1, 2. (a) Donghnak caan he aa tlaiin Jesuh nih zeidah a chim? (b) Zei biahalnak hna dah kan i ruah hna lai?

OLIVE Tlang cungah ṭhu in Jerusalem biakinn a cuanmi Jesuh kha na mitthlam ah cuanter hmanh. A sinah lamkaltu Piter, Andru, Jeim le Johan zong an um ve. Jesuh nih hmailei ah a cang hngami lungthawh awk ngai a simi kong a chimmi kha ṭha tein an ngaih. Mah chimchungbia nih Pathian Pennak ah Jesuh uktu a si tik, hi vawlei ṭhalo donghnak caan chungah zeidah a cang lai ti kha a langhter. Lungthawh awk ngai a simi mah caan chungah vawleicung ah amah aiawh in rian a ṭuan hngami “zumhawk a tlakmi le a fimmi sal” a um lai, mah sal nih a zultu pawl kha a caan hmaan tein thlarau rawl a pek hna lai tiah Jesuh nih a chim.—Matt. 24:45-47.

² Mah chimchungbia ṭhiamṭhiam ah Jesuh nih ngaknu pahra bianabia kong a chim. (Matthai 25:1-13 rel.) Hi capar  ah mah biahalnak hna hi kan i ruah hna lai: (1) Mah bianabia nih a bikin a langhter duhmi cu zeidah a si? (2) Mah bianabia i ruahnak cheuhnak kha zumhfekmi chiti thuhmi hna nih zeitindah an zulh, zei ṭhatnak dah a chuak? (3) Jesuh chimmi bianabia in tuchan ah zei ṭhatnak dah kan hmuh khawh?

3. Hlanah kan cauk nih ngaknu pahra bianabia kha zeitindah a rak fianter, zeidah a cang kho?

³ Nai kum hrawngah zumhawktlak sal nih Baibal tuanbia cheukhat fianter ning a thlenmi kong kha a hmasa capar in kan hngalh cang. Atu ah zumhawktlak sal nih Baibal tuanbia nih zeidah a aiawhmi a si khawh men timi kha biapi ah chia ti loin kan i cawn khawhmi tu kha biapi ah a chiah. Tahchunhnak ah, Jesuh chimmi ngaknu pahra bianabia kong hi ruathmanh. Kan cauk nih meiinn, zinan le thawl nih thil pakhatkhat asiloah mi pakhatkhat a aiawh tiah a rak fianter. Cutin a neknok tiangin biapi ah kan chiah ahcun a fiangmi le a biapimi a kong a tlau kho maw? Mah a phi hngalh cu a biapi tuk.

4. (a) Bianabia chung i nupi ṭhi tlangval cu ahodah a si, mah kha zeitindah kan hngalh khawh? (b) Ngaknu cu ahote dah an si, mah kha zeitindah kan hngalh khawh?

⁴ Jesuh chimmi bianabia nih a bikin a langhter duhmi kha i ruah hna u sih. Pakhatnak ah, ngaknu pahra bianabia ah aa telmi hna kong kha ruathmanh. Nupi ṭhi tlangval cu ahodah a si? Jesuh a si. A hmasa deuh ah Jesuh nih amahle amah kha nupi ṭhi tlangval ka si tiah aa ti caah kan hngalh khawh. (Luka 5:34, 35) Ngaknu cu ahote dah an si? Chiti thuhmi Khrihfa a simi “tuurun hmete” an si. Zeitindah kan hngalh khawh? Bianabia chungah ngaknu hna cu nupi ṭhi tlangval a rat tikah meiinn kha vang in timhcia tein an um a hau. Jesuh nih chiti thuhmi a zultu pawl a chimhmi hna hi zohhmanh: “Zei thil paoh tlung ai kun, tiin nan taisawm kha fek tein i sawmh le nan meiinn kha i van in ralring tein um u; nupi ṭhitnak puai in a ra ṭinmi an bawipa a hngak i . . . timhcia tein a rak ummi a sal hna bantuk khan um u.” (Luka 12:32, 35, 36) Lamkaltu Paul le Johan zong nih chiti thuhmi Khrih zultu hna kha ngaknu thiang he an tahchunh ve hna. (2 Kor. 11:2; Biat. 14:4) Cucaah Matthai 25:1-13 i ruahnak cheuhnak le ralrin peknak cu chiti thuhmi Jesuh zultu hna he aa pehtlai ti kha kan hngalh khawh.

