Brazil i pa pakhat nih hitin a chim: “Zanlei Chungkhar Pumhnak kan tuah tikah kan lung a thawh tuk caah a caan ah keimah nih ka ngolter hna lo ahcun zantlaipi tiang kan tuah tawn.” Japan i a ummi pa pakhat nih kum hra a simi ka fapa nih hlathlainak zei can dah kan tuah cang ti kha a hngal lo i tuah rih a duh tiah a chim. Zeicah a si? Kan fapa cu “a lung a tho tuk i aa nuam tuk” tiah a pa nih a chim.

Asinain fale an dihlak in cun chungkhar pumhnak ah an lung a tho lai lo. Cheukhat cu a nuamh hmanh an i nuam lo. Zeicah a si? Togo i pa pakhat nih “Jehovah biaknak cu a kan normi a si awk a si lo” tiah a chim. Chungkhar pumhnak nih a kan nor ahcun kan tuahning kan thlen a hau tinak a si. Sabbath cu Israel mi cheukhat caah a nuammi a si bantukin chungkhar tampi nih chungkhar pumhnak cu a nuammi a si kho ti kha an hmuh.—Isa. 58:13, 14.

Chungkhar pumhnak ah chungkhar mi dihlak zalong tein an i tel nakhnga pale nih an timhtuah ding a si. Mah lawngah chungkhar pumhnak ah an i nuam kho lai. Fanu pathum le fapa pakhat a ngeimi Ralf nih an innchungkhar pumhnak cu cawnnak si loin biaruahnak he aa lo deuh tiah a chim. Zeitindah a si khawh? An dihlak in an chim ve caah a si. Asinain cawnnak ah chungkhar mi dihlak lungtho tein i tel cu a caan ah a har ko lai. Nu pakhat nih hitin a chim: “Chungkhar pumhnak kha ka duh tlukin a nuammi siter awkah tuah khawhnak thazaang a caan ah ka ngei lo.” Nan innchungkhar pumhnak kha a nuammi na siter kho lai maw?

Germany i fa pahnih a ngeimi pa nih “aa tlak ningin thlennak kan tuah a hau” tiah a chim. Fa pahnih a ngeimi Natalia timi nu nih “kan chungkhar caah a biapi bikmi cu cawnnak kha a phunphun in tuah a si” tiah a chim. Chungkhar tampi nih chungkhar pumhnak kha a kong dangdang i ruah awkah a caan an ṭhen. “Cutin kan tuahnak thawngin kan lung a tho deuh i chungkhar dihlak kan i tel kho” tiah Brazil i kum hra fai a simi fa pahnih a ngeimi Cleiton timi pa nih a chim. Kum aa thlau tukmi fale a ngeimi nulepa nih cawnnak caan kha an ṭhennak thawngin fale pakhat cio i an herhmi kha lungthin an pek khawh. Cun zei cauk dah kan cawn lai ti le zeitindah kan cawn lai timi biakhiah tik zongah nulepa cu thlennak an tuah a hau.

Chungkhar tampi nih chungkhar pumhnak kha zeitindah a phunphun in an tuah? Cheukhat nih chungkhar pumhnak kha Jehovah sin hlasaknak in an thawk. Mexico i Kuan timi pa nih “mah nih a kan nuamhter i kan theih laimi kong caah kan lungthin kha a timhtuah” tiah a chim. Mah  zanlei i an i ruah hngami kong he aa pehtlaimi hla kha a chungkhar nih an thim.

Chungkhar tampi cu Baibal tuanbia pakhat kha an relṭi. Chungkhar mi hna nih Baibal tuanbia i aa telmi hna pakhat cio airolh in an rel. “A hramthawk ah cun cutin Baibal rel cu ka caah phundang pi a lo” tiah Japan i pa pakhat nih a ti. Asinain a fapale pahnih cu an nu le an pa chungkhar pumhnak ah an nuamhmi an hmuh tikah an i nuam. Chungkhar cheukhat nih Baibal tuanbia kha anmah theng nih an piah. Thlanglei Africa i fapa pahnih a ngeimi Roger nih “Baibal chung i nulepa nih kan hmuh lomi kong hmanh kha a caan ah fale nih an hmuh tawn” tiah a chim.

