1. Jehovah pekmi zei thluachuah nih dah a kan nuamhter?

JEHOVAH nih i nuam hna seh ti a duh i kan i nuamh khawh nakhnga thluachuah tampi a kan pek. Mah lak i pakhat cu nunnak a kan pekmi hi a si. Pathian nih a hmaanmi biaknak ah a kan hnuh caah kan nunnak kha amah thangṭhatnak caah kan hman khawh. (Salm 144:15; Johan 6:44) Jehovah nih a kan dawt kha a langhter i a rian kan ṭuannak ah kan lung a dongh nakhnga lo a kan bawmh. (Jer. 31:3; 2 Kor. 4:16) Jehovah nih lam tampi in a kan huhphenh i a kan zohkhenh. Mah ah daihnak, lungrualnak le dawtnak a ngeimi vawleicung pumpi unau rual aa tel. Mah lengah hmailei caah a ṭha tukmi ruahchannak zong kan ngei.

2. Zumhfekmi Pathian salle cheukhat cu zei ruahnak dah an ngeih?

² I nuamh awk a sinak a ruang tampi kan ngei ko nain zumhfekmi Pathian salle cheukhat cu a ṭhalomi ruahnak an ngei. Jehovah nih anmah asiloah a rian an ṭuanmi kha a sunsak lo tiah an ruah men lai. A ṭhalomi ruahnak a ngei zungzalmi hna nih “nun chungte” ah i nuamh cu a si kho lomi a si tiah an ruah men lai. Nunnak cu ni ṭhalo, nikhat hnu nikhat aa chang lengmangmi a si tiah an ruah men lai.—Pct. 11:8.

3. Zeinihdah a ṭhalomi ruahnak a kan ngeihter khawh?

 ³ Cu bantuk a ṭhalomi ruahnak cu lungdonghnak, zawtfahnak asiloah tarnak ruangah a chuakmi a si men lai. (Salm 42:9; 71:9; Ptb. 13:12) Kan lungthin cu “a zer” tuk ti le Pathian mithmai ṭha kan hmuh ko hmanhah ka sual timi ruahnak a kan ngeihter khawh ti kha kan hngalh awk a si. (Jer. 17:9; 1 Johan 3:20) Satan nih Pathian salle kha lih in sual a puh hna. Pathian caah man kan ngei lo tiin Satan nih Elifaz kha chim awkah a forh. Mah cu Job chan ah lihbia a rak si bantukin tuchan zongah a si ṭhiamṭhiam.—Job 4:18, 19.

4. Hi capar ah zei kong dah kan i ruah lai?

⁴ Baibal ah Jehovah nih a ṭhalomi ruahnak doh aa zuammi hna sinah ka um lai tiah bia aa kam. (Salm 23:4) Kan sinah a umnak lam khat cu a Bia, Baibal in a si. Baibal cu “ralhruang fekfek a hrawk khotu Pathian hriamnam” a si. Mah cu a hmaan lomi le a ṭhalomi ruahnak kha a thlen khawh tinak a si. (2 Kor. 10:4, 5) Cucaah a ṭhami hmuhnak ngeih awk le ngeih zungzal awkah Baibal nih zeitindah a kan bawmh khawh ti kha i ruah hna u sih. Mah in nangmah theng ṭhatnak na hmu kho i midang thapek khawhning zong na hngalh khawh.

5. Zei hneksaknak nih dah a ṭhami hmuhnak ngeih awkah a kan bawmh khawh?

⁵ Lamkaltu Paul nih a ṭhami hmuhnak ngeih awkah a kan bawm hngami thil cheukhat kha a rak chim. Korin khua i Khrihfabu kha hitin a forh hna: “Nanmah le nanmah kha ṭha tein i hneksak tuah u: zumhnak nunning khan a nungmi nan si maw?” (2 Kor. 13:5) “Zumhnak” timi cu Baibal ah aa ṭialmi Khrihfa zumhnak vialte kha a si. Mah zumhnak ningin bia kan chim i kan tuah ahcun hneksaknak ah a awngmi le “zumhnak nunning” in a nungmi kan si lai. Zei zumhnak hi dah ka zulh lai tiah i thim khawh a si lo. Baibal chung i Khrihfa cawnpiaknak vialte kha kan zulh a hau.—Jeim 2:10, 11.

6. “Zumhnak nunning” in kan nun le nun lo zeicah kan i check awk a si? (A hramthawknak hmanthlak zoh.)

