1. Mino tampi cu zei rian hna dah an ṭuan?

KANNIH cu a biapi tukmi caan ah kan nung. Atu ah miphun kip in a rami mi tampi nih Jehovah biak awkah an i thim. (Biat. 7:9, 10) Mino tampi cu “nunnak ti hi man loin i lak u” timi sawmnak ah an i telnak in hmuhtonnak ṭhaṭha an ngei. (Biat. 22:17) Mah mino hna nih mi kha Baibal cawn awk le an nunning ṭhancho awkah an bawmh hna. Mi cheukhat cu holh thar an cawng i ramdang holh an hmannak sang ah thawngṭha an chim. (Salm 110:3; Isa. 52:7) Lungsi hnangamnak a pemi mah rian ah i tel ve awkah zeidah na tuah khawh?

2. Jehovah nih mino pawl rianpek a duh hna ti kha Timote kong nih zeitindah a langhter? (A hramthawknak hmanthlak zoh.)

² A hnuah Jehovah rian tam deuh in ṭuan awk aan bawm hngami biakhiahnak atu ah na tuah khawh. Tahchunhnak ah, Timote cu a no lioah a ṭhami biakhiahnak a tuah caah kum 20 hrawng a si ah missionary ṭuan awkah sining a tlinh cang. (Lam. 16:1-3) Thesalonika khua i unau pawl hrem an si hnu thla tlawmpal ah cuka Khrihfabu thar i kal awkah Paul nih Timote kha a fial. Paul cu a si thiam lo caah cuka hmun in a chuak nain Timote nih unau pawl kha thazaang a pek khawh hna lai tiah a zumh. (Lam. 17:5-15; 1 Thes. 3:1, 2, 6) Timote cu mah rian pek a si tikah zeitlukin dah a lung a thawh lai khi ruathmanh.

3. Na tuah laimi biakhiahnak lakah a biapi bikmi cu zeidah a si, mah cu zeitikah dah na tuah awk a si?

³ A biapimi biakhiahnak tuah caan cu atu, na no lio caan hi a si. Na tuah laimi biakhiahnak lakah a biapi bikmi cu zeidah a si? Jehovah rian ṭuan awkah biakhiah kha a si. Mah biakhiahnak tuah awkah a ṭha bikmi caan cu zeitikah dah a si? Jehovah nih “nan tlanval lioah hin nanmah aan sertu kha philh hlah u” tiah a ti. (Pct. 12:1) Lungthin dihlak in Jehovah rian ṭuan lawng hi amah philhlonak lam a si. (Deut. 10:12) Mah cu na tuah laimi biakhiahnak lakah a biapi bikmi a si. Mah nih na nunnak dihlak kha a hnorsuan lai.—Salm 71:5.

4. Pathian rian na ṭuanning a hnorsuangmi a biapimi biakhiahnak hna cu zeidah an si?

⁴ Na nunnak a hnorsuangmi hi Jehovah rian ṭuan ding timi na biakhiahnak lawng a si lo. Nupi, va ka ngei lai maw, ahodah ka ṭhit, ka vat lai, zei rian dah ka ṭuan lai timi kong zongah biakhiahnak na tuah a hau. Mah biakhiahnak hna cu a biapi tukmi an si nain lungthin dihlak in Jehovah rian ṭuan awkah bia na khiah hmasa a hau. (Deut. 30:19, 20) Zeicah? Mah biakhiahnak hna cu an i pehtlaih dih caah a si. Ṭhitumnak le rian kong i na biakhiahnak nih Pathian rian na ṭuanning kha a hnorsuan lai. Cun Pathian rian ṭuan na duhnak nih ṭhitumnak le rian kong i na biakhiahnak kha a hnorsuan lai. (Luka 14:16-20 he tahchunh.) Cucaah na nunnak ah a biapi bikmi thil he aa tlaiin biakhiahnak tuah.—Fil. 1:10.

5, 6. A ṭhami biakhiahnak tuahnak nih Jehovah rian tam deuh in ṭuan awkah a kan bawmh khawh ti kha Yuichiro kong nih zeitindah a langhter? (Mah cauk chung i “Ka Ngakchiat lioah Kaa Thimmi” timi capar zong zoh.)

