“BAWIPA nih Amah Ta a Simi cu a Hngalh ko hna”
“Pathian a dawmi pa kha Pathian nih a hngalh.”—1 KOR. 8:3.
1. Pathian mi cheukhat nih anmahle anmah an i hleng ti a langhtermi tahchunhnak pakhat chim. (A hramthawknak hmanthlak zoh.)
JEHOVAH sin rimhmui khanghthawinak pek awkah pa phukhat cu puan thlam hmaiah an dir. Khatlei ah Israel tlangbawi ngan a simi Aaron a dir i khatlei ah Korah le pa 250 an dir. (Nam. 16:16-18) An zapi in Pathian cungah zumhfek tein a ummi an lo. Asinain Korah le a mi hna cu an i porhlaw, ralchanh an hmang, anmah zawn lawng an i ruat i Aaron sinin tlangbawi sinak kha chuh an i zuam. (Nam. 16:1-11) Jehovah nih kan biaknak kha a cohlan lai tiah an ruahnak thawngin anmahle anmah an i hleng. Asinain a taktak ti ahcun an lungthin a hngal dihtu Jehovah kha an serhsat a si. Chungthu lengnal an si le anmah thangṭhatnak hmuh an duh kha Pathian nih a hngalh.—Jer. 17:10.
2. Moses nih zeidah a chim, a bia cu zeitindah a tlin?
2 A hmasa deuh ah Moses nih “BAWIPA nih hodah amah ta a si . . . ti kha a langhter lai” tiah a ti. (Nam. 16:5) Jehovah nih amah a biatu taktak le chungthu lengnal a simi a hngalh hna kha zeitindah a langhter? Jehovah nih van in mei a tlakter i Korah le pa 250 kha a hrawh hna. (Nam. 16:35; 26:10) Aaron lawng a taang. Aaron cu tlangbawi taktak le amah a bia taktakmi a si kha Jehovah nih a langhter.—1 Korin 8:3 rel.
3. (a) Paul chan ah Khrihfabu ah zei thil dah a cang? (b) Moses chan i doh a hmangmi hna cungah Jehovah tuahmi in zeidah kan hngalh khawh?
3 Kum 1,500 leng a rauh hnu, Paul chan ah Khrihfabu ah cu bantuk thil a cang. Khrihfa aa timi cheukhat nih a hmaan lomi cawnpiaknak an karhter tiah Paul nih a chim. Asinain annih cu Khrihfabu chungah an um rih ko. Mah zumhpialmi hna cu Jehovah a bia taktakmi an lo men lai. Asinain a taktak ahcun annih cu cenghngia bantuk an si i “Khrihfa mi a cheu kha an lung an tuai hna.” (2 Tim. 2:16-18) Mah kha Jehovah nih a hmu maw? A hmuh. Pathian nih doh a hmangmi Korah le a mi hna cungah a tuahmi kha Paul nih a hngalh caah mah thil sining zong Jehovah nih a hmuh ti kha a zumh. Kannih zong Jehovah cungah cu bantuk zumhnak kan ngei kho. Paul nih Timote sinah a ṭialmi lungthawh awk ngai a simi bia in kan i cawn khawhmi kha i ruah u sih.
“Keimah cu i Thleng loin BAWIPA Ka si”
4. Paul nih zeidah a zumh? Paul nih Timote sinah zeidah a chim?
4 Jehovah nih chungthu lengnal biaknak a hngalh ti kha Paul nih a zumh. Cun amah a bia taktakmi a hngalh hna ti zong a zumh. Cutin a zumh kha Timote sinah a ṭialmi bia ah a lang. Zumhpialmi hna nih mi cheukhat i an zumhnak an hrawh hnanak kong a chim hnuah hitin a ti: “Pathian nih fek tein a bunhmi hram cu hnih khawh a si lo, cu hram cungah cun ‘Bawipa nih amah ta a simi cu a hngalh ko hna,’ ti le ‘Bawipa ta ka si a timi paoh nih cun palhnak a tuahmi kha a ngol awk a si,’ ti kha an i ṭial.”—2 Tim. 2:19.
5, 6. Paul chimmi “Pathian nih fek tein a bunhmi hram” timi bia cu zeicah cinken awk tlak a si? Mah nih Timote kha zei ṭhatnak dah a pek?
5 Baibal nih “hram” timi biafang kha thil dangdang caah a hman. Mah ah hlanlio Israel khualipi a simi Jerusalem le Pathian timhnak ah Jesuh i a rian an i tel. (Salm 87:1, NW, 2; 1 Kor. 3:11; 1 Pit. 2:6) Asinain “Pathian nih fek tein a bunhmi hram” timi bia tu cu Baibal ah voikhat lawng a um. Paul nih mah bia a hman tikah zei kong dah a sawh duhmi a si?