⁶ A hleiin ka sung lai tiah na ruah ahcun hneksak na duh lai lo. Asinain kanmah hmuhning nakin Jehovah nih a kan hmuhning hi a biapi deuh, zeicahtiah kanmah nakin a hngalh deuh caah a si. (Isa. 55:8, 9) Jehovah nih amah a biami hna kha sual phawt awkah si loin an ṭhatnak hmuh awk le bawmh awkah a check hna. ‘Zumhnak nunning in a nungmi na si le si lo’ i checknak ah Baibal na hman ahcun Pathian nih aan hmuhning kha na hun hngalhthiam lai. Mah nih man ka ngei lo timi ruahnak ngeih lo awk le Pathian mithmuh ah a sunglawimi na si kha hngalh awkah aan bawmh lai. Mah cu a muimi innkhaan ah ni a luh khawh nakhnga puanzar on he aa lo.

7. Baibal ah aa ṭialmi zumhfekmi hna kong nih zeitindah a kan bawmh khawh?

⁷ Kanmahle kanmah i checknak ah a ṭhami lam cu Baibal ah aa ṭialmi  zumhfekmi hna kong ruah hi a si. An sining le an intuarning kha nangmah he i tahchunh law mah thil sining ah zeidah na tuah lai kha ruat. “Zumhnak nunning” in a nungmi na si le si lo hngalh awkah Baibal zeitindah hman khawh a si kha tahchunhnak pathum in i ruah u sih. Mah nih a ṭhami hmuhnak ngeih awk zongah aan bawmh lai.

8, 9. (a) A si a fakmi nuhmeinu sining cu zeitindah a si? (b) Nuhmeinu cu zei bantuk a ṭhalomi ruahnak dah a ngeih khawh men?

⁸ Jerusalem biakinn ah Jesuh nih a si a fakmi nuhmeinu kha a hmuh. Kan duh tlukin kan tuah khawh lo hmanhah a ṭhami hmuhnak ngeih peng awkah nuhmeinu kong nih a kan bawmh lai. (Luka 21:1-4 rel.) A sining kha ruathmanh. A vapa nih a rak thihtak caah a ngaih a chia tuk lai. Mah lioah biaknaklei hruaitu hna nih bawmh loin amah bantuk nuhmei pawl sinin thil kha hakkau ngaiin an i lak. (Luka 20:47) Nuhmeinu cu a si a fak tuk i biakinn ah thawhlawm a pek khawhmi cu rianṭuantu pawl nih minit 15 rian an ṭuan man tluk lawng a si.

⁹ Nuhmeinu nih phaisa sen pahnihte i put in biakinn tual ah a luh tikah zeitindah a um lai khi na mitthlam ah cuanter hmanh. A vapa a nun lio i a rak pekmi phaisa le atu a pekmi a tahchunh tikah a tlawm tuk tiah a ruat lai maw? Midang nih tampi an pekmi a hmuh tikah lungṭhat loin ka pekmi cu man a ngei lo tiah a ruat lai maw? Cu bantuk ruahnak a ngeih hmanhah a hmaanmi biaknak bawmh awkah a ngeihmi te kha a pek ṭhiamṭhiam ko.

10. Nuhmeinu cu Pathian caah man a ngei ti kha Jesuh nih zeitindah a langhter?

¹⁰ Nuhmeinu le a pekmi thawhlawm cu Jehovah caah a sunglawi tiah Jesuh nih a chim. Mirum mi hna pekmi nakin nuhmeinu pekmi cu a tam deuh tiah a ti. A pekmi cu midang pekmi he aa cawh lai nain Jesuh nih nuhmeinu kha a thangṭhat. Biakinn thawhlawm a reltu hna nih mah phaisa sen pahnih le a petu nuhmeinu cu Jehovah caah zeitlukin dah man an ngeih ti kha an hngal lai lo. Asinain midang hmuhning asiloah nuhmeinu nih amahle amah aa hmuhning si loin Pathian hmuhning tu hi a biapi taktakmi a si. ‘Zumhnak nunning in na nun le nun lo’ i checknak ah mah kong hi na hmang kho lai maw?

