‘Bawipa ah a Ummi he Lawng i Ṭhium’ U—Zulh awkah aa Tlak rih Maw?
“Khrihfabu chungah innchunghawi kaa hmuh lo, keimah lawng tar thluahmah lai hi ka ṭih tuk.”
“A lengmi pa cheukhat cu zaangfahnak an ngei, duh an nung i mi dawt an thiam. Ka biaknak zong an khengkham lo i unaupa cheukhat nak hmanhin Pathian a duh deuhmi an lo.”
Nupi, va a ngei lomi Pathian salle cheukhat nih cutin an chim. Jehovah nih a salle kha ‘Bawipa ah a ummi he lawng,’ phundang cun a hmaanmi Khrihfa he lawng i ṭhium hna seh ti a duh ti kha an hngalh. (1 Kor. 7:39, NW) Cu a si ah Khrihfa cheukhat nih zeicah cutin an chim?
Mi Cheukhat An Lung a Hrinnak a Ruang
Cutin a chimmi Khrihfa hna nih unaupa nakin unaunu an tam deuh tiah an ruah men lai. Ram tampi ah cutin a si taktak. Tahchunhnak ah, Korea ah innchunghawi a ngei lomi unau 100 ah 57 cu nu an si i 43 cu pa an si. Colombia ah innchunghawi a ngei lomi unau 100 ah 66 cu nu an si i 34 cu pa an si.
Hmun cheukhat ah Jehovah Tehte a si lomi nulepa nih an fanule an hal hna tikah man tampi an hauh hna asiloah a man a fakmi laksawng an hal hna. Tlangval unaupa cheukhat nih mah kha an pe kho men lai lo. Mah ruangah unaunu cheukhat nih vat awkah Khrihfa unaupa kan hmu kho hnga maw tiah an lungre a thei. *
Jehovah i Bochan a Herh
Nang zong cu bantuk ruahnak na ngeih ahcun na sining le na intuarmi Jehovah nih a dikthliar in a hngalh kha na zumh khawh.—2 Chan. 6:29, 30.
Asinain Baibal ah Jehovah nih Bawipa ah a ummi lawng ṭhit, vat awkah nawl a kan pek. Zeicah? Kan caah a ṭha bikmi kha a hngalh i huhphenh a kan duh caah a si. Kan lung a fahtermi le kan ngaih a chiattermi, a ṭhalomi biakhiahnak tuahter a kan duh lo. Nehemiah chan ah Judah mi tampi nih Jehovah a bia lomi nu kha an ṭhit hna. Cucaah Nehemiah nih Solomon kong in ralrin a pek hna. Hitin a ti hna: “Pathian nih a dawt i Israel mi vialte cungah cun siangpahrang ah a ser; sihmanhsehlaw amah hmanh cu ramdang minu hna nih an sualter ko.” (Neh. 13:23-26) Jehovah nih ralrin a kan pekmi cu kan caah a ṭhami a si ti kha a hngalh, cucaah Bawipa ah a ummi lawng ṭhitum awkah a kan fial. (Salm 19:7-10; Isa. 48:17, 18) Dawtnak aa telmi le bochan awk a tlakmi lamhruainak a kan pek caah kan i lawm tuk. Jehovah kha a kan Uktu in kan cohlan ahcun zeidah tuah ding timi chimhnak nawl a ngeimi in kan cohlan a si.—Ptb. 1:5.
‘Aa ruang lomi hngawngkual’ phorh na duh lai lo, phundang cun Jehovah a bia lomi he i ṭhitum kha na duh lai lo. Cu bantuk mi nih Jehovah na biaknak kha aan ngolter khawh. (2 Kor. 6:14, NW) Pathian ruahnak cheuhnak cu a ṭhami a si zungzal. Tuchan Khrihfa tampi nih Jehovah nawl ngaih awkah fim ngaiin an i thim. Asinain cheukhat tu nih cun cutin an i thim lo.
