1, 2. Pathian Pennak nih zeidah a tuah lai, Pennak a ra lai tiah zeicah kan zumh khawh?

AD 31, ṭhal chuahka ah Kapernaum khua pawng i tlang cungah Jesuh Khrih nih a zultu hna kha “Na Pennak cu rung tlung ko seh” tiah thlacam awkah a cawnpiak hna. (Matt. 6:10) Tuchan ah mi tampi cu Pennak a ra ti hnga maw tiah an lung a hring. Asinain kannih tu cu Pennak tlung ko seh tiah thla kan cammi kha Jehovah nih a kan leh lai tiah kan zumh.

² Jehovah nih vancung le vawleicung i a salle vialte chungkhar pakhat siter awkah Pennak kha a hman lai. Jehovah tinhmi cu a tling lai. (Isa. 55:10, 11) Jehovah cu Siangpahrang a si cang ti le a salle caah khuaruahhar thil a tuah ti kha a luancia kum 100 chung i a cangmi lungthawh awk ngai a simi thil hna nih an langhter. (Zekh. 14:9; Biat. 15:3) Asinain Jehovah Siangpahrang a sinak le Jesuh nih thlacam awkah a kan cawnpiakmi Pathian Pennak a ratnak cu aa dang. Mah thil pahnih cu zeitindah aa dan i mah nih zeitindah a kan hnorsuan?

3. (a) Jesuh cu zeitikah dah Siangpahrang a hung si, khoika ah dah? (b) 1914 ah Jesuh nih uk hram a thawk ti kha zeitindah na fianter lai? (Tanglei fianternak zoh.)

³ Kumzabu 19nak a dih laiah Pathian salle nih a luancia kum 2,500 lengah Daniel nih a rak ṭialmi mah chimchungbia  hi an hngalhthiam: “Cu siangpahrang hna chan ah cun vancung Pathian nih pennak pakhat a ser lai i cu pennak cu zeitikhmanh ah a rawk lai lo.” (Dan. 2:44) Baibal Siangngakchia hna nih 1914 cu a biapi tukmi kum a si lai tiah kum 20 leng an rak chimchung. 1914 ah mi tampi cu hmailei kongah ruahchannak nganpi an ngei. Caṭialtu pakhat nih “1914 kum cu a ṭha tuk lai timi ruahchannak in a khat” tiah a ṭial. Asinain mah kum a donghlei ah Vawlei Ralpi Inak aa thawk i Baibal chimchungbia a rak tling. Mangṭam, lihnin, zawtnak le a dang Baibal chimchungbia a tlinmi nih 1914 ah Jesuh Khrih cu Pathian Pennak Siangpahrang in vancung ah uk hram a thawk cang ti a langhter. * A Fapa kha Messiah Siangpahrang a ṭuanternak thawngin Jehovah cu lam dang in Siangpahrang a hung si.

4. Jesuh nih Siangpahrang a si tikah a tuah hmasa bikmi cu zeidah a si? Mah hnuah zeidah a tuah?

⁴ Pathian thimmi Siangpahrang nih a tuah hmasa bikmi cu a Pa ral ngan bik a simi Satan doh kha a si. Jesuh le a vancungmi hna nih Satan le a khuachia dihlak kha vancung in an ṭhawl hna. Mah nih vancung ah lunglawmhnak nganpi a chuahter nain vawlei ah cun hlan nakin harnak a tamter chin. (Biathlam 12:7-9, 12 rel.) Mah hnuah Siangpahrang nih vawleicung i a salle kha a thianh hna, a cawnpiak hna i Pathian duhnak tuah awkah a dirh hna. Mah thil pathum an cohlanmi cu tuchan kan caah zeitindah zohchunhawk ṭha a si ti kha i ruah u sih.

5. 1914 in 1919 thawklei tiang zei thianhnak dah a um?

⁵ Jesuh nih vancung ah a ummi Satan le a khuachia pawl huham ṭhalo kha a thianh dih hnuah Jehovah nih vawleicung i a salle pawl check awk le thianh awkah a fial. Profet Malakhi nih mah kha thlaraulei thianhnak tiah a ti. (Mal. 3:1-3) Mah thianhnak cu 1914 in 1919 a thawklei tiang a si ti kha thil sining nih a langhter. * Jehovah i van le vawlei a chungkhar ah tel kan duh ve ahcun kan thian a hau. (1 Pit. 1:15, 16) Kan biaknak kha a hmaan lomi biaknak asiloah nainganzi thurhhnawmhnak in kan thianter zungzal awk a si.

