1, 2. (a) Zeitindah zungzal nunnak kan hmuh khawh? (b) Kan khualtlawnnak in lam pial lo awkah zeinihdah a kan bawmh khawh?

KHRIHFA kan hung si tikah khualtlawn aa thawhmi bantuk kan si. Pathian cungah zumhfek tein kan um ahcun kan tlawn duhnak hmun kan phan lai i zungzal nunnak kan hmu lai. Jesuh nih “a dongh tiangin a fekmi cu khamh an si lai” lai tiah a ti. (Matt. 24:13) Kan khualtlawnnak kan liim khawh nakhnga ‘a dongh tiang’ Pathian cungah zumhfek tein kan um a hau. A dongh tiang ti tikah kan thih tiang asiloah hi vawlei ṭhalo a dongh tiang kha a si. Asinain hi vawlei ruangah lungvaivuanh lo awkah kan i ralrin a hau. (1 Johan 2:15-17) Kan khualtlawnnak in lam pial lo awkah zeinihdah a kan bawmh khawh?

² Jesuh nih kan caah zohchunhawk ṭha bik a chiah. Jesuh nunning kong Baibal chimmi kan hlathlainak thawngin Jesuh cu zei bantuk minung dah a si ti kha kan hngalh lai. Cun Jesuh kha kan dawt lai i kan zumh lai. (1 Piter 1:8, 9 rel.)  Jesuh nih a keneh zulh awkah zohchunhawk a kan chiahpiak tiah lamkaltu Piter nih a ti. (1 Pit. 2:21) Jesuh kha kan i zohchunh ahcun a dongh tiang zumhfek tein kan um kho lai. * A hmasa capar ah Jesuh ngeihmi toidornak le zaangfahnak i zohchunh khawhning kong kan i ruah cang. Hi capar ah Jesuh ngeihmi ralṭhatnak le thleidan khawhnak i zohchunh khawhning kong kan i ruah lai.

3. Ralṭhatnak timi cu zeidah a si, mah kha zeitindah kan ngeih khawh?

³ Ralṭhatnak timi cu harnak inkhawh awkah thazaang a kan ngeihter khotu le a kan bawm khotu intuarnak kha a si. Ralṭhatnak nih a hmaanmi thil runven awk zongah a kan bawmh. Cun harnak ton tikah lungdai tein um awk le Pathian cungah zumhfek tein um awkah a kan bawmh. Ralṭhatnak cu ṭihnak, ruahchannak le dawtnak he aa pehtlaimi a si. Zeitin in dah? Pathian lungton lai lo kha kan ṭih ahcun minung ṭihnak nih a kan tei lai lo. (1 Sam. 11:7; Ptb. 29:25) Jehovah i ruahchannak nih kan tonmi harnak si loin hmailei ruahchannak tu biapi chiah awkah a kan bawmh. (Salm 27:14, NW) Mahzawn ruat lo dawtnak nih hremnak ton tik hmanhah ralṭhatnak ngeih awkah a kan forh. (Johan 15:13) Pathian i bochannak le a Fapa i zohchunhnak thawngin ralṭhatnak kan ngei kho.—Salm 28:7.

