Na Bia cu—‘E, e le Ai, ai aa Cawhmi a si maw’?
Mah bianabia hi ruathmanh: Siizung Pehtlaihnak Kawmiṭi ah aa telmi Khrihfa upa pakhat cu thawngthanhtu mino unaupa pakhat he Zarhpi zing ah phungchim kalṭi awk an i tim. Asinain mah zing ah unaupa pakhat i a nupi cu mawṭaw eksident a tong i siizung ah an kalpi colh. Mah unaupa nih Khrihfa upa kha thi rawnh loin khuaihlaitu ding siibawi kawlpiak awkah phone a chawnh i bawmhnak a hal. Mah harnak a tongmi chungkhar kha bawmh awk le a dawtnak langhter awkah mino unaupa he phungchim kalṭi awk a timhmi kha a let ṭhan.
Mah bianabia hi ruat ṭhan hmanh: Fa pahnih a ngeimi nuhmeinu te chungkhar kha an Khrihfabu i nuva hna nih zanriah ei an sawm hna. Mah kha a fale a chimh hna tikah an i nuam tuk. Mah ni a phanh lai kha an i ngaih tuk. Asinain mah ni a phanh lai ni ah nuva hna nih ruahlopi in thil pakhat a chuah caah sawmmi kha kan let ṭhan tiah nuhmeinu kha an chimh. Zei ruangah dah a si kha a hnuah nuhmeinu nih a hngalh. Anmah an sawm hna hnuah mah nuva hna kha an hawile nih mah zan ah an inn i len awkah an sawm ve hna i an cohlan caah a si.
Khrihfa a simi nih kan biakam ningin kan tuah awk a si. Kan bia cu zeitikhmanh ah “‘e, e’ le ‘ai, ai’ aa cawhmi” a si awk a si lo, mah cu thil pakhat tuah awkah kan hna a tlak hnuah a ruang ṭha a um lo ahcun kan let ṭhan awk a si lo tinak a si. (2 Kor. 1:18) Asinain a cunglei i bianabia pahnih nih a langhter bantukin thil sining cu aa dang kho. Thim ding kan ngeih lo caah kan i timhmi kan let a hauh caan a um men ko lai. Lamkaltu Paul hmanh nih cutin voikhat a rak tuah.
Paul cu Zumhawk a Tlak lo tiah Sual an Phawt
AD 55 ah Paul cu a voithumnak missionary khualtlawnnak ah Efesa ah a tlawng. Paul cu Aegean Rili kha tan in Korin ah, cun cuka in Masidonia ah kal aa tim. Cun Jerusalem i a kirlei ah Korin Khrihfabu ah a voihnihnak tlawn aa tim, mah cu Jerusalem unau pawl an kuatmi hna an laksawng lak awkah a si. (1 Kor. 16:3) Cutin a si kha 2 Korin 1:15,16 i mah bia in kan hngalh khawh: “Hi vialte hi fek tein ka zumh caah nanmah tlawn hmasa kha ka rak i tim, nannih nih thluachuahnak a voihnih in nan hmuh khawh nakhnga. Ka rak i timhning cu, Masidonia lei ka kal pah ah nannih kha tlawn i ka kirlei ah hun tlawn pah ṭhan kha a si. Cuticun Judea lei ka hung kal tikah nannih nih nan ka bawmh khawh hnga tiah ka ruah.”
Paul nih Korin unau pawl sin a hmasa deuh a cakuat ah an sin i tlawn aa timhnak kha chim hna sehlaw a lo. (1 Kor. 5:9) Mah ca a ṭial hnu tlawmpal ah Khrihfabu ah buainak nganpi a um tiah Khalawi te chung sinin thawng a theih. (1 Kor. 1:10, 11) Cucaah Paul nih Korin Khrihfabu sin tlawn ding timi a hmasa aa timhnak kha a thlen ṭhan. Mah hnuah 1 Korin tiah auhmi cakuat kha a ṭial. Mah ca ah Paul nih cawnpiaknak le chimhhrinhnak bia a ṭial. Mah lengah aa timhnak a thlenmi le Masidonia i a kal hmasa hnuah Korin i kal aa timhnak kong zong a ṭial.—1 Kor. 16:5, 6. *
Korin khua i unau pawl nih a cakuat an hmuh tikah cheukhat nih a biakam ningin a tuah lo tiah sualphaw hna sehlaw a lo. Paul nakin kan ṭha deuh tiah an i ruat. Annih kha “lamkaltu taktak” tiah Paul nih a auh hna. Paul nih amahle amah i runven awkah hitin a hal hna: “Hiti ka rak i timh tikah hin lungthin reprai ngei loin aa let lelekmi ka rak si maw? Ka rak i timhnak ah hin mahzawn lawng ruahnak lungthin a ngeimi bantukin, ‘E, e,’ ti ṭung in ‘Ai, ai,’ a ti fawnmi ka si maw?”—2 Kor. 1:17; 11:5.
Mah thil sining ah lamkaltu Paul cu ‘lungthin reprai a ngei lomi’ a si taktak maw tiah kan i hal men lai. Paul cu lungthin reprai a ngei lomi a si lo. ‘Lungthin reprai a ngei lomi’ timi bia cu zumhawk a tlak lomi le a biakam ningin a tuah lomi tinak a si. Paul nih ‘ka rak i timhnak ah hin mahzawn lawng ruahnak lungthin a ngeimi bantuk ka si maw?’ ti zong in a hal hna. Mah bia nih aa timhmi a thlenmi cu zumhawktlak lo a si caah a si lo ti kha Korin khua i Khrihfa pawl a hngalhter hna awk a si.
