1, 2. Jesuh nih a thawhṭhan ni ah a zultu hna kha zeitindah tha a pek hna?

JESUH zultu pahnih cu Jerusalem in meng 7 hrawng a hlatnak khuate ah an kal. Annih cu Jesuh a thih caah an ngaih a chia i a thawhṭhanmi kha an hngal rih lo. Ruahlopi in Jesuh cu a lang i an sinah a kal ve. “Cun Jesuh nih Cathiang chungah, Moses cauk hna thawkin profet hna ṭialmi cauk hna tiang, amah kong aa ṭialmi vialte kha fiang tein a chimh hna.” (Luka 24:13-15, 27) Cathiang sullam a “chimh” hna caah an hna a ngam i an lungthin chungah mei bangin a alh.—Luka 24:32.

² Mah zanlei ah zultu pahnih cu Jerusalem ah an kir ṭhan. Lamkaltu hna he an i ton tikah a cangmi thil kha an chimh hna. An chim cuahmah lioah Jesuh cu an dihlak sinah a lang. Mah tikah lamkaltu hna cu an lau tuk i Jesuh a si taktak hnga maw tiah an lung a hring. Jesuh nih “an lungthin kha a hun pemh hna i Cathiang sullam kha an hun hngalh,” cuticun tha a pek hna.—Luka 24:45.

3. Jehovah rian ṭuannak ah zeicah kan lung a dongh khawh men, asinain zeitindah kan i nuamh peng khawh?

³ A caan ah mah zultu hna bantukin kan ngaih a chia tuk kho men. Jehovah rian fakpi in kan ṭuan ko nain  kan phungchimmi kha mi nih an lehrulh lo tikah kan lung a dong kho men. (1 Kor. 15:58) Asiloah Baibal kan cawnpiakmi cu a ṭhangcho lo tiah kan ruah men lai. An lakin cheukhat nih Jehovah kha a hlawt hmanh an hlawt men lai. Cu a si ah phungchimnak ah zeitindah kan i nuamh peng khawh? I nuamh peng awkah Jesuh chimmi bianabia sullam hngalhthiamnak nih a kan bawmh lai. Atu ah bianabia pathum le mah in kan i cawn khawhmi kha i ruah hna u sih.

4. Jesuh chimmi a ṭhangmi thlaici bianabia cu zei sullam dah a ngeih?

⁴ Marka 4:26-29 rel. Jesuh chimmi a ṭhangmi thlaici bianabia cu zei sullam dah a ngeih? Thlaici a tuhtu nih Pennak kong a chimtu hna kha a aiawh i thlaici nih lungthin ṭha a ngeimi hna sinah an chimmi thawngṭha kha a aiawh. Thlaici a tuhtu cu midang bantukin “zan ah a it, zing ah a tho” ve. Thlaici tuh a si in ṭuan a cut tiang caan sau nawn a rau. Mah caan chungah “thlaici cu an rak keuh i an rak ṭhang.” Mah ṭhannak cu duhsah tein le a dotdot in a si. Cu bantukin mi pakhat cu duhsah tein le a dotdot in thlaraulei ah a ṭhangcho. A ṭhangcho thluahmah i Pathian biak dingin bia a khiah tikah Jehovah sinah aa pumpe i tipil a ing, cuticun ‘thei a tlai.’

5. Zeicah Jesuh nih a ṭhangmi thlaici bianabia kha a chim?

⁵ Zeicah Jesuh nih mah bianabia kha a chim? Lungthin ṭha a ngeimi hna lung chungah biatak a ṭhantertu cu Jehovah a si ti kha hngalhter awkah a si. (Lam. 13:48; 1 Kor. 3:7) Thlaici kan tuh i ti kan toih nain a ṭhan nakhnga asiloah zokzok in a ṭhan nakhnga kan tuah kho lo. Bianabia chung i mipa bantukin a ṭhanning kha kan hngal ve lo. Mi pakhat lung chungah Pennak thlaici a ṭhang ti kha a hngal hmanh kan hngal men lai lo. Asinain a hnuah mah thlaici cu thei a tlai kho, cuticun kanmah he rawlṭuannak rian ah mithar pawl an hun i tel kho.—Johan 4:36-38.