5. Jesuh nih a chimmi bianabia cu zei caan he dah aa pehtlaih ti kha zeitindah a langhter?

⁵ Pahnihnak ah, Jesuh ruahnak cheuhnak cu zei caan he dah aa pehtlaih? Bianabia a donghnaklei i Jesuh chimmi nih a phi hngalh awkah a kan bawmh. Hitin a chim: “Nupi ṭhi tlangvalpa cu a rak phan.” (Matt. 25:10)  Matthai dal 24 le 25 i chimchungbia ah Jesuh ‘ratnak’ asiloah ‘phanhnak’ timi kha voiriat kan hmuh tiin 2013, July 15, Vennak Innsang ah kan i ruah cang. Jesuh nih a ‘ratnak’ kong a chim tikah hi vawlei ṭhalo biaceih awk le hrawh awkah harnak nganpi chung i a rat lainak caan kong kha a chimduhmi a si. Cucaah Jesuh chimmi bianabia cu donghnak caan he aa pehtlai tiah ti khawh a si, asinain Jesuh cu harnak nganpi chungah a ra te lai.

6. Bianabia nih a bikin a langhter duhmi cu zeidah a si?

⁶ Mah bianabia nih a bikin a langhter duhmi cu zeidah a si? Baibal i a cung tang bia kha ruathmanh. Matthai dal 24 ah Jesuh nih “zumhawk a tlakmi le a fimmi sal” kong a chim. Mah sal cu donghnak caan chungah Khrih zultu pawl a hruai hngami chiti thuhmi phu hmete a si lai. Jesuh nih mah pa hna kha zumhfek tein um awkah ralrin a pek hna. Matthai dal 25 ah donghnak caan ah a nungmi chiti thuhmi a zultu vialte ralrin pek awkah ngaknu pahra bianabia kha Jesuh nih a chim. A chimduhmi cu vancung laksawng an sungh nakhnga lo “ralring tein um” awkah a si. (Matt. 25:13) Atu mah bianabia kong le ralrin peknak kha chiti thuhmi hna nih zeitindah an zulh timi kong i ruah hna u sih.

7, 8. (a) Ngaknu fim hna cu zeicah timhcia tein an um? (b) Chiti thuhmi hna cu zeitindah an i timhchung?

⁷ Bianabia chungah ngaknu fim hna cu ngaknu hrut hna he i lo loin nupi ṭhi tlangval a rat tikah timhcia tein an um timi kha Jesuh nih a langhter khun. Zeicah? Annih cu an i timchung i ralring tein an um caah a si. Ngaknu pahra ningin hliphlau tein an um a herh i zan ah an meiinn kha an alhter peng a hau. Ngaknu hrut hna he i lo loin ngaknu fim panga cu meiinn lawng si loin zinan a hlei in an i putnak thawngin an i timchung. Zumhfekmi chiti thuhmi hna cu Jesuh ratnak caah zeitindah an i timhchung?

⁸ Chiti thuhmi hna cu a dongh tiang an rian ṭuan khawh awkah an i timchung. Annih nih Pathian rian ṭuan awkah Satan vawlei in hmuh khawhmi thilri chawva hna hlawt a hau lai ti kha an hngalh, asinain cutin lungtho tein an hlawt. Zumhfek tein Jehovah rian ṭuan awkah bia an khiak, mah cu donghnak caan a naih caah si loin Jehovah le a Fapa an dawt hna caah a si. Zumhfek tein an um i vawlei thilri chawva, ziaza rawhralnak le mahzawn ruahnak lungput nih a hnorsuang kho hna lo. An meiinn i put in timhcia tein a ummi ngaknu fim hna bantukin chiti thuhmi hna cu nupi ṭhi tlangval rauh ding a lawh hmanhah lungsau tein an hngah i an ceu zungzal.—Fil. 2:15, 16.

9. (a) Ngutnak he aa tlaiin Jesuh nih zei bantuk ralrin peknak dah a chim? (b) “Nupi ṭhi tlangval cu a ra cang” timi au thawng kha chiti thuhmi hna nih zeitindah an lehrulh? (A tanglei fianternak zong zoh.)