Zulh awk a Tlak rih Ko
Australia ah a ummi unaunu Maggy cu a hmaanmi Khrihfa a si lomi pakhat he an i duh. * Hitin a chim: “Mah pa he i ton awkah pumhnak voi tampi ka bau. Thlaraulei ah ka der thluahmah.” India ah a ummi a dang unaunu Ratana cu Baibal a cawngmi a khaan hawi pakhat he an i duh. Asinain mah pa cu amah he i duh khawh awkah Baibal a cawnmi a si. A hnuah Ratana cu Jehovah a bia ti lo i mah pa he i um khawh awkah biaknak dang ah a lut.
Cameroon ah a ummi Denka cu kum 19 a si ah Jehovah a bia lomi pa he an i um. An i um hlanah cun Jehovah Tehte na si kho ko lai tiah bia a kamh. Asinain an i um zarh hnih hnuah a pumhter duh ti lo. Denka nih hitin a chim: “Keimah lawng ka li a leng i ka ṭap. Ka nunnak keimah tein kaa uk ti lo kha ka hun hngalh. Kaa ngaichih tuk.”
Khrihfa cheukhat i an innchunghawi cu Jehovah a biami an si lo nain zaangfahnak a ngeimi le a tlarimi an si ti cu a hmaan ko. Jehovah a bia lomi na innchunghawi cu zaangfahnak a ngeih hmanhah Jehovah he nan i pehtlaihnak kha zeitindah a hnorsuan? Nangmah ṭhatnak caah Jehovah nih ruahnak aan cheuhmi na ngaih lo caah zeitindah na um? A biapi bikmi cu na tuahsernak ruangah Jehovah cu zeitindah a um lai?—Ptb. 1:33.
‘Bawipa ah a ummi he lawng i ṭhium u’ timi Jehovah lamhruainak zulh cu a ṭha bikmi biakhiahnak a si ti kha vawleicung pumpi i unau hna nih an hngalh. Innchunghawi a ngei rih lomi unau hna cu Jehovah a biami he lawng i ṭhitumnak thawngin Jehovah lung lawmhter awkah bia an khiak. Japan ah a ummi Michiko cu a chungkhat nih Jehovah a daw lomi he i um awkah an hnek nain Jehovah nawl tu ngaih awkah bia a khiak. A hawile cheukhat cu a hmaanmi Khrihfa hna he an i um cang nain anih cu innchunghawi a ngeih rih lo caah a ngaih a chia. Hitin a chim: “Jehovah cu ‘aa nuammi Pathian’ a si caah kan i nuamhnak cu nupi, va kan ngei maw, ngei lo timi cungah aa hngat lo tiah keimahle keimah kaa ti lengmang. Cun kan lung duhnak a tlinter lai ti zong ka zumh. Cucaah ṭhitum kan duh nain aa tlakmi kan hmuh lo ahcun kan hmuh tiang mah lawngin um cu a ṭha bikmi a si.” (1 Tim. 1:11, NW) A hnuah Michiko cu unaupa pakhat he an i um i Jehovah lamhruainak a rak zulh caah aa nuam tuk.
Aa tlakmi innchunghawi an hmuh hlan lo a hngakmi unaupa cheukhat zong an um. Tahchunhnak ah, Australia ah a ummi Bill nih a caan ah Jehovah Tehte a si lomi nu pawl kha ka rak duh hna tiah a ti. Asinain zumlotu he ‘aa ruang lomi hngawngkual’ phorh a duh lo caah anmah he i komh tuk kha a hrial. Cun unaunu cheukhat zong a rak duh ko hna nain an duh lo. Kum 30 a hngah hnuah amah he an hmuitinh aa khatmi Khrihfa unaunu he an i um. Hitin a chim: “Zeihmanh kaa ngaichih lo. Phungchim kan kalṭi, Baibal kan hlathlaiṭi i kan i pumhṭi caah kaa nuam tuk. Ka nupi a hawile zong Jehovah a biami lawngte an si caah kan i ton i kan i hawikomh hna tikah kaa nuam tuk. Kan innchungkhar a nuamh nakhnga kan pahnih in Baibal phunglam kan zulh.”
