Kan Tuahsernak vialte Thian a Hau
“Nannih zong thiang tein nung ve u.”—1 PET. 1:15.
1, 2. (a) Jehovah nih a mi hna sinin zeidah aa ruahchan? (b) Hi capar ah zei biahalnak hna dah kan i ruah lai?
LAMKALTU Piter nih Levitikas cauk kha a cherhchan i Khrihfa hna cu an thian a herh tiah a fianter. (1 Piter 1:14-16 rel.) ‘A Thiangmi Pathian’ Jehovah nih chiti thuhmi hna le “tuudang” hna kha an tuahsernak vialte thian awkah an si khawh chungin an tuah lai tiah aa ruahchan.—Johan 10:16.
2 Thiannak he aa tlaimi Pathian phunglam hngalh awk le mah kha kan nunnak i hman awkah a kan bawm hngami Levitikas cauk chung i phunglam pawl kha hi capar ah kan i ruah lai. Mah biahalnak hna zong hi kan i ruah lai: Zumhnak thlahdorh kha zeitindah kan hmuh awk a si? Jehovah cungnung bik a sinak ṭanpinak he aa tlaiin Levitikas cauk nih zeidah a kan cawnpiak? Israel mi hna pekmi raithawinak in zeidah kan i cawn khawh?
Zumhnak Thlahdorh kha i Ralring
3, 4. (a) Khrihfa a simi nih Baibal nawlbia le phunglam kha zeicah kan thlahdorh awk a si lo? (b) Phuhlam le lungchung in huatnak ngeih kha zeicah kan hman awk a si lo?
3 Jehovah mithmai ṭha hmuh awkah a nawlbia le a phunglam zulh a hau, mah he aa tlaiin thianlonak le thlahdorhnak Lev. 19:18.
lungput kha zeitikhmanh ah kan ngeih awk a si lo. Kannih cu Moses Nawlbia tangah kan um ti lo nain mah Nawlbia nih Jehovah cohlanmi le a cohlan lomi kha hngalh awkah a kan bawmh. Tahchunhnak ah, Israel mi kha hitin a ti hna: “Nangmah na phunhawi cungah phu na hlam lai lo, na lung chungin huatnak zong na pawi lai lo, sihmanhsehlaw na innpa cu nangmah naa dawt bantukin na dawt lai: keimah hi BAWIPA cu ka si.”—4 Jehovah nih phuhlam le lungchung in huatnak ngeih kha a duh lo. (Rom 12:19) Pathian nawlbia le a phunglam kha zei i kan rel lo ahcun Satan cu aa nuam lai i Pathian min thang kan chiatter lai. Mi pakhat nih kan lung a kan fahter hmanhah thinhun tukin mah kha kan i teiter awk a si lo. Rothil sanhnak “tlak um” bantuk nan si tiah Baibal nih a kan ti. Mah ro cu phungchim rian kha a si. (2 Kor. 4:1, 7) Rothil sanhnak mah um ah acid bantuk a simi thinhunnak kha sanh chih kan duh lo.
5. Aaron sinin le a fapale thihnak in zeidah kan i cawn khawh? (A hramthawknak hmanthlak zoh.)
5 Levitikas 10:1-11 ah Aaron te chungkhar an lung a fahter tukmi kong kha kan hmuh. Jehovah nih Aaron fapale a simi Nadab le Abihu kha thah awkah van in mei a tlakter. Mah hnuah Pathian nih Aaron le a chungkhar kha zeiti lam hmanhin nan ngaihchiatnak langhter hlah u tiah a ti hna. Mah cu zumhnak hneksaknak taktak a si. Nangtah bu chungin chuahmi na chungkhar asiloah midang he pehtlaihnak na tuah lonak thawngin thiang tein na um kha na langhter maw?—1 Korin 5:11 rel.
6, 7. (a) Church ah tuahmi ṭhitumnak ah kal lai le kal lai lo biakhiah tikah zeidah kan ruah awk a si? (A tanglei fianternak zoh.) (b) Church i tuahmi ṭhitumnak ah kan i tel lonak a ruang kha zeitindah kan fianter khawh?
