PASKAL cu Côte d’Ivoire ram i sifak pawl umnak hmun ah a ṭhangmi a si i rum a duh tukmi a si. Boxing thongh a zuam ngaimi a si caah ‘khoika ah dah zaang lentecelhnak ah a min a thangmi ka si khawh lai i ka rum khawh lai?’ tiah khua a ruat. Kum 25 hrawng a si ah Europe ah ka kal ahcun ka si kho lai tiah a ruah. Asinain khualtlawnnak i a herhmi ca pawl a ngeih lo caah Europe ah phung ning loin a kal a hau.

1998, kum 27 a si ah kal awkah aa thawh. Ramri kha tan in Ghana ah a lut, cun Togo le Benin kha a tan i a donghnak ah Niger ram, Birni Nkonni khua a phan. Mah in ṭih a nung ngaimi khualtlawnnak aa thawk. Chaklei kal awkah mawṭaw i cit in Sahara Thetse ram kha a tan a hau. Mah hnu, Mediterranean rili a phanh tikah Europe leiah tilawng in a kal a hau. Cutin kal aa tim nain Niger a um lioah a cangmi thil pahnih ruangah a kal kho ṭhan lo.

Pakhatnak cu a tangka a dih. Pahnihnak cu hmaikal a ṭuanmi unaupa Noa he an i tong i Baibal a cawng. A cawnmi nih a lung a suk tuk i a khuaruah ning aa thleng. Thilri chawva si loin thlaraulei thil tu biapi ah a hun chiah. 1999, December thla ah tipil a ing. Jehovah cung aa lawmhnak langhter awkah 2001 ah biatak a rak hngalhnak, Niger ram ah hmaikal a hung ṭuan. A rianṭuannak he aa tlaiin zeitindah a ruah? “A ṭha bikmi nunnak ka ngei” tiah a chim.

Paskal bantukin unau tampi cu thlaraulei hmuitinh an ngeihnak thawngin an nunnak ah lungsi hnangamnak an ngei chin. Mah hmuitinh phanh khawh awkah unau cheukhat cu Europe in Africa i phungchimtu a herh deuhnak hmun ah an i ṭhial. Nitlak Africa i Benin, Burkina Faso, Niger le Togo ram chung i a herh deuhnak hmun ah Europe in unau 65 hrawng an i ṭhial, annih cu kum 17 in 70 kar an si. * Cutin i ṭhial awkah zeinihdah a forh hna i zei ṭhatnak dah an hmuh?

Denmark in a rami Anne-Rakel nih hitin a chim: “Ka nu le ka pa cu Senegal ram ah missionary an ṭuan. Missionary rian ṭuannak kong kha lungtho ngaiin an chim lengmang caah kei zong ṭuan ka duh ve.” Anne-Rakel cu kum 20 fai a si lio, a luancia kum 15 hrawngah Togo ram ah aa ṭhial i kut holh a hmangmi Khrihfabu ah a ṭuan. Aa ṭhialmi nih midang kha zeitindah thazaang a pek hna? “A hnuah ka naunu le ka naupa zong Togo ah an rak i ṭhial ve” tiah a chim.

 France in a rami, kum 70 a si cangmi unaupa Aurel nih hitin a chim: “A luancia kum nga ah khan pension ka la i mah lioah thim ding pahnih ka rak ngei: mah cu France ah siarem tein um in Paradis a rat lai hngah asiloah phungchimnak ah tam deuh in i tel kha a si.” Aurel nih phungchimnak ah tam deuh in i tel ding kha aa thim. A luancia kum thum hrawngah a nupi Albert-Fayette he Benin ah an i ṭhial. “Hika ah Jehovah rian kan ṭuanmi cu kan tuah balmi thil lakah a ṭha bikmi a si” tiah Aurel nih a chim. Cun “kan phungchimnak sang ah aa dawh tukmi rilikam zong aa tel i paradis bantuk a si ko” tiah nih buin a chimchap.

