1. Pathian mui keng in ser kan si caah zei sining hna dah kan ngeih?

A PA he aa lo tukmi kha “a pa bak a si ko” tiah an ti tawn. Fale kip cu an nu le an pa i an ziaza an ngei ve. Vancung kan Pa, Jehovah cu nunnak a kan Petu a si. (Salm 36:9) Kannih cu minung a fale kan si bantukin kan lawhnak tampi a um ve. Amah “mui” keng in ser kan si caah khuaruah khawhnak, biakhiah khawhnak le hawikomh khawhnak kan ngei.—Gen. 1:26.

2. Jehovah cu zeicah kan Hawi ṭha bik a si khawh?

² Jehovah cu kan Hawi ṭha bik a si kho. Pathian nih a kan dawt ca le amah le a Fapa kan zumh hna caah cutin a si kho. Jesuh nih hitin a chim: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.” (Johan 3:16) Jehovah he pehtlaihnak ṭha a ngeimi mi tampi an um. Mah hna lak i pahnih kong i ruah u sih.

3, 4. Abraham le Jehovah an i pehtlaihnak cu Israel mi le Jehovah an i pehtlaihnak he zeitindah aa dan?

³ Israel mi hna i an pa kha Jehovah nih “ka hawi Abraham” tiah a ti. (Isa. 41:8) Chanrelnak Pahnihnak 20:7 zong nih Abraham kha Pathian hawi tiah a ti. Zeinihdah Abraham kha Sertu  he cu bantuk pehtlaihnak ṭha a ngeihter? A fekmi a zumhnak a si.—Gen. 15:6; Jeim 2:21-23 rel.

⁴ Hlanlio Israel miphun a hung simi Abraham tefa hna ca zongah Jehovah cu an Pa le an Hawi a si. Asinain caan a rauh tikah Pathian he an i pehtlaihnak a rawhmi cu ngaihchiat awk ngai a si. Zeicah a rawh? Jehovah biakam an zumh ti lo caah a si.

5, 6. (a) Jehovah cu zeitindah na Hawi a hung si? (b) Zei bia dah kan i hal awk a si?

⁵ Jehovah kong tam deuh na hngalh tikah amah na zumhnak le na dawtnak cu a fek chin lai. Pathian cu a um taktakmi a si ti le amah he pehtlaihnak ṭha ngeih khawh a si ti na rak hngalhka lio caan kha ruat ṭhan hmanh. Adam nawlngaih lo ruangah kan dihlak in sualnak ro kan co ti kha na rak hngalh. Minung cu Pathian he kan i hlat ti zong na hngalhthiam. (Kol. 1:21) Dawtnak a ngeimi vancung kan Pa cu lamhlatpi ah a ummi le kan zawn a kan ruat lomi a si lo ti zong na hun hngalh. Jehovah nih a Fapa kha tlanhnak caah a kan pek ti kan hngalh i mah tlanhnak man kha kan hun zumh tikah Pathian he pehtlaihnak ṭha kan hun ngei.

⁶ Mah kong kan ruah ṭhan tikah hitin kan i hal awk a si: ‘Pathian he kan i pehtlaihnak fehter chin awkah kaa zuam maw? Jehovah kaa bochannak le ka dawtnak cu nikhat hnu nikhat a fek chin maw?’ A dang Pathian hawi pakhat cu Gideon a si. A nawl kan i cawn khawh nakhnga a kong kha atu i ruah u sih.

7-9. (a) Gideon nih cinken awktlak a simi zei thil dah a ton, mah nih zei ṭhatnak dah a chuahter? (A hramthawknak hmanthlak zoh.) (b) Zeitindah Pathian hawi kan si khawh?

⁷ Biaceihtu Gideon cu Israel mi Biakammi Ram an luh hnu i a har ngaimi caan ah Jehovah rian a ṭuanmi a si. Midian mi hna nih Israel mi kha harnak an pek hna i an ram ah an luhhnawh lengmang hna. Mah ruangah Gideon nih changvut kha leng ah si loin misurhang nennak ah a tuk, cuticun a rawl kha a thuh khawh zokzok lai. Biaceihtu dal 6 ah Jehovah vancungmi nih Ophrah ah Gideon a tonnak kong kan hmuh. Vancungmi cu a sinah a lang i “nang a ṭhawng i ralṭha pa” tiah a ti tikah Gideon cu a lau tuk. Jehovah nih Israel mi kha Izipt ram in a rak khamh ko hna nain atu tan ah tah a kan bawm hnga maw tiah Gideon cu a lung a hring. Jehovah aiawh in bia a chimmi vancungmi nih Gideon kha Pathian nih aan bawmh lai tiah bia a kamh.