4. Jesuh nih biakinn ah zeitindah ralṭhatnak a langhter? (A hramthawknak hmanthlak zoh.)

⁴ Jesuh cu kum 12 a si lio hmanhin a hmaanmi thil kha ralṭha tein a rak ṭanpi cang. ‘Biakinn chungah cawnpiaktu Judah mi hna sin a rak ṭhut’ lioah zeidah a cang ti kha ruathmanh. (Luka 2:41-47 rel.) Mah cawnpiaktu hna cu Moses Nawlbia ṭha tein a hngalmi an si lengah Judah phunglam a hngalmi zong an si. Mah phunglam hna nih Nawlbia kha zulh awkah a harmi a siter. Mah cawnpiaktu hna cu Nawlbia a hngal tukmi an si ko nain Jesuh cu an sinah biachim ngam loin a um lo. Ṭih loin ‘bia tu a rak hal len hna.’ Asinain a halmi hna cu ngakchia pawl hal tawnmi bia pawl a si lo. Khua a ruahtermi, a thukmi bia pawl an si. Cawnpiaktu hna nih Jesuh kha bia-alnak a chuahter khomi biahalnak hna tuah in fawih rak i zuam hna hmanh sehlaw an hlawh a tling lai lo. Cawnpiaktu hna telin a bia a ngaimi dihlak cu “a fimning le a bia lehning ah khan an khuaruah a har ko.” Jesuh nih Baibal biatak kha ralṭha tein a runven.

5. Jesuh nih phung a chim lioah zeiti lam hna in dah ralṭhatnak a langhter?

⁵ Jesuh nih phung a chim lioah ralṭhatnak kha lam a phunphun in a langhter. Tahchunhnak ah, biaknaklei hruaitu hna nih a hmaanlomi cawnpiaknak kha hmangin a ping ah mi an hruaimi hna kha ralṭha tein a langhter. (Matt. 23:13-36) Mah lengah vawleicung i ziaza rawhralnak huham ṭhalo zong nih a iap kho lo. (Johan 16:33) Ralchanhnak a ton buin thawngṭha a chim zungzal. (Johan 5:15-18; 7:14) A hmaanmi biaknak a thurhnawmhtermi hna kha biakinn in voihnih tiang ralṭha tein a ṭhawl hnanak thawngin biakinn kha a thenh.—Matt. 21:12, 13; Johan 2:14-17.

6. Jesuh nih vawleicung a nunnak a donghnak ni ah zeitindah ralṭhatnak a langhter?

⁶ Vawleicung a nunnak a donghnak ni  ah Jesuh langhtermi ralṭhatnak kha i ruah hna u sih. Judas nih a ka rawi hnuah zeidah a cang lai ti kha Jesuh nih a hngalh. Cutin a si ko nain Lanhtak rawl an ei lioah Jesuh nih Judas kha “na tuah ding cu khulrang in tuah ko” tiah a ti. (Johan 13:21-27) Mah hnu, Gethsemane dum i an um lioah Jesuh nih amah tlaih awk i a rami ralkap pawl sinah aho a si kha ralṭha tein a chim. A nunnak ca ṭihnung a si lio hmanhah a zultu hna kha a huhphenh hna i “a dang tu hi cu kalter hna u” tiah ralkap pawl kha a ti hna. (Johan 18:1-8) A hnu, Judah biaceihnak zungpi ah biahal a si tikah Jesuh nih Khrih a si le Pathian Fapa a si kha ralṭha tein a chim. Tlangbawi ngan nih amah thah awkah a ruang a kawl ko nain a ṭih lo. (Mar. 14:60-65) Jesuh cu tung cung i a thih tiang Pathian cungah zumhfek tein a um. Hmanung bik a thaw a chuah laite ah “aa lim cang” tiah a ti.—Johan 19:28-30.

7. Mino hna, Jehovah Tehte nan simi kha zeitindah nan hmuh, ralṭhatnak nan ngeih kha zeitindah nan langhter khawh?

⁷ Jesuh ralṭhatnak kha zeitindah kan i zohchunh khawh? Sianginn ah. Mino hna, nan khaan hawi le midang sinah Jehovah Tehte nan si kha nan chim ahcun ralṭhatnak nan ngeih a si. Serhsatnak nan ton hmanhah cutin nan tuahnak thawngin Jehovah min in auh nan simi nan i uanthlarpi kha nan langhter. (Salm 86:12, rel.) * Sianginn ah thlennawnnak zumh awkah hneknak nan tong men lai. Asinain sernak kong Baibal chimmi cu a hmaan ti kha nan zumh. “Ruahchannak nan ngeihmi kong” hngalh a duhmi hna kha Thilnung Pawl Hi Sermi An Si Maw? [Kawl] timi brochure hmangin nan chimh khawh hna. (1 Pit. 3:15) Cutin nan tuah ahcun Baibal biatak ralṭha tein nan runvenmi kha nan hngalh lai i lungsinak nan hmu lai.