Clodomir le a nupi Lysiane cu a luancia kum 16 lioah France in Benin ah an rak i ṭhial. An i ṭhialka ah cun France i an chungkhar kha an ngai tuk hna i hika nunning hi kan i ziak kho hnga maw tiah an thin a rak phang. Asinain cutin thinphan awk a sinak a ruang a um lo. A hnuah an i nuam tuk. Clodomir nih hitin a chim: “Hika i kum 16 kan um chungah buaktlak in kumkhat ah mi pakhat biatak cohlan awkah kan bawmh khawh hna.”

Sabastian le Johanna te nuva cu 2010 ah France in Benin ah an i ṭhial. Sabastian nih hitin a chim: “Khrihfabu ah ṭuan ding rian tampi a um. Rian a tam tuk caah tinṭan a kai thluahmahmi kan lo.” Phungchimnak ah zei bantuk lehrulhnak dah an hmuh? Johanna nih hitin a chim: “Mi cu biatak an ṭaamhal. Phungchim kan kal lio a si lo hmanhah mi nih lam ah Baibal kong an kan hal i cauk pawl an kan hal tawn.” An i ṭhialmi nih an nuva an i pehtlaihnak zeitindah a umter? Sabastian nih hitin a chim: “Mah nih kan i pehtlaihnak a fehter chin. Ka nupi he chun nitlak phungchim kan kalṭimi cu a nuam tuk.”

Eric le a nupi Katy cu Benin chaklei i mi an i ṭhenṭheknak hmun ah hmaikal rian an ṭuan. France an um lio, a luancia kum hra hrawngah a herh deuhnak hmun i rianṭuannak kong aa ṭialmi capar pawl kha an rel i caantling in Pathian rian a ṭuanmi hna sinah mah kong kha an ruah hna. Mah nih ramdang ah ṭhial a duhter hna i 2005 ah an rak i ṭhial. Cuka hmun ah a ṭhanchomi an hmuhmi nih an lung a suk tuk hna. Eric nih hitin a chim: “A luancia kum hnih lioah Tanguiéta khua ah kan phu cu thawngthanhtu 9 lawng kan rak si nain atu cu 30 kan si cang. Zarhpi ni ah aa pummi hi 50 in 80 kar kan si. Cutin a ṭhanchomi hmuh cu a nuam tuk.”

A herh deuhnak hmun ah aa ṭhialmi hna nih zei harnak dah an ton? Benjamin cu kum 33 a si i Anne-Rakel i a naupa a si. 2000 ah Togo ah missionary a ṭuanmi unaupa he Denmark ah an i tong. Benjamin nih hitin a chim: “Mah unaupa kha hmaikal ṭuan ka duh tiah ka ti tikah ‘Togo ah hmaikal na ṭuan kho’ tiah a ka leh.” Benjamin nih mah kong kha a ruah. Hitin a chim: “Mah lioah kum 20 hmanh ka tling rih lo. Asinain Togo ah ka unule pahnih cu rian an ṭuan cang caah cuka ah i ṭhial cu ka caah a fawi deuh.” Cucaah aa ṭhial. Asinain harnak a tonmi a um. Hitin a chim: “France holh kaa khat hmanh ka thiam lo. Mi he kan i chawnh khawh lo caah a hmasa thla ruk cu ka caah a har tuk.” Asinain duhsah in a ṭhangcho. Atu ah Benjamin cu Benin i Bethel ah cauk kuatnak le computer department bawmtu in rian a ṭuan.

A hmasa ah an kong ṭialmi Eric le Katy cu Benin i an i ṭhial hlanah France i ramdang holh a hmangmi sang ah rian an rak ṭuan. Nitlak Africa i rianṭuan cu zeitindah aa dan? Katy nih hitin a chim: “Siarem tein umnak inn hmuh a har ngai. Electric mei a um lo i inn chungah ti a lut kho lomi inn ah thla tampi kan um.” Eric nih hitin a chim: “Kan innpa hna nih zan tlaipi tiang hla thang taktak in an chuah tawn. Cu bantuk caan ah lungsau a hau i hmunhma ningin umthiam i zuam a hau.” “Kan tonmi harnak cu thawngṭha chim bal lonak hmun ah rianṭuannak in kan hmuhmi nuamhnak he tahchunh ahcun zeihmanh a si lo” tiah an pahnih in an chim.