11. Nuhmeinu kong in zeidah naa cawn khawh?

 ¹¹ Na sining nih Jehovah sinah na pek khawhmi kha a hnorsuan men lai. Kum khua ruang asiloah zawtfah ruangah cheukhat cu an duh tlukin phungchimnak ah caan an pe kho lo. Phungchimnak ah an i tel caan cu report pek awkah a tlak lo tiah an ruah awk a si maw? Mino asiloah a ngan a dammi na si hmanhah naa zuammi cu Pathian miphun nih biaknak ah an hmanmi suimilam tampi he tahchunh ahcun a tlawm tuk tiah na ruah men lai. Jehovah nih amah caah kan tuahmi thil hmete kha a hmuh i a sunsak, a hleiin a harmi thil sining lakah kan tuahmi a sunsak ti kha a si a fakmi nuhmeinu kong nih a langhter. A luancia kum i Jehovah na biaknak kha ruat ṭhan hmanh. Jehovah rian ṭuannak ah na hmanmi suimilam lak i pakhat caah mahca ṭhatnak na hlawt a hau maw? Cutin a si ahcun mah suimilam pakhat chung i na tuahmi kha Pathian nih a sunsak ti na zumh khawh. A si a fakmi nuhmeinu kha naa zohchunh i Jehovah caah na tuah khawhmi zeipaoh na tuah ahcun “zumhnak nunning” in ka nung ti na langhter a si.

12-14. (a) Elijah cu a ṭha lomi zei ruahnak dah a ngeih? (b) Elijah nih zeicah cutin a ruah khawh men?

¹² Profet Elijah cu Jehovah cungah  zumhfek tein a um i a ṭhawngmi zumhnak a ngei. Asinain voikhat cu a lung a dong tuk i Jehovah sinah “a zaa cang; atu cu maw BAWIPA, ka nunnak kha la ko” tiah a hal. (1 Si. 19:4) Cu tlukin a lung a dong bal lomi hna nih Elijah bia cu “a bultan” tiah an ruah men lai. (Job 6:3) Asinain Elijah nih cutin a intuar taktak. Mah tikah Jehovah cu Elijah cungah thinhun loin a bawmh tuin a bawmh kha i cinken.

¹³ Elijah cu zeicah cu bantuk ruahnak a ngeih? Mah hlan deuhte ah Elijah nih Jehovah cu a hmaanmi Pathian a si ti a langhtermi khuaruahhar thil a rak tuah. Mah hnuah Baal profet 450 kha a thah hna. (1 Si. 18:37-40) Elijah nih atu cu Pathian miphun cu a hmaanmi biaknak ah an rak kir ṭhan lai tiah aa ruahchan men lai nain cutin a si lo. Siangpahrang nu ṭhalo Jezebel nih Elijah kha kaan thah lai tiah lamkal a thlah i a chimhter. Mah tikah Elijah cu a thin a phang tuk i Israel ram in thlanglei Judah ram ah a tli i ramlak ah aa thup.—1 Si. 19:2-4.

¹⁴ Elijah cu amah lawng ramlak i a um lioah profet pakhat in ka rian ṭuanmi hi zeihmanh san a tlai lo tiah a hun ruah. “Ka pupa hna nakin ka ṭha hlei ṭung lo” tiah Jehovah kha a ti. A thi cangmi a pupa hna i an ruh le an leidip bantukin man ka ngei lo tiah aa ruat. Kei cu a sungmi ka si i Jehovah ca le aho ca hmanhah man ka ngei lo tiah aa ruat.

15. Pathian nih Elijah cu a caah a sunglawimi a si rih kha zeitindah a langhter?

¹⁵ Asinain Lianngan Bik Pathian nih Elijah kha cutin a hmu lo. Elijah cu a caah a sunglawi rih ko i mah kha Elijah a hngalhter. Tha pek awkah Pathian nih vancungmi kha a thlah. Thlanglei Horeb Tlang ah ni 40 chung a kal tikah thazaang a ngeih khawh nakhnga rawl le ti zong a pek. Elijah nih Jehovah cungah zumhfekmi Israel mi pakhat hmanh an um lo tiah a ruah tikah Pathian nih a ruahnak kha a remh. Cun rian thar zong a pek i mah kha Elijah nih a cohlan. Jehovah bawmhnak thawngin Elijah cu thazaang thar a ngei i profet rian kha a ṭuan ṭhan.—1 Si. 19:5-8, 15-19.

16. Jehovah nih zeitindah thazaang aan pek?

¹⁶ “Zumhnak nunning” in na nun le nun lo hngalh awk le a ṭhami lungput ngeih awkah Elijah kong kha na hman khawh. Pakhatnak ah, Jehovah nih aan bawmhning kha ruat. Na herh lio caante ah Khrihfa upa asiloah thlaraulei nutling patling a simi nih an in bawm maw? (Gal. 6:2) Baibal, Bupi chuahmi cauk le pumhnak nih Jehovah nih a ka zohkhenh tiah aan ruahter maw? Mah hna lak i pakhatkhat in bawmhnak na hmuh ṭhan tikah mah bawmhnak cu aho sinin dah a ra taktakmi a si ti kha ruat law Jehovah sinah lawmhnak bia chim kha philhhlah.—Salm 121:1, 2.

