“Ngai U Law Hngal Tuah U”
“Nan dihlak in ka bia hi ngai u law hngal tuah u.”—MAR. 7:14.
1, 2. Jesuh bia a sullam kha zeicah mi tampi nih an hngalhthiam lo?
MI PAKHAT nih a kan chawnh tikah a aw lawng si loin a aw cawi zong kha kan theih. Asinain a chimmi hngalhthiam awkah a bia sullam kha kan hngalh a hau. (1 Kor. 14:9) Jesuh nih mi tampi kha anmah holh tein a chawnh hna. Asinain a bia sullam kha an dihlak in cun an hngalthiam lo. Cucaah Jesuh nih “nan dihlak in ka bia hi ngai u law hngal tuah u” tiah a ti hna.—Mar. 7:14.
2 Jesuh chimmi a sullam kha annih nih zeicah an hngalhthiam lo? Mi cheukhat cu anmahle ruahnak a ngei cangmi an si. A cheu tu cu lungthin ṭha a ngei lomi an si. Annih kha Jesuh nih hitin a ti hna: “Nanmah cawnpiaknak tu kha fehter i Pathian nawlbia hlawt kha cu nan thiam ngai ko.” (Mar. 7:9) Annih cu Jesuh bia a sullam hngalhthiam awkah an i zuam lo. An zulhmi phunglam le an ruahnak kha thlen an duh lo. An hna nih cun a theih ko nain an lungthin chungah a phan lo. (Matthai 13:13-15 rel.) Kannih tu cu Jesuh cawnpiaknak in cawn kan duh zungzal awk a si. Cutin zeitindah kan tuah khawh?
Jesuh Cawnpiaknak in Ṭhatnak Hmuh Khawhning
3. Zultu pawl nih Jesuh bia kha zeicah an hngalhthiam?
3 Aa toidormi Jesuh zultu pawl kha kan i zohchunh hna Matt. 13:16) Jesuh bia kha midang nih an hngalhthiam lo lioah annih nih zeicah an hngalhthiam? Thil pathum an tuah caah a si. Pakhatnak, biahalnak tuah an duh i Jesuh nih a chim duh taktakmi kha hngalhthiam an i zuam. (Matt. 13:36; Mar. 7:17) Pahnihnak, an hngalh tharmi kong cu an cohlan cangmi kong he zeitindah aa pehtlaih ti kha hngalhthiam an i zuam. (Matthai 13:11, 12 rel.) Pathumnak, an cawnmi kong kha anmah le midang ṭhatnak caah hman an duh.—Matt. 13:51, 52.
a hau. Annih kha Jesuh nih “nan van a va ṭha thiam dah. Nan mit nih a hmuh i nan hna nih a theih” tiah a ti hna. (4. Jesuh chimmi bianabia hngalhthiam awkah zei thil pathum dah kan tuah a herh?
4 Kannih zong Jesuh chimmi bianabia kha hngalhthiam kan duh ahcun zultu hna bantukin thil pathum kan tuah a hau. Pakhatnak, Jesuh bia kha a caan pek in rel, ruah, thukpi in hlathlai le biahalnak tuah a hau. Cutin kan tuah ahcun hngalhnak kan hmuh lai. (Ptb. 2:4, 5) Pahnihnak, mah hngalhnak cu kan cohlan cangmi he zeitindah aa pehtlaih ti le mah nih zeitindah ṭhatnak a kan pek khawh ti kha hngalh i zuam a hau. Cutin kan tuah ahcun hngalhthiamnak kan hmuh lai. (Ptb. 2:2, 3) Pathumnak, kan hngalhmi kha kan nunnak ah kan hman awk a si. Cutin kan tuah ahcun fimnak kan ngei ti kan langhter a si lai.—Ptb. 2:6, 7.
Fimnak nih kan nunnak a khamh khawh
5. Hngalhnak, hngalhthiamnak le fimnak an i dannak kha tahchunhnak in chim.
5 Hngalhnak, hngalhthiamnak le fimnak cu zeitindah an i dan? Mah kha hitin tahchunhnak kan pek khawh: Lamlai i na dir lioah mawṭaw a ra hei ti u sih. Pakhatnak ah, mah cu mawṭaw a si ti kha na hmuh, mah cu hngalhnak a si. Cun cuka ah na dir peng ko ahcun mawṭaw nih aan ṭaih lai kha na hngalh, mah cu hngalhthiamnak a si. Cucaah mawṭaw kha na hrial zokzok, mah cu fimnak a si. Baibal nih ‘fimnak ṭha kha i ken’ u tiah a kan ti. Zeicahtiah mah nih kan nunnak a khamh khawh caah a si.—Ptb. 3:21, 22; 1 Tim. 4:16.