8. Ralṭha tein phungchim awk a sinak zei a ruang hna dah kan ngeih?

⁸ Phungchimnak ah. A hmaanmi Khrihfa a simi nih “Bawipa kong kha ralṭha ngaingai” in kan chim zungzal a hau. (Lam. 14:3) Zeicah ralṭha tein phung kan chim khawh? Pakhatnak, kan chimmi thawngṭha cu Baibal ah a ummi biatak a si. (Johan 17:17) Pahnihnak, ‘kannih cu Pathian rianṭuanṭi hawi’ kan si i Pathian nih a thiang thlarau in a kan bawmh. (1 Kor. 3:9, NW; Lam. 4:31) Pathumnak, Jehovah le kan minung hawi kha kan dawt hna, mah nih kan si khawh chungin thawngṭha chim awkah a kan forh. (Matt. 22:37-39) Kan ral a ṭhat caah phungchim kha kan ngol lai lo. An lungthin a ‘muimi,’ phundang cun biaknaklei hruaitu hna i hlennak a tongmi hna kha biatak cawnpiak awkah bia kan khiak. (2 Kor. 4:4) Mi nih kan chimmi thawngṭha an cohlan duh lo asiloah an kan hrem hmanhah kan chim zungzal lai.—1 Thes. 2:1, 2.

9. Harnak kan ton tikah zeitindah ralṭhatnak kan langhter khawh?

⁹ Harnak ton tikah. Pathian kan i bochan ahcun harnak inkhawh awkah a herhmi zumhnak le ralṭhatnak kan ngei lai. Kan dawtmi nih a kan thihtak tikah kan ngaih a chia tuk, asinain ruahchannak kan ngeihmi cu a tlau lo. “Zeizong vialte ah a kan bawmtu Pathian” nih thazaang a kan pek lai ti kha kan zumh  khawh. (2 Kor. 1:3, 4; 1 Thes. 4:13) Kan zawt asiloah kan i khawnden tikah a fak ko lai, asinain Pathian duh lomi zei bantuk siithlopning paoh kan hrial. (Lam. 15:28, 29) Lungdong in kan um caan ah ‘kan lung nih sual a kan phawt’ ko nain kan hnabei cu a dong lo. ‘Lung a dongmi hna a umpitu,’ Jehovah kha kan i bochan. *—1 Johan 3:19, 20; Salm 34:18.

10. Thleidan khawhnak timi cu zeidah a si, thleidan khawhnak a ngeimi Khrihfa pakhat nih zeitindah bia a chim i thil a tuah?

¹⁰ Thleidan khawhnak timi cu a ṭhami le a ṭhalomi thleidan khawh le a ṭhami i thim khawh kha a si. (Heb. 5:14) Thleidan khawhnak a ngeimi Khrihfa pakhat nih Pathian he an i pehtlaihnak a fehter hngami biakhiahnak a tuah. A biachim nih midang lung a fahter hna nakhnga lo aa ralring. Thazaang petu a simi bia kha thim in a chim caah Jehovah lung a lawmhter. (Ptb. 11:12, 13) ‘Fawi tein a thin a hung lo.’ (Ptb. 14:29, NW) “A hmaanmi thil” kha a tuah, mah cu a nunchung vialte a ṭhami biakhiahnak a tuah tinak a si. (Ptb. 15:21) Zeitindah thleidan khawhnak a ngeimi kan si khawh? Baibal hlathlai a hau i kan hngalhmi zulh a hau. (Ptb. 2:1-5, 10, 11) Cun thleidan khawhnak a ngeimi Jesuh kong kha hlathlai in i zohchunh a hau.