17. Jehovah nih a salle i zei kha dah a sunsak?

¹⁷ Pahnihnak ah, a ṭha lomi hmuhnak nih a ping ah a kan hruai khawh ti kha philhhlah. A biapi taktakmi cu Pathian nih a kan hmuhning hi a si. (1 Samuel 16:7 rel.) Jehovah nih amah sin kan i pumpekmi le zumhfek tein kan ummi kha a sunsak. Jehovah ca i kan sunlawinak cu a caah zeitlukin dah rian kan ṭuan timi cungah aa hngat lo. Elijah bantukin naa hngalh lengin Jehovah caah rian na rak ṭuan men lai. Unau pawl na bawmhmi hna kha naa hngal men lai lo. Asiloah naa zuamnak ruangah mi nih biatak an hngalh men lai.

18. Jehovah sinin na hmuhmi rian nih zeidah a langhter?

 ¹⁸ A donghnak ah, Jehovah sinin na hmuhmi rian paohpaoh kha na sinah Jehovah a um ti langhternak in hmu. (Jer. 20:11) Na rian cu hlawh a tling lomi a lawh tikah asiloah thlaraulei hmuitinh na ngeihmi cu phanh khawh a si lomi a lawh tikah Elijah bantukin na lung a dong kho men. Asinain kan dihlak in kan ngeihmi tinvo sung kha na ngei ve rih ko. Mah cu thawngṭha chimnak le Jehovah Tehte sinak tinvo sung a si. Cucaah Jehovah cungah zumhfek tein um. Cutin na um ahcun Jesuh nih a chim bantukin “ra lut law ka lunglawmhnak hi i hrawm ve” tiah ti na si ve lai.—Matt. 25:23.

19. Salm dal 102 a ṭialtu cu zeitindah a intuar?

¹⁹ Salm dal 102 a ṭialtu cu a hnabei a dong. Anih cu lungthinlei le pumsalei in ‘harnak a ing.’ A harnak inkhawh awkah thazaang a ngei ti lo. (Salm 102, biatlangpi) A harnak, a li lennak le a intuarnak kong lawng a ruat. (Salm 102:3, 4, 6, 11) Jehovah nih hlonh a ka duh tiah a ruah.—Salm 102:10.

20. Thlacamnak nih a ṭhalomi ruahnak a domi hna kha zeitindah a bawmh khawh hna?

²⁰ Asinain salm caṭialtu nih a nunnak kha Jehovah thangṭhatnak caah a hman khawh rih. (Salm 102:19-21 rel.) Salm dal 102 nih “zumhnak nunning” in a nungmi hmanh harnak an ing kho i zeihmanh ruat kho loin an um kho ti a langhter. Salm caṭialtu cu harnak nih kulh dih sehlaw cu bang “inn cung va cihai bantuk ka si” tiah lungleng ngaiin a chim. (Salm 102:7) Nang zong cutin na ruah ve ahcun salm caṭialtu bantukin Jehovah sinah na intuarmi kha chim. Thlacamnak nih a ṭhalomi ruahnak tei khawh awkah aan bawmh lai. Baibal ah hitin kan hmuh: “Kaltak cia a mi kha [Pathian nih] an thlacamnak a ngaihpiak hna lai i a theihpiak hna lai.” (Salm 102:17) Mah biakam kha zum.

21. Kan lung a dongh tikah zeitindah a ṭhami hmuhnak kan ngeih khawh deuh?

²¹ Salm dal 102 nih a ṭhami hmuhnak zeitindah ngeih khawh deuh a si zong a langhter. Salm caṭialtu nih Jehovah he an i pehtlaihnak kong kha a ruahnak thawngin cutin ngeih aa zuam. (Salm 102:12, 27) Jehovah cu a mi pawl harnak an inkhawh nakhnga bawmh awkah timhcia a si zungzal ti a hngalhmi nih a hna a ngamter. Cucaah na lung a dongh i mah nih na duh tlukin Pathian rian aan ṭuanter khawh lo ahcun thla cam. Na harnak in luatnak ca lawngah si loin ‘BAWIPA min chim’ a si nakhnga ca zongah thla cam.—Salm 102:20, 21.

22.  Zeitindah Jehovah lung kan ton khawh?

²² “Zumhnak nunning” in kan nung ti le Jehovah caah a sunglawimi kan si ti langhternak ah Baibal kan hman khawh. Satan vawlei ah a ṭhalomi ruahnak le lungdonghnak vialte kan hlo kho dih lai lo ti cu a hmaan ko. Asinain a rian ṭuannak ah zumhfek tein kan i tel ahcun Jehovah lung kan ton lai i zungzal nunnak kan hmu lai.—Matt. 24:13.