THAWNGṬHA chimnak cu tuchan vawleicung ah ṭuanmi rian lakah a biapi bikmi a si. Mah rian ṭuannak in Jehovah kan aiawh khawhmi cu tinvo sung a si. Asinain a caan ah hmaikal le thawngthanhtu hna nih phungchimnak i an lungthawhnak kha hmunhter awkah an i harh men lai. Zeicah?

Inn ah mi an um lo caah thawngthanhtu cheukhat cu innkhat hnu innkhat phungchimnak ah mi he bia an i ruah kho setsai men lai lo. Inn ah mi an um hmanhah Pennak kong thawngṭha kha an ngai duh men lai lo, asiloah kan cungah an thin hmanh a hung kho men. Thawngṭha ngaih a duhmi hna an umnak lohmun kaupipi ah a ummi thawngthanhtu cheukhat cu mi vialte sinah kan chim kho hnga maw tiin an lungre a thei. Phungchimnak ah caan saupi aa tel cangmi thawngthanhtu hna cu donghnak a rat rih lo caah an lung a dong.

Phungchimnak ah kan lungthawhnak a zorter khomi harnak kan tong ko lai. Kannih cu “mi ṭhalopa,” Satan Khuachia nih a ukmi vawlei ah kan um caah thawngṭha chim cu a har lai ti kha kan i ruahchan ciami a si.—1 Johan 5:19.

Phungchimnak ah zei bantuk harnak na ton hmanhah Jehovah nih tei awkah aan bawmh lai kha na zumh khawh. Asinain phungchimnak ah na lung a thawh chin nakhnga zeidah na tuah khawh? Ruahnak cheuhnak cheukhat kha i ruah hna u sih.

Kum fate mi thong tampi cu Jehovah Tehte pakhat in tipil an ing. Nang cu tipil a ingkami na si ahcun kum tampi chung phung a chim cangmi hna sinin thil tampi naa cawn khawh. Asiloah nang cu kum tampi chung thawngthanhtu a si cangmi na si ahcun mithar pawl kha na bawm kho hna lai maw? Cutin na tuah ahcun lungsi hnangamnak na hmu lai.

Zultu pawl cu phungchim a thiammi an si nakhnga lamhruainak an herh ti kha Jesuh nih a hngalh. Cucaah phungchimning a cawnpiak hna.  (Luka 8:1) Tuchan zongah mithar pawl cu phungchim a thiammi an si nakhnga cu bantuk cawnpiaknak an herh ve.

Thawngthanhtu thar pakhat cu phungchim a kal ca men ah zeitin phungchim ding a si timi a thiam tiah kan ruah awk a si lo. Zaangfahnak le dawtnak a ngeimi unau pakhat sinin cawnpiaknak a herh. (1) Inn-ngeitu sin chim dingmi i timhtuahning le tuahchunhning, (2) mi he bia i ruahning, (3) cauk pekṭhenhning, (4) lungthawhnak a ngeimi lennolh tuahning le (5) Baibal cawnpiaknak thawk khawhning kha hmuhtonnak a ngeimi thawngthanhtu nih mithar a cawnpiak a herh. Hmuhtonnak a ngeimi thawngthanhtu cawnpiakmi kha thawngthanhtu thar nih ṭha tein a zoh i aa zohchunh ahcun anih zong phungchim a thiammi a hung si kho. (Luka 6:40) Thawngthanhtu thar nih ka herh caan i bawmh awkah pakhatkhat cu timhcia tein a um ti a hngalh ahcun a ral a ṭha deuh lai. Thangṭhatnak le ruahnak cheuhnak zong nih thawngthanhtu thar kha a bawmh khawh.—Pct. 4:9, 10.

Inn-ngeitu he bia i ruah awkah fakpi in naa zuam ko nain a caan ah cun cutin na tuah kho men lai lo, na kalṭi hawi he tu bia tam deuh nan i ruah kho men lai. Jesuh nih a zultu hna kha phungchim awkah “pahnih pahnih in” a thlahmi hna kha i cinken. (Luka 10:1) Phungchim an kalṭi tikah pakhat le pakhat tha an i pe kho i an i forh kho. Phungchimnak ah unau pawl he kan kalṭi tikah ‘pakhat le pakhat i bawmhnak’ caanṭha kan hmu.—Rom 1:12.

Na kalṭi hawi he zei kong dah nan i ruah khawh? Nai ah nan tonmi thazaang a pemi hmuhtonnak kong nan i chim kho. Pumpak Baibal hlathlainak asiloah chungkhar pumhnak ah nan cawnmi lungthawh awk ngai a simi kong nan i chim kho. Pumhnak ah nan theihmi thazaang a pemi a kong pakhatkhat nan i chim kho. A caan ah a kong ṭha tein na hngalh lomi thawngthanhtu he phungchim nan kalṭi men lai. Mah tikah zeitindah biatak na rak hngalh tiin le mah hi Jehovah bupi a si ti kha zeinihdah aan zumhter tiin na hal khawh. A ngeihmi tinvo sung le a hmuhtonnak kong kha na hal khawh. Nangmah na hmuhtonnak zong na chimh khawh. Phungchimnak ah zei bantuk lehrulhnak na ton hmanhah unau pakhat he phungchim nan kalṭimi nih ‘pakhat le pakhat thazaang i peknak’ caanṭha aan ngeihter khawh hna.—1 Thes. 5:11.

