1. Levitikas cauk nih zeitindah a kan bawmh khawh?

JEHOVAH nih a salle dihlak sinin thiannak kha aa ruahchan. Baibal uk dihlak nih thiannak kong an chim nain Levitikas cauk nih tam bik a chim. Mah cauk hngalhthiamnak le sunsaknak nih thiang tein um khawhning kha hngalh awkah a kan bawmh lai.

2. Levitikas cauk ah zeidah kan hmuh?

² Moses nih a ṭialmi Levitikas cauk cu ‘Cathiang dihlak’ timi ah aa tel vemi a si i “cawnpiaknak caah . . . a ṭhahnemmi a si.” (2 Tim. 3:16) Mah cauk i dal khat cio ah Jehovah min voi hra hrawng aa ṭial. Levitikas cauk hngalhthiamnak nih Pathian min thang a chiatter hngami zei thil hmanh tuah lo awkah a kan bawmh lai. (Lev. 22:32, NW) Mah cauk ah ‘Keimah cu Jehovah ka si’ timi bia voi tampi aa ṭial. Mah nih Pathian nawl ngaih awkah a kan forh awk a si. Hi capar le a hnu capar ah Levitikas cauk in a sunglawimi ro hna kha kan hngalh lai i mah nih Pathian kan biaknak ah thian awk a kan bawmh lai.

3, 4. Aaron le a fapale kholh an simi nih zeidah a aiawh? (A hramthawknak hmanthlak zoh.)

³ Levitikas 8:5, 6 rel. Jehovah nih Aaron kha Israel  tlangbawi ngan si awkah rian a pek i a fapale kha Israel miphun ca tlangbawi si awkah rian a pek hna. Aaron nih Jesuh kha a aiawh i a fapale nih chiti thuhmi Khrihfa hna kha an aiawh hna. Aaron kholh a simi cu zei sullam dah a ngeih? Mah cu Jesuh cu thianh a hau tinak a si maw? A si lo. Jesuh cu sualnak a ngei lo i “a tlingmi” a si. (Heb. 7:26; 9:14) Aaron cu kholh a si hnu lawngah a thiangmi le a dingmi Jesuh kha a aiawh. Aaron a fapale kholh an simi nih tah zeidah a aiawh?

⁴ Aaron fapale kholh an simi nih vancung i tlangbawi ṭuan awkah thimmi hna an thianmi kha a aiawh. Mah thiannak cu tipil an innak he aa pehtlai maw? Aa pehtlai lo, zeicahtiah tipil innak nih sualnak kha a hloh khawh lo caah a si. Tipil innak cu Pathian sin i pumpeknak langhternak a si. Chiti thuhmi hna cu ‘Pathian bia’ in thianh an si caah an nunnak ah Khrih cawnpiaknak kha tling tein an zulh awk a si. (Efe. 5:25-27) Cuticun annih cu a thiangmi an hung si. “Tuudang” tah zeitin?—Johan 10:16.

5. Tuudang cu Pathian Bia thawngin an thiang tiah zeicah kan chim khawh?

⁵ Aaron fapale nih tuudang ah aa telmi “mibu nganpi” kha an aiawh hna lo. (Biat. 7:9) Asinain tuudang zong Pathian Bia thawngin an thiang ve. Vawlei ruahchannak a ngeimi hna nih Jesuh raithawinak i a ṭhawnnak kong Baibal chimmi kha an zumh tikah “chun zan” in Jehovah biak an hun duh. (Biat. 7:13-15) Chiti thuhmi hna le tuudang nih an thian nakhnga a zungzal in an tuah. Cucaah an tuahsernak cu a thiang peng. (1 Pit. 2:12) Jehovah nih a miphun dihlak an thianmi, an lung aa rualmi le an Tuukhal Jesuh bia  an ngaih i zumhawktlak tein an zulhmi kha a hmuh tikah aa lawm.