6. Thlarau rawl cu zeitindah timhtuah a si, mah rawl cu zeicah a biapit?

⁶ Mah hnuah Jesuh nih “zumhawk a tlakmi le a fimmi sal” rianpek awkah Siangpahrang in a nawlngeihnak kha a hman. Mah sal nih Jesuh zohkhenhnak tangah a ummi “tuurun runkhat” ah aa telmi vialte kha thlarau rawl hmaan tein an pek hna lai. (Matt. 24:45-47; Johan 10:16) 1919 thawkin chiti thuhmi unaupa phu hmete nih “sal hawi” rawlpek ding timi rian nganpi kha zumhawktlak tein an ṭuan. A kan pekmi thlarau rawl nih kan zumhnak a fehter chin. Mah nih kan biaknak, kan tuahsernak, kan ruahnak le pumsalei thian ding timi kan biakhiahnak kha a fehter chin. Mah thlarau rawl nih vawleicung ah ṭuanmi a biapi bikmi rian a simi phungchim rian ṭha tein ṭuan khawh awkah a kan cawnpiak i a kan timhtuah. Mah thlarau rawl kha hmaan tein na ei maw?

7. Vawleicung a um lioah Jesuh nih zei a biapimi rian dah ṭuan hram a thawk, mah rian cu zeitik tiang dah ṭuan a si lai?

⁷ Jesuh nih vawleicung ah phungchim hram a thawk tikah hitin a chim: “Pathian Pennak kong Thawngṭha kha khua  dang zongah ka chim hrimhrim awk a si, cu chim ah cun pei Pathian nih a ka thlah cu.” (Luka 4:43) Kum thum le cheu chung, phungchim rian cu Jesuh caah a biapi bikmi rian a si. A zultu hna kha hitin a ti hna: “‘Vancung Pennak cu a nai cang,’ tiah va chim hna u.” (Matt. 10:7) A zultu hna nih “vawleicung khuazakip” ah phung an chim lai tiah Jesuh nih a thawhṭhan hnuah a chimchung. (Lam. 1:8) A biapimi mah rian ṭuan khawh awkah caan a dongh tiang kaan bawmh hna lai tiah bia a kamh hna.—Matt. 28:19, 20.

8. Siangpahrang nih vawleicung i a zultu hna kha phungchim awkah zeitindah a forh hna?

⁸ 1919 thawkin “Pennak kong Thawngṭha” cu sullam a ngei khun. (Matt. 24:14) Siangpahrang nih van in a uk cang i vawleicung i thianhmi phu hmete kha a pumh hna. Mah phu nih vancung ah Pathian Pennak dirh a si cang timi thawngṭha kha vawleicung pumpi ah chim u timi Jesuh nawlpekmi kha lungtho tein an zulh. (Lam. 10:42) Tahchunhnak ah, 1922, September thla ah U.S.A., Ohio, Cedar Point ah tuahmi ramkomh civui ah Pennak a ṭanhmi 20,000 dengmang an i pum. Unaupa Rutherford nih “Pennak” timi biatlangpi in phung a chim i hitin a thanh tikah zeitlukin dah an lung a thawh lai khi ruathmanh: “Zohhmanh u, Siangpahrang nih a uk cang! Nannih cu zapi hngalh in a rian a ṭuanmi nan si. Cucaah Siangpahrang le a Pennak kong kha thanh u, thanh u, thanh u.” A thaizing ah an lak i mi thong hnih cu phungchim ah an kal i cheukhat cu civui tuahnak hmun in meng 45 a hlatnak tiang an kal. Unaupa pakhat nih hitin a ti: “Pennak kong thanh awk sawmnak le aa pummi mibu an lungthawhnak kha zeitikhmanh ah ka philh kho lai lo.” Midang zong cutin an si ve.

9, 10. (a) Phungchimnak caah zei tinṭan hna nih dah a kan bawmh? (b) Mah tinṭan in zei ṭhatnak dah na hmuh?