⁵ Jehovah rian ṭuan ding naa thim ahcun zeidah tuah seh ti a ka duh ti kha hlathlai law zeitindah Jehovah rian ka ṭuan lai ti kha biakhiak. Japan ram i unaupa pakhat nih hitin a ṭial: “Kum 14 ka si lioah Khrihfa upa pakhat he phungchim kan kalṭi i phungchimnak ah kaa nuamh lo kha a hmuh. Mah tikah nem tein hitin a ka ti: ‘Yuichiro, inn ah va ṭin. Dai tein va ṭhu law Jehovah nih na caah a tuahmi thil kha ṭha tein va ruat.’ A chim bantukin ka tuah. Mah kong kha ni tam nawn ka ruat i thla ka cam. Duhsah duhsah in ka lungput aa thleng. Caan tlawmpal a rauh hnuah Jehovah rian ṭuannak ah ka hun i nuam. Missionary a ṭuanmi hna kong rel kha ka duh ngai i Pathian rian tam deuh in ṭuannak kong ka hun ruat.”

⁶ Yuichiro nih a ṭhami biakhiahnak a hun tuah. Mah ruangah a hnuah ram dang ah Jehovah rian a ṭuan kho. Hitin a ti: “Tahchunhnak ah, Mirang ca cawn awkah bia ka khiak. Sianginn ka dih tikah hmaikal ka ṭuan khawh nakhnga Mirang ca ka chim pah hna. Kum 20 ka si ah Mongolia holh ka cawng i Mongolia thawngthanhtu phu kha ka tlawng hna. Kum hnih a rauh hnu, 2007 ah Mongolia ram ah ka va tlawng. Hmaikal cheukhat he phungchim kan kalṭi tikah biatak a kawlmi mi tampi an um kha ka hmuh caah cuka ah i ṭhial in bawmh ka duh hna. Japan i ka kir ṭhan tikah timhlamhnak ka tuah. 2008, April thawkin Mongolia ah hmaikal ka ṭuan. Hika i khuasak cu a har ngai. Asinain mi nih thawngṭha kha an cohlan i Jehovah he i naih awkah ka bawmh khawh hna. Kaa thimmi hi a ṭha bikmi a si tiah ka ruah.”

7. Nangmah tein zei biakhiahnak dah na tuah awk a si, Moses sinin zeidah kan i cawn khawh?

⁷ Jehovah rian zeitindah ka ṭuan lai timi kongah nangmah tein biakhiahnak na tuah a hau. (Josh. 24:15) Nupi, va na ngeih  awk a si le si lo asiloah ahodah na ṭhit, na vat awk a si ti kha kan in chim kho lo. Zei rian dah na ṭuan awk a si ti zong kan in chim kho lo. Tinṭan tlawmpal lawng kai a haumi rian na ṭuan lai maw? Cheukhat cu a si a fakmi khuate ah nan um i a cheu cu a rummi khuapi ah nan um. Nan sining, nan thiamnak, nan cawnmi, nan duhmi le nan hmuitinh an i lo lo. Hlanlio ah Jehovah rian a rak ṭuanmi mino pawl zong an sining a rak i lo lo. Tahchunhnak ah, Izipt ram ah a ṭhangmi Moses cu a rum nain a dang Hebru mino pawl cu sal an rak si. (Ex. 1:13, 14; Lam. 7:21, 22) Annih cu nangmah bantukin a biapi tukmi caan ah an rak nung ve. (Ex. 19:4-6) Anmah pakhat cio nih zeidah kan tuah lai ti kha biakhiahnak an tuah a hau. Moses nih a ṭhami biakhiahnak a rak tuah.—Hebru 11:24-27 rel.

8. A ṭhami biakhiahnak tuah awkah khoika in dah bawmhnak na hmuh khawh?

⁸ A ṭhami biakhiahnak tuah khawh awkah Jehovah nih ruahnak aan cheuh. Zeitindah aan cheuh? Zei bantuk thil sining paohah hman khawhmi Baibal phunglam aan cawnpiaknak in a si. (Salm 32:8) Mah phunglam hna kha zeitindah hman ding a si ti naa fian lo ahcun na nu le na pa asiloah Khrihfa upa kha bawmhnak na hal khawh hna. (Ptb. 1:8, 9) Atu ah a ṭhami biakhiahnak tuah awk aan bawm khomi Baibal phunglam pathum i ruah u sih.

9. (a) Jehovah nih zalong tein thimnak nawl a kan peknak thawngin zeitindah a kan upat? (b) Pennak pakhatnak ah na chiah ahcun zei ṭhatnak dah na hmuh lai?

