‘Aho paoh kha Zeitindah Kan Chawnh’ hna awk a si?
“Nan biachim nan holh rel cu a zungzal in ngaih a nuammi . . . a si awk a si i aho paoh kha zeitindah ka chawnh ah a ṭhat bik lai ti hngalh kha nan i zuam lai.”—KOL. 4:6.
1, 2. (a) Aa tlakmi biahalnak hman man a ngeih kha zei hmuhtonnak nih dah a langhter? (A hramthawknak hmanthlak zoh.) (b) A harmi kong i ruah kha zeicah kan ṭih awk a si lo?
UNAUNU pakhat cu Jehovah Tehte a si lomi a vapa he Baibal kong an i ruah. A vapa nih Thumkomh pathian ka zumh tiah a ti. Asinain Thumkomh pathian kong he aa tlaiin an church nih an cawnpiak taktakmi hna kha a hngal lo ti kha unaunu nih a hngalh. Cucaah fim ngaiin hitin a hal: “Pathian cu Pathian a si, Jesuh cu Pathian a si i thiang thlarau zong Pathian a si, asinain Pathian pathum si loin pakhat an si tiin maw na zumh?” Khuaruahhar ngai a simi cu a vapa nih “cutin ka zum lo” tiah a leh. Cuticun Pathian cu aho dah a si timi kong kha lungtho ngaiin an i ruah kho.
Kan bia a ngaimi hna an lung chungah lut lakin kan cawnpiak khawh hna
2 Mah kong in zeidah kan i cawn khawh? Aa tlakmi biahalnak kha fim ngaiin hal cu man a ngei tuk timi kan i cawn khawh. Thumkomh pathian, hell mei le Sertu a um ti bantuk a harmi kong i ruah kha kan ṭih awk a si lo ti zong kan hngalh. Jehovah le a kan cawnpiakmi kha kan i bochan ahcun kan bia a ngaimi hna an lung chungah lut lakin kan cawnpiak khawh hna lai. (Kol. 4:6) Hi capar ah (1) mi kha an ruahnak a chimter hngami biahalnak tuahnak, (2) Baibal chimmi kha ruahternak le (3) kan chim duhmi langhter awkah bianabia hmannak in zeitindah hmualngei deuh in mi kan cawnpiak khawh hna timi kong kan i ruah lai.
Na Bia a Ngaimi kha a Ruahnak a Chimter hngami Bia Hal
3, 4. Mi pakhat i a zumhnak hngalh awkah biahalnak tuah cu zeicah a biapit? Tahchunhnak pe.
3 Kan bia a ngaimi nih zeidah a zumh timi hngalh awkah biahalnak nih a kan bawmh khawh. Mah cu zeicah a biapit? Phungthlukbia 18:13 nih hitin a ti: “Bia na leh hlanah ngai hmasa, cuti na tuah lo ahcun na hruh a si hleiah bia na lehmipa zei i na rel lo zong a si.” Cucaah kan bia a ngaimi nih zeidah a zumh taktak ti kha hngalh kan i zuam hmasa a hau. Cutin kan tuah lo ahcun a kong pakhat a palh ti fianter awkah caan tampi kan hman hnuah mah mipa nih mah kong cu a zumhmi a si lo kha kan hngalh khawh men.—1 Kor. 9:26.
4 Tahchunhnak ah, mi pakhat he hell kong kan i ruah men lai. Mi cheukhat nih hell cu mi ṭhalo pawl mei in hrem an sinak hmun a si tiah an zumh. A cheu nih cun hell tlak timi cu Pathian he pehtlaihnak ṭha ngeih lo kha a si tiah an zumh. Cucaah hitin kan ti khawh: “Hell kong ah mi nih zumhnak a phunphun an ngeih caah na zumhning hngalh ka duh?” A chimmi kan ngaih hnuah mah pa kha Baibal cawnpiakmi hngalhthiam awkah kan bawmh khawh lai.