6. Jesuh chimmi bianabia pasarih kan i ruah lioah zei biahalnak pali dah kan hlathlai lai? ( Rinli kulh zoh.)
6 Hi capar le a hnu capar ah Jesuh chimmi bianabia pasarih kha kan i ruah hna lai. Kan i ruah lioah mah biahalnak hna hi kan hlathlai lai: Mah bianabia cu zei sullam dah a ngeih? (Mah cu hngalhnak a si.) Zeicah Jesuh nih mah bianabia kha a chim? (Mah cu hngalhthiamnak a si.) Mah bianabia kha kanmah le midang ṭhatnak caah zeitindah kan hman khawh? (Mah cu fimnak a si.) Mah nih Jehovah le Jesuh kong zeidah a kan cawnpiak?
Anṭam Ci
7. Jesuh chimmi anṭam ci bianabia cu zei sullam dah a ngeih?
7 Matthai 13:31, 32 rel. Jesuh chimmi anṭam ci bianabia cu zei sullam dah a ngeih? Anṭam ci nih kan chimmi Pennak kong thawngṭha le Khrihfabu kha a aiawh. AD 33 i Khrihfabu dirh a si lioah “thlaici vialte lakah a hme bik” bantukin a hmete a rak si. Asinain phungchim rian ruangah caan tawite chungah khulrang in a ṭhangcho. Cutluk rang in a ṭhangcho lai tiah mi tampi nih an i ruahchan lo. (Kol. 1:23) Jesuh nih “a nge ah khan va zong nih bu an ser” tiah a ti. Mah cu Khrihfabu a ngan thluahmah tikah cuka ah lungthin ṭha a ngeimi hna nih thlarau rawl, hrimhnak le dornak an hmuh tinak a si.—Ezekiel 17:23 he tahchunh.
Khrihfabu a ṭhanning cu khuaruahhar tuk a si
8. Zeicah Jesuh nih anṭam ci bianabia kha a chim?
8 Zeicah Jesuh nih mah bianabia kha a chim? Pathian Pennak a ṭhanchoning, huhphenhnak a pekning le dawntu thil vialte a tei khawhning kha langhter awkah Jesuh nih anṭam ci khuaruahhar in a ṭhanning kha a chimmi a si. 1914 thawkin Khrihfabu a ṭhanning cu khuaruahhar chinchin a si. (Isa. 60:22) Khrihfabu chungah a ummi hna cu Jehovah he naih tein um awkah bawmh an si. (Ptb. 2:7; Isa. 32:1, 2) Khrihfabu a ṭhanchomi kha zeihmanh nih a dawn kho lai lo.—Isa. 54:17.
9. (a) Anṭam ci bianabia in zeidah kan hngalh khawh? (b) Mah nih Jehovah le Jesuh kong zeidah a kan cawnpiak?
9 Anṭam ci bianabia in zeidah kan hngalh khawh? Kannih cu Jehovah Tehte tlawmpal lawng an umnak asiloah a ṭhancho lonak hmun ah kan um men lai. Asinain Pennak nih
dawnkhantu thil vialte a tei khawh ti kha kan philh lo awk a si. Mah nih inkhawhnak ngeih awkah a kan bawmh lai. Tahchunhnak ah, 1926 ah Unaupa Edmin Skinner cu India ah a phan i mah lioah Jehovah Tehte tlawmte lawng an rak um. Cun a ṭhanchoning zong a nuarh tuk caah rianṭuan cu “a har” ngai. Asinain phung a chim zungzal i Pennak nih dawnkhantu thil nganpipi a tei khawh ti kha a hmuh. Atu India ah Jehovah Tehte 37,000 leng an um cang i 2013 Ruahnolhnak ah aa pummi 108,000 leng an si. India ah Unaupa Skinner a phanh kum ah Zambia ah phungchim rian thawk a si ve. Atu Zambia ah Jehovah Tehte 170,000 leng an um cang i 2013 Ruahnolhnak ah aa pummi 763,915 an si. Mah cu Zambia ram i milu 18 ah 1 tluk a si. A ṭhanchoning cu khuaruahhar taktak a si.Thilnu
10. Thilnu bianabia cu zei sullam dah a ngeih?
10 Matthai 13:33 rel. Thilnu bianabia cu zei sullam dah a ngeih? Mah bianabia nih Pennak kong thawngṭha le mah nih minung nunning a thlen khawhning kha a langhter. “Changvut rel khat” nih minung vialte kha a aiawh. Changvut a thawhmi nih phungchim rian thawngin Pennak kong thawngṭha a karhning kha a langhter. Anṭam ci a ṭhanmi cu hmuh khawh colh a si nain thilnu a karhmi tu cu hmuh khawh a si lo. Caan tlawmpal a rauh hnu lawngah a phichuak kha hmuh khawh a si.