⁸ Keimah nih ‘Midian kut chungin Israel mi chuah’ cu zeitindah a si khawh lai tiah Gideon nih a ruah. Mah tikah Jehovah nih hitin a ti: “Nangmah sinah ka um lai i Midian mi hna cu mi pakhat tluk ceu in na thah dih ko hna lai.” (Biac. 6:11-16) Gideon nih cutin a si kho taktak hnga maw tiah a ruah men ko lai, cucaah Pathian kha hmelchunhnak a hal. Mah an biaruahnak ah Gideon nih Pathian cu a um taktakmi a si le si lo, a lung a hrin lo kha na hmu ko lo maw?

⁹ Mah hnu i a cangmi thil nih Gideon kha a zumhnak a fehter i Pathian he a naihter chin. Gideon nih rawl a timh i vancungmi kha a hunh. Vancungmi nih a ṭhiangṭhunh in rawl kha a tongh tikah rawl cu mei nih a kangh. Gideon nih mah vancungmi cu Pathian thlahmi a si taktak ti kha a hngalh tikah a thin a phang tuk. Hitin a ti: “Aize, maw Bawipa PATHIAN! Atu cu BAWIPA vancungmi cu hmaitonh in ka hmuh cang cu ta.” (Biac. 6:17-22) Mah thil nih Gideon le Jehovah an i pehtlaihnak kha a hrawk maw? A hrawk hrimhrim lo. Gideon cu Pathian he remnak le daihnak a hmu. Cuka hmun ah  a sakmi biakṭheng cu Hebru holh in “Jehovah-shalom” timi “BAWIPA cu daihnak a si” tiah auh a si caah cutin kan chim khawh. (Biaceihtu 6:23, 24 rel.) Jehovah nih nifate a kan tuahpiakmi thil kan ruah ahcun kan Hawikom taktak a si kha kan hngalh lai. Jehovah sinah thla kan cam zungzal ahcun lungdaihnak kan ngei lai i kan i pehtlaihnak a fek chin lai.

10. Salm 15:3, 5 ningin Jehovah nih a hawi si a duhmi hna sinin zeidah a hal hna?

¹⁰ Jehovah nih a hawi si a duhmi hna sinin a halmi thil a um. Salm dal 15 ah David nih Jehovah thlam ah um kan duh ahcun, phundang cun a hawi si kan duh ahcun kan tuah awk a simi thil kha hla in a rak sak. (Salm 15:1) Mah lak i pahnih a simi mi congoih hman lonak kong le dinfelnak kong kha atu i ruah u sih. Jehovah nih a hawile si awkah a cohlanmi hna kong kha David nih hitin a ti: “Mi congoih a hmang lo i . . . a sual lomi hna sual phawt awkah ziknawh pek khawh lomi cu an si.”—Salm 15:3, 5.

11. Zeicah mi congoih kha kan hrial awk a si?

¹¹ David nih hitin ralrin a kan pek chap: “Bia ṭhalo chim kha i sum u.” (Salm 34:13) Mah ralrin peknak kha kan zulh lo ahcun vancung kan Pa he kan i pehtlaihnak a rawk kho. Mi thangchiat le congoih cu Jehovah ral ngan bik a simi Satan Khuachia i a hmelchunh a si. “Khuachia” timi biafang hi “thangchiattu” tiah sullam a ngeimi Greek biafang in a rami a si. Mi sinah kan chimmi le midang kong kan chimmi kha kan i ralrin ahcun mah nih Jehovah he i naih awkah a kan bawmh lai. Khrihfabu hruaitu si awkah Pathian nih rian a pekmi unaupa pawl cung i kan lungput kha a hleiin kan i ralrin awk a si.—Hebru 13:17; 1 Thesalon 5:12 rel.

