2013, April 28 ah Japan ram, Nagoya khua ah tuahmi special pumhnak ah Uktu Bu chungtel a simi Anthony Morris nih lungthawh awk ngai a simi thawng a thanh. Japan holh in Baibal—Matthai Thawngṭha Cauk timi cauk thar chuah a si tiah a thanh. Cuka ah aa pummi le video in a zohmi cu an dihlak ah 210,000 an si. Aa pummi cu mah thawngthanhnak an theih tikah an i lawm tuk i an kut saupi in an bengh.

Mah Matthai Thawngṭha cauk cu Vawlei Thar Lehnak Baibal in an lak i an chuahmi a si. Asinain cahmai 128 a ummi mah cauk cu aa thleidang. Mah cu Japan mi hna bawmhnak caah chuahmi a si tiah Unaupa Morris nih a fianter. Mah cauk i aa thleidannak cu zeidah a si? Zeicah a herh? Mi nih zeitindah an lehrulh?

Matthai cauk aa ṭialning ruangah mi cu an khuaruah a har. Japan ca cu a pheilei in siseh a tunglei in siseh ṭial khawh a si. Kan cauk pawl telin cauk tampi cu a pheilei in ṭial a si. Asinain Japan thanhca le a dang ca tampi bantukin Matthai cauk cu a tunglei in ṭial a si. Japan mi tampi nih a tunglei in ṭialmi kha rel an i fawih deuh. Cun a cunglei ah ṭial tawnmi biatlangpi kha biatlang tete phun in ca a lai ah ṭial a si. Cucaah a biapimi kong kha fawi tein hmuh khawh a si.

Japan unau hna nih Matthai cauk kha an rel colh. Kum 80 leng a si cangmi unaunu nih hitin a ti: “Matthai cauk kha a hlanah voi tampi ka rak rel bal. Asinain atu bantukin a tunglei in ṭial a simi le biatlang tete nih Tlang Cung Cawnpiaknak kha hngalhthiam chin awkah a ka bawmh.” Mino unaunu nih hitin a ṭial: “Matthai cauk kha voikhatte ah ka rel dih. A pheilei in ṭialmi ca kha ka rel lengmangmi a si nain Japan mi tampi nih cun a tunglei in ṭialmi kha an duh deuh.”

Mah cauk cu Japan mi hna caah zeicah man a ngeih khun? Japan mi tampi nih Baibal kong an hngal setsai lo nain rel cu an duh. Baibal a rak hmu bal lomi tampi cu atu ah Baibal ṭhenkhat an ngei kho cang i an rel khawh cang.

Zeicah Matthai cauk cu thim a si? Japan mi tampi nih “Baibal” timi biafang an theih tikah Jesuh Khrih kha an lung ah a chuak. Cucaah Jesuh chuahkehnak le hrin a sinak kong, a min a thangmi Tlang Cung Cawnpiaknak le ni hmanung bik caan he aa tlaimi chimchungbia kong aa ṭialnak Matthai cauk cu thim a si. Mah kong hna cu Japan mi hna nih hngalh an duhmi a si.

Japan i thawngthanhtu hna nih mah cauk kha innkhat hnu innkhat ah le lennolh tuahnak ah lungtho tein an pek hna. Unaunu pakhat nih hitin a ṭial:  “Sang i a ummi hna sinah Pathian Bia chiah awkah caanṭha tam deuh ka hmu cang. A tak ti ah cun special pumhnak a dih hnu zanlei bak ah khan Matthai cauk ukkhat mi ka pek khawh colh.”

Thawngthanhtu hna nih mah cauk thar kha zeitindah mi an pek hna? Japan mi tampi nih “kutka bi,” “nan lungvar cu vok hmaiah va thla hlah u” timi le “thaizing kongah lungrethei in um hlah u” ti bantuk bia kha an hngalh. (Matt. 6:34; 7:6, 13) Mah bia hna cu Jesuh Khrih bia a si ti an hngalh tikah an khuaruah a har. Matthai chungah mah bia pawl an hmuh tikah “Baibal kha voikhat tal cu rel ka rak duh zungzalmi a si” tiah mi tampi nih an ti.

Thawngthanhtu hna nih Matthai cauk a cohlangmi an len ṭhan hna tikah tlawmpal kan rel colh asiloah a dihlak in kan rel colh tiah an ti tawn hna. Kum 60 leng a simi pa nih thawngthanhtu pakhat kha hitin a ti: “Mah cauk hi voi tampi ka rel i mah in hnemhnak ka hmu. Zaangfahnak in Baibal kong tam deuh in rak ka chim.”

Matthai cauk kha zapi lak phungchimnak zongah an pekṭhenh hna. Unaunu pakhat nih mah cauk a cohlangmi nu kha a e-mail address a pek. Suimilam pakhat a rauh tikah mah nu nih unaunu kha ca a kuat, Matthai cauk kha tlawmpal ka rel cang i tam deuh in hngalh ka duh tiah a ti. Zarhkhat a rauh hnuah mah nu cu Baibal a cawng i tlawmpal ah a hun i pum.

Japan ram i Khrihfabu hna sinah Matthai cauk uk 1,600,000 leng kuat a si cang. Unau pawl nih thla fatin uk thong tampi mi an pek hna. Matthai cauk biahmaiṭhi ah “mah cauk relnak nih Baibal kong hngalh duhnak aan ngeihter chin hna lai tiah kan i ruahchan” tiin a chuahtu hna saduhthah kha a langhter.