6 Aaron le a chungkhar tonmi hneksaknak bantuk cu kan tong men lai lo. Asinain church ah tuah hngami Jehovah Tehte a si lomi kan chungkhat ṭhitumnak puai ah sawm kan si ahcun zeitin? Kal khawh a si lo timi nawlbia Baibal ah a um lo nain mah he aa tlaimi phunglam pawl cu a um. *
7 Jehovah lunglawmhter awk le thiang tein um awk i kan biakhiahnak kha 1 Pit. 4:3, 4) An thin hunter kan duh lo caah mah kong kha a hlankan in nem tein le hlangfang tein kan chimh hna awk a si. Ṭhitumnak puai ah na kan sawm caah kan i lawm tiah kan ti khawh hna. Cun nan puai ah nan i nuamh lai kha kan duh, kannih cu biaknaklei phungphai ah kan i tel lo caah nanmah le nan mileng pawl hnahnawhnak pek kha kan duh lo tiah kan ti khawh hna. Mah cu kan zumhnak thlahdorh hrial khawhnak lam khat a si.
chungkhat pawl nih an hngalhthiam men lai lo. (Jehovah Cungnung Bik a sinak kha Ṭanpi
8. Levitikas cauk nih Jehovah cungnung bik a sinak kha zeitindah a hleiin a langhter?
8 Levitikas cauk nih Jehovah cungnung bik a sinak kha a hleiin a langhter. Levitikas cauk chungah nawlbia pawl cu Pathian sinin a rami a si timi bia kha voi 30 leng kan hmuh. Mah kha Moses nih a hngalh i Jehovah nih a fialmi ning tein a tuah dih. (Lev. 8:4, 5) Moses bantukin Cungnung Bik Jehovah nih tuahter a kan duhmi kha kan tuah zungzal awk a si. Pathian bupi nih a kan bawmh ko lai nain ramcar chungah Jesuh nih a ton bantukin kanmah lawng kan um caan ah zumhnak hneksaknak kan tong kho. (Luka 4:1-13) Pathian kan i bochan i cungnung bik a sinak kha kan ṭanpi ahcun kan zumhnak thlahdorh awkah ahohmanh nih an tuah kho lai lo. Ṭihnak nih a kan tei lai lo.—Ptb. 29:25.
Moses bantukin Cungnung Bik Jehovah nih tuahter a kan duhmi kha kan tuah zungzal awk a si
9. Pathian miphun cu zeicah huat an si?
9 Vawleicung pumpi i Pathian miphun nih hremnak ton lai kha kan i ruahchan awk a si, zeicahtiah Jesuh nih a zultu hna kha hitin a rak ti hna: “Mi nih an in tlaih hna lai i dantat awkah an in chanh hna lai i an in thah hna lai. Keimah ruangah mi vialte nih an in huat hna lai.” (Matt. 24:9) Mi nih a kan huat hmanhah phung kan chim zungzal i kan tuahsernak kip ah thiang tein kan um. Dingfel tein kan um i pumsalei le ziazalei ah kan thiang. Rammi ṭha zong kan si. Cu a si ah mi cheukhat nih zeicah an kan huat? (Rom 13:1-7) Jehovah lawng kha cungnung bik in kan cohlan caah a si. ‘Amah lawnglawng’ kha kan biak i a dingmi a nawlbia le a phunglam kha zeitikhmanh ah kan thlahdorh lai lo.—Matt. 4:10.
10. Khoikalei hmanh ṭanlonak a thlahdorhmi unaupa pakhat nih zeidah a ton?
10 “Vawlei ta” kan si lo caah khoikalei hmanhah kan ṭang lo i raltuknak le nainganzi ah kan i tel lo. (Johan 15:18-21; Isaiah 2:4 rel.) Aa pumpe cangmi Khrihfa cheukhat cu khoikalei hmanh ṭanlonak kha an thlahdorh. An lak i tampi cu an i ngaichih i Jehovah sinah an kir ṭhan. (Salm 51:17) Asinain mi tlawmte tu cu an i ngaichih lo. Tahchunhnak ah, Vawlei Ralpi IInak lioah Hungary ram chungah unau tampi cu a dinglopi in thongthlak an si. Nawlngeitu pawl nih kum 45 tang a simi unau 160 kha khua pakhat ah an pumh hna i ralkap tlak awkah nawl an pek hna. Tam deuh nih cun an al nain pakua cu ralkap an tla i ralkap thilthuam kha an cohlan. Kum hnih a rauh tikah an lak i pakhat kha zumhfekmi unau pawl thah awkah rian an pek. Mah unau lakah a upa zong aa tel. Asinain zumhfekmi unau pawl cu thah an si ṭhan lo.
Jehovah kha a Ṭha bikmi Pe
11, 12. Hlanlio Israel mi hna pekmi raithawinak in zeidah kan i cawn khawh?