6. Baibal kan cawnpiakmi a ṭhanchonak he aa tlaiin zeidah kan cohlan awk a si?

⁶ Mah bianabia in zeidah kan hngalh khawh? Pakhatnak, Baibal kan cawnpiakmi cu zeitluk rang in ṭhangcho seh  tiah kanmah nih kan ti kho lo ti kha kan cohlan a hau. A si khawh chungin kan bawmh nain tipil in awkah cun kan hnek bal lai lo. Pathian sinah aa pumpek lai le pumpek lai lo kha amah tein bia a khiah awk a si ti kha toidor tein kan cohlan. Jehovah nih amah kan dawt taktak lawngah kan i pumpeknak kha a cohlan.—Salm 51:12; 54:6; 110:3.

7, 8. (a) Jesuh chimmi a ṭhangmi thlaici bianabia in a dang zeidah kan hngalh khawh rih? Tahchunhnak pe. (b)Mah nih Jehovah le Jesuh kong zeidah a kan cawnpiak?

⁷ Pahnihnak, mah bianabia sullam hngalhthiamnak nih cawnpiaknak rian ah a phichuak kan hmuh colh lo hmanhah lungdongh lo awkah a kan bawmh. Kan lung a sau a hau. (Jeim 5:7, 8) Baibal kan cawnpiakmi kha a si khawh chungin kan bawmh ko nain a lungthin chungah biatak a ṭhan lo ahcun mah cu cawnpiak kan thiam lo tinak a si lo. Jehovah nih thlennak tuah a duhmi, aa toidormi hna lungthin lawngah biatak thlaici kha a ṭhanter. (Matt. 13:23) Cucaah kan phungchimnak hmual a ngei maw, ngei lo timi kha tipil a ingmi pa zeizat an si timi in kan tah awk a si lo. Jehovah zong nih phungchimnak ah kan hlawh a tling maw, tling lo timi kha mi nih an lehrulhning in a tah ve lo. Mah nakcha cun teima tein rian kan ṭuanmi tu kha a sunsak.—Luka 10:17-20; 1 Korin 3:8 rel.

⁸ Pathumnak, mi pakhat lungthin chungah thlennak a ummi kha kan hmu kho tawn lo. Tahchunhnak ah, missionary unaupa he Baibal a cawngmi nuva hna nih tipil a ing rih lomi thawngthanhtu si kan duh tiah unaupa kha an chimh. Mah tikah unaupa nih kuak zuk nan ngol hmasa a hau tiah a ti hna. Annih nih kan ngolnak thla tam nawn a si cang tiah an ti tikah unaupa cu a khuaruah a har tuk. A thli tein kuak kan zuk hmanhah Jehovah nih a kan hmuh khawh i Jehovah nih i titernak a huat ti kha an hngalh. Cucaah kuak kan zuk ahcun missionary unaupa hmaiah kan zuk lawlaw lai, kan zuk lo ahcun kan ngol lawlaw lai tiah bia an khiak. Mah nuva hna nih thlennak nganpi an tuahmi kha unaupa nih a hngal lo nain Jehovah an dawtnak a ṭhanchomi nih a hmaanmi biakhiahnak tuah awkah a bawmh hna.

9. Sur bianabia cu zei sullam dah a ngeih?

⁹ Matthai 13:47-50 rel. Jesuh chimmi sur bianabia cu zei sullam dah a ngeih? Jesuh nih Pennak kong thawngṭha chimnak cu rili chungah sur nganpi chehnak he aa lo tiah a ti. Sur nih “nga phunzakip” a tlaih bantukin phungchim rian nih mi a phunphun kha a hnuh hna. (Isa. 60:5) Kum fatin civui le Ruahnolhnak puai ah mi tampi an rak i pumhmi nih cutin a si kha a langhter. An lakin cheukhat cu “a ṭhami” nga  bantuk an si i Khrihfabu ah an hung lut. A dang tu cu “a ṭha lomi” nga bantuk an si i Jehovah nih a cohlang hna lo.

