1. Kan biaknak ah zeidah a biapi tuk?

VAWLEICUNG khuazakip ah Jehovah min kha inn tampi le thilhlun chiahnak i thilri tampi ah an ṭialmi hmuh khawh a si. Cu bantuk hmun ah Jehovah min na hmuh tikah na khuaruah a har tuk ko lai. Jehovah Tehte a simi kan caah Pathian min cu kan biaknak ah a biapi tukmi a si. Pathian min kan hman bantukin a hmangmi midang an um lo. Asinain a min hman lawng hi a za lo. A Tehte sinak tinvo sung kan hmuh caah amah thang a ṭhatter hngami lam in nun awkah rian kan ngei.

2. Pathian min in auhnak tinvo sung kan hmuh caah zei rian dah kan ngeih?

² Pathian mithmai ṭha hmuh awkah a min hman lawngin a za lo. Ziazalei i a phunglam kha zulh a hau i “ṭhatlonak kha hrial” a hau. (Salm 34:14) Cutin tuah a hauh kha Paul nih mah bia a ṭialmi in a langhter: “Bawipa ta ka si a timi paoh nih cun palhnak a tuahmi kha a ngol awk a si.” (2 Timote 2:19 rel.) Pathian miphun a simi kannih nih zeitindah ‘palhnak tuah kha kan ngol’ khawh, phundang cun ṭhatlonak kha kan hrial khawh?

3, 4. Mi cheukhat nih zei bia dah hngalhthiam an i harh, zeicah?

³ 2 Timote 2:19 ah Paul nih “Pathian nih fek tein a bunhmi hram” kong a chim. Mah hram cungah ca pahnih aa ṭial. A pakhatnak ca a simi “Bawipa nih amah ta a simi cu a hngalh ko hna” timi cu Nambar 16:5 in lakmi a si. (A hmasa capar zoh.) A pahnihnak ca a simi “Bawipa ta ka si a timi paoh nih cun palhnak a tuahmi kha a ngol awk a si” timi tah zeitin? Mi cheukhat nih mah bia kha hngalhthiam an i harh. Zeicah?

⁴ Paul bia nih mah ca cu Hebru Baibal i a dang cacang in lakmi a si kha a langhter. Asinain mah ca he aa lomi Baibal cacang a um lomi a lo. Cu a si ah Paul nih “Bawipa ta ka si a timi paoh nih cun palhnak a tuahmi kha a ngol awk a si” tiah a ti tikah zeidah a sawh duhmi a si? Paul nih a chimmi a pakhatnak ca cu Nambar dal 16 in lakmi a si i Korah dohnak kong kha a sawh duhmi a si. A pahnihnak ca nih tah mah kong kha a sawh duhmi a si ve maw?

5-7. 2 Timote 2:19 ah Paul ṭialmi nih Moses chan i zei kong kha dah a sawh duhmi a si? (A hramthawknak hmanthlak zoh.)

⁵ Dathan le Abiram cu Korah leiah an ṭang i dohnak a hruaitu an si. (Nam. 16:1-5) Moses kha an upat lo i Pathian sinin a hmuhmi nawlngeihnak kha zei ah an rel lo. Annih cu Israel mi hna lakah an um caah Israel mi caah ṭihnung an hung si. Jehovah nih zumhfek tein amah a biami a langhter hna hlanah nawlbia pakhat a pek hna.

⁶ Baibal nih hitin a ti: “BAWIPA nih Moses cu, ‘Mi zapi sinah Korah le Dathan le Abiram umnak pawngkam in va ṭian u, tiah va chim,’ tiah a ti. Cun Moses cu a tho i Dathan le Abiram sinah a kal i Israel mi upa hna nih khan an zulh. Cun aa pummi hna sinah cun, ‘Hi miṭhalo hna thlam hna hin ṭian u, tiah kaan nawl hna, cun an thil zong zeihmanh tawng hlah u, an sualnak chungah fenh chih nan si sual lai,’ tiah a ti. Cucaah Korah, Dathan, le Abiram hna umnak pawngkam khan an ṭian.” (Nam. 16:23-27) Mah hnuah Jehovah nih dotu vialte kha a hrawh dih hna. Asinain Pathian cungah  zumhawktlak tein a ummi cu an luat. Zeicah? Dotu pawl sinin an ṭiannak thawngin ‘palhnak tuah kha an ngol’ caah a si.