11 Nawlbia nih Israel mi kha zei bantuk raithawinak dah pek ding a si kha fiang tein a chimh hna. (Lev. 9:1-4, 15-21) An pekmi nih Jesuh i a tlingmi raithawinak kha a aiawh caah dotlami a si a hau. Cun Israel mi nih raithawinak pakhat cio he aa tlaimi tuahphung kha an zulh a hau. Levitikas 12:6 ah fa a hringmi nu kha hitin tuah awkah hal a si: “Aa thenhnak ni kha a tlin tikah, fapa caah siseh, fanu caah siseh, tlangbawi sinah, tonnak thlam innka ah khangh thawinak caah tuufa kum khat a timi a rak put lai i sual thawinak caah laileng no pakhat maw ṭhuro pakhat dik a rak put lai.” Jehovah nih cu set kha set tiin a hal ko hna nain dawtnak a ngeimi le a tlarimi a si kha Nawlbia nih fiang tein a langhter. Tahchunhnak ah, fa a hringmi nu nih tuu a pek khawh lo ahcun ṭhuro pahnih asiloah laileng no pahnih kha a pek khawh. (Lev. 12:8) Anih cu a si a fak ko nain a man a fakmi laksawng a pe khomi hna tlukin Jehovah nih a dawt i a sunsak. Mah in zeidah kan i cawn khawh?
Jehovah cu dawtnak a ngeimi le a tlarimi a si kha Nawlbia nih fiang tein a langhter
12 Lamkaltu Paul nih Khrihfa hna kha Pathian sinah ‘thangṭhat raithawinak’ pek awkah a forh hna. (Heb. 13:15) Midang sinah Jehovah min kong kan chim tikah thangṭhat raithawinak kan pek a si. A hna a chet i a holh kho lomi unau hna nih Pathian thangṭhat awkah kut holh an hman. Inn in a chuak kho lomi unau pawl nih caṭial in le telephone in phung an chim, cun an sinah a rak lengmi kha phung an chimh hnanak thawng zongin Jehovah an thangṭhat. Zeitlukin dah Jehovah kan thangṭhat khawh ti cu kan ngandamnak le kan sining cungah aa hngat ko lai, asinain a ṭha bikmi kha kan pek zungzal awk a si.—Rom 12:1; 2 Tim. 2:15.
13. Phungchimnak ah kan hmanmi a caan kha zeicah report kan pek awk a si?
13 Jehovah kha kan dawt caah thangṭhat raithawinak kha lungtho tein kan pek. (Matt. 22:37, 38) Asinain thla fatin phungchimnak ah kan hmanmi suimilam report pek awk fial kan si tikah zei bantuk lungput dah kan ngeih awk a si? Mah cu Pathian sin kan i pumpeknak langhter khawhnak lam a si caah lungtho tein kan pek awk a si. (2 Pit. 1:7) Asinain report tam deuh in pek khawhnak ca men ah phungchimnak ah caan tam deuh in kan i tel awk a si tiah kan ruah awk a si lo. Thawngthanhtu pakhat cu kumkhua ruang asiloah ngandamnak ruangah phungchimnak ah caan tampi aa tel khawh lo ahcun minit 15 hmanh report a pek khawh. Mah cu a si khawh chungin a tuahmi a si caah Jehovah nih a sunsak. Unau pawl nih amah an dawtmi le a Tehte si an duh taktakmi zong kha Jehovah nih a hngalh. A si a fakmi hlanlio Israel mi hna nih Pathian sinah raithawinak an pek khawh bantukin tuchan zongah unau cheukhat cu ri an ngei ko nain report an pek khawh ve caah an i lawm. Kan pekmi report cu vawleicung pumpi report ah fonh chih a si, mah nih bupi kha lohmun ca a herhmi timhtuah awkah a bawmh hna. Mah ruangah phungchim rian ah kan hmanmi suimilam report kan peknak a si.
Baibal kan Hlathlaining le Thangṭhat Raithawinak
14. Baibal kan hlathlaining kan ruah awk a sinak a ruang kha fianter.
14 Levitikas cauk chungin a man a sungmi kong pawl kan i ruah hnuah zeicah mah cauk hi Pathian Bia chungah aa tel ti kha na hngalthiam chin ko lo maw? (2 Tim. 3:16) Thian zungzal awk na biakhiahnak cu a fek chin maw? Jehovah nih a ṭha bikmi pek awkah a kan hal i mah cu hmuh awkah aa tlak. A dang Baibal pawl zong kha thuk deuh in hlathlai na duh ko lai. (Phungthlukbia 2:1-5 rel.) Baibal na hlathlaining kha thlacam buin ruat. Hitin i hal: ‘Jehovah kha a ṭha bikmi ka pe maw? TV, video game, lentecelhnak asiloah ka huammi thil tuahnak nih thlaraulei ṭhancho awkah a ka dawn maw?’ Cutin a si ahcun Hebru cauk i Paul chimmi kha thukpi in ruah cu a ṭha.
Baibal hlathlainak le chungkhar pumhnak kha biapi ah na chia maw? (Catlangbu 14 zoh)
15, 16. Paul nih Hebru Khrihfa hna sin ca a ṭial tikah zeicah hlangfang in a ṭial?