10. Zeicah Jesuh nih sur bianabia kha a chim?

¹⁰ Zeicah Jesuh nih mah bianabia kha a chim? Bianabia chung i nga ṭhennak nih harnak nganpi chung i hmanung bik biaceihnak kha a langhtermi a si lo. Hi donghnak caan chungah a cangmi thil tu kha a langhtermi a si. Pennak kong thawngṭha a duhmi cheukhat cu Jehovah sal si an duh lai lo ti kha Jesuh nih a langhter. Kan sinah aa pummi asiloah kanmah he Baibal a cawngmi tampi nih Jehovah sinah i pumpek kha an duh lo. (1 Si. 18:21) A cheu cu a pum hmanh an i pum ti lo. Mino cheukhat cu Khrihfa a simi nulepa sinah a ṭhangmi an si ko nain Jehovah kha an daw taktak lo. Pakhat cio nih mah tein biakhiahnak tuah a hau ti kha Jesuh nih a hleiin a langhter. A hmaanmi biakhiahnak kan tuah ahcun Jehovah nih “chawhlawn” asiloah a sunglawimi in a kan hmuh lai.—Hag. 2:7.

11, 12. (a) Sur bianabia in zeitindah ṭhatnak kan hmuh khawh? (b) Mah nih Jehovah le Jesuh kong zeidah a kan cawnpiak?

¹¹ Sur bianabia in zeitindah ṭhatnak kan hmuh khawh? Mah bianabia hngalhthiamnak nih Baibal kan cawnpiakmi asiloah kan fale lak i pakhat nih Jehovah biak a duh lo tikah ngaihchiat tuk lo awk le lungdongh tuk lo awkah a kan bawmh lai. Amah cawnpiak awkah kan tuah khawhmi zeipaoh kan rak tuah ko lai. Asinain mi pakhat cu Baibal cawn a duh ca men asiloah biatak ah a ṭhangmi a si ca men in Jehovah hawi a si kho lo. Jehovah nawlngeihnak a cohlang duh lomi cu Pathian sal an si kho lo.

¹² Mah cu biatak a kaltakmi cu zeitikhmanh ah Khrihfabu ah a kir ṭhan kho ti lo tinak a si maw? Asiloah Jehovah sin aa pumpe rih lomi kha kan i ruahchan awk a si ti lo tinak tah a si maw? A si lo, harnak nganpi aa thawk hlan paoh cu Jehovah hawi si khawhnak caanṭha a um rih. Annih kha Jehovah nih “ka sinah nan ra kir ahcun, nan sinah ka ra kir ve lai” tiah a  sawm hna. (Mal. 3:7) Mah kha Jesuh chimmi fapa tlau bianabia nih a hleiin a langhter.—Luka 15:11-32 rel.

13. Fapa tlau bianabia cu zei sullam dah a ngeih?

¹³ Jesuh chimmi fapa tlau bianabia cu zei sullam dah a ngeih? Bianabia chung i dawtnak a ngeimi pa nih dawtnak a ngeimi vancung kan pa, Jehovah kha a aiawh. A ro a sawksammi fapa nih Khrihfabu a kaltakmi hna kha a aiawh. Annih cu Jehovah sinin a hlatnak “a hla ngaingaimi ram” he aa lomi Satan vawlei ah an phan. (Efe. 4:18; Kol. 1:21) A hnuah, an lak i cheukhat nih sualnak nganpi kan tuah ti kha an hun hngalh i Jehovah sin kir ṭhan awkah bia an khiak. Cutin tuah awkah fakpi in i zuam a hau nain an i toidor i an tuahmi thil kha lungtak in an i ngaihchih caah Jehovah nih a ngaihthiam hna i a cohlan ṭhan hna.—Isa. 44:22; 1 Pit. 2:25.

14. Zeicah Jesuh nih fapa tlau bianabia kha a chim?

¹⁴ Zeicah Jesuh nih mah bianabia kha a chim? Jehovah nih amah a kaltakmi hna kha a sinah rak kir ṭhan hna seh ti a duh kha langhter awkah a si. Bianabia chung i pa nih a fapa a kir ṭhan lai ti aa ruahchannak kha zeitikhmanh ah a hlaw lo. A fapa a rak kirmi kha “lam hlatpi” in a hmuh tikah a hei tlik hnawh. Lunglawm tein a cohlanmi kha a fapa hngalhter a duh. Mah bianabia nih biatak a kaltakmi hna kha Jehovah sin kir ṭhan colh awkah a forh hna awk a si. Jehovah he an i pehtlaihnak cu a der tuk men lai, an ning a zak men lai i kir ṭhan awkah an i harh tuk men lai. Asinain kir ṭhan awkah an i zuammi cu a phu tukmi a si. An kir ṭhan tikah Jehovah, Jesuh le vancungmi cu an i lawm tuk lai.—Luka 15:7.