Paul nih sual an phawtmi a palh kha hitin a langhter: “Pathian cu zumhawktlak a si bantukin nan sin i ka biakam cu ‘E, e,’ le ‘Ai, ai,’ aa cawhmi a si lo.” (2 Kor. 1:18) Korin unau pawl caah a ṭha bikmi a duh caah aa timhmi a khualtlawnnak kha a thlenmi a si. 2 Korin 1:23 ah Paul bia kha hitin kan hmuh: “Korinth khua i ka rat lo cu nanmah zawn kaan ruah hna caah a si.” Aa timhmi a thlennak thawngin a tlawn hna hlanah a cawnpiakmi hna kha zulhnak caanṭha a pek hna. Unau pawl nih cutin an rak tuah taktak. Masidonia i a um lioah Paul nih Korin khua i unau pawl kha an tuahmi a ṭhalo ti hngalh awk le i ngaihchih awkah a cakuat nih a bawmh hna ti kha Titas sinin a theih. Mah nih a lung a lawmhter taktak.—2 Kor. 6:11; 7:5-7.
Jesuh cu Aamahkhan a Si
“Lamkaltu taktak” hna nih Paul kha a biakam ningin a tuah lo tiah sual an phawt tikah phungchimnak zongah zumhawk a tlak lo tiah an chimduhmi a si men lai. Asinain Paul nih Korin khua i unau pawl kha an sin i a chimmi thawngṭha cu Jesuh Khrih kong a si kha a hngalhter hna. “Zeicahtiah Silas le Timote le keimah nih kan in chimhmi hna Jesuh Khrih, Pathian Fapa cu, ‘E, e’ le ‘Ai, ai,’ aa cawhmi a si lo. Amah cu Pathian ‘E’ a si ko.” (2 Kor. 1:19) Cu a si ah Jesuh Khrih cu zumhawk a tlak lomi a si maw? A si lo. A nun chung vialte le phung a chim chung vialte biatak kha a chim zungzal. (Johan 14:6; 18:37) Jesuh chimmi cu a hmaanmi le zumhawk a tlakmi a si ahcun Paul zong mah kong kha a chim ve caah zumhawk a tlakmi a si ve lai.
Jehovah cu “zumhawktlakmi Pathian” a si. (Salm 31:5) Mah kha Paul nih a ṭial chapmi mah bia in kan hngalh khawh: “Amah cu Pathian biakamnak dihlak ah khan ‘E’ a si.” Amah timi cu Khrih kha a si. Jesuh cu vawleicung a um lioah zumhfek tein a um caah Jehovah biakam cu zumhawktlak a si tiah kan ti khawh. Paul nih hitin a ti chap: “Cu ruangah cun kannih nih Jesuh Khrih thawngin Pathian thangṭhatnak ah khan, ‘Amen,’ kan ti tawn kha a si.” (2 Kor. 1:20) Jesuh cu “Amen” a si ti tikah zeidah a chimduhmi a si? Jesuh cu Jehovah biakam vialte a tling lai ti a langhtermi aamahkhan a si tinak a si.
Paul nih “e” a ti tikah “e” a si taktak ti cu a fiang ko. Jesuh Khrih le Jehovah Pathian bantukin a chimmi ningin a tuah taktak. (2 Kor. 1:19) Anih cu zumhawktlak a si i “mah zawn lawng ruahnak lungthin” he biakamnak a tuahmi a si lo. (2 Kor. 1:17) Pathian thlarau lamhruainak a zulmi a si. (Gal. 5:16) A tuahmi kip nih unau pawl caah a ṭha bikmi a duh ti a langhter. E a ti tikah E a si taktak.
E Na ti tikah E a si Taktak maw?
Tuchan ah mi tampi cu biakamnak tuah an i fawih i buaibainak hmete ruangah asiloah thil dang tuah an duh deuh ruangah an let ṭhan lengmang. Chawlehnak kongah mi cu hnatlaknak min an thut hmanhah “e” an ti bantukin “e” an si zungzal lo. Mi tampi nih ṭhitumnak biakamnak kha zungzal ca in an hmu ti lo. Nuva i ṭhennak hi a karh tuk i mah nih ṭhitumnak kha fawi tein hrawh khawhmi a biapi lomi biakamnak in mi tampi nih an hmuh ti a langhter.—2 Tim. 3:1, 2.
Nangtah zeitin? E na ti tikah E a si taktak maw? Mah capar a thawknak ah kan hmuh cang bantukin zumhawktlak lo na si ruangah si loin hngalh chung khawh lomi thil ruangah naa timhmi let ṭhan a hauh caan a um ve men lai. Asinain biakamnak na tuah ahcun mah ningin tuah awkah na si khawh chungin naa zuam a hau. (Salm 15:4; Matt. 5:37) Cutin na tuah ahcun zumhawk a tlakmi le biatak a chim zungzalmi in mi nih an in hngalh lai. (Efe. 4:15, 25; Jeim 5:12) Zei kong paohah zumhawk a tlakmi na si kha mi nih an hmuh ahcun Pathian Pennak kong na chim tikah ngaih an duh deuh lai. Cucaah E kan ti tikah E a si zungzal awk a si.
^ cat. 7 1 Korin a ṭial hnu tlawmpal ah Paul cu Troas khua in Masidonia ah a rak kal. Cuka ah 2 Korin kha a ṭial. (2 Kor. 2:12; 7:5) A hnuah Korin ah a va tlawng.