6. Zeicah kanmahle kanmah kan i check lengmang awk a si?

⁶ Israel tlangbawi pawl pumsalei thian an herhmi cu tuchan kan caah zei sullam dah a ngeih? Baibal kan cawnpiakmi tampi nih kan thianmi le kan biaknak hmun a thianmi kha an hmuh. Mah lengah Jehovah biak a duhmi hna cu ‘an lungthin a thian’ a hau. (Salm 24:3, 4 rel; Isa. 2:2, 3) Cucaah Jehovah kha lungthin thiang, ruahnak thiang le a thiangmi pum in kan biak a hau. Mah kongah kanmahle kanmah kan i check lengmang a hau. Thiang tein um khawh awkah thlennak nganpi tuah a herh caan a um men lai. (2 Kor. 13:5) Tahchunhnak ah, tipil a ing cangmi pakhat nih a thurhnawmmi hmanthlak a zoh ahcun ‘Thiang tein ka um maw?’ tiah aa hal awk a si. Cun mah a ṭhalomi tuahsernak kha ngol awkah bawmhnak a hal hna awk a si.—Jeim 5:14.

7. Levitikas 8:22-24 ah ṭialmi tlangbawi pawl bantukin Jesuh nih zei zohchunh awk dah a chiah?

⁷ Israel tlangbawi pawl rian pek an si tikah tuukawng thi kha Tlangbawi Ngan Aaron le a fapale i an orhlei hnakhaw, an orhlei siapi le an orhlei kepi ah an thuh hna. (Levitikas 8:22-24 rel.) Mah nih tlangbawi pawl nih an rian kha nawlngai tein an ṭuan lai ti a langhter. Cu bantukin Tlangbawi Ngan a simi Jesuh nih Pathian lamhruainak kha a ngaih, Jehovah duhnak kha a tuah i a thiangmi nunning in a nung. Cuticun chiti thuhmi le tuudang caah a tlingmi zohchunh awk a chiah.—Johan 4:31-34.

8. Kan dihlak in zeidah kan tuah awk a si?

⁸ Jehovah a biami kan dihlak in Pathian cungah zumhawktlak tein a ummi Jesuh kha kan i zohchunh awk a si. Baibal ah kan hmuhmi Pathian lamhruainak kha a dikthliar in kan zulh awk a si, cuticun ‘Pathian thiang thlarau ngaihchiatter’ kha kan hrial khawh lai. (Efe. 4:30) ‘A ping a pang ah ke hlan sual lo’ awkah bia khiak hna u sih.—Heb. 12:13.

9. Uktu Bu chungtel hna he naih tein rian a ṭuanṭimi unaupa pathum nih zeidah an chim, an chimmi nih thian awkah zeitindah aan bawmh khawh?

⁹ Uktu Bu chungtel hna he naih tein kum tampi chung rian a ṭuanṭimi unaupa pathum chimmi hi zoh hna hmanh u sih. Unaupa pakhat nih hitin a chim: “Mah unau pawl he rianṭuanṭi cu a sunglawi tukmi tinvo a si nain naih tein rian kan ṭuanṭi hna tikah annih cu chiti thuhmi an si ko nain mitlinglo an si ti a lang. Asinain hruaitu pawl an nawl ngaih awkah hmuitinh ka chiah.” A pahnihnak  unaupa nih hitin a chim: “‘Khrih nawl ngaihnak’ kong ṭialmi 2 Korin 10:5 ti bantuk Baibal cang nih hruaitu pawl an nawl ngaih awk le anmah he rian ṭuanṭi awkah a ka bawmh. Mah nawlngaihnak cu lungthin in a rami a si.” A pathumnak unaupa nih hitin a chim: “Jehovah duhmi duh le a huatmi huat, a lamhruainak kawl zungzal le a duhmi tuah timi cu a bupi le vawlei ca i aa tinhnak tlinter awkah a hmanmi hna nawl ngaih kha a si.” Mah unaupa nih Uktu Bu chungtel a hung simi Nathan Knorr kong kha aa cinken rih. 1925, Vennak Innsang i “Pennak Dirhnak” timi capar chung i aa ṭialmi kha midang nih cun an cohlang lo nain Unaupa Knorr nih cun a cohlan. Mah nawlngaihnak nih unaupa kha a lung a suk tuk. Mah unaupa pathum chimmi ṭha tein ruahnak nih Pathian nawl ngaih awk le thiang tein um awkah aan bawmh khawh.

