh awk a si?
14 Mi tampi cu sifah harnak a tam tuknak hmun ah khua an sa. Cu bantuk hmun ah a ummi unau pawl bawmh awkah bupi cu rian an ṭuan. (2 Kor. 8:14) Asinain a si a fakmi unau hna hmanh pek duhnak lungthin an ngei. An si khawh tawk in lunglawm tein an pekmi kha Jehovah nih a hmuh tikah aa nuam.—2 Kor. 9:7.
15 A si a fak tukmi Africa ram pakhat ah, unau cheukhat cu an dum i hmun cheukhat kha a dang tein an chiah i mah in a chuakmi thlaikho vialte kha an zuar i mah tangka kha Pennak rian bawmhnak caah thawhlawm an pek. Mah ram i unau hna nih Biakinn saknak rian zong kha bawmh an duh hna. Mah caan cu cinthlak caan a si i an rian a tam ngai. Asinain Biakinn saknak rian bawmh awkah bia an khiak, chun ah Biakinn ah rian an ṭuan i zanlei ah an rian an ṭuan. Zeitlukin dah an i pek! Mah nih hlanlio Masidonia i unau pawl kha kan lung ah a chuahter ṭhan. Annih cu “an si a fak ngaingai” ko nain Paul kha unau pawl bawmhnak caah tangka kan pekter ve ko tiah an nawl. (2 Kor. 8:1-4) Kannih zong Jehovah nih a kan pekmi thluachuah cung kan i lawmhnak langhter awkah kan si khawh chungin thawhlawm pe ve hna u sih.—Deuteronomi 16:17 rel.
16. Jehovah nih kan raithawinak a cohlan nakhnga zeidah kan tuah khawh?
16 Mahca ṭhatnak kan hlawt tikah kan chungkhar ti bantuk a biapi bikmi kha kan philh hna awk a si lo. Hlanlio Israel mi hna bantukin lungtho tein kan pekmi cu Pathian cohlanmi a si a hau. Zeinihdah kan raithawinak kha Jehovah cohlan lomi a siter khawh? Chungkhar rian le Jehovah kan biaknak cu a biapi bikmi a si ti kha kan philh lo awk a si. Biakinn saknak, leiser ral a tongmi hna bawmhnak le a dang rian ṭuannak caanṭha kan ngei men lai. Asinain kan chungkhar kha thlaraulei le pumsalei ah kan zohkhenh hna lo ahcun kan ṭuanmi rian cu cohlan awktlak a si lai lo. Cutin kan tuah ahcun Jehovah kha kan ngeih lomi thil kan pek bantuk a si lai. (2 Korin 8:12 rel.) Zeitikhmanh ah Jehovah mithmai ṭha kan sungh nakhnga lo kan i pehtlaihnak kha fehter zungzal a hau. (1 Kor. 9:26, 27) Baibal phunglam ningin kan nun ahcun kan raithawinak nih a kan lawmhter lai i Jehovah nih a kan “cohlanpiak” lai ti kha kan zumh khawh.
Kan Raithawinak cu a Man a Sung tuk
17, 18. Pennak caah mahca ṭhatnak a hlawmi hna kha zeitindah kan hmuh hna, zei kong dah kan ruah awk a si?
17 Unau tampi nih mah zawn ruat loin an caan, an thazaang le an tangka kha Pennak rian caah an pek. (Fil. 2:17) Pek duhnak lungput a langhtermi hna kha kan sunsak hna. Pennak rian ah hruaitu a simi unaupa hna i an nupi le an fale zong kha mahca ṭhatnak an hlawt caah kan thangṭhat hna.
18 Pennak rian bawmh awkah fakpi in rianṭuan a hau. Cucaah kan si khawh chungin Jehovah rian zeitindah kan ṭuan khawh timi kong kha thlacam buin fakpi in ruat hna u sih. Cutin kan tuah ahcun atu ah thluachuah tampi kan hmu lai i “a ra dingmi chan” ah tam chinchin in kan hmuh lai.—Mar. 10:28-30.
^ cat. 2 2012, January 15, Vennak Innsang, cahmai 21-25 i “Na Lungthin Dihlak in Jehovah sinah Raithawinak Pe” timi capar kha zoh.