Ka Ngakchiat lioah Kaa Thimmi
Ka ngakchiat lio
1985 ah kum hra ka rak si. Mah lioah U.S.A., Ohio, Columbus i kan sianginn ah Cambodia in ngakchia pawl an rak i ṭhial. An lak i pakhat cu Mirang holh tlawmpal a thiam. Mah pa nih hremnak le thahnak a ingmi hna kong le an nunnak luat awkah a tlimi hna kong ṭih a nungmi tuanbia kha hmanthlak in a suai pah i a ka chimh. Zan ah mah ngakchia pawl kong ka ruat i ka ṭap. Annih kha Paradis le thawhṭhannak ti bantuk kong chimh ka duh hna nain ka holh an hngalthiam lo. Mah lioah ngakchia lawng ka rak si rih nain ka sianginn kaiṭi hawi pawl kha Jehovah kong ka chimh khawh hna nakhnga Cambodia holh cawn awkah bia ka khiak. Mah ka biakhiahnak nih hmailei ka nunnak zeitindah a hnorsuan lai kha ka rak hngal lo.
Cambodia holh cawn cu a har tuk. Voihnih tiang ngol ka rak i tim nain Jehovah nih ka nu le ka pa hmangin tha a ka pek. A hnuah, ka sayate le ka sianginn kaiṭi hawile nih rianṭha ngai cohlan awkah an ka forh. Asinain hmaikal ṭuan ka duh caah caan cheu rian hmuh awk a kan bawm hngami sianginn tu kai awkah kaa thim. Sianginn ka ṭin hnuah hmaikal unau cheukhat he phungchim ka kal tawn. Mirang holh a cawngmi siangngakchia zong kha man loin ka bawmh hna. Cutin ka tuahmi nih a hnuah a ka bawmh.
Kum 16 ka si ah U.S.A., California, Long Beach ah Cambodia phu an um timi thawng ka theih. Mah phu kha ka va tlawng hna i unau pawl nih Cambodia ca rel an ka chimh. Sianginn ka dihle cangka hmaikal ka ṭuan. Kan inn pawngah a ummi Cambodia mi kha phung ka chimh hna. Kum 18 ka si ah Cambodia ah i ṭhialnak kong ka ruat. Mah ram cu ṭih a nungmi hmun a si rih, asinain cuka ram ah mi nuai hra an um i tam deuh cu thawngṭha an thei bal lo ti kha ka hngalh. Mah lio caan ah an ram pumpi ah thawngthanhtu 13 a ummi Khrihfabu pakhat lawng a rak um. Kum 19 ka si ah Cambodia ah a voikhatnak ka va tlawng. Kum hnih hnuah cuka ah kaa ṭhial. Mirang holh lehnak le cawnpiaknak ah caan cheu rian ka hmu. A hnuah kan hmuitinh aa khatmi nupi kaa hmuh. Kan pahnih in Cambodia mi tampi kha Jehovah Tehte si awkah kan bawmh hna.
Jehovah nih ka “lungthli tum” a ka pek. (Salm 37:4) Phungchimnak hi lungsi hnangamnak a kan pe kho bikmi a si. Cambodia i kum 16 ka um chungah thawngthanhtu 13 lawng a ummi Khrihfabu hmete in Khrihfabu 12 le phu 4 tiang a karh.—Jason Blackwell nih a chim.