⁷ Paul nih “Bawipa nih amah ta a simi cu a hngalh ko hna” tiah a ti tikah Nambar 16:5 in a lakmi a si. Cun “Bawipa ta ka si a timi paoh nih cun palhnak a tuahmi kha a ngol awk a si” tiah a ti tikah Nambar 16:5, 23-27 ah aa ṭialmi kong kha a sawh duhmi a si men lai. Cucaah 2 Timote 2:19 ah aa ṭialmi ca pahnih nih a kong pakhat kha a sawh duhmi a si tiah ti cu aa tlak. Mah ca pahnih in zeidah kan i cawn khawh? Jehovah nih lungthin a hmuh khawh ti kha a si. Pathian nih zumhawktlakmi a salle kha a hngalh hna i miṭhalo mi hna sinin i ṭhen awkah aa ruahchan.

8. Pathian min hman le Khrihfabu chung um lawng si loin zei zong dah kan tuah a herh?

⁸ Paul nih Timote kha Jehovah he an i pehtlaihnak kilven a herhnak kong hngalhter ṭhan awk zongah Moses chan i thil sining kha a hman. Moses chan i zumhawktlakmi Pathian salle nih Jehovah min an hman lawng a zat lo bantukin Khrihfa hna zong Khrihfabu chung i um men lawngin a za lo. Zumhfekmi Pathian salle dihlak nih ṭhatlonak kha an hrial a hau. Mah cu Timote caah zei sullam dah a ngeih? Paul ruahnak cheuhnak in zeidah kan i cawn khawh?

9. “Hruhnak men le zeihmanh hngalh set ṭung loin i al lengmangnak” nih a hmasa Khrihfabu kha zeitindah a rak hnorsuan?

⁹ Paul nih Timote a kuatmi ca ah ṭhatlonak hrial khawhning a chimh. Tahchunhnak ah, “biafang i al menmen kha ngol” awk le “pakpalawng a simi” bia i alnak kha hrial awkah a chimh. (2 Timote 2:14, 16, 23 rel.) Mah cu zei sullam dah a si? Khrihfabu chung i mi cheukhat nih zumhpialmi hna zumhnak kha an cawnpiak hna. A cheu nih bia-alnak a chuahtermi kong kha an chim. An chimmi cheukhat cu Baibal cawnpiaknak he aa ralchanhmi cu a si lo nain mah nih Khrihfabu lungrualnak kha a hrawh khawh. Cucaah Paul nih Timote kha “hruhnak men le zeihmanh hngalh set ṭung loin i al lengmangnak hi hrial” tiah a timi a si.

10. Zumhpialmi hna ruahnak kan theih ahcun zeidah kan tuah awk a si?

¹⁰ Tuchan Khrihfabu ah zumhpialmi cu hmuh khawh an si setsai lo. Asinain Baibal cawnpiaknak he aa ralkahmi ruahnak kha kan theih men lai. Mah ruahnak cu khoika in a rami a si hmanhah kan hrial awk a si. Zumhpialmi hna he pumpak in, Internet in asiloah a dangdang in pehtlaihnak tuah cu hruh a si. Anmah kha bawmh duh ruangah  pehtlaihnak kan tuah hna ahcun Pathian nawl ngaih lo a si lai. Pathian nih zumhpialmi hna kha hrial awkah nawl a kan pek.

11. Zeinihdah Khrihfabu kha a ṭhencheuter khawh, Khrihfa upa nih zeitindah zohchunhawk ṭha an chiah khawh?

¹¹ Zumhpialmi hna ruahnak lengah Khrihfabu daihnak a hrawk khomi thil dang a um rih. Tahchunhnak ah, Khrihfa caah zei bantuk nuamhsaihnak dah aa tlak timi kongah ruahnak a phunphun a um kho men. Mah ruahnak kha midang zulhter awkah hneknak nih “hruhnak men le zeihmanh hngalh set ṭung loin i al lengmangnak” a chuahter khawh. Khrihfa pakhat nih ziazalei i Pathian phunglam he aa ralkahmi nuamhsaihnak kha tha a pek ah tah zeitin? Khrihfa upa hna nih bia-alnak hrial duh men ah mah kha i hngalhter loin an um lai lo. (Salm 11:5; Efe. 5:3-5) Asinain anmah ruahnak kha cohlan awkah unau pawl hnek lo awkah an i ralring. Mah Baibal cawnpiaknak hi an zulh: “Pathian nih aan pekmi hna tuurun a khaltu kha si u . . . Nanmah zohkhenh awkah chiahmi hna kha a uk in uk hna hlah u, sihmanhsehlaw an i zohchun ding tu si i zuam u.”—1 Pit. 5:2, 3; 2 Korin 1:24 rel.