 ⁹ Ngaknu fim hna cu ralring tein an um ca zongah nupi ṭhi tlangval a rat tikah timhcia an si. Asinain bianabia chungah a raumi a lomi nupi ṭhi tlangval an hngah lioah ngaknu pahra ningin “an ngu i an i hngilh.” Cu a si ah tuchan chiti thuhmi Khrihfa hna cu “an i hngilh” kho maw, phundang cun Khrih a rat an hngah lioah an lung a vaivuan kho maw? A vaivuan kho. Lungthawhnak a ngeimi hmanh a ratnak a hngah lioah a tha a der kho i a lung a vaivuan kho ti kha Jesuh nih a hngalh. Cucaah zumhfekmi chiti thuhmi Khrihfa hna cu ralring tein um awkah fak chinchin in an i zuam. Zeitin in dah? Bianabia chungah ngaknu pahra ningin “nupi ṭhi tlangval cu a ra cang” timi au thawng kha an lehrulh. Asinain ngaknu fim hna lawng ralring tein an um. (Matt. 25:5, 6; 26:41) Cu bantukin donghnak caan chungah zumhfekmi chiti thuhmi hna nih “nupi ṭhi tlangval cu a ra cang” timi au thawng kha an lehrulh ve. Jesuh a ra cang lai ti a langhtermi thil kha an cohlan i a ratnak caan caah timhcia tein an um. * Atu ah caan caan khat kong a langhtermi Jesuh chimmi bianabia i a donghnak kha i ruah hna u sih.

10. Ngaknu fim hna le ngaknu hrut hna bia an i ruahnak he aa tlaiin zei bia dah kan hal khawh men?

¹⁰ Bianabia a donghnak leiah ngaknu hrut hna nih ngaknu fim hna kha zinan an hal hna. Asinain ngaknu fim nih an pe hna lo. (Matthai 25:8, 9 rel.) Cucaah mah bia hi kan hal khawh men: Zumhfekmi chiti thuhmi hna nih bawmh a herhmi kha zeitikah dah an bawmh hna lo? Bianabia nih a sawh duhmi caan kong kha ruathmanh. Nupi ṭhi tlangval a simi Jesuh cu harnak nganpi a donghnak leiah biaceih awkah a ra lai. Cucaah bawmhnak an halmi hna cu harnak nganpi a dongh lai te ah a si men lai. Zeicah cutin kan chim khawh? Chiti thuhmi hna cu mah caan ah hmanung bik hmelchunhnak pek an si cang caah a si.

11. (a) Harnak nganpi aa thawk laite ah zeidah a cang lai? (b) Ngaknu fim hna nih ngaknu hrut hna kha va kal u law zinan vaa cawk u an timi hna cu zei sullam dah a si?

¹¹ Harnak nganpi aa thawk hlanah vawleicung i zumhfekmi chiti thuhmi vialte cu hmanung bik hmelchunhnak an hmu lai. (Biat. 7:1-4) Mah caan thawkin annih cu vancung ah an kai lai ti a fiang lai. Asinain harnak nganpi aa thawk hlan caan kong kha ruathmanh. Ralring tein a um lomi le zumhawktlak lo a hung simi chiti thuhmi hna cu zeidah an ton lai? Annih cu hmanung bik hmelchunhnak an hmu lai lo. Cucaah mah caan ah a dang zumhfekmi Khrihfa hna cu chiti thuh an si lai. Harnak nganpi aa thawk i a Liannganmi Babilon a rawhmi an hmuh tikah a hrutmi hna  cu an lau tuk lai. Mah tik lawngah Jesuh ratnak caah timhcia an si lo kha an i hngalh men lai. Mah caan ah bawmhnak an hal hna tikah zeidah a cang lai? A phi kha bianabia ah kan hmuh. Ngaknu fim hna nih ngaknu hrut hna kha zinan an pe duh hna lo i va kal u law vaa cawk u ti tu in an ti hna. “Zanṭim pi” a si cang caah ahohmanh nih an zuarh duh hna lo. A tlai tuk cang.

12. (a) Chiti thuhmi a rak si ko nain hmanung bik hmelchunhnak pek hlanah zumhawktlak lo a hung simi hna cu harnak nganpi chungah zeidah an ton lai? (b) Ngaknu hrut bantuk a simi hna nih zeidah an ton lai?

¹² Harnak nganpi chungah zumhfekmi chiti thuhmi hna nih zumhawktlak lo a hung simi hna kha an bawm kho ti hna lai lo. A tlai tuk cang. Cu a si ah zumhawk a tlak lomi hna cu zeidah an ton lai? Zinan cawk ah a kalmi ngaknu hrut hna nih an tonmi hi ruathmanh: “Nupi ṭhi tlangvalpa cu a rak phan. Timhcia tein a ummi ngaknu panga hna cu nupi ṭhit rawldanghnak chungah khan amah sinah cun an lut i innka kha an khar.” Harnak nganpi a dongh lai ah Jesuh cu sunparnak he a rat tikah zumhfekmi chiti thuhmi hna kha vancung ah a pumh hna lai. (Matt. 24:31; 25:10; Johan 14:1-3; 1 Thes. 4:17) Asinain Jesuh nih zumhawk a tlak lomi vialte kha a hlawt dih hna lai. Annih nih ngaknu hrut hna bantukin “Bawipa, bawipa, innka hung kan hunh tuah” tiah an ti men lai. Mah tikah Jesuh nih zeitindah a leh hna lai? Meheh bantuk a simi a leh hna ningin “kaan hngal hrimhrim hna lo” tiah a leh ve hna lai.—Matt. 7:21-23; 25:11, 12.