⁹ 1922 ah thawngthanhtu 17,000 leng nih ram 58 ah phung an chim. Asinain annih cu cawnpiak an hau. Kumzabu pakhatnak ah, thimmi Siangpahrang nih a zultu hna kha zei kong dah, khoika ah dah, zeitindah chim ding timi kong lamhruainak a pek hna. (Matt. 10:5-7; Luka 9:1-6; 10:1-11) Tuchan zongah phung a chimmi hna nih hmualngei tein an chim khawh nakhnga a herhmi lamhruainak le hriamnam pawl kha Jesuh nih a timhtuah. (2 Tim. 3:17) Jesuh nih Khrihfabu hmangin a zultu hna kha phungchimnak caah a cawnpiak hna. A cawnpiak hnaning lamkhat cu vawleicung pumpi i Khrihfabu 111,000 lengah tuahmi Phungchim Ning Cawnnak a si. Mah cawnnak thawngin nuai sarih leng a simi thawngthanhtu hna nih “mikip” nih ngaih an duh nakhnga zeitindah phungchim ding a si le cawnpiak ding a si kha an hngalh.—1 Korin 9:20-23 rel.

 ¹⁰ Mah lengah Khrihfa upa, hmaikal, nupi a ngei lomi unaupa, Khrihfa nuva, Zung Ṭengnge Kawmiṭi chungtel le an nupile, khualtlawng rianṭuantu le an nupile le missionary pawl caah tinṭan dang zong a um. * Khrihfa Nuva caah Baibal Tinṭan a kaimi hna nih lunglawm ngaiin hitin an ti: “Kan hmuhmi cawnpiaknak nih Jehovah kan dawtnak a fehter chin i midang bawmh khawh awkah sining a kan tlinhter.”

11. Satan dohnak lakah Jesuh zultu hna nih zeicah phung an chim khawh zungzal?

¹¹ Thawngṭha chim awk le cawnpiak awkah cu bantuk thil tuahmi vialte kha kan ral Satan nih a hmuh. Phungchimnak rian kha ngol hna seh ti a duh i Pennak thawngṭha le a chimtu hna doh awkah a tuah khawhmi zeipaoh a tuah lai. Asinain Satan dohnak cu a hlawh a tling lai lo. Jehovah nih a Fapa kha “vancung uktu vialte hna le nawlngeitu vialte hna le ṭhawnnak vialte hna le bawi vialte hna cungah” a chiah. (Efe. 1:20-22) Jesuh nih a Pa duhnak a tlin khawh nakhnga a zultu pawl huhphenh awk le lamhruai awkah Siangpahrang in a nawlngeihnak kha a hman. * Thawngṭha cu chim zungzal a si i lungthin ṭha a ngeimi mi tampi cu Jehovah biak awkah cawnpiak an si. A sunglawi tukmi mah rian ah kan i tel khawh vemi cu tinvo sung taktak a si.

12. 1914 thawkin Pathian salle cu zeitindah ṭha deuh in dirh an si?

¹² 1914 ah Jesuh nih uk hram a thawk tikah a Pa duhnak tuah awkah Pathian salle dirh an sining kha a remh. (Isaiah 60:17 rel.) 1919 ah phungchim rian tlangtlak awkah Khrihfabu kip ah phungchim rian hruaitu kha an thim hna. 1927 ah Zarhpi ni fatinte phungchim kal awkah an timh. 1931 ah Jehovah salle nih Jehovah Tehte Hna timi min kha an i lak, mah nih Pennak rian tam deuh in ṭuan awkah a forh hna. (Isa. 43:10-12) 1938 thawkin Khrihfabu hruaitu hna kha me pek in thim ti loin rian kha a pek in an pek hna. 1972 ah Khrihfabu tlangtlaknak rian kha unaupa pakhat lawng si ti loin Khrihfa upa phu kha an pek hna. Khrihfa upa le bu rianṭuantu si awkah sining a tlinhmi hna cu Khrihfabu tuukhal si awkah thapek an si. (1 Pit. 5:2) 1976 ah Uktu Bu cu vawleicung pumpi i Pennak rian tlangtlak awkah kawmiṭi paruk in dirh a si. Cuticun Jesuh nih a zultu hna kha Pathian duhning in thil an  tuah khawh nakhnga ṭha deuh in a dirh thluahmah hna.