11. Jesuh nih a biachim in zeitindah thleidan khawhnak a langhter?

¹¹ Jesuh nih a biachim le a tuahsernak in thleidan khawhnak kha a langhter. A biachim. Jesuh nih thawngṭha a chim tikah bia dawhdawh a hman, mah nih a ngaitu vialte kha an khuaruah a harter hna. (Matt. 7:28; Luka 4:22) Baibal kha a rel asiloah a cherhchan lengmang. Zei bantuk thil sining ah zei Baibal cang dah hman ding ti kha a hngalh. (Matt. 4:4, 7, 10; 12:1-5; Luka 4:16-21) Mah lengah Jesuh nih Cathiang sullam a fiantermi nih a theimi hna kha an lung a suk tuk hna. Tahchunhnak ah, Jesuh nih a thawhṭhan hnuah Emmaus khua ah a kalmi zultu pahnih kha bia a ruah hna i amah he aa pehtlaimi Cathiang sullam kha fiang tein a chimh hna. Mah zultu hna nih a hnuah hitin an chim: “Lampi i bia a kan ruah le Cathiang sullam a kan chimh ah khan kan chungah mei kang bang a si lo mei kha?”—Luka 24:27, 32.

12, 13. Jesuh cu thinhunlei ah a khul a nuarmi a si le a tlarimi a si kha zei tahchunhnak hna nih dah an langhter?

¹² A intuarnak le a lungput. Thleidan khawhnak nih Jesuh kha “thinhunlei ah a khul a nuarmi” a siter. (Ptb. 16:32) A intuarnak aa uk khomi a si i mi “nunnem” a si. (Matt. 11:29) A zultu hna cu palhnak an tuah tawn ko nain an cungah a lung a sau zungzal. (Mar. 14:34-38; Luka 22:24-27) A ding loin pehtlaih a si tik hmanhah lungdai tein a um.—1 Pit. 2:23.

 ¹³ Thleidan khawhnak nih Jesuh kha a tlarimi a siter. Moses Nawlbia chuah a sinak a ruang kha a hngalhthiam i mah cu mi a pehtlaih hnaning cungah huham a ngei. Tahchunhnak ah, “thichuahnak” in a zawmi nu kong kha ruathmanh. (Marka 5:25-34 rel.) Minu cu mibu lakah a kal, Jesuh puan kha a va tawngh i a dam. Nawlbia ningin cun anih cu thiang lo a si i ahohmanh a tawngh hna awk a si lo. (Lev. 15:25-27) Asinain Jesuh nih minu kha bia fakfak in a ti lo. Zeicah? “Zaangfahnak le zumhtlakmi sinak” ti bantuk ziaza hna cu Nawlbia a dikthliar in zulh nakin a biapi deuh ti kha a hngalhthiam caah a si. (Matt. 23:23) Cucaah Jesuh nih minu kha hitin nem tein a ti: “Ka fanu, na zumhnak nih aan damter cang. Dai tein va kal law na zawtnak cun va dam ko cang.” Jesuh ngeihmi thleidan khawhnak nih zaangfahnak langhter awkah a forhmi cu cinken awk tlak taktak a si.

14. Jesuh nih zei rian dah aa thim, phungchim rian kha zeitindah lungthin a pek zungzal khawh?

¹⁴ A nunning. Jesuh nih a nunning in thleidan khawhnak a ngeih kha a langhter. Thawngṭha chimnak rian kha a nunchung ṭuan dingmi rian ah aa thim. (Luka 4:43) Mah rian ah lungthin pek awk le liim awkah a bawmmi biakhiahnak zong a tuah. Tahchunhnak ah, a caan le a thazaang kha phungchimnak ah a hman khawh nakhnga nunning sawhsawh tein a nung. (Luka 9:58) A thih hnuah phungchim rian ṭuan khawh a si zungzal nakhnga midang cawnpiak a herh ti kha a hngalh. (Luka 10:1-12; Johan 14:12) Cun phungchimnak ah “caan dongh tiangin” kaan bawmh hna lai tiah a zultu pawl kha bia a kamh hna.—Matt. 28:19, 20.

