‘Lam kha a Hngalh’
JEHOVAH TEHTE HNA i Uktu Bu chungtel a simi Guy Hollis Pierce cu kum 79 a si, 2014, March 18, Nihnih ni ah vawleicung a nunnak a dih. Anih cu Khrih unau a si caah a thoṭhan cang i vancung laksawng a hmuh cang.—Heb. 2:10-12; 1 Pit. 3:18.
Guy Pierce cu 1934, November 6 ah U.S.A., California peng, Auburn khua ah a chuak i 1955 ah tipil a ing. 1977 ah a dawtmi Penny he an i um i chungkhar an dirh. Guy Pierce cu midang tampi ca zongah pa bantuk a si. 1982 ah Penny he hmaikal an ṭuanṭi. 1986 thawkin United States ah kum 11 chung peng zohkhenhtu a ṭuan.
1997 ah Guy Pierce le Penny cu United States Bethel chungkhar mi an hung si. Unaupa Pierce cu Rianṭuannak Department ah a ṭuan. 1998 ah Uktu Bu i Rianṭuantu Kawmiṭi bawmh awkah rian pek a si. 1999, October 2 ah tuahmi rian kong meeting ah Guy Pierce cu Uktu Bu chungtel in rian pek a si tiah an thanh. Nai kum hna ah Unaupa Pierce cu Rianṭuantu, Caṭialnak, Cauk Chuahnak le Khuakhangtu Kawmiṭi ah rian a ṭuan.
Unaupa Pierce cu a mithmai a panh i capo a thiam. Hnulei sining le nunphung aa dangmi mi tampi cu a sin an um tikah an i nuam. A hleiin dawtnak, toidornak, Pathian nawlbia le phunglam upatnak le Jehovah cungah a fekmi zumhnak a ngeih caah mi nih an dawt tukmi a si. Guy Pierce nih Jehovah biakam tlin lo nakin cun ni chuah lo hmanh hi a fawi deuh lai tiah a chim tawn, cutin a si kha vawleicung pumpi hngalhter a duh hna.
Unaupa Pierce cu rian aa zuam tukmi a si, zingka tein zan tlaipi tiang rian a ṭuan tawn. Unau pawl thapek awkah vawleicung pumpi ah khual a tlawng. Bawmhnak a herhmi le ruahnak a halmi hna he caan hmangṭi kho lo tiangin a rian aa tamter lo. A dawtnak, a hawikomhnak le thlaraulei thapeknak kha unau pawl nih kum tampi hnu tiang an i cinken.
Kan unau le dawtmi hawikom Pierce kha a nupi, a fale paruk, a tule, a tuchin hna le thlaraulei a fale tampi nih an ngai tuk lai. Uktu Bu chungtel a simi Mark Sanderson nih 2014, March 22, Zarhte ni ah Brooklyn Bethel ah Unaupa Pierce caah ruakvui phungchimnak kha a chim. Unaupa Pierce ngeihmi vancung ruahchannak kong kha a chim i Jesuh chimmi mah bia hi a rel: “Ka Pa inn chungah cun khaan tampi a um ko. . . . Ka va kal lai i nan ca i ka va timh hnuah ka ra kir ṭhan lai i ka sinah kaan lak hna lai, cun ka umnak ah nannih zong nan um ve lai. Ka kalnak ding hmun phaknak lam cu nan hngalh ko.”—Johan 14:2-4.
Unaupa Pierce kha kan ngai tuk lai. Asinain zungzal a umnak hmun kalnak ‘lam kha a hngalh’ caah kan i lawm.