10. Thi he aa tlaimi Pathian nawlbia ngaih cu zeitlukin dah a biapit?

¹⁰ Levitikas 17:10 rel. Jehovah nih Israel mi hna kha “zei thi hmanh” ei lo awkah nawl a pek hna. Khrihfa hna zong minung thi le saram thi hrial awkah nawl pek kan si ve. (Lam. 15:28, 29) Pathian hlawtmi le buchung chuahmi a kan siter hngami thil tuah lai kha a ruah hmanh kan ruat kho lo. Jehovah kha kan dawt i a nawl ngaih kan duh. Jehovah a hngal lomi asiloah zei i a rel lomi hna nih Jehovah nawl ngaih lo awk an kan hnek tikah kan nunnak ca ṭihnung a si hmanhah an duhnak kan zul lai lo. Thi kan hrial ruangah mi cheukhat nih an kan nihsawh lai ti kan hngalh ko nain Pathian nawl ngaih awkah kan i thim. (Judas 17, 18) Thi ei lo ding asiloah thi rawnh lo ding biakhiah awkah zeinihdah a kan bawmh lai?—Deut. 12:23.

11. Remnak Ni cu phungphai men lawng a si lo tiah zeicah kan chim khawh?

¹¹ Kum khat voikhat tuahmi Remnak Ni ah Israel tlangbawi ngan tuahmi nih thi he aa tlaimi Pathian hmuhning kha hngalhthiam awkah a kan bawmh. Thi cu a hleikhunmi tinhnak ca lawngah hman a si. Israel mi nih Pathian he pehtlaihnak ṭha an ngeih khawh nakhnga sual ngaihthiamnak hmuh awkah thi kha an hman. Cawtum thi le meheh thi kha biakamnak kuang a chin hmaiah theh a si. (Lev. 16:14, 15, 19) Mah thi thawngin Pathian nih Israel mi hna kha an sualnak a ngaihthiam hna. Mi pakhat nih ei awk caah saram a thah ahcun a thi kha vawlei ah a zor lai i leidip in a khuh lai tiah Jehovah nih nawl a pek hna, zeicahtiah “titsa vialte nunnak cu an thi cu a si.” (Lev. 17:11-14) Mah nawlbia cu a biapi lomi phungphai men a si lo. Mah hlan kum tampi lioah Pathian nih Noah le a tefa hna kha thi ei a rak thlauh hna. (Gen. 9:3-6) Mah cu Khrihfa hna caah zei sullam dah a ngeih?

12. Paul nih thi kha ngaihthiamnak he zeitindah a pehtlaihter?

 ¹² Lamkaltu Paul nih mah bia a ṭialmi in thi cu thenh khawhnak ṭhawnnak a ngeih kha a langhter: “Nawlbia ning ah cun zei paohpaoh hi thisen in thenh a si i sualnak hi thisen luanh lawnglawng in ngaihthiam a si.” (Heb. 9:22) Asinain saram raithawinak man cu chikkhat ca lawng a si. Mah raithawinak nih Israel mi kha misual an si le an sualnak hloh dih awkah a ngan deuhmi raithawinak an herh kha a hngalhter ṭhan hna tiah Paul nih a ṭial. Nawlbia cu “a taktak le a ngaingai a simi thil” si loin “a ra dingmi thilṭha muithlam ceo a rak si.” (Heb. 10:1-4) Cu a si ah sual ngaihthiamnak cu zeitindah hmuh khawh a si lai?