13. (a) Chiti thuhmi Khrih zultu tampi cu zumhawktlak lo an hung si lai tiah zeicah ti awk a si lo? (b) Jesuh nih chiti thuhmi Khrihfa a zumh hna kha ngaknu pahra bianabia nih zeitindah a langhter? (A hramthawknak hmanthlak zoh.)

¹³ Jesuh nih chiti thuhmi tampi cu zumhawktlak lo an hung si lai i airolh an hau te lai tiah a chimduhmi a si maw? A si lo. Matthai dal 24 chungah Jesuh nih zumhawk a tlakmi le a fimmi sal kha sal ṭhalo si lo awkah ralrin a pekmi kan hmuh. Mah cu sal ṭhalo a hung si lai tiah aa ruahchan tinak a si lo. Cu bantukin ngaknu pahra bianabia zong hi ralrin peknak a si ve. Ngaknu panga cu an hrut i panga cu an fim bantukin chiti thuhmi Khrihfa pakhat cio nih i timhtuah in ralring tein kan um lai maw asiloah zumhawktlak loin dah kan um lai ti kha an i thim a herh ve. Paul nih chiti thuhmi unau hna sinah cu bantuk ralrin peknak a rak chim. (Hebru 6:4-9 rel; Deuteronomi 30:19 he tahchunh.) Hlangfang tein ralrin a pek ko hna nain chiti thuhmi unau pawl nih an laksawng an hmuh lai ti zong a zumh. Ngaknu pahra bianabia ralrin peknak nih chiti thuhmi hna cungah Jesuh nih cu bantuk zumhnak a ngeih kha a langhter. Cun chiti thuhmi a salle pakhat cio cu zumhfek tein an um kho i an laksawng an hmu kho ti kha Jesuh nih a hngalh.

14. Ngaknu pahra bianabia in “tuudang” hna cu zeicah ṭhatnak an hmuh khawh?

¹⁴ Jesuh chimmi bianabia cu chiti thuhmi Khrihfa hna he aa pehtlaimi a si. Asinain Jesuh chimmi bianabia in “tuudang” tah ṭhatnak an hmu maw? (Johan 10:16) An hmu. Bianabia nih a bikin a langhter duhmi cu “ralring tein um ko u” timi a si. Jesuh nih hitin a chim: “Nan sin ka chimmi hi mi dihlak sin i ka chim a si: Hngilh loin hngak ko u.” (Mar. 13:37) Jesuh nih a zultu dihlak kha timhcia tein le ralring tein umter a duh hna. An nunnak ah phungchim rian pakhatnak ah a chiami chiti thuhmi Khrihfa hna kha Khrihfa dihlak nih kan i zohchunh khawh hna. Ngaknu hrut hna nih ngaknu fim hna kha zinan an hal hna ti kha i cinken. Asinain annih cu pek an si lo. Mah nih Pathian cungah zumhfek tein um awk, i timhtuah awk le ralring tein um awk ti cu pakhat cio cungah aa hngat ti kha a kan hngalhter. Mah kha ahohmanh nih an kan tuahpiak kho lai lo. Kan dihlak in a rauhhlan ah a ra laimi, a dingmi Biaceihtu Jesuh Khrih nih bia a kan ceih lai. Cucaah timhcia tein kan um a hau.

15. Khrih le a monu ṭhitumnak cu Khrihfa dihlak caah zeicah lungthawh awk ngai a si?

¹⁵ Jesuh chimmi bianabia ah langhtermi ṭhitumnak he aa tlaiin Khrihfa dihlak cu an lung a tho. Hmailei, Armageddon raltuknak a dih hnuah chiti thuhmi Khrihfa hna cu Khrih i a monu an hung si lai. (Biat. 19:7-9) Vawleicung ah a ummi vialte cu mah vancung ṭhitumnak in ṭhatnak an hmu lai. Zeicah? Mi vialte caah a tlingmi cozah a umter lai caah a si. Vancung ruahchannak a ngeimi kan si ah, vawleicung ruahchannak a ngeimi kan si ah i timhtuah chung awk le ralring tein um awkah bia khiak hna u sih. Cutin kan tuah ahcun Jehovah nih a kan timhpiakmi, a ṭha tukmi hmailei ruahchannak kha kan hmuh lai.