5. Mi pakhat nih zeicah cutin a zumh timi hngalh awkah biahalnak nih zeitindah a kan bawmh khawh?
5 Mi pakhat nih zeicah cutin a zumh timi hngalh awk zongah fim ngaiin biahalnak tuahnak nih a kan bawmh khawh. Tahchunhnak ah, phungchimnak ah kan tonmi pakhat nih Pathian ka zum lo a ti hei ti u sih. Mah tikah mah pa nih zeicah cutin a chimmi a si hnga tiah ruahdamh awk a si maw? A si lo. (Salm 10:4) Mi cheukhat cu midang harnak an tonmi an hmuh caah asiloah anmah theng harnak tampi an ton caah Pathian an zumhnak a tlau. Dawtnak a ngeimi Sertu nih cu bantuk harnak umnak nawl a awnhmi kha an hngalthiam kho lo. Cucaah inn-ngeitu pakhat nih “Pathian ka zum lo” a ti ahcun “a hlante in maw na zumh lo?” tiah kan hal khawh. A si lo a ti ahcun Pathian a um timi a lung a hrintermi thil pakhatkhat a ton le ton lo kan hal khawh. A bialehnak nih bawmh khawhnak a ṭha bikmi lam kha a kan hngalhter lai.—Phungthlukbia 20:5 rel.
A bialehnak kha kan ngaih awk a si i a ruahnak kan upat kha kan hngalhter awk a si
6. Biahalnak kan tuah tikah zeidah kan tuah awk a si?
6 Biahalnak kan tuah tikah a bialehnak kha kan ngaih awk a si i a ruahnak kan upat kha kan hngalhter awk a si. Tahchunhnak ah, harnak cheukhat ruangah dawtnak a ngeimi Sertu a um timi a lung a hrin kha a chim men lai. Mah tikah zeicah harnak kan ton timi kong ruah cu a palh lo ti kha kan hngalhter awk a si. (Hab. 1:2, 3) Mah hnuah Pathian a um ti kha zeitindah hngalh khawh a si timi kong kan chimh khawh. Kan lung a sau i dawtnak kan ngeih ahcun tam deuh in hngalh a duh ko lai.
Baibal Chimmi Ruahternak
Hmualngei tein phungchim khawh awkah zeinihdah a kan bawmh lai? (Catlangbu 7 zoh)
7. Hmualngei tein phungchim khawh awkah zeidah kan tuah a herh?
7 Phungchimnak ah Baibal hi kan hman bikmi hriamnam a si. Baibal nih ‘zeizong zeizong ah tlamtlingmi si awk le thil ṭha phun zakip tuah khawh awkah thilthuam tling tein a ngeimi si awkah’ a kan bawmh. (2 Tim. 3:16, 17) Hmualngei tein phungchim khawh awkah Baibal cang tampi rel lawngin a za lo. Baibal chimmi kha zeitindah ruahter awk a si le fianter awk a si kha kan hngalh a hau. (Lamkaltu 17:2, 3 rel.) Mah kong hngalh khawh awkah tahchunhnak pathum i ruah u sih.
8, 9. (a) Jesuh cu Pathian he an i tluk tiah a zummi kha zeitindah khua kan ruahter khawh? (b) Mah kong ruahter awkah mi kha zeitindah na rak bawmh hna?
8 Tahchunhnak 1: Phungchimnak ah Jesuh cu Pathian he an i tluk tiah a zummi he kan i tong. Amah kha ṭha tein khua ruahter awkah zei Baibal cang dah kan hman khawh? Johan 6:38 i Jesuh bia hi kan relter khawh: “Vancung in ka rung ṭum cu keimah duhnak tuah awkah khan si loin a ka thlahtu duhnak tuah awkah khan a si deuh.” Mah cacang a rel dih hnuah hitin kan hal khawh: “Jesuh cu Pathian a si ahcun aho nih dah vancung in a thlah? A thlahtu cu Jesuh nakin a ngan deuhmi a si lai, a si ko lo maw? A taktak ti ahcun thlahtu cu thlahmi nakin a ngan deuh.”
9 Filipi 2:9 zong kan relpiak khawh, mah cacang ah lamkaltu Paul nih Jesuh a thih hnu le a thawhṭhan hnuah Pathian nih a tuahmi kong a ṭial. Mah cacang nih Jesuh kha “cunglei a sannak bik hmun ah khin Pathian nih a cawi i min vialte lakah a ngan bik min kha a pek” tiah a ti. Mah cacang kha ṭha tein ruahter awkah inn-ngeitu kha hitin kan hal khawh: “Jesuh cu a thih hlanah Pathian he an i tluk i a thawhṭhan hnuah Pathian nih a san deuhnak hmun ah a cawi ahcun Jesuh cu Pathian nakin a sang deuh lai, a si ko lo maw? Asinain Pathian nakin san deuh cu zeitindah a si khawh lai?” Cutin ruahternak nih Pathian Bia a upatmi lungthin ṭha a ngeimi kha tam deuh in hngalh a duhter lai.—Lam. 17:11.