11. Zeicah Jesuh nih thilnu bianabia kha a chim?
11 Zeicah Jesuh nih mah bianabia kha a chim? Pennak kong thawngṭha cu “vawleicung khuazakip” phanh khawhnak le minung lungthin thlen khawhnak ṭhawnnak a ngei ti kha Jesuh nih mah bianabia hmangin a langhter. (Lam. 1:8) A hmasa ah mah thlennak kha kan hmu theng lai lo nain mah cu a cangmi a si. Hmun kip ah a ummi mi tampi nih Pennak kong thawngṭha kha an cohlan i an ziaza an i thleng.—Rom 12:2; Efe. 4:22, 23.
12, 13. Thilnu bianabia nih a langhter bantukin phungchim rian a ṭhanchoning kha tahchunhnak in chim.
12 Mi nih thawngṭha an theih hnu kum tampi lawngah a phichuak kha hmuh khawh a si tawn. Tahchunhnak ah, Brazil Bethel ah rian a ṭuanmi Frans le Markit te nuva cu 1982 ah khua hmete pakhat ah phung an chim. Baibal cawnpiaknak tampi an hmu i pakhat cu nu pakhat le a fale pali he a si. Mah lioah a fapa upa bik cu kum 12 lawng a si rih. Anih cu a ningzah a pang tuk i Baibal cawnnak thawk hlanah aa thup tawn.
Frans le Markit cu an ṭhial hna caah mah chungkhar kha Baibal an cawnpiak kho ti hna lo. Kum 25 a rauh hnuah cuka hmun ah an va tlawng ṭhan. Cuka ah thawngthanhtu 69 a ummi Khrihfabu pakhat dirh a simi, hmaanhmaan 13 an ummi le Biakinn thar ah an i pumhmi an hmuh tikah zeitlukin dah an i nuamh lai khi ruathmanh. A ningzah a rak pang tukmi ngakchia pa cu atu ah Khrihfa upa phu ah khuakhangtu a si cang. Jesuh chimmi bianabia chung i thilnu bantukin Pennak kong thawngṭha cu a karh i mi tampi kha an nunning a thlen hna.13 Zalong tein phung chim khawh a si lonak ram hmanhah Pennak kong thawngṭha nih mi kha an nunning a thlen khawh ko hna. Cu bantuk ram hna ah thawngṭha zeitlukin dah a karh timi kong kan theih tikah kan khuaruah a har. Tahchunhnak ah, 1910 ah Pennak kong thawngṭha cu Cuba ah a phan i 1913 ah Unaupa Russell cu mah tikulh ah a va tlawng. A hramthawk ah cun a ṭhangcho tuk lo. Asinain atu ah tah zeitin? Cuka ah thawngthanhtu 96,000 leng an um cang i 2013 Ruahnolhnak ah aa pummi 229,726 an si. Mah cu Cuba tikulh i milu 48 ah 1 tluk a si. Khenkhamnak a um lonak ram hna hmanhah unau pawl nih phung kan chim kho lai lo tiah an ruahnak hmun tiang Pennak kong thawngṭha cu a phan. *—Pct. 8:7; 11:5.
Jehovah nih zeipaoh a tuah khawh
14, 15. (a) Thilnu bianabia in zeitindah ṭhatnak kan hmuh khawh? (b) Mah nih Jehovah le Jesuh kong zeidah a kan cawnpiak?
14 Thilnu bianabia in zeitindah ṭhatnak kan hmuh khawh? Jesuh chimmi bianabia a sullam kan ruah tikah thawngṭha a thei rih lomi mi tampi sinah zeitindah Pennak kong thawngṭha a phanh lai timi kongah lungretheih a hau lo ti kha kan hngalh. Jehovah nih zeipaoh a tuah khawh. Asinain kanmah nih tah zeidah kan tuah awk a si? Baibal nih hitin a ti: “Zinglei ah thlaici tuh ko, zanlei zongah ngol hlah; zeicahtiah an dihlak in an ṭhat lai le an ṭhat lai lo kha na hngal lo i a zei kha dah a ṭha deuh lai ti zong kha na hngal lo.” (Pct. 11:6) Jehovah nih phungchim rian thluachuah a pek nakhnga, a hleiin khenkham a sinak ram ah thluachuah a pek nakhnga thla kan cam zungzal awk a si.—Efe. 6:18-20.