12, 13. (a) Jehovah Tehte Hna nih nuamhsaihnak kha zeitindah an i thim, zei Baibal phunglam dah an zulh? (b) Catlangbu 12 ah kan i ruahmi phunglam kha a kong dangdang ah zeitindah kan hman khawh?

¹² Kan bupi nih video, game, cauk asiloah hla pawl kha hlathlai in zei bantuk dah hrial awk a si ti kha biakhiahnak an kan tuahpiak lai lo. Zeicah? Baibal nih mi pakhat cio kha “chia le ṭha thleidan” khawh awkah kan chiaṭha thleidannak lungthin kha cawnpiak awkah a kan fial. (Heb. 5:14) Nuamhsaihnak ṭha tein i thim khawh awkah Baibal phunglam kha kan hman khawh. Kan i thimmi kip ah “Bawipa a lawmhtertu thil kha kawl i zuam” awk a si. (Efe. 5:10) Baibal nih chungkhar lu cu nawl a ngei tiah a ti, cucaah an innchungkhar ah nuamhsaihnak cheukhat tuah lo awkah bia a khiah khawh. *—1 Kor. 11:3; Efe. 6:1-4.

¹³ A cunglei i langhtermi Baibal phunglam hna nih thil dang kong zongah a ṭhami biakhiahnak tuah awk a kan bawmh khawh. Tahchunhnak ah, thil hrukning le ṭamhning, ngandamnak le eidinning le a dang kong ah ruahnak a phunphun a um. Mi cheukhat nih cu bantuk kong ah an ruahnak kha zulh awkah midang hnek an duh men hna lai nain mah nih lung i khah lonak a chuahter khawh. Asinain Baibal phunglam he aa ralkah lomi a si ahcun Khrihfa pakhat cio nih tuah awk a simi he aa tlaiin i al ding a si lo. Baibal nih hitin a ti: “Bawipa sal cu, aa si lengmangmi a si awk a si lo. Mi vialte cungah zaangfahnak a ngeimi . . . a si awk a si.”—2 Tim. 2:24, 25.

14. Hawi ṭhalo hrial a herh kha Paul nih zei tahchunhnak hmangin dah a chim?

¹⁴ Pathian salle a simi kannih nih zeiti lam in dah ‘palhnak tuah kha kan ngol’ khawh rih? Hawi ṭhalo hrialnak in a si. Mah kha Paul nih zeitindah tahchunhnak bia in a chim? “Pathian nih fek tein a bunhmi hram” kong a chim hnuah “inn nganpi” kong a chim. Mah inn chungah “umkheng a phunphun an um” i “a cheu cu ngun in sermi an si, a cheu cu thing in sermi an si i a cheu cu tlak in sermi an si; cun a cheu cu caan sung khun i hman awk caah an si i a cheu cu a menmen  i hman awk caah an si.” (2 Tim. 2:20, 21) Cun Paul nih Khrihfa hna kha “a menmen i hman awk” a simi “umkheng” kha hrial awkah a forh hna.

15, 16. “Inn nganpi” tahchunhnak in zeidah kan i cawn khawh?

¹⁵ Paul chimmi tahchunhnak a sullam cu zeidah a si? “Inn nganpi” cu Khrihfabu he tahchunh khawh a si. Inn chungah a ummi “umkheng” pawl cu Khrihfabu chungah a ummi pakhat cio he tahchunh khawh a si. Inn chungah a ummi umkheng cheukhat cu an thian lo ahcun ṭih a nung. Cucaah inn ngeitu nih a thiang lomi um kha rawlchuannak ah hmanmi ti bantuk a thiangmi um he a ṭhen hna lai.