Pathian Bia a upatmi lungthin ṭha a ngeimi kha tam deuh in hngalh a duhter lai
10. (a) Hell mei a zummi kha zeitindah khua kan ruahter khawh? (b) Mah kong ruahter awkah mi kha zeitindah na rak bawmh hna?
10 Tahchunhnak 2: Inn-ngeitu nih mi ṭhalo pawl cu hell mei ah a zungzal in hrem an si lai lo timi kha zumh awkah aa harh. Mi ṭhalo pawl kha an tuahmi thil ṭhalo ruangah dantat si hna seh ti a duh caah hell mei a zumhmi a si men lai. Cutin a ruatmi hna kha zeitindah kan chimh khawh hna? Mi ṭhalo pawl cu dantat an si lai ti kha kan chimh khawh. (2 Thes. 1:9) Mah hnuah sualnak ca i dantatnak cu thihnak a si ti a langhtermi Genesis 2:16, 17 kha kan relpiak khawh. Adam sualnak ruangah mi vialte cu misual kan si tiah kan fianter khawh. (Rom 5:12) Pathian nih hell mei ah dantatnak kong pakhat hmanh a chim lo tiah kan ti khawh. Mah hnuah Genesis 3:19 kha kan rel khawh. Mah cacang ah Pathian nih Adam kha na sual ruangah leidip ah na kir ṭhan lai tiah a ti. “Adam cu hell mei ah a kal ding a si ahcun leidip ah na kir ṭhan lai tiah ti cu aa tlak hnga maw?” tiah kan hal khawh. Cu bantuk biahalnak nih lungthin ṭha a ngeimi kha mah kong ṭha tein ruah awkah a bawmh lai.
11. (a) Miṭha vialte van ah an kai lai tiah a zummi pakhat kha zeitindah khua kan ruahter khawh? (b) Mah kong ruahter awkah mi kha zeitindah na rak bawmh hna?
11 Tahchunhnak 3: Phungchimnak ah miṭha vialte van ah an kai tiah a zummi pakhat he kan i tong. Mah ruahnak nih Baibal a hngalhthiam ning kha a hnorsuan khawh. Tahchunhnak ah, Biathlam 21:4 kan rel ahcun inn-ngeitu nih mah cu vancung nunnak kong a si tiah a ruah men lai. (Rel.) Mah pa kha zeitindah na chimh khawh? Baibal cang tam deuh in rel nakcha in Biathlam 21:4 chung i biafang pawl tu kha na fianter khawh. Mah cacang nih “thihnak a um ti lai lo” tiah a ti. Hitin kan hal khawh: “Thil pakhatkhat a um ti lai lo ti tikah mah thil cu a rak um bal tinak a si ti kha na hna a tla ko lo maw?” A tla tiah a ti men ko lai. Mah tikah vancung ah cun thihnak a um lo tiah kan chimh khawh. Thihnak cu vawlei lawngah a um. Cucaah Biathlam 21:4 cu hi vawlei ah a um laimi thluachuah kong a si tiah ti cu aa tlak.—Salm 37:29.
Kan Chim Duhmi Langhter awkah Bianabia Hmannak
12. Jesuh nih zeicah bianabia a hman?
12 Jesuh nih phung a chim tikah bianabia a hman. (Matthai 13:34, 35 rel.) Mah bianabia hna nih a bia a ngaitu hna cu lungthin ṭha a ngeimi an si le si lo hngalh awkah a bawmh. (Matt. 13:10-15) Jesuh nih a chimmi an i cinken nakhnga le a bia ngaih an duh nakhnga ca zongah bianabia a hman. Cawnpiaknak ah bianabia kha zeitindah kan hman khawh?
Hngalh a fawimi bianabia hman cu a ṭha bikmi a si
13. Pathian cu Jesuh nakin a ngan deuh timi cawnpiak awkah zei bianabia dah na hman khawh?
13 Hngalh a fawimi bianabia hman cu a ṭha bikmi a si. Tahchunhnak ah, Pathian cu Jesuh nakin a ngan deuh timi cawnpiak awkah mah bianabia hi kan hman khawh: Pathian le Jesuh an pahnih in an i pehtlaihnak kha Pa le Fapa an i pehtlaihnak he an tahchunh ti kha kan chimh khawh. (Luka 3:21, 22; Johan 14:28) Mah hnuah hitin kan hal khawh: “Mi pahnih cu an i khat, an i tluk timi langhter awkah chungkhar i zei pehtlaihnak dah na hman lai?” Inn-ngeitu nih unau asiloah faphir tiah a ti men lai. Mah tikah hitin kan ti khawh: “Mah cu a ṭha tukmi bianabia a si. Mah bianabia kha fawi tein kan hngalh khawh ahcun a Liannganmi Cawnpiaktu Jesuh nih ziah mah bianabia kha a hman ve lo? Mah nakcha in Pathian cu ka Pa a si ti tuin a chim. Cuticun Pathian cu a upa deuh i amah nakin nawl a ngei deuh ti kha kan hngalhthiam nakhnga a kan bawmh.”