15 Paul nih Hebru Khrihfa hna sin ca a ṭial tikah hlangfang tein a ṭial. (Hebru 5:7, 11-14 rel.) “Hngalh nan i harh tuk” tiah a ti hna. Zeicah cu tluk hlangfang in a ti hna? Jehovah bantukin a dawt hna i an caah a lungre a theih caah a si. Zeicahtiah annih cu hnuk asiloah a hrampi Baibal hngalhnak lawngin an i za. A hrampi Baibal cawnpiaknak hngalhthiam cu a biapi ko nain thlaraulei ṭhancho kan duh ahcun “rawl taktak” a simi a thuk deuhmi Baibal cawnpiaknak kha kan cawn a hau.
16 Hebru Khrihfa hna cu midang cawnpiak canah anmah tu cawnpiak an herh. Zeicah? “Rawl taktak” kha an ei lo. Hitin i hal: ‘A thukmi Baibal cawnpiaknak he aa tlaiin a hmaanmi lungput ka ngei maw? Mah kha hlathlai ka duh maw? Asilole thukpi in Baibal hlathlai lo le thlacam loin ka um maw? Cutin a si ahcun Baibal ka hlathlaining hi thlen a hau lai maw?’ Mi kha phung chimh lawng si loin cawnpiak le zultu siter zong a herh.—Matt. 28:19, 20.
17, 18. (a) Zeicah “rawl taktak” kha kan ei zungzal awk a si? (b) Pumh hlan i zu din kha zeitindah kan hmuh awk a si?
17 Ka sual timi ruahnak ka ngei sual lai ti phan ruangah Baibal hlathlai kha Jehovah nih a duh lo. Baibal hlathlai awkah a hnek zong a kan hnek lo. Baibal hlathlai cu kan caah a fawi lo hmanhah, biatak kan hngalhnak zei can a sau cang hmanhah “rawl taktak” ei kan herh zungzal. Kan thian zungzal nakhnga mah cu a biapimi a si.
18 Kan thian nakhnga Baibal kha ṭha tein hlathlai le Pathian nih a kan halmi ning tein tuah a hau. Aaron fale Nadab le Abihu cu “a thiang lomi mei” an thawi caah thah an si, mah cu zu an rit buin an thawimi a si kho men. (Lev. 10:1, 2) Zeicatiah mah thil a can hnuah Pathian nih Aaron a chimhmi kha i cinken. (Levitikas 10:8-11 rel.) Mah bia nih pumh kal hlanah zu din awk a si lo tiah a ti duhnak a si maw? Mah hi ruathmanh: Kannih cu Nawlbia tangah kan um ti lo. (Rom 10:4) Ram cheukhat ah unau pawl cu pumh kal hlan rawl ei lioah zu kha a zafang in an din. Lanhtak puai an rak tuah lioah mitsurhang hrai li an hman. Ruahnolhnak tuah lioah Jesuh nih a thi a aiawhmi mitsurhang kha a zultu pawl a dinter hna. (Matt. 26:27) Baibal nih zu tam tuk din le zu rit kha a duh lo. (1 Kor. 6:10; 1 Tim. 3:8) Unau tampi cu an chiaṭha thleidannak lungthin ruangah Jehovah biaknak ah i tel hlanah zu an ding men lai lo. Asinain ramkhat le ramkhat sining cu aa lo lo, Khrihfa hna caah a biapi bikmi cu thian zungzal awk le Jehovah lungton awkah ‘a thianglomi le a thiangmi thleidan’ khawh kha a si.
19. (a) Chungkhar pumhnak le pumpak hlathlainak kha zeitindah sullam kan ngeihter khawh? (b) Thian zungzal awk bia na khiah kha zeitindah na langhter khawh?
19 Baibal kha ṭha tein kan hlathlai ahcun a ṭha tukmi Baibal phunglam tampi kha kan hmuh khawh lai. Chungkhar pumhnak le pumpak hlathlainak sullam a ngeih nakhnga hlathlainak hriamnam hna kha hmang. Jehovah le aa tinhnak kong kha tam deuh in hngalh i zuam. Jehovah kha naih. (Jeim 4:8) Hitin hla a sami salm caṭialtu bantukin Pathian sinah thla cam: “Na nawlbia chung i a ummi khuaruahhar biatak kha ka hmuh khawh nakhnga, ka mit ka auter ko.” (Salm 119:18) Baibal nawlbia le phunglam hna kha zeitikhmanh ah thlahdorh hlah. ‘A Thiangmi Pathian’ Jehovah nawlbia kha lungtho tein ngai law “Pathian sin i a rami thawngṭha” chimnak ah lungtho tein i tel. (1 Pit. 1:15; Rom 15:16) Hi donghnak caan chungah thian zungzal kan herh. Kan tuahsernak ah thiang zungzal hna u sihlaw Jehovah cungnung bik a sinak kha ṭanpi hna u sih.
^ cat. 6 2002, May 15, Vennak Innsang i “Careltu Hna Sinin Biahalnak” [Kawl] kha zoh.