13. Jehovah sinah Jesuh nih a thisen man a pekmi cu na caah zei sullam dah a ngeih?

¹³ Efesa 1:7 rel. Jesuh cu mi vialte tlanhnak caah a thi, mah cu amah le a Pa a dawmi hna caah sullam a ngei tukmi a si. (Gal. 2:20) Asinain a thawhṭhan hnuah a tuahmi thil nih kan sualnak in a kan luattermi a si, cutin a si kha Remnak Ni ah a cangmi thil nih a langhter. Mah Ni ah tlangbawi ngan cu Hmun Thiang Bik ah a lut i cuka ah saram thi kha Pathian a pek. (Lev. 16:11-15) Jesuh zong a thawhṭhan hnuah  van ah a kai i minung pum in a pekmi a thisen man kha Pathian a pek. (Heb. 9:6, 7, 11-14, 24-28) Jesuh pekmi thi kha kan zumh caah sual ngaihthiamnak kan hmu i chiaṭha thleidannak lungthin thiang kan ngeih khawh caah kan i lawm tuk.

14, 15. Thi he aa tlaimi Jehovah nawlbia hngalhthiam le zulh cu zeicah a biapit?

¹⁴ Jehovah nih “zei thi hmanh” ei lo awkah nawl a kan peknak a ruang kha atu naa fiang deuh cang ko lai. (Lev. 17:10) Pathian caah thi cu zeicah a thiang tukmi a si ti kha na hngalthiam maw? Thi nih nunnak kha a aiawh caah a si. (Gen. 9:4) Thi kha Pathian hmuhning in hmuh awk a si ti le thi hrial u timi a nawlbia zulh awk a si ti kha na hna a tla ko lai. Jesuh tlanhnak man kan zumh le Sertu caah thi cu a sunglawi tuk ti kan cohlan lawngah Pathian he remnak kan hmu kho lai.—Kol. 1:19, 20.

¹⁵ Kan dihlak in thi rawnh, thi cheubang le thi aa telmi sii thlopning cohlan lai le cohlan lai lo kha ruahlopi in biakhiah a hau men lai. Cucaah a hlankan in Jehovah sin thlacam, hlathlainak tuah le biakhiahnak tuah cu a biapi tuk. Cutin kan tuah ahcun thi kha kan hrial khawh lai. Jehovah duh lomi thil cohlannak thawngin a ngaihchiatter kha kan duh lai lo. Tuchan ah siibawi tampi le midang nih nunnak khamhnak caah tiin thi hlut awk an kan forh. Asinain thi hmanning he aa tlaiin Jehovah lawng chimnak nawl a ngei ti kha kan hngalh. Pathian caah “zei thi hmanh” hi a thiangmi a si. Cucaah thi he aa tlaimi a nawlbia zulh awkah bia kan khiah a hau. Jesuh pekmi thisen kan sunsak kha a thiangmi tuahsernak zongin kan langhter khawh. Jesuh thi lawng nih sual ngaihthiamnak le zungzal nunnak a kan hmuhter khawh.—Johan 3:16.

16. Zeicah Jehovah miphun cu an thian a herh?

¹⁶ Jehovah nih Israel mi kha Izipt ram i sal sinak in a luatter hna lioah hitin a ti hna: “Keimah cu nan Pathian si awkah, Izipt ram in aan chuahpitu hna BAWIPA ka si; cucaah nannih cu nan thian awk a si, keimah ka thian caah.” (Lev. 11:45) Jehovah cu a thian caah Israel mi zong thian ve awkah aa ruahchan. Jehovah nih tuchan zongah cutin aa ruahchan. Mah kha Levitikas cauk ah fiang tein kan hmuh.

17. Atu ah Levitikas cauk kha zeitindah na hmuh

¹⁷ Levitikas cauk chung i a kong cheukhat kan i ruahmi in ṭhatnak na hmu ko lai. Mah cauk kha na sunsak chin ko lai i kan thian awk a sinak a ruang kha na hngalhthiam chin ko lai. Levitikas cauk in a dang zeidah kan i cawn khawh rih? Mah cauk nih Pathian kha a thiangmi lam in biak awkah zeitindah a kan bawmh khawh? Mah kong hna kha a hnu capar ah kan i ruah hna lai.