13. Messiah Siangpahrang nih kum 100 chungah a tuahmi thil nih zeitindah aan hnorsuan?

¹³ Messiah Siangpahrang nih uk hram a thawk in kum 100 chungah a liimmi vialte kha ruathmanh. Jehovah a aiawhtu si awkah phu pakhat kha a thianh hna. Ram 239 ah thawngṭha chimnak rian kha lam a hruai i Jehovah biak awkah mi tampi kha a cawnpiak hna. A Pa duhnak tuah awkah lungtho tein i pek a duhmi zumhfekmi nuai sarih leng kha a pumh hna. (Salm 110:3) Khuaruahhar taktak a simi thil tuah awkah Jehovah nih Messiah Pennak kha a hman. Asinain hmailei ah mah nakin khuaruahhar deuh a simi thil a cang lai.

14. (a) “Na Pennak cu rung tlung ko seh” tiah thla kan cam tikah Pathian kha zei tuah awkah dah kan halmi a si? (b) 2014, kumcang Baibal cu zeidah a si i mah cu zeicah aa tlak?

¹⁴ Jehovah nih a Fapa Jesuh Khrih kha 1914 ah Messiah Siangpahrang a ṭuanter nain mah cu “na Pennak cu rung tlung ko seh” timi kan thlacamnak tling tein lehnak cu a si rih lo. (Matt. 6:10) Jesuh nih ‘ral hna lakah a uk lai’ tiah Baibal nih a chimchung. (Salm 110:2, Judson) Satan kut tangah a ummi minung cozah nih atu tiang Pennak kha an ralchanh. Pathian Pennak tlung ko seh tiah thla kan cam tikah Messiah Siangpahrang le amah he siangpahrang a ṭuanṭimi 144,000 nih Pennak a ralchanhmi minung uknak le vawlei mi hna kha hrawh awkah Pathian kan halmi a si. Cutin a si tikah Pathian Pennak nih “hi pennak vialte hi a hrawh dih hna lai i a donghter dih hna lai” timi Daniel 2:44 i chimchungbia a tling cang lai. Pathian Pennak nih a ral a simi uknak vialte a hrawh dih hna lai. (Biat. 6:1, 2; 13:1-18; 19:11-21) Mah cu a rauhhlan ah a tlin cang lai caah “Na Pennak cu rung tlung ko seh” timi Matthai 6:10 kha 2014, kumcang Baibal ah thim a simi cu aa tlak. Atu ah van ah Pathian Pennak dirh a sinak hi kum 100 a tling cang.

15, 16. (a) Khrih kum thongkhat uknak chungah lungthawh awk ngai a simi zei thil dah a cang lai? (b) Messiah Siangpahrang in Jesuh nih hmanung bik a tuahmi cu zeidah a si lai? Mah nih Jehovah tinhnak kha zeitindah a umter lai?

¹⁵ Jesuh nih Pathian ral pawl a hrawh dih hna hnuah Satan le a khuachia hna kha dongh hngal lo khor ah kum thongkhat chung a thlak hna lai. (Biat. 20:1-3) A ṭhalomi huham a um ti lai lo caah Pennak nih mi kha Jesuh tlanhnak man in ṭhatnak hmuh awkah a bawmh colh hna lai i Adam sualnak ruangah a chuakmi vialte kha a hrawh dih lai. Siangpahrang nih mithi tampi kha a thawhter hna lai i annih kha Jehovah kong cawnpiak awkah a kau ngaimi fimcawnnak a timhtuah lai. (Biat. 20:12, 13) Vawlei pumpi cu Eden dum bantuk paradis ah a cang lai i zumhfekmi dihlak cu mitling an hung si lai.

¹⁶ Khrih kum thongkhat uknak a dih tikah vawlei he aa tlaimi Jehovah tinhnak cu a tling cang lai. Mah tikah Jesuh nih Pennak kha a Pa a pek ṭhan lai. (1 Korin 15:24-28 rel.) Jehovah le kanmah karlak ah lamsialtu a um a hau ti lai lo. Vancung i Pathian fapale le vawleicung i a fale dihlak cu vancung kan Pa chungkhar ah kan i tel dih cang lai.

17. Pennak caah zei tuah awkah dah bia na khiah?

¹⁷ Pennak nih kum 100 chung a uk lio i a cangmi thil sining hna nih Jehovah cu uktu a si ti le vawlei ca i aa tinhmi a tling lai ti a langhter. Jehovah kha zumhfek tein bia hna u sihlaw Siangpahrang le a Pennak kong kha thanh hna u sih. “Na Pennak cu rung tlung ko seh” timi kan thlacamnak kha Jehovah nih a rauhhlan ah a kan leh lai ti kan zumh.