⁹ Pathian Pennak le dinnak kha pakhatnak ah chia. (Matthai 6:19-21, 24-26, 31-34 rel.) Jehovah nih zalong tein i thimnak nawl aan peknak thawngin aan upat. Na caan dihlak kha phungchimnak ah na hman lai tiah aan ti lo. Asinain Jesuh nih Pennak pakhatnak i chiah a biapitnak kong kha a kan cawnpiak. Pennak kha pakhatnak ah na chiah ahcun Jehovah le midang na dawt hna le zungzal nunnak ruahchannak ca i naa lawmh langhternak caanṭha na hmu lai. Ṭhitumnak le rian kong na biakhiahnak nih thilri chawva biapi deuh ah na chiah ti maw a langhter lai asiloah Pathian Pennak le dinnak dah?

10. Jesuh cu zeinihdah a nuamhter, i nuamh awkah zeidah na tuah awk a si?

¹⁰ Midang ca rian ṭuannak in nuamhnak hmu. (Lamkaltu 20:20, 21, 24, 35 rel.) Nunnak caah mah a hrampi phunglam kha Jesuh nih a kan cawnpiak. Jesuh nih amah duhnak si loin a Pa duhnak kha a tuah caah aa nuam tuk. Cun aa toidormi hna nih a chimmi thawngṭha kha an cohlan ca zongah aa nuam. (Luka 10:21; Johan 4:34) Nang zong midang ca rian na ṭuan tikah naa nuam ve ko lai. Cucaah Jesuh cawnpiakmi phunglam cungah hrambunh in biakhiahnak tuah. Cutin na tuahmi nih aan lawmhter lai i Jehovah zong a lawmhter ve lai.—Ptb. 27:11.

11. Zeicah Baruk cu aa lawmhnak a tlau, Jehovah nih zeitindah ruahnak a cheuh?

¹¹ Lawmhnak ngan bik cu Jehovah rianṭuannak in hmuhmi a si. (Ptb. 16:20) Jeremiah caṭialtu Baruk cu a nunnak i caan khatkhat ah aa lawmhnak rak tlau dawh a si. Baruk nih Jehovah duhnak nakin amah duhnak tu biapi deuh in a hun ruat. Mah kha Jehovah nih a hmuh tikah na caah ‘thil lianngan kawl’ kha ngol tiah a ti. Jehovah bia a ngaih ahcun Jerusalem hrawhnak in a luat lai. (Jer. 45:3, 5) Baruk kha zeinihdah a nuamhter lai? Amah duhnak tuah in hrawh a simi nih maw asiloah Jehovah duhnak tuah in Jerusalem hrawhnak in a luatmi nih dah?—Jeim 1:12.

12. Zei biakhiahnak nih dah Ramiro kha a nuamhter?

 ¹² Midang ca rian ṭuannak in nuamhnak a hmumi unaupa pakhat cu Ramiro a si. Hitin a chim: “Kei cu Andes Tlang i khuate ah a ummi, a si a fakmi chungkhar ah a ṭhangmi ka si. Cucaah ka upa nih sianghleiruun kai awkah kaan bawmh lai tiah a ka ti tikah mah cu caanṭha taktak a si. Asinain naiah Jehovah Tehte pakhat in tipil ka ing i hmaikal pakhat nih amah he khua hmete pakhat ah phungchimṭi awkah a ka sawm ve. Cuka khua ah ka kal, sam meh ka cawng i ka pawcawmnak caah sam mehnak dawr ka tuah.” Mah khua i mi tampi nih Baibal cawnpiaknak an cohlan. A hnuah anmah holh tein Khrihfabu thar pakhat a hung um. Cucaah Ramiro nih mah Khrihfabu ah rian ṭuan awk bia a khiak i atu ah a ṭuannak kum hra a si cang. Mi kha anmah holh tein Baibal cawnpiak nakin a ka nuamhter deuhmi zei rian hmanh a um lo tiah a ti.

13. Lungthin dihlak in Jehovah rian ṭuan awkah no lio caan hi zeicah a ṭhat?

¹³ No lio tein Jehovah rian ṭuannak ah i nuam. (Phungchimtu 12:1 rel.) Hmaikal ka ṭuan hlanah rian ṭha ka ngeih hmasa awk a si tiah ruat hlah. Lungthin dihlak in Jehovah rian ṭuan awkah a ṭhat bik caan cu atu, innchungkhar rian na ngeih hlan hi a si. A har ngaimi rian ṭuan khawh awkah na ngan a dam i thazaang na ngei. Jehovah caah zeidah tuah na duh? Naa tinhmi cu hmaikal ṭuan asiloah ramdang holh a hmangmi hna sin phungchim a si men lai. Asiloah nan Khrihfabu ah rian tam deuh in ṭuan a si men lai. Naa tinhmi cu zei a si hmanhah pawcawmnak rian na ngeih a hau. Hitin i hal: ‘Zei rian dah ka ṭuan lai, mah caah tinṭan zei can dah kai a herh lai?’