12, 13. (a) Zeicah kan dinfel zungzal awk a si? (b) Kan dinfelmi nih zei ṭhatnak dah a chuahter?

¹² Jehovah salle cu a dingmi le a hmaanmi thil a tuahmi in hngalh kan si. Lamkaltu Paul nih hitin a ṭial: “Thla kan campiak lengmang ko u. A hmaanmi thil kha tuah kan duhmi a si zungzal caah kan chiaṭha thleidannak lungthin kha a thiang ko.” (Heb. 13:18) ‘A hmaanmi thil tuah zungzal’ awkah bia kan khiah caah kan unau pawl hlen kha kan hrial. Tahchunhnak ah, unau pawl cu kan rian an ṭuan ahcun ṭha tein kan pehtlaih hna awk a si i bia kan i kammi zat in an ṭuan man kan pek hna awk a si. Khrihfa kan si caah kan rian a ṭuanmi tel in mikip sinah kan dingfel. Khrihfa unau sinah rian kan ṭuan ahcun a hleiin tinvo hmuh ding kan i ruahchan awk a si lo.

¹³ Vawlei mi hna nih Jehovah Tehte Hna kan dinfelnak kha an kan thangṭhat tawn. Tahchunhnak ah, company nganpi pakhat i director nih Jehovah Tehte Hna cu an biakam ningin an tuah ti kha a hmuh. Hitin a ti: “Tuah awkah bia nan i kammi ningin nan tuah zungzal.” (Salm 15:4) Dinfelnak nih Jehovah kha kan Hawi siter zungzal awkah a kan bawmh i vancung kan Pa thang a ṭhatter.

14, 15. Phungchimnak ah mi kha Jehovah hawi si awkah zeitindah kan bawmh khawh hna?

¹⁴ Phungchimnak ah kan tonmi mi tampi nih Pathian a um kha an zumh men ko lai nain an Hawi ṭha bik in cun an hmu men lai lo. Annih kha zeitindah kan bawmh khawh hna? Jesuh nih a zultu cheukhat kha phungchim awk i a thlah hna lioah lamhruainak a pekmi hna kha ruathmanh. Hitin a ti hna: “Inn pakhatkhat ah nan luh tikah a hmasa bik ah, ‘Hi inn chungah daihnak um ko seh,’  va ti u. Daihnak a duhmipa a rak um a si ahcun, daihnak na cungah um seh, tiin nan biakchawnhnak cu a cungah hmun seh; sihmanhsehlaw cuti a si lo ahcun daihnak in nan biakchawnhnak cu nan sinah kir ṭhan seh.” (Luka 10:5, 6) Mi kha ṭha tein kan biakchawnh hna ahcun biatak kong kha hngalh an duh deuh men lai. Fakpi in a kan ralchanhtu cungah nemnak kan langhter ahcun an lung a dai kho i caan dang ah biatak kha ngaih an duh men lai.

¹⁵ Biaknaklei ah aa zuam tukmi asiloah a hmaan lomi biaknak phunglam a zulmi hna he kan i ton tik zongah ṭha tein le dai tein kan um awk a si. Pumhnak ah a rami kip kha ṭha tein kan conglawmh hna, a hleiin tuchan vawlei ruangah a lung a dongmi le kan biakmi Pathian kong tam deuh in hngalh a duhmi hna kha kan conglawmh hna. Cu bantuk mi tampi kong kha “Baibal nih An Nunning a Thlen” timi capar ah kan hmuh khawh.

16. Jehovah hawi kan si lengah ‘a rian ṭuanṭi hawi’ zong zeitindah kan si khawh?

¹⁶ Rian a ṭuanṭimi hna cu hawikom ṭha an hung si tawn. Jehovah sin aa pumpemi hna cu Jehovah hawi an si lengah ‘a rian ṭuanṭi hawi’ zong an si. (1 Kor. 3:9, NW) Phungchimnak le zultu siternak rian kan ṭuan tikah vancung kan Pa i khuaruahhar a simi a sining hna kha kan hun hngalh chin. Cun a thiang thlarau nih a kan bawmhmi zong kan hmuh.