15 Phungchim rian i a phichuak kha kan hmuh colh lo hmanhah kan lung a dongh awk a si lo. A thawknak “thil hmetete hna” kha zei rel loin kan um awk a si lo. (Zekh. 4:10) A donghnak ah kan ruah khawhmi lengin a ngan deuhmi le khuaruahhar deuh a simi a phichuak a um kho.—Salm 40:5; Zekh. 4:7.
Lungvar le Thuhmi Rothil
16. Lungvar le thuhmi rothil bianabia cu zei sullam dah a ngeih?
16 Matthai 13:44-46 rel. Lungvar le thuhmi rothil bianabia cu zei sullam dah a ngeih? Jesuh chan ah chawlettu pawl cu a ṭha bikmi lungvar kawl awk le cawk awkah lam hlatpi tiang an kal tawn. Jesuh chimmi bianabia chung i “a ṭha ngaingaimi” lungvar nih a sunglawimi Pennak kong biatak kha a aiawh, chawlettu nih biatak hmuh awkah khuazakip ah a kawlmi lungthin ṭha a ngeimi kha a aiawh hna. Chawlettu nih mah a ṭha ngaingaimi lungvar kha cawk khawh awkah a ngeihmi thil vialte kha a zuar colh. Jesuh nih lo chung i rian a ṭuan lioah “thuhmi” rothil a hmumi pa bianabia zong a chim. Mah pa nih chawlettu pa bantukin rothil kha a kawlmi cu a si lo. Asinain rothil kha a hmuh i a sunlawinak a hngalhle cangka mah kha ngeih khawh awkah “a ngeihmi thil vialte” a zuar ve.
17. Zeicah Jesuh nih lungvar le thuhmi rothil bianabia kha a chim?
17 Zeicah Jesuh nih mah bianabia pahnih kha a chim? Biatak kha lam a phunphun in hmuh khawh a si ti langhter awkah a si. Mi cheukhat nih cun biatak kha an kawl i hmuh khawh awkah mahca ṭhatnak an hlawt. Cheukhat tu cu biatak kha an kawl lo nain an hmuh, mah cu pakhatkhat nih phung an chimh hna caah a si men lai. Bianabia pahnih chung i pa pahnih nih an hmuhmi thil a sunlawinak kha an hngalh tikah mah kha ngeih khawh awkah mahca ṭhatnak tampi an hlawt.
Na nunnak ah biatak kha pakhatnak i chiah khawh awkah a herhmi zeipaoh tuah
18. (a) Mah bianabia pahnih in zeitindah ṭhatnak kan hmuh khawh? (b) Mah nih Jehovah le Jesuh kong zeidah a kan cawnpiak?
18 Mah bianabia pahnih in zeitindah ṭhatnak kan hmuh khawh? (Matt. 6:19-21) Hitin i hal: ‘Biatak he aa tlaiin mah pa pahnih lungput ka ngei ve maw? Biatak kha a sunglawimi rothil in ka hmu maw? Mah kha ngeih khawh awkah mahca ṭhatnak ka hlaw maw asiloah nifa nunnak ca ti bantuk thil dang ruangah dah ka lung a vaivuanh?’ (Matt. 6:22-24, 33; Luka 5:27, 28; Fil. 3:8) Biatak kan duh taktak ahcun mah kha kan nunnak i pakhatnak ah chiah khawh awkah a herhmi zeipaoh tuah kan duh ko lai.
19. A hnu capar ah zei kong dah kan i ruah hna lai?
19 Mah bianabia hna kan ngaih le a sullam kan hngalhthiam kha langhter hna u sih. Asinain a sullam hngalhthiam lawng a zat lo kha i cinken. Kan hngalhmi kha kan zulh a hau. A hnu capar ah a dang bianabia pathum le mah in kan i cawn khawhmi kha kan i ruah hna lai.
^ cat. 13 Argentina (2001 Yearbook, cahmai 186 [Mirang]); Nichuah Germany (1999 Yearbook, cahmai 83 [Mirang]); Papua New Guinea (2005 Yearbook, cahmai 63 [Kawl]); le Robinson Crusoe Tikulh (2000, June 15, Vennak Innsang, cahmai 9 [Kawl]) i hmuhtonnak hna zong kha rel khawh a si.