Jehovah Hngah Lioah
Jehovah lamhruainak naa bochan i amah a biami innchunghawi na kawl lioah zeidah na tuah khawh? Nupi, va na ngeih lonak a ruang kha na ruah khawh. Mah cu Jehovah nawlbia zulh na duh caah a si ahcun mah nih Jehovah lung a lawmhter lai ti kha na zumh khawh. (1 Sam. 15:22; Ptb. 27:11) Cun Jehovah sinah thla cam zungzal law na intuarmi taktak kha chim. (Salm 62:8) Lemsoinak le a ṭhalomi duhnak kha na si khawh chungin na doh ahcun Jehovah he nan i pehtlaihnak cu nikhat hnu nikhat a fek chin lai. Nang cu Jehovah caah a sunglawimi na si caah Jehovah nih na duhnak le na herhmi aan hngalhpiak ti kha na zumh khawh. Jehovah nih nupi asiloah va kaan pek hna lai tiah ahohmanh bia a kamh hna lo. Asinain innchunghawi ngeih cu na caah a herh taktakmi a si ahcun Jehovah nih na herhmi tlinter awkah a ṭha bikmi lam kha a hngalh.—Salm 145:16; Matt. 6:32.
A caan ah hitin a chimmi David bantukin na intuar ve men lai: “BAWIPA, atu ah ka let ko sawh, ruahchannak zeihmanh ka ngei ti lo! Ka thuh tak hlah.” (Salm 143:5-7, 10) Asinain na lung dong hlah. Jehovah nih zeidah aan duhpiak timi langhter awkah Jehovah kha a caan pe. Baibal relnak in le na relmi thukpi in ruahnak thawngin Jehovah bia kha ngai. Mah nih Jehovah halmi le hlanlio a salle a rak bawmh hnaning hngalh awkah aan bawmh lai. A bia na ngaihnak thawngin a nawlbia zulh zungzal awkah a herhmi zumhnak na ngei kho lai.
Nupi, va a ngei lomi Khrihfa hna cu chungkhar pawl le ngakchia pawl an bawmh hnanak thawngin Khrihfabu ah a sunglawimi an si
Nungak, tlangval si lioah i nuamh zungzal awk le rian tam awkah zeidah na tuah khawh rih? Jehovah he nan i pehtlaihnak kha na fehter khawh i min ṭha ngeih awkah naa zuam kho. Cun a siangmi, rian aa zuammi le komh a fawimi si awk le Jehovah cung zumhfek tein um awkah naa zuam kho. Mah sining hna chungkhar nuamhnak caah a herhmi an si. (Gen. 24:16-21; Ruth 1:16, 17; 2:6, 7, 11; Ptb. 31:10-27) Cun phungchimnak le Khrihfabu ah na rian a tamnak thawngin Pennak kha pakhatnak ah chia. Mah hna nih a ṭhalomi biakhiahnak tuah lo awkah aan bawmh lai. Bill nih tlangval a rak si lio caan kong kha hitin a chim: “A caan cu chikkhat te ah a liam. Ka caan kha hmaikal ṭuannak ah ka hman.”
‘Bawipa ah a ummi he lawng i ṭhium’ u timi Jehovah nawlbia cu chan nih a kaltak cangmi asiloah zulh awkah aa tlak ti lomi a si lo. A hmaanmi Khrihfa he lawng kan i ṭhitumnak thawngin Jehovah kha kan thangṭhat khawh i kanmah theng zong kan i nuam lai. Baibal nih hitin a ti: “BAWIPA cu thangṭhat u! BAWIPA a ṭihmi cu mi lunglawm an si. A nawlbia zulh a nuam in a theimi cu mi lunglawm an si. An innchungkhar hna cu an rum an lian lai i khua awng an pem zungzal lai.” (Salm 112:1, 3) Cucaah ‘Bawipa ah a ummi he lawng i ṭhium’ u timi Pathian nawlbia zulh awkah bia khiak.