17. Civui nih Jehovah cu kan Hawi a si kha zeitindah a langhter?

¹⁷ Phungchimnak ah caan tam deuh kan i tel tikah Jehovah he kan i naih chin. Ralchanhtu hna nih phungchim rian ngolter an i zuammi kha Jehovah nih zeitindah a kham ti kan hmuh. Pathian nih lam a kan hruai ti kha fiang tein kan hmuh i pumhnak le bupi chuahmi cauk hmangin a kan cawnpiakmi kha kan hmuh. Civui program hna nih Jehovah nih kan herhmi le kan tonmi harnak a hngalhthiam ti kha a langhter. Civui pakhat an i pumh hnuah chungkhar pakhat nih hitin ca an ṭial: “Civui i kan theihmi nih kan lung a kan suk tuk. Jehovah nih pakhat cio kha zeitlukin dah a kan dawt ti le hlawhtlinter a kan duh ti kha kan hngalh.” Ireland ah tuahmi special civui ah aa pummi Germany i nuva hna nih ṭha tein an conglawmhmi hna le an zohkhenhmi hna ruangah an i lawmhnak bia an chim hnuah hitin an ti: “Asinain a bik in Jehovah le a thimmi Siangpahrang Jesuh Khrih cungah kan i lawm. Anmah nih a lung aa rualmi miphun lakah um ve awkah an kan sawm. Lungrualnak kong hi kan chim sawhsawh  lawng si loin nifate kan hmuh taktak. Dublin ah tuahmi special civui i kan hmuhtonmi nih nan dihlak he a liannganmi Pathian rian kan ṭuanṭi khawhmi tinvo sung hi a kan hngalhter zungzal lai.”

18. Jehovah he kan i pehtlaihnak he aa tlaiin zei bia dah kan i hal awk a si?

¹⁸ Hawikom cu pehtlaihnak ṭha an ngeih tikah an i naih chin. Tuchan ah mi nih pehtlaihnak caah Internet le cakuatnak hna kha an hman. Kan Hawi ṭha bik, Jehovah he kan i pehtlaihnak tah zeitin? Anih cu “kan thlacamnak a kan lettu” a si. (Salm 65:1) Amah he bia i ruah awkah voi zeizat dah caan kan pek?

19. Thlacam tikah Jehovah sinah kan intuarmi chim kan i harh ahcun zeinihdah a kan bawmh khawh?

¹⁹ Pathian salle cheukhat cu an intuarmi taktak kha chim an i harh. Asinain Jehovah nih thla kan cam tikah cutin chim hna seh ti a kan duh. (Salm 119:145; Ṭah. 3:41) Kan intuarmi chim kan i harh hmanhah bawmtu kan ngei ko. Paul nih Rom khua i Khrihfa hna sinah hitin ca a ṭial: “Zeiti hin dah thla kan cam awk a si ti hmanh kan hngalh lo caah bia in chim khawh lomi hram ainak in thlarau nih Pathian cu a kan nawlpiak. Thlarau nih cun Pathian cu a mi hna aiawh le amah Pathian duhning khan a nawl caah, minung lungchung a hmutu Pathian nih cun thlarau ruahnak cu zeidah a si ti kha a hngalh.” (Rom 8:26, 27) Job, Salm le Phungthlukbia ti bantuk Baibal cauk kan rel tikah Jehovah sinah kan intuarmi zeitindah chim ding a si kha kan hngalh khawh.

20, 21. Filipi 4:6, 7 i Paul bia in zei hnemhnak dah kan hmuh?

²⁰ Harnak ngan kan ton tikah Paul nih Filipi Khrihfa hna sin a chimmi bia hi i cinken hna u sih: “Zei thil kong hmanhah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u.” Cutin thla kan cam ahcun hnemhnak taktak kan hmu lai. Paul nih hitin a ti chap: “Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai.” (Fil. 4:6, 7) Kan lungthin le kan ruahnak a kilvengmi “Pathian daihnak” caah kan i lawmh tuk awk a si.

²¹ Thlacamnak nih Jehovah he kan i pehtlaihnak a fehter. Cucaah “a zungzal in thlacam” hna u sih. (1 Thes. 5:17) Pathian he kan i pehtlaihnak kha fehter in a kan halmi kha kan tuah zungzal awk a si. Jehovah cu kan Pa, kan Pathian le kan Hawi a si caah kan hmuhmi thluachuah kong kha a caan pe in ruat hna u sih.