France in a rami, kum 60 dengmang a simi Mishel le Marei-Annes te nuva cu a luancia kum nga hrawngah Benin ah an rak i ṭhial. A hmasa ah cun an lungre a thei ngai. Mishel nih hitin a chim: “Mi cheukhat nih kan i ṭhialmi he aa tlaiin, hri cung i a kalmi pa nih leng a nam pah i mah leng cung i a ṭhumi bantuk nan si tiah an kan ti. Hri cung i a kalmi cu Jehovah a si ti hngalh lo ahcun kan ṭih tuk ko lai. Jehovah rian tam deuh in ṭuan awkah kan i ṭhial i Jehovah nih a kan bawmh ve.”

A herh deuhnak hmun ah aa ṭhialmi hna nih hitin i timhtuah a biapit kha an chim: A hlankan in timhlamh. Hmunhma he aa tlak in umthiam i zuam. Tangka hman i ralrin. Jehovah i bochan.—Luka 14:28-30.

A hmasa ah a kong ṭialmi Sabastian nih hitin a chim: “Kan i ṭhial hlan kum hnih chungah, ka nupi Johanna he nuamhsaihnak caah kan hmanmi kha kan ṭhumh i a herh lomi thil cawk loin tangka kan i khon.” Benin ah rian an ṭuan khawh zungzal nakhnga kum  khat ah thla tlawmpal chung Europe ah rian an va ṭuan lengmang i an hmuhmi in mah kum chung hmaikal an ṭuan kho.

Nitlak Africa i a herh deuhnak hmun ah aa ṭhialmi nungak unaunu 20 hrawng lakah Marie-Tarez zong aa tel ve. Anih cu France ah bus a mawngmi a si i 2006 ah Niger ah hmaikal ṭuan awkah kum khat ca khunh a la. Tlawmpal a ṭuan ah mah cu ngeih a duh tukmi nunning a si kha a hun hngalh. Hitin a chim: “France ka kir hnuah rian ngeitu kha ka rian ṭuan caan thlen ka duhnak kong ka chimh i a hna a tla. Atu ah May in August tiang France ah bus ka mawng i September in April tiang Niger ah hmaikal ka ṭuan.”

‘Pathian Pennak biapi deuh’ ah a chiami hna nih an herhmi “thil dang vialte” kha Jehovah nih a kan pek lai ti an zumh khawh. (Matt. 6:33) Tahchunhnak ah, France in a rami nungak unaunu Safera kong hi ruathmanh. Anih cu kum 30 a tling deng cang i Benin ah hmaikal a ṭuanmi a si. 2011 ah France ah a kir i a hmai kum chung (a kum ruknak) Africa ah a ṭuan khawh nakhnga tangka a kawl. Safera nih hitin a chim: “Mah cu Ninga ni a si i hmanung bik rian ka ṭuan ni a si, asinain a hmai kum caah tangka a za in ka ngeih nakhnga nihra rian ṭuan a hau rih. France ah ka um ding caan zarh hnih lawng a taang cang fawn. Jehovah sinah thla ka cam i ka sining kha ka chimh. Tlawmpal ah rianṭuannak zung in phone a ra i mi pakhat zaka ah zarh hnih chung rian na ṭuan kho lai maw tiah an ka ti.” Nikhat ni ah a rian a ṭuanpiak dingmi sinin rian ṭuanning cawn awkah zung ah a kal. Hitin a chim: “Mah cu Hmaikal Tinṭan kai awkah nihra chung khunh a lami unaunu a si ti ka hngalh tikah ka khuaruah a har tuk. An rianngeitu nih nangmah zaka ah a ṭuan dingmi an um lo ahcun khunh na la kho lo tiah a ti. Mah tikah keimah bantukin Jehovah sinah bawmhnak a rak hal ve.”

Unau tampi cu Nitlak Africa ah kum tampi chung rian an ṭuan i an um beh. Cheukhat tu cu kum tlawmpal an um hnuah an ram ah an kir ṭhan. Asinain a herh deuhnak hmun ah a rak i ṭhialmi hna cu ramdang i rian an ṭuannak in ṭhatnak an hmu rih ko. Lungsi hnangamnak taktak cu Jehovah rian ṭuannak in hmuh a si kha an hngalh.