15. Kan biachim ah zeitindah thleidan khawhnak kan langhter khawh?

¹⁵ Jesuh ngeihmi thleidan khawhnak kha zeitindah kan i zohchunh khawh? Kan biachim. Unau pawl he bia kan i ruah tikah lung a donghtermi bia si loin thazaang a pemi bia tu kan chim. (Efe. 4:29) Midang sinah Pathian Pennak kong kan chim tikah kan bia cu “ngaih a nuammi le a ṭhami a si awk a si.” (Kol.  4:6) Mi nih zeidah an herh ti le zei kong dah hngalh an duh ti kha hngalhthiam awkah kan i zuam, mah hnuah chim dingmi kha ṭha tein kan thim. Bianem kan hman ahcun mi nih ngaih an duh lai i kan chimmi thawngṭha nih an lung a suk hna lai. Mah lengah kan zumhnak kong kan fianter tikah a si khawh tik caan paohah Jehovah bia a simi Baibal in kan relpiak hna. Kan chim khawhmi zei bantuk bia nak hmanhin Baibal bia cu hmual a ngei deuh ti kha kan hngalh.—Heb. 4:12.

16, 17. (a) Thinhunnak ah a khul a nuarmi kan si le a tlarimi kan si kha zeitindah kan langhter khawh? (b) Zeitindah phungchim rian ah lungthin kan pek zungzal khawh?

¹⁶ Kan intuarnak le kan lungput. Thleidan khawhnak nih hneknak kan ton tikah kan intuarnak i uk khawh awk a kan bawmh i ‘thinhunnak leiah a khul a nuarmi’ a kan siter. (Jeim 1:19) Mi nih kan thin an kan hunter tikah zeicah hitin an chim asiloah an tuah ti hngalhthiam awkah kan i zuam. Mah tikah ngaihthiam awkah kan i fawih deuh i an cungah kan thin a hung lo. (Ptb. 19:11) Thleidan khawhnak nih a tlarimi zong a kan siter. Unau pawl sinin tlinnak kha kan i ruahchan lo. Mah canah ṭha tein kan hngalhthiam lomi buaibainak an ngei kho ti kha kan i cinken. An ruahnak an chimmi kha ngaihpiak kan duh hna. Kanmah duhning in tuah awkah hnek loin a si khawh tik caan paohah an duhnak kha kan zulh hna.—Fil. 4:5.

¹⁷ Kan nunning. Thawngṭha chimnak cu a sunglawi bikmi tinvo a si ti kha kan hngalh. Cucaah phungchim rian ah lungthin pek zungzal awk a kan bawmmi biakhiahnak kan tuah. Kan nunnak ah Jehovah kha pakhatnak ah kan chiah. Donghnak a rat hlanah thawngṭha chimnak ah kan caan le kan thazaang tam deuh in kan hman khawh nakhnga nunning sawhsawh tein kan nung.—Matt. 6:33; 24:14.

18. Zungzal nunnak lam ah zeitindah kan kal zungzal khawh, zei tuah awkah dah bia na khiah?

¹⁸ Jesuh ngeihmi sining ṭha lak i cheukhat kong i ruah cu a nuam tuk. A dang a sining hna kan hlathlai tik le amah i zohchunh khawhning kong kan hun hngalh chin tikah zeitlukin dah ṭhatnak kan hmuh lai kha ruat. Cucaah Jesuh i zohchunh awkah bia khiak hna u sih. Cutin kan tuah ahcun zungzal nunnak lam ah kan kal kho zungzal lai i Jehovah he kan i naih chin lai.