14. Hell mei i mi hrem awkah Pathian nih Satan a hman timi a si khawh lonak kha zei bianabia nih dah a langhter?
14 A dang tahchunhnak pakhat i ruah ṭhan u sih. Pathian nih Satan kha hell cawngtu ah a chiah tiah mi cheukhat nih an zumh. Hell mei i mi hrem awkah Pathian nih Satan a hman timi a si khawh lonak kha hngalh awkah fa a ngeimi kha zeitindah na bawmh khawh? Hitin na hal khawh: “Na fa cu chimh a ngai lo tuk i thil ṭhalo tampi a tuah ahcun zeidah na tuah lai?” Ka chimhhrinh lai tiah a ti ko men lai. Thil ṭhalo a tuah ti nakhnga lo atu le atu a cawnpiak ko lai. (Ptb. 22:15) Asinain “na fa nih a zia thlen a duh lo ahcun zeidah na tuah lai?” tiah na hal khawh. Ka fa kha dan ka tat lai tiah nulepa tam deuh nih an ti ko lai. Mah tikah “na fa kha thil ṭhalo tuah awkah mi ṭhalo pakhat nih a forhmi a si ti na hngalh ahcun zeitindah na um lai?” tiah na hal khawh. Mah pa cungah a thin a hung ko lai. A donghnak ah mah bianabia fianter awkah hitin na hal khawh: “Mi ṭhalo pa nih na fa kha a forhmi a si ti na hngalh ahcun mah pa kha na fa dantatpiak awkah bawmhnak na hal lai maw?” A hal lai lo ti cu a fiang ko. Cu bantukin Satan cu thil ṭhalo tuah awkah mi a forhtu a si. Cucaah thil ṭhalo a tuahmi hna dantat awkah Pathian nih Satan a hmang lai lo ti cu a fiang ko.
A Tlarimi Si
15, 16. (a) Mikip nih Pennak kong thawngṭha kha an cohlan lai tiah zeicah kan i ruahchan awk a si lo? (b) Hmualngei tein phungchim khawh awkah phungchim a thiam tukmi si a hau maw? Fianter. (“ Bialehnak caah Bawmtu a simi Hriamnam” timi rinli kulh zoh.)
15 Aa tlakmi biahalnak kan hman, a ṭha bikmi lam in khua kan ruahter hna i aa tlakmi bianabia kan hman hmanhah mikip nih Pennak kong thawngṭha kha an cohlang lai lo. (Matt. 10:11-14) Jesuh cu vawleicung i a nung balmi lakah a lianngan bikmi Cawnpiaktu a si nain mi tlawmte lawng nih a cawnpiaknak kha an rak cohlan.—Johan 6:66; 7:45-48.
Jehovah nih “aho paoh” kha ṭha tein chawnh awkah a kan bawmh lai
16 Kei cu cawnpiak a thiam tukmi ka si lo tiah kan i ruah ahcun zeitin? Cuti a si hmanhah hmualngei tein phung kan chim khawh ko. (Lamkaltu 4:13 rel.) “Zungzal nunnak hmu dingah thim a simi hna” nih thawngṭha kha an cohlan lai tiah Baibal nih a ti. (Lam. 13:48) Cucaah a tlarimi si hna u sih. Cawnpiak thiam deuh awkah kan i zuam awk cu a si nain kan chimhmi hna nih thawngṭha an cohlan lo tikah kan lung a dongh awk a si lo. Jehovah le a cawnpiaknak kha kan i bochan ahcun cawnpiak a thiam deuhmi kan si lai i mah nih kanmah he kan bia a ngaimi hna he a kan ṭhathnem lai. (1 Tim. 4:16) Jehovah nih “aho paoh” kha ṭha tein chawnh awkah a kan bawmh lai. Sui Nawlbia tiah auhmi kha kan zulhnak thawngin phungchimnak ah zeitindah hlawhtlingmi kan si khawh timi kong kha a hnu capar ah kan i ruah lai.