15, 16. (a) Jesuh chimmi fapa tlau bianabia in zeidah kan i cawn khawh? Tahchunhnak cheukhat chim. (b) Mah nih Jehovah le Jesuh kong zeidah a kan cawnpiak?

 ¹⁵ Fapa tlau bianabia in zeitindah ṭhatnak kan hmuh khawh? Jehovah dawtnak kha kan i zohchunh awk a si. Mi pakhat Khrihfabu ah a kir ṭhan tikah a ‘ding tukmi’ kan si awk a si lo, cun cohlan duh loin kan um awk a si lo. Cutin kan um ahcun Jehovah he kan i pehtlaihnak a rawk kho. (Pct. 7:16, NW) Mah bianabia in kan cawn khawh rihmi cu Khrihfabu a kaltakmi pakhat kha a kir ṭhan khomi “tuu tlau” bantukin hmuh awk a si timi kha a si. (Salm 119:176) Khrihfabu in lam a pialmi pakhat kha kan hmuh tikah kir ṭhan awkah a si khawh chungin kan bawm lai maw? Asiloah Khrihfa upa pawl kha bawmhnak pek awkah kan chim colh hna lai maw? Jesuh chimmi bianabia kha kan hngalhthiam taktak i kan zulh ahcun cutin kan tuah lai.

¹⁶ A kir ṭhanmi hna cu Jehovah zaangfahnak le Khrihfabu i unau pawl dawtnak le bawmhnak an hmuh caah an i lawm tuk. Kum 25 chung bu chungin chuah a simi unaupa pakhat nih hitin a chim: “Bu chungah ka luh ṭhan thawkin Jehovah sinin ‘thlarau thazaang thar hmuhnak caanṭha’ ka hmuh thluahmah caah kaa lawmhnak cu a karh chin. (Lam. 3:20) Unau kip nih an ka bawmh i an ka dawt. Atu cu a ṭha tukmi thlaraulei chungkhar ka ngei cang.” Kum nga chung Khrihfabu a kaltak hnuah a rak kir ṭhanmi mino unaunu pakhat nih hitin a chim: “Jesuh chimmi dawtnak ka cungah an langhtermi ka hmuh tikah zeitlukin dah kaa nuamh ti kha a chim zia hmanh ka thiam lo. Jehovah bupi chungah um cu a sunglawi tukmi a si.”

17, 18. (a) Mah bianabia pathum in zeidah kan i cawn khawh? (b) Zei tuah awkah dah bia kan khiah?

¹⁷ Mah bianabia pathum in zeidah kan i cawn khawh? Pakhatnak, Baibal kan cawnpiakmi cu zeitluk rangin ṭhangcho seh tiah kanmah nih kan ti kho lo ti kha kan hngalhthiam a hau. Mah kha Jehovah kut ah kan ap. Pahnihnak, kan sinah aa pummi le kanmah he Baibal a cawngmi dihlak nih Jehovah biak an duh lai tiah i ruahchan cu aa tlak lomi a si. A donghnak ah, unau cheukhat nih Jehovah an kaltak men lai nain an rak kir ṭhan lai tiah kan i ruahchannak kha zeitikhmanh ah kan hlawt awk a si lo. An rak kir ṭhan tikah Jehovah dawtnak kha i zohchunh in cohlang hna u sih.

¹⁸ Kan dihlak in hngalhnak, hngalhthiamnak le fimnak kha kawl zungzal hna u sih. Jesuh chimmi bianabia na rel tikah hitin i hal: ‘Mah bianabia hi zei sullam dah a ngeih? Zeicah Baibal ah ṭial a si? Mah hi zeitindah ka zulh khawh? Mah bianabia in Jehovah le Jesuh kong zeidah ka hngalh?’ Cutin kan tuahnak thawngin Jesuh chimmi bia a sullam kan hngalh kha kan langhter khawh.