14. Rian na kawl tikah zeidah naa ralrin awk a si?

¹⁴ Rian naa thim tikah a cunglei i kan i ruahmi Baibal phunglam pathum nih aan bawmh lai. Na sayate asiloah cozah zung hna nih nan ram ah asiloah rian ṭuan na duhnak ram ah zei rian dah a um ti kha an hngalh men lai. An chimmi cu bawmtu a si men ko lai nain naa ralrin a hau. Jehovah a daw lomi hna nih na lungthin in vawlei na tlaihchan nakhnga an i zuam men lai. (1 Johan 2:15-17) Vawlei pekmi thil kong na ruah tikah na lungthin nih fawi tein aan hlen khawh kha philhhlah.—Phungthlukbia 14:15 rel; Jer. 17:9.

15, 16. Rian kongah aho nih dah a ṭhami ruahnak aan cheuh khawh?

¹⁵ Zei rian dah a um ti na hngalh hnu zongah ruahnak cheuhnak na herh. (Ptb. 1:5) Rian naa thim tikah Baibal phunglam hmangin aho nih dah aan tuaktanpi khawh lai? Jehovah a dawmi, nangmah aan dawmi le na sining ṭha tein a hngalmi hna bia kha ngai. Annih nih zeidah na tuah khawh ti le zeidah tuah na duh timi kha ṭha tein ruah awkah an i bawmh lai. An chimmi nih naa tinhmi kha ruah ṭhan awkah aan bawmh men lai. Na nu le na pa cu Jehovah a dawmi an si ahcun tampi an i bawmh khawh lai. Khrihfa upa zong nih a ṭhami ruahnak an i cheuh khawh. Hmaikal le khualtlawng rianṭuantu hna kha zeicah Jehovah rian caantling in ṭuan awkah bia nan khiah tiah hal hna. Zeitindah an rak thawk? Zeitindah an paw an i cawm? Zei thluachuah dah an hmuh?—Ptb. 15:22.

¹⁶ Na kong ṭha tein a hngalmi hna nih a ṭhami ruahnak an in cheuh khawh. Tahchunhnak ah, ca ciah na zuam lo caah sianginn kai ti loin hmaikal ṭuan na duh ahcun zeitin? Nangmah aan dawmi nih cun zeicah sianginn kai ngol na duh kha fiang tein a hngalh men lai. Cucaah ngol loin sianginn kainak nih fawi tein lungdongh lo awkah aan bawmh khawh ti kha hngalhthiam awkah aan chimh lai. Jehovah rian ṭuan zungzal na duh ahcun mah ziaza ngeih a herh.—Salm 141:5; Ptb. 6:6-10.

17. Zei bantuk rian dah naa thim awk a si lo?

¹⁷ Jehovah rian a ṭuanmi aho paoh zumhnak a derter khomi le Jehovah he a hlatter khomi thil an tong lai. (1 Kor. 15:33; Kol. 2:8) A dang thil nakin na zumhnak a derter kho deuhmi rian cheukhat a um. Mi cheukhat cu an i thimmi rian ruangah an zumhnak a tlau kha na hmuh men lai. (1 Tim. 1:19) Jehovah he nan i pehtlaihnak a rawhter khomi rian i thim lo cu fim a si.—Ptb. 22:3.

18, 19. Atu ah Jehovah rian ṭuan duhnak na ngeih rih lo ahcun zeidah na tuah khawh?

¹⁸ Jehovah rian ṭuan na duh taktak ahcun na no lio i na hmuhmi caanṭha kha hmang. A biapi tukmi atu kan chan ah Pathian rian ṭuan awk aan bawm hngami biakhiahnak tuah.—Salm 148:12, 13.

¹⁹ Atu ah Jehovah rian ṭuan duhnak na ngeih rih lo ah tah zeitin? Jehovah na zumhnak fehter awkah lungdong loin i zuam. Paul nih Jehovah thluachuah hmuh awkah a tuahmi kong a chim hnuah hitin a ṭial: “Ruahning phun dang a ngeimi nan um ahcun, Pathian nih cucu an fianterpiak ko hna lai. A zei a si hmanhah, atu tiang kan zulhmi phung ningin hmailei ah kal ko u sih.” (Fil. 3:15, 16) Jehovah nih aan dawt kha philh hlah. Ruahnak a kan cheuhmi cu a ṭha bikmi a si. Atu na no lio caan ah a ṭhami biakhiahnak tuah awkah i bawmhter.