Phungchimnak i kan lungthawhnak hmunhter awkah pumpak Baibal hlathlainak kha ṭha tein tuah  a herh. “Zumhawk a tlakmi le a fimmi sal” nih kan hlathlai khawhmi a kong tampi a kan chuahpiak. (Matt. 24:45) Pumpak Baibal hlathlainak ah kan hlathlai khawhmi a kong pakhat kha i ruah hna u sih: Mah cu zeicah phungchim rian hi a biapit tuk? timi a si. “ Phungchimnak ah Zeicah Lungtho tein i Tel a Herh?” timi rinli kulh nih a biapitnak a ruang cheukhat a langhter.

Rinli kulh chungah aa ṭialmi a kong tete hlathlainak nih lungtho tein phungchim zungzal awkah aan forh lai. Lungtho tein phungchim awk a sinak a ruang dang hna zong kawl law hlathlai. Mah hnuah mah a ruang hna kha ṭha tein ruat. Cutin na tuah ahcun phungchimnak ah na lung a tho chin lai.

Jehovah bupi nih phungchimnak ah ṭhancho khawhning kha ruahnak a kan cheuh lengmang. Tahchunhnak ah, innkhat hnu innkhat phungchimnak lengah cakuat in le phone in phungchimnak, lamcung asiloah mi an tamnak hmun i phungchimnak, tonsaphak phungchimnak le rianṭuannak hmun ah phungchimnak ti bantuk zong kan tuah khawh. Cun Jehovah Tehte tlawmpal lawng an umnak asiloah an um lonak hmun i phungchim awk zongah kan i tim kho.

Phungchimning thar kha tuah chunh na duh maw? Cutin a tuah chunhmi tampi cu an hlawh a tling. Tahchunhnak pathum hi zohhmanh.

April timi unaunu nih Baibal cawnpiaknak thawk khawhning he aa tlaiin Kannih Pennak Rianṭuannak capar i ruahnak cheuhnak kha zulh awkah bia a khiah. A rianṭuan hawi pathum kha Baibal cawnṭi awkah a sawm hna. An pathum ningin an cohlan i an hun i pumh caah April cu a khuaruah a har tuk i aa nuam tuk.

 Kan mekazin chung i capar pakhatkhat kha ahote nih dah rel an duh lai timi ruah awk zongah forh kan si. United States i peng zohkhenhtu pakhat nih ṭaya kong aa ṭialmi I Hlau! capar kha hmun pakhat ah a ummi ṭaya dawr vialte i manager hna kha a pek hna. Cun “Siibawi te Hngalhthiamnak” timi I Hlau! kha a nupi he siibawi 100 leng i zungkhaan ah an pek hna. Cutin kan tuah caah mi nih phungchim rian kong le kan cauk pawl kong an hun hngalh tiah unaupa nih a chim. Sang i a ummi hna kong an hun hngalh deuh tikah an nuva in lennolh tam deuh an hmu.

Judy timi unaunu nih phone in phungchim awkah na kan forh caah kaa lawm tuk tiah zungpi ah ca a ṭial. A nu cu kum 86 a si cang i a dam lo tuk nain phone in phung a chim zungzal, atu ah cun kum 92 a simi nu pakhat he Baibal cawnpiaknak an thawk khawh cang tiah a chim.

Kan cauk chung i ruahnak cheuhnak hna cu man an ngei taktak. Cucaah zulh i zuam. Mah nih phungchimnak ah i nuamh awk le lungthawh zungzal awkah aan bawmh lai.

Zeinihdah phungchimnak ah kan hlawh a tlinter? Mah cu cauk pa zeizat dah mi kan pek khawh hna, Baibal cawnpiaknak pa zeizat dah kan ngeih ti le Jehovah Tehte si awkah mi pa zeizat dah kan bawmh hna timi cungah aa hngat lo. Noah kong kha ruathmanh. Noah nih a chungkhar hlei ah Jehovah biak awkah mi pakhat tal a bawm kho hna maw? A bawm kho hna lo. Asinain anih cu phungchimnak ah a hlawh a tling tiah ti khawh a si. Cucaah a biapimi cu zumhawktlak tein Jehovah biak kha a si.—1 Kor. 4:2.

Phungchim rian ah lungthawhnak ngeih awkah a tlarimi hmuitinh ngeih a herh ti kha thawngthanhtu tampi nih an hmuh. Cu bantuk hmuitinh cheukhat cu zeidah an si? “ A Tlarimi Hmuitinh Ngei” timi rinli kulh ah hmuitinh cheukhat aa ṭial.

Phungchim rian ah sullam ngei tein i tel awk le hlawhtlin awkah Jehovah sinah bawmhnak hal. Na hmuitinh na phanh tikah phungchimnak ah na tuah khawhmi zeipaoh na tuah kha na hngalh lai i lungsi hnangamnak na hmu lai.

Thawngṭha chim cu a har lai ti cu a hmaan ko. Asinain phungchimnak ah na lung a thawh nakhnga na tuah khawhmi a um ko. Phungchim na kalṭi hawi he bia i ruah u, pumpak Baibal hlathlainak kha hmaan tein le sullam ngei tein tuah, zumhawk a tlakmi le a fimmi sal i ruahnak cheuhnak kha zul law a tlarimi hmuitinh ngei. A biapi bikmi cu Jehovah Pathian nih a Tehte pakhat in thawngṭha chimnak tinvo sung aan pekmi kha i cinken. (Isa. 43:10) Phungchimnak ah na lungthawhnak kha na hmunhter zungzal ahcun lunglawmhnak nganpi na hmu lai.