6 Paul nih “Pathian nih fek tein a bunhmi hram” timi bia kha Moses nih Korah le a mi hna kong a chimmi bia a cherhchannak cacang ah a hmanmi a si. (Nambar 16:5 zoh.) Cuticun Jehovah nih Khrihfabu i a cangmi thil a hngalh kha Paul nih Timote kha a hngalhter ṭhan. Pathian nih zumhpialmi hna kha harnak chuahter lo awkah a kham hna lai. Korah ruangah Jehovah timhnak aa thlen lo bantukin Khrihfabu chung i zumhpialmi hna ruangah Pathian timhnak cu aa thleng lai lo. “Pathian nih fek tein a bunhmi hram” timi bia i a sullam kha Paul nih ṭha tein a fianter lo. Asinain Paul chimmi nih Timote kha Jehovah zumh awk le bochan awkah a bawmh.
Jehovah phunglam cu aa thleng bal lo
7. Jehovah cu a zungzal in a dingmi le zumhawk a tlakmi a si tiah zeicah kan zumh khawh?
7 Jehovah phunglam cu aa thleng bal lo. Salm 33:11 ah Jehovah “khuakhanmi cu zungzal in a hmun i amah timhmi cu zungzal in a fek” tiah aa ṭial. Jehovah cu Siangpahrang a si, a fekmi dawtnak a langhtermi a si i a dingmi le zumhawk a tlakmi a si. Mah a sining hna zong aa thlen bal lo kha Baibal nih a langhter. (Ex. 15:18; Salm 106:1; 112:9; 117:2) Malakhi 3:6 nih “keimah cu i thleng loin BAWIPA ka si” tiah a ti. Cu bantuk ṭhiamṭhiam in Jeim 1:17 zong nih “thladem cu an i thleng lengmang nain anih cu aa thleng bal lo” tiah a ti.
Jehovah cung Zumhnak a Ngeihtermi Bia
8, 9. “Pathian nih fek tein a bunhmi hram” cungah aa ṭialmi ca in zeidah kan i cawn khawh?
8 Hlanlio ah inn pakhat i a hram ah ca an ṭial tawn. Mah cu inn satu ahodah a si asiloah inn-ngeitu ahodah a si ti langhter awkah a si tawn. Paul cu cu bantuk phung kong a ṭial hmasa bikmi Baibal ṭialtu a si. * 2 Timote 2:19 ah Paul nih a chimmi “Pathian nih fek tein a bunhmi hram” cungah ca pahnih aa ṭial: (1) “Bawipa nih amah ta a simi cu a hngalh ko hna” timi le (2) “Bawipa ta ka si a timi paoh nih cun palhnak a tuahmi kha a ngol awk a si” timi a si. Mah ca nih Nambar 16:5 chung bia kha a kan hngalhter ṭhan.—Rel.
9 “Pathian nih fek tein a bunhmi hram” cungah aa ṭialmi ca in Jehovah ta a simi hna nih zeidah an i cawn khawh? Jehovah phunglam cu a biapimi biatak pahnih cungah hram aa bunh. Mah cu (1) Jehovah nih a cungah zumhfek tein a ummi kha a dawt hna ti le (2) Jehovah nih a ṭha lomi tuahsernak kha a huat timi a si. Mah cu Khrihfabu chung i zumhpialnak he zeitindah aa pehtlaih?
10. Paul chan i zumhpialmi hna tuahsernak nih zumhfekmi hna kha zeitindah a umter hna?
10 Timote le a dang zumhfekmi hna cu zumhpialmi hna tuahsernak ruangah an lung a rawk tuk. Khrihfabu chungah zumhpialmi hna kha zeicah an umter hna tiah Khrihfa cheukhat nih an hal men ko lai. Zumhfekmi hna nih an zumhfehnak le zumhpialmi hna i chungthu lengnal biaknak kha Jehovah nih a thleidang kho hnga maw ti hmanhin an ruat men lai.—Lam. 20:29, 30.
Timote cu zumhpialmi hna tuahsernak nih a hnorsuang lai lo (Catlangbu 10-12 zoh)
11, 12. Paul cakuat nih Timote zumhnak a fehter lai tiah zeicah kan zumh khawh?
11 Paul cakuat nih Timote zumhnak kha a fehter ko lai. Hlanlio ah Jehovah nih Korah le a mi hna cu chungthu lengnal an si ti a langhtermi kha Paul nih Timote a hngalhter ṭhan. Jehovah nih annih kha a hlawt hna i a hrawh hna nain Aaron tu cu mithmai ṭha a pek. Cu bantukin Paul chan ah Khrihfa kan si tiah aa titermi an um nain Jehovah nih amah ta a simi kha fiang tein a langhter ve hna lai.