¹⁶ Tuchan Pathian salle lak zongah cutin a si ve. Kan nunnak kip ah thian kan duh ahcun Khrihfabu chungah a um ko nain Jehovah phunglam a zul duh lomi hna he kan i ṭhen a hau. (1 Korin 15:33 rel.) Khrihfabu chung i Pathian nawl a ngai lomi hna kha kan hrial hna awk a si ahcun Khrihfabu leng i a ummi hna he i komh tuk kha kan hrial chinchin awk a si. Zeicahtiah Khrihfabu lengah a ummi mi tampi cu tangka a duhmi, nulepa nawl a ngai lomi, zumhawk a tlak lomi, hlen a hmangmi, a puarhrangmi, ṭhatnak a duh lomi, hawi rawi a hmangmi le Pathian nakin nuamhnak a duh deuhmi an si caah a si.—2 Tim. 3:1-5.

17. Zumhfekmi Israel mi hna nih zeitindah ‘palhnak tuah kha an ngol’?

¹⁷ Jehovah nih “Korah le Dathan le Abiram umnak pawngkam in va ṭian u” tiah nawl a pek hna tikah zumhfekmi Israel mi hna cu “an ṭian” colh. (Nam. 16:24, 27) Annih cu dotu hna sinin i ṭhen awkah i cungcang in le zei tuah awk hngal loin an um lo. Dotu hna “umnak pawngkam khan an ṭian.” Zumhfekmi  hna cu an lungthin dihlak in Pathian nawl ngaih an duh. Jehovah an bawmh le ṭhatlonak an doh kha fiang tein an langhter. An sinin zeidah kan i cawn khawh?

18. Paul nih Timote kha “tlanval lio pumsa duhnak kha zaamtak i zuam” tiah a ti tikah zeidah a chimduhmi a si?

¹⁸ Jehovah he kan i pehtlaihnak cu kan caah a sunglawi tukmi a si. Mah kha kilven awkah zeipaoh kan tuah colh awk a si. Mah cu Paul nih Timote kha “tlanval lio pumsa duhnak kha zaamtak i zuam” tiah a forh tikah a chimduhmi a si. (2 Tim. 2:22) Mah lioah Timote cu kum 30 leng a si cang men lai. Asinain a upa cangmi hmanh a ṭhalomi “tlanval lio pumsa duhnak” an ngei kho. Timote nih cu bantuk duhnak a ngeih ahcun a “zaamtak” a hau. ‘Palhnak tuah kha a ngol’ a hau. Jesuh nih mah he aa lomi bia kha hitin a chim: “Nan mit nih aan pialter hna ahcun khoih u law hlonh ko hna u.” (Matt. 18:9) Mah bia zulh a duhmi le Pathian he an i pehtlaihnak kilven a duhmi hna nih a fekmi biakhiahnak he cutin an tuah colh awk a si.

19. Khrihfa cheukhat nih Jehovah he an i pehtlaihnak kha zeitindah an kilven?

¹⁹ Khrihfa cheukhat nih Jehovah he an i pehtlaihnak kha zeitindah an kilven? Zu ningcang loin a rak hmangmi cheukhat nih zu din ti lo awkah bia an khiak. Derthawmnak pakhatkhat a ngeimi hna nih a ṭhalomi duhnak a chuahter khomi nuamhsaihnak paoh kha an hrial. (Salm 101:3) Tahchunhnak ah, unaupa pakhat cu Jehovah Tehte a si hlanah ziaza a rawkralmi hna an umnak laamnak party ah kal kha a rak duh ngai. Biatak a hngalh hnuah cun zeitikhmanh ah laam ti lo awk le unau pawl nih an tuahmi nuamhnak hmun hmanhah laam ti lo awkah bia a khiak. A ṭhalomi ruahnak le duhnak ngeih ṭhan kha a duh ti lo. Mah cu Khrihfa dihlak nih zu, laam asiloah a ṭhalomi a si lomi a dang thil kha hrial awk a si tinak cu a si lo. Asinain kan i ralrin awk a si i Jehovah he kan i pehtlaihnak kha kan kilven awk a si.

20. ‘Palhnak tuahmi ngol’ cu a fawi lai lo nain zeinihdah kan hna a ngamter?

²⁰ Jehovah Tehte tiin auh kan simi cu tinvo sung a si. Asinain rian zong kan ngei. ‘Palhnak tuah kha kan ngol’ awk a si i ‘ṭhatlonak kha kan hrial’ awk a si. (Salm 34:14) Cutin tuah cu a zungzal in cun a fawi lo. Asinain Jehovah nih “amah ta a simi” le a nawl a ngaimi cu a dawt zungzal hna ti hngalh cu hnangamtertu a si.—2 Tim. 2:19; 2 Chanrelnak 16:9a rel.