Chungkhar hna nih an tuah khawh rihmi cu Noah tilawng asiloah Solomon biakinn ti bantuk sak a si. Cu bantuk thil tuah khawh awkah hlathlainak tuah cu a nuam tuk. Tahchunhnak ah, Asia i kum nga a simi ngakchianu cu a nu le a pa le a pi he cutin an rak tuah. An innpi ah ṭhu in lamkaltu Paul i missionary khualtlawnnak kha catlap cungah an suai, cun anmah theng mah lam ah a kalmi bantukin lente an i celh. Chungkhar cheukhat nih cun Exodus Baibal chung i Israel mi hna khualtlawnnak lam kha an suai i lente an i celh. Cutin a phunphun in kan tuahmi nih “chungkhar pumhnak kha a nuamhter lengah kan innchungkhar zong a nuamhter” tiah Togo i kum 19 a simi Donald nih a chim. Nangtah nan innchungkhar pumhnak a nuamh deuh nakhnga tuah khawhmi thil kha na ruat kho maw?

Aa tlak ningin thlennak le a phunphun in tuahnak nih chungkhar pumhnak kha a nuamhter nain kan dihlak in ṭhatnak hmuh awkah tuah a herhmi a um rih. Chungkhar dihlak in i timhchung a herh. Ngakchia pawl cu saupi ṭhut in Baibal cawn kha an i harh caah pale nih ngakchia duh hngami kong kha ṭha tein an thim a hau. Cun caanpe in ṭha tein an i timhlamh a hau. Pa pakhat nih “ṭha tein kaa timhlamh ahcun kan dihlak in cawnnak ah hmualngei tein kan i tel kho” tiah a chim. Germany i pa pakhat nih a hmai thla chung i chungkhar pumhnak ah an i ruah hngami kong kha a chungkhar a chimhcia hna. Benin i a ngakchia rihmi fa paruk a ngeimi chungkhar pakhat cu chungkhar pumhnak ah bupi chuahmi DVD an zoh tawn. Zeitindah an i timhtuah? An pa nih biahalnak pawl a ṭialmi kha a pek cia hna. Timhtuahnak nih chungkhar pumhnak kha a ṭhatter chin ti cu a fiang ko.

Chungkhar mi hna nih an cawn hngami kong kha an hngalh cia ahcun mah zarh chungah mah kong kha an i ruah kho lai. Mah tikah chungkhar pumhnak kha an i ngaih lai. Cun chungkhar mi pakhat cio nih rian an ngeih ahcun chungkhar pumhnak cu keimah caah a si tiah an ruah lai.

Chungkhar pumhnak hmaan tein tuah a har kha chungkhar tampi nih an hmuh. Zeicah?

Pale tampi cu chungkhar zohkhenhnak caah suimilam tampi chung rian an ṭuan. Tahchunhnak ah, Mexico i pa pakhat cu rianṭuan awkah zinglei suimilam paruk in aa thawh i zan pariat hrawng tiang a ṭin rih lo. A caan ah khualtlawng rianṭuantu tlawn ruangah asiloah pengkomh civui a um caah chungkhar pumhnak tuah ni kha thlen a hau men lai.

A har hmanhah chungkhar pumhnak kha hmaan tein tuah awkah bia kan khiah a hau. An chungkhar caah cutin tuah a biapitnak kong kha Togo ram i kum 11 a simi Luis hitin a chim: “Chun ah a cangmi thil ruangah a caan ah chungkhar pumhnak kha hnupi ah kan thawk nain tuah loin cun kan um bal lo.” Chungkhar pumhnak kha zarh thawknak lei ah tuah cu a ṭha. Zeicah? Ruahlo piin thil pakhatkhat a can sual ahcun chungkhar pumhnak kha zarh donghnak lei ah na thawn khawh.

Mah kha zeicah chungkhar pumhnak tiah auh a si? Jehovah kan biaknak phunkhat a si ve caah a si. Chungkhar ningin ‘kan raithawinak a simi’ “thangṭhatnak” kha Jehovah sinah kan pekchanh khawh. (Heb. 13:15) “BAWIPA ah nan i lawmhnak cu nan thazaang a si caah” chungkhar pumhnak ah chungkhar mi dihlak lunglawm tein i tel u.—Neh. 8:9, 10.