12 Jehovah cu aa thlen bal lo caah a zungzal in kan i bochan khawh. Pathian nih ṭhatlonak kha a huat caah thil ṭhalo a tuah i aa ngaichih lomi kha dan a tat hna lai. “Bawipa ta ka si a timi paoh” nih cun ṭhatlonak kha a hrial awk a si, cucaah Timote cu Khrihfa kan si tiah aa titermi hna i a ṭhalomi huham kha doh awkah ralrin pek a si. *
A Hmaanmi Biaknak cu Thluachuah a Hmu Zungzal
13. Zeidah kan zumh khawh?
13 Paul nih Timote sin a ṭialmi bia cu kan caah thazaang petu a si ve. Zeitin in dah? Jehovah nih a cungah zumhfek tein kan ummi kha ṭha tein a hngalh. A hngalh sawhsawh lawng si loin kan cungah lungtak in siaherhnak a langhter. Baibal nih hitin a chim: “Vawleicung dihlak ah hin BAWIPA mit cu aa chok dih i amah lei i an lung soisel awk a um lomi hna cungah a ṭhawnnak kha a langhter.” (2 Chan. 16:9) Jehovah nih amah biak awkah lungtak tein kan i zuammi kha zeitikhmanh ah a philh lai lo ti kan zumh khawh.—1 Kor. 15:58; 1 Tim. 1:5.
Jehovah nih amah biak awkah lungtak tein kan i zuammi kha zeitikhmanh ah a philh lai lo ti kan zumh khawh
14. Zei bantuk biaknak dah Jehovah nih a cohlan lo?
14 Jehovah nih chungthu lengnal biaknak kha a huat i a cohlang lo. Mi vialte lungthin kha a hmuh khawh i lungthin dihlak in amah a bia lomi kha a hngalh khawh hna. A thli tein sualnak tuah buin nawl a ngaimi aa lawhtermi hna kha Jehovah nih a fih hna. (Ptb. 3:32) Cu bantuk mi kha mi nih an zumh men hna lai nain Jehovah cu cutin a si lo. “A palhnak kha a thupmi cu khua-awng a tong lai lo” tiah Baibal nih a ti. Zeicahtiah Jehovah cu a lianngan bikmi a si lengah a dingmi Pathian zong a si caah a si.—Ptb. 28:13; 1 Timote 5:24; Hebru 4:13 rel.
Jehovah nih chungthu lengnal biaknak kha a huat i a cohlang lo
15. Zeidah kan hrial awk a si, zeicah?
15 Jehovah kha a miphun tam deuh nih lungthin dihlak in an dawt. Chungthu lengnal biaknak in Jehovah hlen i zuam hi a um theng lo. Asinain Moses chan le a hmasa Khrihfa hna chan ah mah thil cu a rak um caah tuchan zongah a um kho. (2 Tim. 3:1, 5) Mah cu kan unau hna kha zumh loin Jehovah cung an zumhfehnak kha lunghrin awk a si tinak a si maw? A si lo, a hmaanmi a ruang um loin kan unau cungah lunghrin cu a palhmi a si. (Rom 14:10-12; 1 Korin 13:7 rel.) Cun unau cung lunghrinnak nih Jehovah he kan i pehtlaihnak kha a hrawh khawh.
16. (a) Na lung chungah i titernak a um nakhnga lo zeitindah na tuah khawh? (b) “ I Hneksak Tuah U . . . I Hneksak Tuah U” timi rinli kulh in zeidah kan i cawn khawh?
16 Khrihfa kip nih “kan rian ṭuanmi cu kanmah cio nih a ṭhat a chiat a cuaithlaining kan thiam awk a si.” (Gal. 6:4) Mitlinglo kan si caah a ṭhalomi timhnak he Jehovah kha kan hun biak khawh men i mah kha kan i hngal men lai lo. (Heb. 3:12, 13) Jehovah kan biakmi cu i titermi a hung si kho. Cucaah hitin kan i hal awk a si: ‘Zeicah Jehovah ka biak? Ka dawt ca le a ka Uktu siter ka duh caah a si maw? Asiloah Paradis ah hmuh lai kaa ruahchanmi a nuammi nunnak kong lawng dah ka ruah?’ (Biat. 4:11) Cu bantuk bia kan i halnak thawngin kan lung chungah i titernak a pelpoite hmanh um lo awkah kan tuah khawh lai.
Zumhfehnak nih Lawmhnak a Chuahter
17, 18. Jehovah kan biaknak cu zeicah lungtak in a si awk a si?
17 Kan lung chungin i titernak vialte hloh awkah kan i zuam ahcun thluachuah kan hmu lai. “BAWIPA nih na palh, tiah sual a phawt lomi cu a lung aa lawm; hlennak in a luat dih” tiah Salm caṭialtu nih a ti. (Salm 32:2) Kan biaknak ah i titernak a um lo ahcun atu ah kan i nuam lai i hmailei ah a tlingmi nuamhnak kan hmu lai.
Kan biaknak ah i titernak a um lo ahcun atu ah kan i nuam lai i hmailei ah a tlingmi nuamhnak kan hmu lai
18 A rauhhlan ah Jehovah nih a sualnak aa ngaichih duh lomi hna le a thli tein sualnak a tuahmi hna kha a langhter cang hna lai. ‘Miṭha le miṭhalo, Pathian rian a ṭuanmi le a ṭuan lomi’ an i dannak kha a langhter lai. (Mal. 3:18) Mah caan a phanh hlan tiang “Bawipa nih a dingmi cu a mit in a ven hna i an thlacamnak kha a ngaih zungzal” ti kan hngalhmi cu hnangamtertu a si.—1 Pit. 3:12.
